Uncategorized

Dili, atu prevene numeru asidente trafiku aumenta, Komando Polísia Nasional Timor Leste (PNTL) munisipiu Baukau kontinua hala’o aktividade cek point ba motorizada no karreta.

Komandante PNTL munisipiu Baukau, Superintendente Justino Menezes hafoin partisipa iha misa Selebrasaun loron Santo António iha Kuartel Jerál Kaikoli (22/06) hateten, oras ne’e dadaun numeru asidente iha munisipiu Baukau menus ona kompara ho fulan kotuk.

“Operasaun kona-ba cek point ba transporte públiku, motorizadas no karreta estadu lao nafatin tanba ne’e asidente iha Baucau redus ona”, tenik Komandante PNTL Munisipiu Baucau.

Superintendente ne’e informa tan katak, aktividade cek point ne’ebe hala’o iha loron Sabadu no Dominggo foka liu ba iha motor no karreta Estadu ne’ebe laiha Karta Autorizasaun Servisu, maibé uja hodi halo fali aktividade privadu iha fim de semana, nune’e parte Polísia prende no halo relatorio ba iha ninia Ministeriu kompetente atu prosesa.

Resultadu husi aktividade cek point ne’e, durante besik fulan 5 prende ona motor no transporte públiku kuaje 500 no karreta estadu kuaje 20, no total osan ne’ebe motorista sira ne’ebe halo infrasaun hodi selu multa, hamutuk $6000 no osan hirak ne’e hatama ba kofre estadu.

Kestiona kona-ba situasaun seguransa iha munisipiu Baucau Komandante ne’e haktuir katak, situasaun seguransa públika iha munisipiu Baucau lao kontroladu nune’e aktividade Komunidade Estadu no Relijioju lao normal iha seim impedimentu ruma no iha kolaborasaun servisu entre komunidade, veteranus, intelektuais no estadu ba iha servisu polisia munisipiu Baucau nian.

Media PNTL.

Dili- Familia bo’ot Polisia Nasional Timor-Leste (PNTL) hamutuk konvidadus sira seluk iha 22 de Junu de 2016, selebra loron Santo Antonio nudar Padrueru PNTL liu husi misa ne’ebe prezidi direita husi Bispo Diocese Dili MGR. Virgilio do Carmo da Silva,SDB.

Bispo Diocese Dili MGR. Virgilio do Carmo da Silva,SDB iha ninia homilia husu ba PNTL atu fiel ba lema PNTL ne’ebe dehan ‘Servir e Protejer’.

Bispo Diocese Dili salienta liu tan katak“Pontus inportante atu PNTL bele aplika lema ne’e maka tenki iha Komunikasaun, Empatia, Integridade, Profesionalismu no Korajen. PNTL iha abilidade atu hatudu empatia la to’o rona ho simpatia deit, la rona ho tilun deit maibe rona ho atensaun, rona ho fuan no iha mos abilidade atu hatudu integridade no abilidade atu hatudu profesionalismu no abilidade atu hatudu korajen laos atu halo buat ne’ebe boot no situasaun difisil deit.”

Iha okajiaun ne’e Komandante Jeral PNTL Komisariu Polisia Julio da Costa Hornay hateten selebrasaun misa ba loron Santo Antonio ne’e ho objektivu atu fo agradesementu ba instituisaun PNTL no nia membrus tomak no mos agradesementu ba herois libertasaun da patria ne’ebe maka fornese sira nia vida tomak hodi sosa ukun rasik aan ida ne’e no mos ba membrus PNTL ne’ebe maka mate iha servisu laran.

Nia haktuir tan katak misa ida ne’e atu halo malirin buat kroat balu ne’ebe maka karik uluk ita uza iha servisu laran maka ladun halo los no buat ruma karik ita husu para halo malirin nune’e ba oin ita servisu ho situasaun ida ne’ebe maka hakmatek ho espiritu de korpu no espiritu de kamaradajen ne’ebe forte hadomi povu no atende povu ho justu, honestu no professional.

Nudar Mahein ba Instituisaun PNTL Santo Antonio proteje husi buat neebe aat, durante ne’e nia mos la toba, nia estatua mos la hela saugati deit iha ne’e maibe nia harohan nafatin ba instituisaun ne’e atu ema kontinua muda, transforma no konverte nia aan.

Misa Solene ne’ebe diriji husi Bispo Diocese Dili ne’e mos nudar misa Enseramentu Retiru Misericordia nebe hetan mos partisipasaun husi Ministru Interior Longuinhos Monteiru, Eis Segundu Komandante Jeral Komisariu Afonso de Jesus, Komandante munisipiu 13, Komandante Unidade, Sefe Departamentu, kombidadus no familia boot PNTL. Media PNTL

Dili, Komando Polisia Nasional Timor-Leste (PNTL ) munisipiu Dili, iha Segunda ne’e (13/06) komemora loron St. Antonio padrueru PNTL ho misa ne’ebe prezidi husi Amu Kapelaun Nelino Americo no akompaña husi amu Paskalis Patut O Carm no amu Aniceto Maia da Costa.

Iha ninia homilia, Padre Con selebrante Paskalis patut O carm apela ba membru PNTL atu labele uza sala armas ne’ebe maka iha, maibé uza hodi fó seguransa ba sosiedade.

“PNTL tenke servi povu no nasaun ho matenek, labele laran metin ba forsa fiziku, borgol no pistola wainhira hala’o nia knaar, tanba ne’e polisia tenke matenek no halai lais liu kriminoju sira“, hateten Padre Paskalis Patut O Carm iha selebrasaun misa refere.

Amo Con selebrante   informa tan katak, selebrasaun loron St. Antonio ba tinan ida ne’e diferente, tanba antes hala’o selebrasaun misa, hala’o mós aktividade Retiru ne’ebe maka amo Kapelaun hala’o ona iha munisipiusanulu resin ida falta Munisipiu Covalima ho Munisipiu Bobonaru.

Aktividade Retiru hanesan programa PNTL nian, ne’ebe maka halo ho nia objetivu atu ema idak-idak nu’udar kriatura Maromak nian hatene ninia a’an no komprende lolos oinsa lori ita nia fiar iha servisu loron-loron.

Iha okajiaun ne’e Adjuntu komandante PNTL munisipiu Dili Superintendente Assistente Euclides Belo hato’o agradese ba amu selebrante no amu konselebrante nain rua ne’ebe maka selebra loron St. Antonio nian hamutuk ho familia bo’ot PNTL iha Komando PNTL munisipiu Dili.

Santo Antonio moris tinan 36 deit no nia hanesan ema ida ne’ebe Santu liu iha istoria igreja Katólika no nia prosesu sai santo lais liu depois nia mate la to’o tinan ida (loron 352) deit nia sai santo, Santo Antonio koñesidu hanesan ema ne’ebe maka servisu maka’as to’o nia mate.

Misa solene ne’e partisipa husi Komandante Jerál PNTL, Komandante munisipiu Dili, Komandante Administrasaun, Xefe Departamentu Polisia Komunitariu, reprezentante ministeriu Saude, konvidadus no familia bo’ot PNTL.

Media PNTL.

Dili, Kinta-feira ne’e (09/06) Polísia Nasional Timor Leste (PNTL) liu husi Polísia Munisipiu Dili no Tránzitu halo sosializasaun no fahe informasaun kona-ba regras ka normas sinais tránzitu nian ba estudante Sekundaria Nobel da Paz, iha Quintal Bo’ot.

Segundu Komandante Munisipiu Dili Superintendente Assistente Euclides Belo ne’ebe representa Polísia Munisipiu Dili perante estudante sira, esplika uluk nanain kona-ba misaun no papel PNTL nian iha nasaun ida ne’e maka garante seguransa Interna rai ida ne’e nian.

“Misaun PNTL nian tuir ita nia Lei Konstitusional RDTL garante seguransa Interna nian, úniku instituisaun Estadu nian ida ne’ebe maka garante seguransa interna nian formalmente Lei fó dalan atu uja forsa hodi fó garante seguransa maka PNTL”, hateten Segundu Komandante Munisipiu Dili.

Superintendente Assistente ne’e mós subliña tan katak, PNTL maka garante máxima ita nia estabilidade maibé laos PNTL mesak, tenke iha apoio tomak husi komunidade no mós estudante sira hanesan futuru nasaun nian.

PNTL além de sai hanesan instituisaun Estadu nian ida ne’ebe maka garante seguransa interna, Segundu Komandante Munisipiu Dili ne’e akresenta tan katak, papel segundu husi PNTL nian maka kontrola seguransa tránzitu rodoviariu ne’ebe maka sai hanesan pontu esensial iha aktividade sosializasaun ida ne’e, atu nune’e estudante sira bele hatene atu oinsa lao tuir sinais no regras husi tránzitu rodoviariu nian.

“Infrasaun ne’ebe sidadaun hotu-hotu lori karreta no motor maka kontra regras sinais tránzitu nian maka sei kona multa, hanesan laiha xapa matrikula, laiha espellu no laiha lampu maka Polísia Tránzitu sei prende”, haktuir Superintendente Assistente Euclides Belo.

Iha fatin hanesan, diretor eskola Sekundaria Nobel da Paz Pedro Nunes agradese ba presensa no realizasaun aktividade refere husi Polísia Munisipiu Dili nian no mós Tránzitu hodi fahe informasaun sira ne’ebe bele fó benefisiu ba estudante sira atu hatene kona-ba regras ka normas tránzitu ninia.

Marka presensa iha aktividade ne’e, estudante sekundaria hamutuk ho professores no representante husi Polísia Tránzitu Munisipiu Dili.

Media PNTL.

Dili-Komandante Jerál PNTL Komisariu Polísia Julio da Costa Hornay partisipa enkontru painel iha Nova Yorke hodi informa kona-ba esperensia, hanoin no ideias kona-ba misaun ONU nian liu-liu ba area polísia nian.

“Objetivu vizita ne’e atu kumpri konvite husi Sekretariu Jerál Nasõens Unidas Banki Moon, ba Xefe Polísia iha mundu tomak atu ba tuir enkontru painel ida hodi informa kona-ba esperensia, hanoin no ideia kona-ba misaun ONU nian liu-liu ba area polísia nian no kooperasaun misaun ONU atu hamutuk foti planu ida ne’ebe diak liu atu nune’e bele responde ho diak misaun ONU nian iha nasaun konflitu sira, “dehan Komandante Jerál PNTL Komisariu Polísia Julio da Costa Hornay iha Salaun VIP AeroPortu Nicolau Lobato Comoro, Dili bainhira fila hikas mai Timor-Leste iha (07/06).

Komisariu Polísia ne’e haktuir tan katak, iha enkontru ne’e Timor-Leste sujere atu Implementa relatoriu kona-ba misaun Organizasaun Nasõens Unidas (ONU) ne’ebe maka hakerek husi painel independente ida ne’ebe maka ONU hari’i no lidera husi eis Prezidente Republika Dr.Ramos Horta hamutuk ema nain 50 resin tanba sira halo relatoriu ida ne’ebe diak tebes kona-ba misaun ONU nian ida ne’e maka ita sujere para ONU bele implementa.

Aliende ne’e, PNTL mós husu karik misaun ONU iha PNTL bele hetan oportunidade.,Timor-leste hanesan nasaun membru ONU tanba ne’e Misaun ONU iha Afrika no nasaun seluk sira sempre konvida PNTL.Tuir informasaun husi Komandante PNTL ne’e katak, la kleur ONU sei hili sekretariu Jerál foun, maske foun hanoin relatoriu ne’e bele aplika tanba iha asuntu importante iha painel ne’ebe maka ONU hari.

Vizita Komandante Jerál PNTL ba Nova Yorke ne’e, akomapaña husi Xefe Departamentu Justisa Superintendente Xefe Carlos Almeida Sousa Jeronimo, vizita ne’e hahu’u iha loron 30 fulan Maiu no fila hikas iha 07 de Junho 2016 ho aviaun Sriwijaya.

Media PNTL.

Dili, iha semana ne’e sei iha ro Mercy ne’ebe organiza husi militar Estadu Unidus Amerika (EUA) hamutuk ho Australia sei fó atendimentu mediku nian ba iha munisipiu Dili, hanesan iha Hospital Nasional Guido Valadares (HNGV) no mós iha Hospital Munisipiu Ermera.

Ro Mercy husi EUA ne’e tuir planu iha loron 6 sei destaka iha portu Dili hodi halo atendimentu mediku iha ro laran, ne’ebe maioria mediku sira ne’e husi militar EUA no Australia, Komando Polísia Nasional Timor Leste (PNTL) sei orienta Unidade Polísia Maritima (UPM) atu asegura ro ne’e durante ninia presensa iha Dili.

“Iha aktividades bo’ot ida, ro Mercy nian husi EUA ne’ebe hamutuk ho Australia, que sira mai ho mediku sira ne’ebe kuaze ema militar, entaun ida ne’e maka ami orienta ona, tanba sira sei mai halo atendimentu mediku ne’e iha fatin tolu além de iha ro laran rasik iha mós HNGV no mós iha Munisipiu Ermera”, hateten Segundo Komandante Jerál PNTL Komisariu Polísia Faustino da Costa hafoin hala’o enkontru semanal ho Komadante husi Munisipiu sira, iha segunda ne’e (06/06).

Tuir Komisariu Polísia ne’e katak, relasiona ho presensa ro ne’e maka parte Komando PNTL orienta ona Komando Operasional oinsa atu bele asegura aktividades ka eventu sira ne’e ho diak, inklui mós mediku PNTL sira nia envolvimentu hanesan mós Unidade Maritima.

Parte Komando PNTL, sei fokus atu orienta Unidade Maritima durante presensa ro ne’e, atu bele fó apoio atu bele transfere karik iha pasiente ne’ebe presija desloka husi ro mai rai maran nune’e mós husi rai maran desloka ba iha ro Mercy ne’e rasik. Além de ro ne’e rasik iha ona kondisaun hanesan preparasaun helikopturu rua maka sei halo viagem to iha Gleno munisipiu Ermera hodi tula mediku no pasiente sira.

Ro husi UPM nian sei fó apoio ba iha ro Mercy husi EUA no Australia ne’e, tanba ro ne’e rasik labele destaka besik iha portu Dili, nune’e parte UPM rasik hasai ona ordem atu bele prepara ro Polísia nian atu halo movimentu.

Media PNTL.

Dili– Atu garante seguransa ne’ebe diak ba povu no nasaun, governu tenke tau investimentu orsamentu ne’ebe bo’ot ba Instituisaun Polisia Nasional Timor-Leste (PNTL) hodi nune’e bele kompleta fasilidade no ekipamentus servisu nian.

Segundu Komandante Jerál PNTL Komisariu Polísia Faustino da Costa hateten, atu bele implementa planu hotu ne’ebe PNTL iha, presija hare’e mós ba iha alokasaun orsamentu no emvlope fiscal ne’ebe termina ba iha instituisaun ida ne’e.

“Maske PNTL iha planu barak atu kompleta ninia fasilidade no ekipamentus servisu nian maibe emvlope fiscal limita entaun tenke koa planu balu no hare prioridade balun deit tanba ne’e governu tenke tau investimentu ne’ebe boot ba instituisaun seguransa ne’e”, hateten Komisariu Polisia Faustino da Costa hateten iha nia knar fatin Sexta (03/06).

Reforsa tan katak Iha tinan 2017 sei realiza Elisaun Jerál, entaun PNTL tenke asegura kampaña no elisaun ho diak tanba ne’e presija kompleta ekipamentus hanesan Kasteti, Eskudu (TAMEN), Radio no ekipamentus seluktan ne’ebe maka relevante ho nesesidadae servisu seguransa nian.

Media PNTL.

Dili, Segunda-feira ne’e (06/06/2016) Komandante husi Munisipiu 13 inklui Komandante husi Unidades sira, halo enkontru semanal hodi apresenta numeru asidente ne’ebe akontese iha munisipiu hotu ba iha Komando PNTL.

Segundu Komandante Jerál PNTL Komisariu Polísia Faustino da Costa hafoin enkontru semanal ne’e hateten, objetivu husi realizasaun enkontru ne’e atu Komandante husi munisipiu sira apresenta relatoriu semanal kona-ba aktividades saida deit maka hala’o tiha ona iha semana kotuk, no mós aktividades ka eventu ne’ebe sei hala’o iha semana ne’e.

“Enkontru semanal ne’e bain-bain ita halo atu Komandante idak-idak inklui munisipiu Dili apresenta situasaun saida maka iha semana ida ne’e sira halo, sira nia atendimentu ne’e hanusa, iha kazu hira maka sira iha no mós prevensaun Komando nian kona-ba saida maka halo ona iha semana kotuk no semana ne’e ba oin ne’e”, hateten Komisariu Polísia Faustino da Costa perante Jornalista sira iha Kuartel Jerál Kaikoli, Dili.

Komisariu Polísia ne’e mós hatutan tan katak, em prinsipiu diskuti por exemplu iha munisipiu Dili apresenta kazu hanesan asidente iha Dili ne’e kontinua as nafatin, semana liu ba iha kazu hamutuk 26 maka rezista iha Komando munisipiu Dili, kauza husi asidente ne’e maioria tanba fatór ema umanu nian.

Além de kazu asidente ne’ebe maka Komando munisipiu Dili apresenta, iha mós kazu asaltu ne’ebe maka ofensas integrida fisika simples ruma ne’ebe mosu iha Dili laran, tuir dadus ne’ebe maka parte Komando munisipiu Dili rezista katak sei iha nafatin pertubarsaun balun, area balun ita nia joven balun kontinua lanu no halo problema hasoru joven seluk.

“Problema agora ita hasoru maka ne’e, labarik minoridade mós involve iha laran, entaun ida ne’e maka aproveita xefe departamentu sira hotu atu oinsa orienta sira nia atendimentu além de uza sistema Polísiamentu Komunitaria, oinsa bele sensibiliza no fahe informasaun ba ita nia joven sira”, akresenta Segundo Komandante Jerál PNTL ne’e.

Media PNTL.

Dili–Atu asegura servisu seguransa iha fronteira liu-liu hasoru krime importasaun veikulo, motorizada no sasan illegal, presija kontribuisaun komunidade no autoridade seguransa iha fronteira nune’e bele minimija krime ne’e.

Komandante Jerál em exercicio Komisariu Polisia Faustino da Costa hateten atu kombate no hamenus numeru krime ne’ebe maka akontese iha fronteira, PNTL ho ninia Postu no Unidade sira presija hetan kolaborasaun ne’ebe diak husi komunidade no autoridade iha parte fronteira ninia.

“Atu asegura servisu seguransa iha fronteira liu-liu hasoru krime inportasaun veikulo, motorizada no sasan illegal maka Postu Integradu ne’ebe mai husi PNTL Unidade Patrulamentu Fronteira(UPF), Unidade Polisia Maritima (UPM), Servisu Migrasaun, Alfandega, Karantina no populasaun sira presija kontribui no kolabora hamutuk atu nune’e bele minimija krime ne’e,”hateten Komisariu Polísia Faustino da Costa iha nia kna’ar fatin kaikoli Dili (03/06).

Aktual Segundu Komandante Jerál PNTL ne’e akresenta tan katak PNTL, rekoñese los duni sasan illegal barak maka tama iha fronteira terrestre tanba ne’e autoridade sira iha fronteira inklui komunidade atu buka oinsa bele kopera ba asuntu ida ne’e.

Kestiona kona-ba motor no karreta ne’ebe maka kontinua fa’an iha area tasi ibun Lecidere nian, Komisariu Polísia ne’e hateten PNTL informa ona ba Ministeriu Comersiu Industria no Ambiente (MCIA) kona-ba ida ne’e no MCIA mós avisa beibeik no fó hanoin ona maibé ema kontinua fa’an.

Parte Alfandega rasik iha lei kona-ba adoneru hateten katak, karreta sira ne’ebe rejistu iha DNTT maka karreta sira ne’ebe tama hosi portu Dili no mós define ona karreta nia modelu no fábrika sa tinan maka bele tama maibé realidade kontrariu la hatudu tuir lei ne’ebe maka estabelese.

Media PNTL.

Dili, Polisia Nasional Timor-Leste (PNTL) sei asegura seguransa ba konsentrasaun grupu Unidade Nasional Joventude Pro-RDDTL ne’ebe maka halo konsentrasaun massa iha Dili, hodi tuir enkontru ne’ebe sei realiza durante loron tolu (2-4 Juñu 2016) iha salaun Conselho Nacional das Eleições (CNE).

Komandante Jerál PNTLem exercicio Komisariu Polisia Faustino da Costa hatan kona-ba seguransa durante aktividade ne’ebe maka sei hala’o husi grupu Unidade Nasional Joventude Pro-RDDTL, membru PNTL sei halo pasa revista ba grupu refere antes aktividade hala’o.

“Hau orienta ona atu halo cek point ba sira nia aktividade no movimentu no halo barazen de estradas nune’e bele asegura seguransa, sira mai ho diak no fila ho diak atu labele mosu buat balu ne’ebe ema hotu la espera atu”, hateten Komandante Jerál PNTL Interinu Komisariu Polisia Faustino da Costa ba jornalista sira iha Kuartel jerál PNTL Kaikoli Dili (01/06).

Komisariu Polísia ne’e mós haktuir tan katak, atu asegura seguransa ba grupu ne’e tau konsentrasaun iha parte Hera, PNTL koloka ona nia pessoal hamutuk ho Servisu Nasional de Informações hanesan Z2 husi F-FDTL atu monitorija aktividade ne’ebe maka sira hala’o.

Bazeia ba informasaun ne’ebe iha, grupu refere organija husi Señor Asukai kompostu husi ema nain 2000 resin no alta entidade lubuk ida maka sei sai orador ba aktividade ou eventu ne’ebe sei hala’o iha salaun enkontru CNE hodi koalia kona-ba grupu ne’e nia partisipasaun iha Eleisaun Jerál tinan 2017 oin mai.

Parte Komando PNTL rasik, seidauk hetan karta koñesimentu husi komisaun ka sekretariadu ne’ebe maka organiza eventu ne’e, maibé informasaun kona-ba grupu ne’e ho ninia aktividade, PNTL hetan wainhira komandante munisipiu sira halo relatoriu mai iha Komando katak iha organizasaun ida maka agora daudauk halo mobilizasaun massa atu mai tuir enkontru iha Dili. No husi informasaun refere kruza katak iha duni grupu husi Unidade Nasional Joventude Pro-RDDTL, maibé iha karta ne’ebe sira halo husu ba prezidente CNE atu fó fatin ba sira hodi halo nia enkontru iha salaun CNE.

Media PNTL.