Uncategorized

Dili, Komandu Polísia Nasional Timor-Leste (PNTL) liu husi Gabinete Planeamentu Estratéjiku no Dezenvolvimentu (GPED) kuarta-feira (26/07) ne’e realiza aktividade ida kona-ba Seminariu Monitorizasaun No Avaliasaun PNTL Tinan 2023 ho objetivu atu hare’e servisu Polísia nian iha Sétor hotu-hotu ba Atendimentu Públiku, Analiza Rezultadu Trimestral no Rasionaliza Planu Rekursu hodi bele mellora/hadia diak liu tan kualidade rezultadu iha próximo Trimester durante implementasaun programa liu husi Sistema Informátika Dalan Ba Futuru Timor-Leste.

Komandante Jerál PNTL Komisariu Jerál Polísia Henrique da Costa hafoin halo abertura ba aktividade ne’ebe hala’o iha salaun enkontru Kaurtél Jerál, ba jornalista sira hateten kada tinan Komandu prepara Planu Asaun Annual hodi aprezenta ba Governu nune’e bele hetan osan husi Governu.

“Ohin ita halo ita nia enkontru avaliasaun ba iha servisu ninian ne’ebe maka envolve Komandante Komandu munisipiu, Komandante Unidade, Xefe Departamentu sira hodi halo fila fali avaliasaun ba iha implementasaun ita nia Planu Asaun Annual ne’ebe maka ita fó sai ona no ita mós halo avaliasaun ba iha ita nia implementasaun Planu Estratéjiku PNTL nian inklui mós Prioridade Lima Komandu ninian ne’ebe maka ita implementa iha tinan 2023 nian”, esplika Komandante Jerál PNTL ne’e.

Komisariu Jerál Polísia ne’e salienta tan katak parte GPED nian maka sei halo aprezentasaun no orsida sira mós sei hare’e kona-ba Atinzimentu ba iha ita nia implementasaun ba Planu sira. Atu nune’e bele ajusta ho Planu Prioridade husi Governu ninian, atu nune’e ita labele lao sai husi Planu Prioridade husi Governu nian.

“Ita mos orienta atu nune’e, avaliasaun ne’e remata husi parte GPED ninian tenke tun direitamente ba iha munisipiu sira atu nune’e bele akompaña sira nia implementasaun iha terenu, pois bele mós fó orientasaun karik identifika buat ruma ne’ebe maka ladiak, bele fó kedas orientasaun atu nune’e iha terenu sira bele halo servisu ho diak”, hatutan Komisariu Jerál Polísia ne’e.

Hola parte iha aktividade loron ida ne’e, Komandante Jerál PNTL Komisariu Jerál Polísia Henrique da Costa, Komandante Komandu Operasaun, Administrasaun, Komandante Komandu PNTL munisipiu 14, Komandante Komandu Unidade UPM, UPF, UEP, Xefe Departamentu no Xefe Gabinete sira Komandu PNTL nian.  Media PNTL.

 Dili-Komandu PNTL munisipiu Liquica prende presaun de arma (Kilat anin) unidade 21 ho marka Sharp Tiger no motorizada unidade rua(2) ne’ebe maka hatama illegal liu husi fronteira Terrestre iha loron segunda (17/07), oras 23:41 Otl.

Portavoz Komandu PNTL Superintendente Polisia Antonio Da Lúz akompaña husi Komandante PNTL munisipiu Liquisa Superintendente Polisia Umbelina Soares relata katak Servisu Investigasaun Kriminal ho Seksaun Rezerva Intervensaun Rapida (RIR) munisipiu Liquica kaptura sidadaun nain tolu (3) ho sasan evidensia kilat manu hamutuk unidade 21 no motorizada rua (2), Nia hato’o asuntu ne’e liu husi komferensia emprensa iha Kuartel Jeral PNTL Kaikoli Dili.

Nia hatutan ekipa halo hela patrulhamentu hamutuk iha area Maumeta laran no ekipa simu kontaktu husi Komandante munisipiu katak iha fatin Kaimeo Dato Liquica nian membru Servisu Informasaun Polisia (SIP) nain ida prende hela suspetu lori sasan kontra bandu.

Komandu detein suspetu nain tolu ne’ebe maka komete kazu kontra bandu ne’e, suspetu hirak ne’e ho inisial JMP, AAPM no MB no investigasaun munisipiu Liquica halo ona prosesu identifikasaun hodi submete ba prosesu kontinuasaun ba Ministeriu Publiku.

Sasan hirak ne’e tama husi fronteira no suspetu hirak ne’e ba foti iha fronteira, tanba ne’e prosesu investigasaun sei lao atu hatene klaru liu iha investigasaun maka sei hatene lolos sasan ne’e sira foti iha ne’ebe no husi se.

Iha okajianun ne’e Komandante munisipiu Liquica Superintendente Polisia Umbelina Soares informa tuir orentasaun husi Komandante Jeral  Komisariu Jeral Polisia Henrique da Costa maka Hau ho membru sira transporta Suspetu nain tolu (3) ho sasan evidensia mai Kuartel Jeral atu nune’e Portavoz PNTL halo komferensia emprensa atu nune’e publiku bele hatene tanba kazu ne’e sensitivu tebes, hafoin lori sira fila-fali ba Komandu munisipiu Liquica hodi kontinua prosesu investigasaun.

Komandu munisipiu Liquica halo kordenasaun servisu ho Unidade Polisia Marítima(UPM), Unidade Patrulhamentu Fronteira (UPF) no membru F-FDTL sira ne’ebe destakadu hodi pasa informasaun ba malu hodi halo vizilansia no prende movimentu sidadaun ho sasan illegal.

Portavoz Komandu PNTL haktuirtan movimentu sasan illegal kontinua akontese iha fronteira terrestre tanba fronteira nia area luan, distransia postu ida ba postu seluk dook ho membru ne’ebe limitadu nudar kauza atividade illegal kontinua akontese maibe Polisia kontinua halo esforsu hodi reforsa seguransa. Komandu mos iha planu atu bele hare oinsa reforsa ita nia fronteira, espera katak iha tinan oin governu bele aloka orsamentu hodi halo rekrutamentu ba membru PNTL foun hodi bele aumenta rekursu ne’ebe maka ita menus ho ekipamentu ne’ebe maka apropriadu.

Atu prevene atividade ilisitu maka Komandu orienta nafatin ba membru sira atu halao servisu ho lolos no responsabilidade tanba nasaun ne’e ita nian tanba ne’e ita iha dever atu asegura alende ne’e presiza mos komunidade ne’ebe maka hela iha liña fronteira terrestre no marítima nia koperasaun hodi apoiu Polisia liu husi informasaun tanba Polisia mesak labele halo buat ida.

Avizu mos ba publiku karik uza no rai hela sasan kontra bandu maka voluntariamente entrega ba autoridade seguransa duke Polisia maka hetan halo aprensaun no prosesu tanba sasan kontrabandu ne’e kontra Lei tanba ne’e labele koko rai no uza sasan illegal hirak ne’e tanba ne’e konsidera hanesan krime Armas Branca.

Iha biban ne’e informa mos katak iha loron segunda (17/07) Departamentu Investigasaun Kriminal(DIK) Servisu do Alfandega kaptura sidadaun nain 3, ne’ebe hatama sigaru Surya 12, bal ida (slop 21) no Joker Karton 8, iha Portu Tibar.

Sidadaun nain 3 ne’e kompostu husi Feto nain 2, ho mane ida, ho naran inisial, JPBM (mane), MI no RSB (feto). Sasan hirak ne’e transporta husi fronteira Batugade mai Kapital Dili, ho transporte publiku (BUS).

Kazu ho NUC: 0204/ 23.PNSIC, husi Departamentu Investigasaun Kriminal kontinua prosesu no lori ba Ministeriu Publiku hodi kontinua nia prosesu.

Media PNTL

Dili, Komandu Polísia Nasional Timor-Leste (PNTL) sexta-feira (14/07) ne’e simu vizita dahuluk Ministru Interior Francisco da Costa Guterres,Ph.D mai iha Kuartél Jerál hodi hare’e no rona dezafiu hirak ne’ebe maka institusaun seguransa ne’e hasoru durante ne’e. iha vizita ne’e hala’o mós enkontru ho estrutura Komandu PNTL nian.

Hafoin aktividade vizita, ba jornalista sira Ministru Interior hateten ohin halo vizita mai PNTL atu rona dezafiu saida maka PNTL infrenta no presiza saida maka governu bele apoiu hanesan infrastrutura no  ekipamentu. Iha ne’e ami hare’e ona katak kestaun infrastrutura, ekipamentus, transporte tanba ne’e governu iha komitmentu sei hadia PNTL nia insfrastrutura, hadia sira nia ekipamentus no prepara transporte ba Komandu PNTL.

“Kestaun seluk ne’ebe maka ohin koalia ho Komandu maka kestaun oinsa maka bele hadia diak liu tan prestaun servisu Polísia ninian, atu bele hala’o servisu hanesan atendimentu públiku ne’e lao ho diak, segundu maka oinsa Polísia bele kria mekanizmu atu haforsa liu tan Manutensaun da Paz iha Timor laran tomak”, tenik Ministru Interior ne’e.

Membru Governu ne’e kompremete ona katak kona-ba infrastrutura sei hare’e uluk konstrusaun edifisiu Kuartél Jerál nian tanba ne’e ohin hau hateten ona ba Komandu katak iha tinan 2024 tenke hahu’u ona ninia lansamentu ba Kuartél Jerál. Ninia prosesu deit maka presiza resolve, iha tinan ida ne’e nia laran sei resolve uluk ninia mekanizmu no prosesu hotu, maka iha tinan 2024 sei tama iha lansamentu ba konstrusaun ninian.

“Ita sei mós halo revizaun ba Lei sira kona-ba Regime Salarial no Regime Karreira ninian, atu nune’e sira bele desempeña sira nia papel ne’e ho diak liu tan, no ita mós tenke agradese tanba durante ne’e PNTL konsege hala’o servisu ho diak tebes, ita bele hare’e iha eleisaun tolu ne’ebe liu ona lao ho diak, tanba sira maka pilar esensial ida ne’ebe maka tau hela seguransa ba iha prosesu ne’e rasik”, afirma Membru Governu ne’e.

Francisco da Costa Guterres,Ph.D haktuir tan katak durante aktividade eleisaun tolu ne’ebe liu ona, situasaun seguransa lao ho diak tanba servisu maka’as PNTL nian hanesan wainhira akompaña lori urnas sira husi fatin votasaun no halo kontagem hafoin ikus mai hamosu rezultadu ne’ebe maka diak, ne’e sira hotu tanba servisu Polísia sira nian.

“Ohin mós hau lori Primeiru Ministru nia naran no mós Governu nia naran agradese hela ba servisu ne’ebe PNTL halo diak tebes-tebes durante eleisaun tolu ne’e”, hatutan Ministru Interior ne’e.

Planu Governu nian liu-liu Ministeriu Interior sei hare’e ba PNTL maka iha tinan 2024 sei preparasaun atu halo rekrutamentu ba Polísia foun, sei revê mós Diploma Legais barak ne’ebe maka iha PNTL nia laran, atu nune’e wainhira halo Lei ne’e tenke tuir kondisaun servisu PNTL nian.

Iha vizita dahuluk ne’e, Ministru Interior Francisco da Costa Guterres,Ph.D simu ho Guarda de Honra no tara tais husi Segundu Komandante Jerál PNTL Komisariu Polísia Pedro Belo. Hafoin ida ne’e, membru governu ne’e kontinua hala’o enkontru ho Komandante Jerál PNTL Komisariu Jerál Polísia Henrique da Costa, Segundu Komandante Jerál PNTL Komisariu Polísia Pedro Belo, Komandante Komandu PNTL munisipiu 14, Komandante Unidade, Xefe Departamentu, Xefe Servisu sira ne’ebe tutela iha Komandu Jerál.

Iha biban enkontru ne’e, Komandante Jerál PNTL halo mós aprezentasaun kona-ba Programa Planu Prioridade PNTL nian ba tinan 2023-2026, Dezafiu no Obstákulu ne’ebe maka PNTL hasoru durante ne’e. Hafoin aprezentasaun, Komisariu Jerál Polísia Henrique da Costa entrega Relatoriu Servisu durante Períodu Primeiru nian ba iha Ministru Interior Francisco da Costa Guterres,Ph.D.

Media PNTL.

Dili- Komandante Jeral Komisariu Jeral Polisia Henrique da Costa no Segundu Komandante Jeral Komisariu Pedro Belo halao vizita kortejia ba RENETIL no husu atu kontinua tau matan ba servisu membru PNTL iha terrenu.

Komandante Jeral hateten ohin Hau mai ho Segundu Komandante Jeral halo vizita ba Organizasaun Rejistensia RENETIL no husu atu nune’e nafatin tau matan mai instituisaun PNTL no fo sira nia kontribuisaun liu husi aspetu saida deit, buat ne’ebe ita husu mak ne’e kuandu PNTL halo buat ruma la los no ladiak tenke hateten ba ami katak ita bot sira iha neba halo buat ne’e la los atu nune’e ami bele hadia, Nia hato’o asuntu ne’e ba Jornalista sira iha Sede RENETIL Farol Dili, kinta (13/07).

“Atu dezenvolve Polisia laos depende deit ba membru nain 4000 ne’ebe iha instituisaun PNTL nia laran maibe presija kontribuisaun husi ema hotu-hotu, momentu ida ne’e ita husu apoiu husi RENETIL para nafatin fo sira nia hanoin ba ita, ita mos akompaña hela katak ita nia situasaun seguransa agora daudauk ne’e lao normal hakamtek, maibe ita husu kontribusaun husi ema hotu-hotu nian atu nune’e mantein situasaun ida hanesan ne’e,” dehan Komandante Jeral.

Nia hatutan karik iha situasaun ruma ne’ebe perturba ordem publika bele informa ba parte seguransa atu nune’e ita bele foti medida prevensaun antes duke mosu tia problema ruma maka ita nia Polisia to’o ba tarde no sasan estragus hotu ona no ema mate hotu ona ita lakohi atu akontese, entaun prejensa Polisia nian diak liu ita prevene duke mosu tia problema maka ita ba.

Ita hatene katak kontribuisaun joventude sira nian liu-liu parte RENETIL agora daudaun barak mos sai hanesan membru PNTL.

Iha okajiaun ne’e Sekretariu Jeral RENETIL Joaquim da Fonseca hateten vizita Komandante Jeral no Segundu Komandante Jeral mai Sede RENETIL nudar jestu ida ne’ebe maka ami agradese teb-tebes tanba ida ne’e hanesan hahu buat foun ida iha relasaun entre RENETIL hanesan organizasaun Rezistensia ida no organizasaun sosiedade sivil nian ho instituisaun ida inportante teb-tebes ba manutensaun seguransa lei no ordem.

Nia hatutan ohin Komandante sira mai ne’e hanesan espresa sira nia avertura sira nia neon no attitude nakloke atu servisu ho siedade tomak inklui organizasaun hanesan RENETIL. Ami hato’o ami nia apresiasaun ba jestu ida ne’e nomos ba PNTL nia servisu em jeral, hanesan ita bot sira akompaña iha semana kotuk ami halo komferensia emprensa hodi koalia konaba andamentu prosesu eleisaun nian iha neba ami agradese no kongratula PNTL nia servisu ne’ebe garante katak prosesu eleitoral hahu husi kampaña to’o kontajen de votus lao diak ho insidente minimu. Ohin mos ami repete fali mensajen ida ne’e ba PNTL nia Komandu ho mensajen ida katak hahu hari hela iha ida ne’e nia leten tanba ne’e hatudu ona fundamentu diak iha PNTL nia servisu.

“Fo korajen ba membru PNTL tomak atu uza susesu ida ne’e hanesan padraun ida para hakat ba oin ne’e kontinua ho ida ne’e,” dehan Fonseca.

Nia afirma enkontru ida ne’e Hau hein katak laos sorumutu ba dala ikus liu, uluk kuandu ami ba vizita Kuartel PNTL tanba kazu insidente ruma atu hato’o liafuan, Komandante sira uluk mos nakloke hodi simu no rona, agora daudaun PNTL mak mai ne’e mos diak. Aban bainrua ami sei kontinua koperasaun no relasaun ida ne’e hodi hadia ita nia rai no ita nia sosiedade, Nia hakotu. Media PNTL

Dili, Atu garante situasaun seguransa iha Kapital Dili hakmatek, Komandu Polísia Nasional Timor-Leste (PNTL) munisipiu Dili sei hasa’e volume patrullamentu hodi evita konflitu mosu iha komunidade nia le’et.

Hafoin simu posse husi Komandante Jerál Komisariu Jerál Polísia Henrique da Costa iha loron kuarta-feira(12/07) ne’e nu’udar Komandante Komandu PNTL munisipiu Dili, Superintendente Xefe Polísia Orlando Gomes ba jornalista sira hateten iha hanoin balun ne’ebe maka atu servisu hamutuk ho ita nia líder tomak iha munisipiu Dili ho ita nia komunidade sira, joven, veteranu no ita nia líder komunitaria tomak, atu hotu-hotu hamutuk fó kontribuisaun atu nune’e bele kontribui ba situasaun hakmatek kapital Dili nian.

“Tanba ne’e laos hau mai atu lidera, ba buat balun ne’ebe presiza ita hadia, ita tenke hadia, mellora diak liu tan iha Komandu munisipiu Dili ninian, hau hanoin ba oin ita sei hadia jestaun operasaun, ita sei hadia funsaun lima iha PNTL ne’ebe Polisial nian ne’e, ita sei mellora, esforsu no haka’as ann hamutuk atu nune’e ita bele prevene krime sira ne’ebe maka sempre mosu”, tenik Komandante Komandu PNTL munisipiu Dili ne’e.

Superintendente Xefe Polísia salienta tan katak Polísia maka sai hanesan autor ba seguransa atu halo prevensaun, maibé kontribui mós ho ita nia líder komunitaria sira, ita bele kombate krime ne’ebe maka mosu iha Dili laran ne’e. ita hotu-hotu hamutuk, Dili ne’e bele hakmatek.

“Ita kontinua hasa’e ita nia volume patrullmentu no ita sei trasa planu operasaun ba iha Dili laran, ita sei servisu haka’as ann, sei hadomi ita nia rai, ita tenke esforsu maka’as atu nune’ebe bele garante situasaun hakmatek maibé ita konta ho ita nia maluk sira tomak”, hatutan Superintendente Xefe Polísia ne’e.

Eis Komandante UEP ne’e sei apela ba membru sira iha Komandu munisipiu Dili katak Polísia ne’e servisu basea ba Lei no Ordem, servisu tuir regras, ita halo atuasaun iha terenu mós tuir regras, tuir Lei ne’ebe maka iha, respeitu nafatin ba iha Direitus Umanus. Iha membru ne’ebe maka halo servisu lalos, envolve iha grupu sira, ka partidu sira, ita tenke halo prosesu investigasaun, tanba Polísia nia servisu tenke imparsial, neutru atu nune’e ita nia komunidade sira bele fiar iha Polísia, laran metin iha Polísia, Polisia labele halo servvisu tuir nia hakarak maibé tenke tuir Lei, Regras, Prosedimentu ne’ebe maka iha.

Media PNTL.                                 

Dili, Komandante Jerál Polísia Nasional Timor-Leste (PNTL) Komisariu Jerál Polísia Henrique da Costa hamutuk ho Segundu Komandante Jerál Komisariu Polísia Pedro Belo iha loron kuarta-feira(12/07) ne’e fó posse ba daruak Ofisias Superior no Inspetores hamutuk na’in sanulu resin-rua (12) hodi priense estrutura Komandu PNTL nian ne’ebe antes ne’e mamuk hela hafoin prosesu aposentasaun/reforma.

Ofisias Superior no Inspetores hamutuk sanulu resin-rua (12) ne’e simu posse ba kargu hanesan: Komandante Komandu Administrasaun, Komandante Komandu PNTL munisipiu Dili, Komandante Komandu PNTL munisipiu Aileu, Komandante Komandu PNTL munisipiu Viqueque, Komandante Komandu PNTL munisipiu Manatuto, Komandante Komandu PNTL munisipiu Covalima, Segundu Komandante Interinu UEP no Segundu Komandante Interinu UEP, Xefe Departamentu Tránzitu Seguransa Rodoviaria Nasional (DTSRN), Xefe Departamentu Investigasaun Kriminal (DIK), Segundu Komandante CFP no Komandante Interinu Batallaun de Manutensaun no Ordem Públika (BOP).

Iha nia intervensaun ba serimonia ne’e, Komandante Jerál PNTL Komisariu Jerál Polísia Henrique da Costa hateten promosaun, nomeasaun, rotasaun iha insitituisaun ida espesialmente PNTL hanesan buat ida ne’ebe normal, akontese iha nasaun ne’ebe deit no akontese iha instituisaun polísia ne’ebe deit.

“Ohin ita realiza serimonia ida ne’e hodi priense mós kargu ka estrutura ne’ebe maka durante ne’e mamuk no halo mós rotasaun atu nune’e bele iha envariomentu foun ida, atu nune’e bele implementa servisu iha fatin ne’ebe foun ho diak liu tan”, informa Komandante Jerál PNTL ne’e.

Komisariu Jerál Polísia ne’e salienta, ita hatene katak iha fulan kotuk ita halo ona aposentasaun ka reforma ba iha ita nia membru hamutuk 158 inklui mós ita nia ofisias superior, ofisias inspetores lubuk ida, ninia rezultadu husi reforma ne’e maka fó oportunidade ba ema sira seluk atu nune’e okupa kargu sira ne’ebe mamauk no mós bele iha oportunidade ba promosaun iha tempu tuir mai.

“Hau hakarak apela ba iha emposadu sira ne’ebe maka ohin simu posse, kargu no nomeasaun ne’ebe ohin ita bo’ot sira simu hanesan konfiansa husi instituisaun liu husi Komandante Jerál no Segundu Komandante Jerál atu nune’e bele asegura dezisaun Komandu nian, hafoin implementa servisu iha terenu ho responsabilidade”, hatutan Komisariu Jerál Polísia ne’e.

Autoridade másimu instituisaun seguransa ne’e salienta tan katak iha juramentu ba tomada de posse ne’e emposadu sira hateten katak lealidade no mós kumpri ba iha Lei sira. Signifika katak Lei sai hanesan lealidade ba servisu no ita bo’ot sira nia lealidade ba Komandu mós importante.

“Husu ba emposadu sira ne’ebe maka sei ba fatin servisu foun ne’e atu bele kria komunikasaun ne’ebe diak ho ita nia líder ka autoridade sira iha ne’eba, tanba wainhira ita mesak ho númeru Polísia ne’ebe limitadu ita sei labele fornese servisu ne’ebe maka 100% ba iha ita nia komunidade sira, tanba ezizensia ne’e barak hanesan problema sosial, ne’ebe maka ninia impaktu ne’e bele hadaet mai to’o iha servisu Polísia ninian, tanba ne’e tenke halo koordenasaun ho parseiru sira iha area responsabilidade atu nune’e lori progresu ba iha servisu Polísia ninian”, hatutan Autoridade másimu instituisaun seguransa ne’e.

Komandante Jerál PNTL ne’e apela ba Ofisias Superior, Subalternu inklui membru sira katak ita Polísia ne’e halo servisu tenke Neutral, labele inklina ba kaulkér partidu politiku tanba instituisaun PNTL konsagra ona iha Konstituisaun RDTL artigu 147 fó kna’ar ba ita, husu ba ita hotu tenke obedese ba ida ne’e.

Despasu Gabinete Komandante Jerál:

Hola parte iha serimonia tomada de posse ne’ebe hala’o iha salaun enkontru Kuartél Jerál ne’e Komandante Jerál PNTL Komisariu Jerál Polísia Henrique da Costa hamutuk ho Segundu Komandante Jerál Komisariu Polísia Pedro Belo, Komandante Komandu Operasaun, Inspetur Jerál, Diretur Justisa no Disiplina Interinu, Xefe SIP, Xefe Gabinete no Xefe Departamentu sira iha Kuartél Jerál inklui emposadu sira.

Media PNTL.

Dili-Ministru Interior halao enkontru ho Membru Polisia reformadu sira hodi rona sira nia hanoin no prekupasaun ba desijaun Governu Konstitusional da VIII ne’ebe halo Reforma ba membru nain 158 tanba idade abansadu no kondisaun Psikika.

Ministru Interior Francisco Guterres hateten Hau mai koalia ho sira atu rona sira konaba prosesu tomak apozentasaun ne’e lao halo nusa hafoin ami sei foti desijaun ida, sei bolu Komandu hodi koalia ho Komandu hafoin aprejenta iha Konsellu Ministru hodi desidi no foti desijaun konaba apozentassaun ne’e rasik, Nia hato’o asuntu ne’e iha Sentru Formasaun Polisia Komoro Dili, tersa (11/07). “Ita laos mai atu hatama fali ema maibe atu prepara didiak para prosesu reforma ne’e lao ho diak no lao ho dignu, Polisia sira ne’e estadu gasta osan barak ba sira atu forma sira sai Polisia to’o oras ida ne’e, tanba ne’e sira reforma hotu ona ita tenke husik sira ho dignu para sira kontinua kontribui ba dezenvolvimentu paz no estabilidade rai ida ne’e no sira kontinua iha ligasaun emosional ho instituisaun PNTL nune’e kuandu PNTL presija sira iha tempu ruma ne’ebe difisil sira kontinua mai ajuda no kontribui nafatin ida ne’e maka ita hare,”dehan Ministru.

Nia haktuir iha enkontru ne’e Reformadu sira hato’o prekupasaun barak Komandu aponta no koalia depois sei tur hamutuk. “Hau sei halo hotu tia pareser ne’e hadia kestaun legais hirak ne’e hotu tia depois Hau bele dehan iha fulan ida ne’e nia laran Ami aprejenta ba Konsellu Ministru para depois Konsellu Ministru foti desijaun,”MI informa.

Hare ba Estatuto Professional do Pessoal com Funções Policiais da PNTL Dekretu Lei Nu. 69/2022 de 28 de setembro ne’e hateten klaru nia mekanismu no prosesu ne’e mak presija hadia, Reformadu sira ne’ebe maka mai mos laos ejiji atu tama fila-fali maibe sira husu deit atu Reforma ho Dignu tanba sira servi ba rai ida ne’e no ba instituisaun ne’e kleur ona labele kaer Sira soe sai deit mais mai Haruka Sira sai husi odamatan ho didiak, ida ne’e maka sira koalia mai Hau.

Governu sei hare ida ne’e no hare oinsa meius ne’ebe maka dignu hodi halo reforma ne’ebe maka dignu para sira fila ba vida sivil. Sira ne’e ema ne’ebe treinadu se ita la trata sira ho diak ba komunidade sira bele sai fali potensia destruidor ba komunidade ne’e rasik tanba ne’e maka ita tau sira ba komunidade no husik sira ho dignu.

Komisariu Jeral Polisia Henrique da Costa hateten ohin hanesan oportunidade diak ida ne’ebe maka organija husi Gabinete Ministru Interior nian hakarak hasoru malu diretamente ho Reformadu sira.

Nia hatutan atu informa mos ba Ministru katak iha loron 16 juñu 2023 ita halo serimonia despedida ho reformadu sira maibe marka prejensa iha momentu neba reformadu kuaje nain 60 maibe agora sira barak, Ami agradese atu rona diretamente mensajen husi Ministru Interior.

Entretantu Reformadu Superintendente Assitente Paskoal Ferreira Guterres hateten Ami agradese ba Primeiru Ministru ne’ebe haruka ona Ministru Interior mai halo enkontru ho ami hodi koalia kestaun barak ne’ebe maka la defende parte ida no hatun parte seluk maibe hanesan Ministru hateten oinsa rezolve situasaun hirak ne’ebe maka agora Polisia hasoru hodi hadia kondisaun hirak ne’e sai ba diak atu nune’e Reforma tuir mai ho situasaun diak.

“Ami reformadu sira ohin koalia ona katak mais ou menus Ita sai ba hanesan kolega sira hateten ita tama iha odamatan ema suta ita husi Janela não pode ser asim (labele hanesan ne’e) instituisaun ne’e estadu nian entaun buat hotu-hotu ita lao tuir governu nia politika entaun governu nia knar rasik mak hakarak prepara hanesan ohin Ministru hateten prepara oinsa atu hadia Lei no prosedimentu atu instituisaun PNTL lao tuir ida ne’e mak inportante no laiha ema ida mak lakon no laiha ema ida mak manan, buat diak ba hotu-hotu.

Enkontru Membru Governu Konstitusional da IX ho Reformadu sira kuaje oras rua nia laran ne’e taka ba publiku.

Enkontru ne’e diriji husi Komandante Jeral akompaña husi Segundu Komandante Jeral Komisariu Pedro Belo ho prejensa husi eis Komandante Jeral Sr. Paulo de Fatima Martins, Komisariu Afonso De Jesus, omisariu Julio Hornay, komisariu Faustino da Costa no Eis Iha okajiaun ne’e Komandante Jeral PNTL Segundu Komandante Jeral Komisariu Mateus Fernandes, Asesor sira, Ofisiais Superior PNTL no Reformadu sira. Media PNTL

Aileu, Komandante Jerál Polísia Nasional Timor-Leste (PNTL) Komisariu Jerál Polísia Henrique da Costa hafoin simu posse nu’udar Autoridade másimu instituisaun seguransa iha loron 27 fulan Marsu tinan 2023 hala’o vizita servisu dahuluk nian ba iha Komandu PNTL munisipiu Aileu iha loron 10 fulan Jullu tinan 2023.

Iha vizita ne’e, Komandante Jerál PNTL ne’e hala’o enkontru ho Komandante Eskuadra, Xefe Seksaun inklui membru PNTL munisipiu Aileu nian hodi hato’o planu no prioridade Komandu nian durante assume kargu nu’udar Autoridade másimu instituisaun seguransa.

Planu prioridade lima ne’ebe sei implementa durante mandatu tinan tolu (2023-2026), ida maka hanesan hadia estrutura Komandu PNTL nian hanesan halo Rotasaun, Transferensia no Nomeasaun ba Ofisias Superior, Subalternu, Sargentu, no Ajente sira iha munisipiu hotu. Além de hadia estrutura Komandu nian, halo mós Reforma basea ba Estatuto instituisaun PNTL nian.

Komisariu Jerál Polísia Henrique da Costa iha vizita ne’e hato’o orientasaun ba Komandu munisipiu sira hodi koloka estrutura foun tuir Deviza ne’ebe maka iha. Iha tempu badak, Komandu nia esperansa maka sei halo promosaun ba membru sira tuir Antiguidade hodi bele priense estrutura Komandu nian.

Biban vizita ba iha munisipiu Aileu ne’e, Komandante Jerál PNTL ne’e partisipa mós iha serimonia Komemorasaun tinan 50 Existensia munisipiu Aileu nian. Aktividade vizita ne’e, Komisariu Jerál Polísia Henrique da Costa akompaña husi esposa Sra.Manuela de Araújo ne’ebe maka halo mós enkontru ho esposa Ofisias Superior sira iha Komandu PNTL munisipiu Aileu nian.

Antes termina vizita servisu, Autoridade másimu instituisaun seguransa hato’o Motivasaun ba membru PNTL sira iha munisipiu Aileu atu bele servisu ho profesionalizmu, dedikasaun no hala’o kna’ar tuir Lei no Ordem ne’ebe maka iha.

Media PNTL.      

Dili, Komandu Polísia Nasional Timor-Leste (PNTL) liu husi Departamentu Investigaasaun Kriminal (DIK) iha loron segunda-feira (10/07) ne’e asegura ona sidadaun Timor oan ida ne’ebe maka hasai liafuan att ka Defama Líder Nasional aktual Primeiru Ministru Xanana Gusmão iha Media Sosial.

Xefe DIK Superintendente Polísia João Belo dos Reis liu husi konferensia imprensa segunda-feira (10/07) ne’e hateten baseia ba publikasaun iha Media Sosial (Facebook) ita nia sidadaun Timor oan balun hasai liafuan att (Tolok) ba Primeiru Ministru iha Media Sosial.

“Nune’e DIK lokaliza kedas/buka tuir informasaun lokaliza nia hela fatin, detekta nia númeru kontaktu no agora dadaun ema ne’e ami notifika ona hodi fó ninia deklarasaun baseia ba publikasaun ne’ebe nia halo”, informa Xefe DIK ne’e.

Superintendente Polísia hakuir tan katak, sidadaun refere ho inisial MJ ho idade 33 uja ID Facebook ‘Jonn Malic’ hodi hasai liafuan att no defama eis Komandante En-Xefe FALINTIL no aktuál Primeiru Ministru José Alexandre Kay Rala Xanana Gusmão iha Media Sosiál Facebook.

“Hafoin lokaliza nia hela fatin, maka ohin (10/07) parte DIK ba foti sidadaun refere iha ninia residensia privada iha area Mota-Ki’ik, Suku Hera, Postu Administrativu Cristo Rei, Munisipiu Dili hodi lori mai Kuartél Jerál, hodi presta ninia deklarasaun baseia ba publikasaun ne’ebe nia halo”, hatutan Superintendente Polísia ne’e.

DIK Detekta Mosu Asaun Tráfiku Umanu Ilegal, Sidadaun Timor Oan Barak Sai Vitíma

Iha semana kotuk, sidadaun Timor oan na’in ha’at (4) fila husi estrangeiru (Malaysia), parte DIK foti ona sira nia deklarasaun no detekta katak akontese rede Tráfiku Umanu illegal tanba sidadaun na’in ha’at ne’e tuir rekrutamentu liu husi online, hafoin transporta ba liur liu husi Indonesia tama iha Malaysia, fó servisu la tuir kontratu ne’ebe maka sira asina.

“Ita detekta mós katak, laos sidadaun na’in ha’at ne’e deit, maibé antes ne’e sidadaun hamutuk 21 maka fila ona husi Malaysia ho kazu ne’ebe maka hanesan no parese sei barak tan iha Malaysia, tanba ne’e ita sei buka tuir nafatin”, haktuir Xefe DIK ne’e.

Superintendente Polísia João Belo dos Reis apela ba sidadaun Timor oan hotu ne’ebe buka hela servisu, atu labele fiar arbiru, publikasaun rekrutamentu liu husi online ne’ebe habosok ita bo’ot sira. Karik ema ruma oferese servisu ka publika hela informasaun atu fó servisu, diak liu buka didiak no husu atu labele fiar arbiru, tenke konsulta uluk ho parte governu nian liu-liu SEFOPE, parte ne’ebe bele fiar no parte ne’ebe bele fó servisu no nasaun ne’ebe maka bele oferese servisu ba ita. Se lae maka ita sai vitíma hanesan mós ita nia maluk lubuk ida ne’ebe maka agora deporta fila ona mai husi Malaysia no sai vitíma ba rede Tráfiku Umanu husi ema sira ne’ebe maka laiha responsabilidade.

“Sira ne’ebe halo rekrutamentu ne’e dala barak mai husi Kupang, ema iha Kupang maka oferese servisu liu husi online ba Timor oan no to’o ikus ita konsidera katak tama ona iha rede Tráfiku Umanu nian”, hakotu Superintendente Polísia ne’e.

Media PNTL.           

Dili, Komandu Polísia Nasional Timor-Leste (PNTL) munisipiu Lautem aprezenta ona kazu ida ne’ebe hamate sidadaun Timor oan ida iha loron 06 fulan Jullu tinan 2023 ba iha Ministeriu Públiku (MP) hodi hetan mandadu detensaun ba suspeitu sira ne’ebe envolve iha akontesimentu ne’ebe halakon sidadaun refere.

Porta Voz Komandu PNTL Superintendente Polisia António da Lúz liu husi konferensia imprensa segunda-feira (10/07) ne’e informa ho akontesimentu ne’ebe akontese ne’e halo komunidade sira kestiona situasaun balun kona-ba atuasaun servisu Polísia nian no mós prosesu sira.

“Prosesu ba kazu ne’e, Komandu PNTL munisipiu Lautem halo ona prosesu, agora dadaun aprezenta ona ba MP atu bele hetan mandadu detensaun, prosesu inisial halo ona, identifika ona suspeitu na’in hitu (7), husi Komandu PNTL munisipiu Lautem halo ona prosesu identifikasaun maibé ita hein mandadu detensaun husi MP atu bele asegura suspeitu sira ne’e hodi bele partisipa iha prosesu kontinuasaun”, esplika Porta Voz Komandu PNTL ne’e.

Superintendente Polisia akresenta tan katak husi Komandu Jerál hasai ona despaisu ba iha Inspetúr Jerál hodi bele kria ekipa ida hodi halo investigasaun ba membru PNTL iha munisipiu Lautem kona-ba servisu ne’ebe maka sira halo. Tanba públiku kestiona kona-ba Polísia nia atendimentu ne’ebe ho akontesimentu ne’e no agora dadaun Komandante Jerál hasai ona despaisu ba iha Inspetúr Jerál hodi kria ekipa konjunta ida husi Inspetúr Jerál, parte Investigasaun ho mós parte Justisa atu halo prosesu Investigasaun ba membru PNTL sira iha munisipiu Lautem. Matebian oras ne’e dadaun entrega ona familia hodi halo prosesu funeral, antes ne’e halo ona prosesu autopsia ba mate isin.

Grupu Rua Asaltu Malu, Komandu PNTL Munisipiu Bobonaro Asegura ona Suspeitu Na’in Ida

Iha loron 06 fulan Jullu tinan 2023, akontese kazu asaltu malu entre grupu rua iha munisipiu Bobonaro hodi estragus komunidade sira nia uma rua, parte PNTL munisipiu Bobonaro asegura ona suspeitu na’in ida

Liu husi konferensia imprensa, Porta Voz Komandu PNTL Superintendente Polisia António da Lúz hateten Komandu PNTL munisipiu Bobonaro halo ona prosesu identifikasaun no asegura suspeitu na’in ida no sei buka tan suspeitu sira seluk ne’ebe maka envolve iha konfrontu ne’e.

“Liu husi biban ne’e, apela ba maluk sira ne’ebe envolve iha kazu ne’e atu entrega ann ba iha Polísia hodi halo prosesu, tanba ita hatene halo problema, ita tenke responsabiliza ba aktu sira ne’ebe maka ita halo, dala ida tan instituisaun PNTL husu ba maluk sira ne’ebe envolve iha kazu asaltu malu ida ne’e no estragus komunidade nia uma, husu atu bele entrega ba parte Polísia hodi tuir prosesu legal ne’ebe maka iha”, hakotu Superintendente Polisia ne’e.

Media PNTL.