Uncategorized

SUAI, 20 outubru 2022 (SRP) – Ekipa investigadór no instrutór hosi Diresaun Jeral Servisu Migrasaun, servisu hamutuk ho Organizasaun Internasionál ba Migrasaun (sigla ingles;IOM), kontinua halo sosializasaun ba lei Migrasaun no Ázilu no lei Trafiku Humanu hanesan medida preventiva ida iha kontekstu luta kontra tráfiku umanu iha Timor-Leste.

Objetivu hosi sosializasaun ne’e ho objetivu atu garante ezisténsia hosi asaun koordenada ida entre autoridade justisa, sosiedade sivil,autoridade seguransa no komunidade sira iha liña fronteira nune’e bele define polítika no estratéjia nesesária sira ba prevensaun no luta ida ne’ebé efikás kontra tráfiku ba ema sira inklui promove konvensaun sira ne’ebé Timor-Leste ratifika ona.

Sosializa ne’e halo iha fatin rua mak hanesan edifisiu Cruz Vermelha Santa Rosa-Covalima no ida seluk hala’o iha edifisiu PRADET Ronpe, ne’ebe lokaliza iha Suai Vila, Munisipiu Covalima no orador sira mai hosi Servisu Migrasaun, PNTL-VPU no-mos ajensia Organizasaun Nasoens Unidas (ONU), liuhosi projetu IOM.

Materia hirak ne’ebe orador sira desimina maka alende Lei Migrasaun no Azilu ko’alia mós atividade sira kona-ba prevensaun no luta kontra tráfiku ba ema sira inklui programa ba fortalesimentu jestaun fronteira nasionál nian sira ne’ebe apoiu husi Organizasaun Internasionál Migrasaun (OIM) ne’ebé reflete iha área prinsipál tolu – prevensaun, prosesu kriminál sira no protesaun ba vítima sira.

Ministeriu Interior liu hosi Servisu Migrasaun rasik reafirma ona kompromisu hodi halibur esforsu nesesáriu sira hotu atu prevene no kombate tráfiku umanu no kumpri obrigasaun internasionál sira ne’ebé asume ona husi Estadu Timor-Leste iha konstituisaun no iha Lei Prevensaun no Luta Kontra Tráfiku Umanu.

Entretantu sosializasaun ne’ebe halao durante loron tolu nia laran ne’e abertura direta husi Abertura husi Representante Administrador Munisipiu Covalima, Afonso Nogeira, no hetan partisipasaun másimu husi Autoridade Lokál, Lider Komunitaria, Autoridade Seguransa,Autoridade Justisa, Emprezariu lokál, Sosiedade Sivíl no-mós sivitas akademika sira. Media Servico Relasaun Publika M.I.

Dili, Komandu FALINTIL Forsa Defesa Timor-Leste (F-FDTL) no Polísia Nasional Timor-Leste (PNTL) kinta-feira (20/10) ne’e hala’o misa hamutuk hodi selebra festa São Miguel Arcanjo nu’udar mahein Instituisaun F-FDTL nian. Misa konjuntu ne’e prezide husi Sua Eminência Cardeal Virgilio do Carmo da Silva,SDB no hala’o iha igreja Catedral Vila Verde.

Iha nia homilia Sua Eminência Cardeal Virgilio do Carmo da Silva,SDB hateten 2022 tinan ida laos hanesan tinan bain-bain, tinan ida ne’ebe liu ba mós sei la hanesan ho tinan ida ne’ebe sei mai, tanba historikamente marka dékade rua, ita hamrik nu’udar nasaun ho ita nia soberania rasik ne’ebe foin ita selebra iha 20 Maiu Restaurasaun Independensia.

“Selebra festa padrueira F-FDTL iha kontekstu históriku ida ne’e sai oportunidade ida ba instituisaun atu hare’e fali ba kotuk, prestasaun servisu ne’ebe fó ona ba povu no nasaun ho koragem hateke ba oin atu mellhora instituisaun ninia didikasaun ba povu nia estabilidade no paz”, tenik Sua Eminência Cardeal ne’e.

Dom Virgilio do Carmo salienta liu tan katak selebrasaun ida ne’e úniku, úniku liu tan tanba instituisaun laos F-FDTL mesak deit maibé hamutuk mós ho PNTL ne’ebe halibur hamutuk atu festeja padrueiru F-FDTL nian, liu husi selebrasaun Eukarístika ne’ebe hala’o iha Catedral no ida ne’e primeira vés mai hau selebra festa São Miguel Arcanjo hamutuk ho instituisaun Defesa no Seguransa.

“Ohin momentu ida laos selebra deit festa Padrueiru maibé momentu ida atu agradese no harohan ba kna’ar ne’ebe Estadu fó fiar mai instituisaun rua (F-FDTL no PNTL) no atu membru sira hala’o kan’ar ho didiak iha instituisaun nia laran, hau nia parabéns ba F-FDTL hamutuk ho familia bo’ot PNTL nian”, hatutan Sua Eminência Cardeal ne’e.

Iha fatin hanesan, hafoin selebrasaun Eukarístika Xefe Estadu Maior Jeneral F-FDTL Tenente Jeneral Falur Rate Laek iha ninia aprezentasaun hato’o benvindu no obrigadu ba Komandu rua (F-FDTL no PNTL) hahu’u husi Jenerais, Komisariu, Ofisiais no membru hotu hodi mai simu bensaun sagradu husi Sua Eminência Cardeal Virgilio do Carmo da Silva,SDB.

“Misa ida ohin ita selebra aniversariu mahein instituisaun F-FDTL nian São Miguel Arcanjo ne’ebe ami haksolok ita halo festa hamutuk, reza hamutuk hodi ita lao ba malu lori instituisaun rua ne’e ba oin, maibé laos ida deit tanba hau hanoin ida ne’e foin maka primeira vés ne’ebe Sua Eminência Cardeal Virgilio do Carmo mai fó ba ita hafoin simu kna’ar todan husi Santa Sé tau Nia nu’udar Cardeal ba iha rai Timor Lorosa’e nu’udar rai livre independente no livre iha mundu rai klaran”, tenik Tenente Jeneral ne’e.

Biban misa ne’e partisipa husi Ministru Defesa Filomeno Paixão, Tenente Jeneral Reformadu Lere Anan Timur, Xefe Estadu Maior Jeneral F-FDTL Tenente Jeneral Falur Rate Laek, Komandante Jerál PNTL Komisariu Polísia Faustino da Costa, Segundu Komandante Jerál PNTL, Ofisias Superior, Kapitaun, Subalternu, Sargentu, Prasa husi instituisaun F-FDTL no PNTL nian inklui funsionariu no familia bo’ot instituisaun Defesa no Seguransa.

Media PNTL.            

Tibar, 12 outubru 2022 – Atu prevene no kombate krimi tráfiku droga, tráfiku umanu, terorizmu, piratarias, imigrasaun klandestina no poluisaun marítima, Timor-Leste Police Development Program (TLPDP) fasilita formasaun ba membru Unidade Polísia Marítima (UPM) hamutuk nain 42, iha Suku Tibar, Postu Administrativu Bazartete, Munisípiu Liquiça, hodi sai navegadór ne’ebé profisionál nune’e bele fó seguransa ba área tasi nian.

Xefi Seksaun Formasaun no Treinamentu UPM, Primeiru Sarjentu Polísia, José Manuel Gomes, hateten formasaun ne’e hetan apoiu finanseiru hosi TLPDP.

“Atividade ida-ne’e ita hala’o bazeia ba planu estratéjiku ne’ebé dezenvolve hosi Komandante Unidade Polísia Marítima hodi realiza treinamentu ba membru sira ho kooperasaun hosi parseria dezenvolvimentu sira hosi TLPDP hodi apoiu treinamentu no-mós finanseiru formasaun ida-ne’e”, esplika José Manuel Gomes, ba jornalista sira iha Sentru Nasionál Empregu no Formasaun Profisionál (sigla portugés; CNEFP)- Suku Tibar, Liquiça.(12/10/2022).

Nia dehan, formandu sira hamutuk ema nain 42 inklui ofisiais sub alternu, sarjentu no ajente sira ne’ebé maka durante ne’e servisu iha UPM no Komponente Naval nian.

“Formasaun ne’e ita fahe ba parte rua ida longu prazu no ida kurtu prazu. Kurtu prazu ne’e ita komesa hosi fulan agostu tinan ida-ne’e to’o agora enkuantu longu prazu nian ita sei halo iha tinan oin no formasaun ida-ne’e envolve mós instituisaun sira seluk mak hanesan komponente naval no Ministériu Agrikultura no Peskas (MAP) tanba iha futuru mai polítika Guvernu nian estabelese Autoridade Nasionál Marítima ita bele integra hamutuk hodi halo kolaborasaun di’ak liután”, salienta.

Xefi Formasaun UPM ne’e hatutan, treinamentu ne’e hanesan kontinuasaun ba materia sira ne’ebé antes ne’e membru sira simu ona alias “refreshing training” atu fó hanoin hikas fali membru sira ho di’ak tuir espesialista ne’ebé iha.

“Formasaun ida-ne’e ita foka ba materia tolu hanesan lei baze fundamentál marítima nian, sistema navegasaun no-mós treinamentu kona-ba prevensaun no kondusaun. Tanba ne’e ha’u iha esperansa katak ho apoiu másimu hosi Guvernu inklui TLPDP sei bele mellora di’ak liután kapasidade membru sira nian iha siénsia marítima nian atu sira bele sai hanesan navegadór ne’ebé di’ak tuir orientasaun nune’e bele fó rezultadu di’ak nudar servidór estadu iha area marítima nian. ”, hakotu.

Iha fatin hanesan, Cameron Knight, nudar asesór ba area marítima hosi TLPDP akresenta formasaun ida-ne’e importante hodi bele eleva kapasidade formandu sira nian iha area marítima nian.

“TLPDP mai ho hanoin ida katak Timor-Leste nu’udar estadu marítimu soberanu iha responsabilidade internasionál hodi fornese seguransa iha tasi laran entaun formasaun ida-ne’e hanesan kontinuasaun ba dezenvolvimentu instituisaun PNTL nian, tanba ita hatene katak parte importante iha nasaun ida maka seguransa marítima” dehan Cameron Knight.

Formador Cameron hatutan, nia parte sei haree nafatin oportunidade ba oin atu kontinua halo formasaun hodi mellora di’ak liután membru UPM sira sai profisonál liután.

“Pontu importante hosi treinamentu ne’e tanba formasaun ne’e rasik envolve mós komponente naval hosi F-FDTL no Ministériu Peskas nian no ami hosi TLPDP sente kontente bele hola parte durante fulan tolu nia laran halo ona formasaun ba formandu hamutuk nain 42”, tenik tán.

Entretantu formasaun baze navegadór ne’e hetan apoiu formadór hosi CNEFP hanesan Hermenegildo Egidio Nunes Guterres, nudar Nautical Officer pilot kona-ba marítima nian no Ivan Nikolov intsrutór internasionál hosi CNFP rasik.  Media Serviços Relações Públicas

Dili, Governu Timor-Leste liu husi Ministeriu Interior através Gabinete Vise Ministru Interior hamutuk Komandu Polísia Nasional Timor-Leste (PNTL) segunda-feira (17/10) ne’e hala’o serimonia hatur fatuk dahuluk ba konstrusaun edifisiu Eskuadra PNTL Dom Aleixo.

Vise Ministru Interior (VMI) António Armindo iha ninia intervensaun hateten projetu ida ne’e ita hahu’u deseñu kedas iha tinan kotuk, wainhira iha tinan 2020 hau rasik mai hare’e fatin ne’e ho ninia deseñu ne’ebe atu halo, deseñu ne’ebe hanesan ho edifisiu tuan maibé ho ninia kustu bo’ot tebes (milaun sanulu). Hafoin vizita ne’e halo, ami halo relatoriu ba Ministru Interior aktual Primeiru Ministru, atu halo re-deseñu.

“Primeiru Ministru orienta hau atu obriga tékniku sira hodi halo re-deseñu, hafoin ida ne’e ninia kustu tun mai milaun tolu hafoin tun mai miliaun ida resin; ho ida ne’e maka halo atrazu bo’ot ida iha ne’ebe tuir lolos ita halo iha tinan 2020 mas ita tenke avansa mai iha tinan 2022, maibé naturalmente akontese duni; hanesan ita hotu hatene katak fatin ida ne’e risku bo’ot ba membru PNTL hirak ne’ebe servisu iha ne’e tanba wainhira tempu udan difikulta tebes servisu membru sira nian”, tenik VMI ne’e.

Membru governu ne’e salienta liu tan katak projetu lubuk ida inklui Komandu PNTL munisipiu Dili ne’ebe mak agora tama ona ba etapa deseñu final, projetu existe iha tinan ida ne’e, ita nia eskuadra sira iha kapital Dili inklui Atauro envolve hotu iha projetu tinan ne’e, maibé difikuldade ne’ebe maka ami hasoru, ami tenke deseñu fila fali ho razaun katak ita hakarak projetu ida ho integradu hahu’u husi fondasi to’o edifisiu nia kakuluk inklui ho ninia instalasaun eletrisidade.

Iha fatin hanesan Xefe Departamentu Planeamentu PNTL Superintendente Calistro Gonzaga iha entrevista hateten projetu ida ne’e uza Orsamentu Estadu nian ne’ebe maka iha tinan rua liu ba ita atu realiza maibé la konsege no tinan ida ne’e ita realiza duni ho Orsamentu US$ 1,551,974.61 ne’ebe maka manan husi kompañia Join Venture husi Quatro Colegas, LDA ho Carya Timor-Leste, LDA ne’ebe maka sira promote ona atu halo ida ne’e ba iha tinan ida nia laran sira sei finaliza obra ida ne’e.

“Modelu edifisiu ne’e sei ho andar tanba fatin ida ne’e klot no ita presiza espasu la ba nia liras maibé ita halo ba leten tanba ne’e ita sei halo andar rua tuir deseñu ne’ebe maka ita halo”, esplika Xefe Departamentu Planeamentu PNTL ne’e.

Superintendente ne’e esplika tan katak iha ninia kompremisiu iha projetu hamutuk 19, ida ne’e maka ita hahu’u ona no sei tuir mai tan iha fulan ida ka rua, ita sei obra tan iha eskuadra Cristo Rei, Laclo, Vera Cruz no Nai Feto inklui sira seluk ba munisipiu Liquiça Kuartél, munisipiu Aileu Kuartél, munisipiu Dili Kuartél, Bairo Polísia Viqueque, Bairo Polísia Baucau no mós Postu Polísia balun ho eskuadra sira ne’ebe maka foin estabelese hanesan iha Letefoho B no iha Lorehe.

“Projetu hirak ne’ebe temi ita hahu’u ona investe ba iha prosesu aprovisionamentu, hein katak tinan oin ita bele hetan apoiu husi Orsamentu Geral Estadu (OGE) nune’e ita bele halo konstrusaun físika, montante ba iha projetu hirak ne’e sei iha hela kalkulasaun maibé ita hato’o ona BOQ ba iha Governu liu husi ADN ho CNA atu bele estuda, wainhira estudu ne’e remata ona hau hanoin katak sira bele fó informasaun ba ita atu bele realiza”, afirma Superintendente ne’e.

Entretantu, Diretúr Kompañia Join Venture husi Quatro Colegas, LDA ho Carya Timor-Leste, LDA Evaristo Soares Guterres e Silva hateten nia parte hato’o obrigadu ba governu tanba bele fó fiar mai ami atu halo konstrusaun ba edifisiu iha fatin ida ne’e.

“Ami mós sei promete atu hala’o konstrusaun ho responsabilidade no sei la sai husi BOQ no mós sei esforsu maka’as atu bele finaliza obra ida ne’e tuir tempu ne’ebe terminadu iha konstratu nia laran; ami mós hakarak atu halo dezenvolviemntu iha rai ida ne’e hodi konstribui rai ida ne’e bele ba oin, projetu ne’e rasik sei halo ho durasaun tempu tinan ida”, haktuir Diretúr Kompañia Join Venture husi Quatro Colegas, LDA ho Carya Timor-Leste, LDA ne’e.

Projetu ne’e hala’o basea ba Númeru Kontratu: ICB/002/MI-2022 ho nia Kontrator maka Kompañia Quatro Colegas, LDA ho Carya Timor-Leste, LDA (Joint Venture) ho kustu hamutuk US$ 1,551,974.61 no durasaun konstrusaun maka tinan ida (Outubru 2022- Outubru 2023).

Marka prezensa iha serimonia ne’e VMI António Armindo, Vise Prezidente Komisaun B Parlamentu Nasional ne’ebe trata asuntu Seguransa, Defesa no Negosiu Estrangeiru Cornelio Gama ‘L7’, Segundu Komandante Jerál Komisariu Polísia Mateus Fernandes hamutuk ho Ofisias Superior PNTL, Amu Kapelaun PNTL, Autoridade Lokal, inklui Komandante eskuadra Dom Aleixo hamutuk ho membru sira.

Media PNTL. 

Dili, Komandu Polísia Nasional Timor-Leste (PNTL) sexta-feira (07/10) semana kotuk hala’o serimonia despedida ba Comandante Relasaun Públika Superintendente Xefe Armando Monteiro ne’ebe maka hetan nomeasaun nu’udar Adidu Seguransa Timor-Leste iha Indónesia. Nomesaun ne’e halo basea ba Despasu Konjunta husi Ministeriu Negosiu Estrangeiru no Ministeriu Interior Nu.03/2022 de 28 de Julho ho asuntu Nomeasaun no Kolokasaun Ofisial Ligasaun Ministeriu Interior iha Embaixada Timor-Leste nian iha Jakarta-Indonesia.

Komandante Jerál PNTL Komisariu Polísia Faustino da Costa iha ninia intervensaun ba serimonia ne’e hateten PNTL iha ona esperiensia ba membru ne’ebe koloka hanesan Adidu Seguransa no ohin ita halo serimonia ida ne’e, iha buat rua. Primeiru, serimonia ofisial sira hanesan ne’e normalmente ita presija halo, katak laos atu orienta maibé atu hato’o saida maka intensaun Komandu nian ba ita nia ema sira ne’ebe ita koloka.

“Tanba ne’e maka iha pontu ida ne’e prosesu atu nomea Superintendente Xefe laos fasil, prosesu ne’ebe lori tempu naruk kuaze tinan ida resin no wainhira governu liu-liu Primeiru Ministru hanesan mós Ministru Interior indika Superintendente Xefe Armando Monteiro maka atu sai Adidu, hasai despasu iha fulan Abril tinan ida ne’e, maibé presiza iha despasu ida konjuntu ho Ministeriu Negosiu Estrangeiru maka la konsege ita la hala’o tuir tempu ne’ebe iha no foin ita hetan Ministeriu Negosiu Estrangeiru nia asinatura iha fulan ikus Jullu nian”, esplika Komandante Jerál PNTL ne’e.

Komisariu Polísia ne’e haktuir tan katak hafoin prosesu ida ne’e, Komandu mós tenke kontinua koordena no kanaliza ba parte relevante, tantu ho Ministeriu Interior rasik ho Ministeriu Negosiu Estrangeiru tantu mós liga direita ho Embaixada Indonesia nian iha Timor-Leste. Tanba ne’e maka maske despasu konjuntu simu tiha iha fulan Agostu ikus, iha fulan Setembru nia laran tuir prosedimentu ita labele haruka ba deit, tenke fó uluk naran ba, Indonesia aseita ka lae. Husi Indonesia fó resposta durante fulan tomak nia laran, ita foin hetan resposta iha loron rua ka tolu liu ba, katak Indonesia laiha dúvida kona-ba presenza Superintendente Xefe Armando Monteiro nian iha Indonesia hanesan Adidu Seguransa.

“Entaun, intensaun Komandu nian maka Superintendente Xefe Armando Monteiro laos reprezenta deit PNTL maibé reprezenta mós Timor-Leste, nu’udar PNTL ita bo’ot hatene, PNTL ninia desevolvimentu to’o ohin loron iha ne’ebe no parte ida ne’ebe maka ita presiza atu bele koalia ho parseiru liu-liu iha fatin ita bo’ot hala’o kna’ar ba; ita hatene katak PNTL iha akordu ka Nota Entendimentu rua, ida kona-ba kapasitasaun, ida kona-ba servisu hamutuk kombate krime ne’ebe ohin loron iha akordu sira ne’e balun ita presiza halo revizaun, ita fiar katak ita bo’ot nia presenza bele koordena liu-liu ho Autoridade Polísia Indonesia ninian ba area sira ne’ebe PNTL nesesita ba futuru desenvolvimentu instituisaun ninian”, hatutan Komisariu Polísia ne’e.

Iha fatin hanesan Adidu Seguransa Timor-Leste iha Indónesia Superintendente Xefe Armando Monteiro liu husi entrevista hateten hare’e ba kna’ar foun ne’ebe maka Komandu deposita mai hau hodi hala’o misaun importante ida, primeiru tuir despasu konjuntu ne’ebe iha, estruturalmente hau responsabilidade ba Misaun Diplomata liu husi Ministeriu Negosiu Estrangeiru ba iha embaixada destakadu iha Jakarta no funsionalmente hau nafatin responsabilidade mai iha Ministeriu Interior no mai Hirakria Estrutural Komandu PNTL.

“Misaun importante ne’ebe hau hala’o maka halo kooperasaun polisial oinsa atu halo desenvolvimentu kapasitasaun PNTL ne’ebe halo ho Polri (Polisia Repúblika Indonesia) iha tinan barak nia laran maibé tanba asuntu balun no mós Pandemia Covid-19, programa inportante barak maka labele realiza no husi ida ne’e oinsa bele konfiansa ne’ebe maka fó mai hau, tenta no esforsu atu bele fó oportunidade nafatin ba Instituisaun PNTL hodi nune’e partisipa ba kualker formasaun saida deit orsida ita nia parseiru Polri fornese mai PNTL”, tenik Comandante Relasaun Públika sesante ne’e.

Superintendente Xefe ne’e afirma tan katak prevensaun no kombate krime organizadu ne’ebe maka durante ne’e sai preukupasaun bo’ot ba media no mós ita nia sosiedade tantu mós ita nia nai ulun sira rai ida ne’e, tanba ita hatene katak Timor oan barak maka hela iha Indonesia, até to’o ohin loron dadus ita rasik seidauk bele hatene. Maibé ida ne’e mós problema ida ne’ebe maka konfiansa ida fó mai hau oinsa bele servisu hamutuk ho parte edukasaun ninian tantu mós liña ministerias sira seluk liu husi Adidu ne’ebe maka destakadu iha Indonesia, oinsa ami bele kria sistema ida hodi nune’e sai odamatan ida atu ita bele kontrolu Timor oan ne’ebe maka tama no sai iha nasaun Indonesia.

Hola parte iha serimonia despedida ne’ebe hala’o iha salaun enkontru Kuartél Jerál Komandante Jerál PNTL Komisariu Polísia Faustino da Costa, Segundu Komandante Jerál, Inspetúr Jerál, Komandante Komandu Operasaun, Komandante munisipiu 13, Xefe Servisu no Xefe Departamentu sira iha Kaurtél Jerál.   Media PNTL.                             

Dili-Polisia Nasional Timor-Leste (PNTL) halao kolokiu Dezenvolvimentu hamutuk ho parseru sira hodi define Planu Estratejiku oinsa atu dezenvolve instituisaun seguransa ne’e iha tinan 2023.

Segundu Komandante Jeral PNTL Komisariu Polisia Mateus Fernandes hateten liu husi kolokiu ida ne’e maka bele tau hanoin hamutuk atu kompleta planu dezenvolvimentu PNTL ligasaun ho enkontru PNTL ho parseru sira ne’ebe maka halao fulan hirak liu ba iha City8, ita hotu hatene katak dezenvolvimentu Polisia atu lao ba oin tenke iha sentidu planu estratejiku PNTL 2023-2038 ho ninia Sistema Komandu Sentralistiku, Nia hato’o asuntu ne’e iha CFP Komoro Dili, kuarta (05/10).

Nia hatutan planu estratejiku ida ne’e ita aprejenta ona ba Prezidente Republika iha nia vizita mai Komandu Jeral iha fulan Agostu, iha planeamentu ida ne’e iha investimentu boot hare ba orsamentu tetu orsamentu ne’ebe maka governu fo ba PNTL naturalmente la to’o tanba ne’e iha tinan hirak liu ba PNTL reuni uluk ho parseru sira halo ninia Planu Asaun Annual ba submisaun orsamentu, oinsa maka tetu orsamentu ne’ebe la kobre nesesidade diariu PNTL nian ita negosia ho parseru sira para atu bele responde parte balu husi situasaun ida ne’e.

“Komandu sente kontente no fiar katak ho prejensa parseru sira nian sei fo informasaun pojitivu ba dezenvolvimentu PNTL nian hahu agora ba oin,” dehan Komisariu.

Alende ida ne’e durante dezenvolvimentu PNTL nian parseru balu maka fo ona apoiu ba PNTL liu husi formasaun oi-oin tantu formasaun bazika, mediu no formasaun avansadu iha lideransa nune’e mos fo ekipamentu hanesan komputador, AntiRiot para oinsa ajuda profesionalija liutan  Polisia para halao sira nia funsaun ho diak. Parseru sira mos halo ona Sentru treinamentu iha munisipiu 13 falta munisipiu Atauro tanba foin maka transforma sai munisipiu espesial Alende ne’e hari mos Sentru Integradu investigasaun Krime Organizadu, edifisiu IT nomos tuir planu parseru sei instalatan CCTV no rehabilitasaun Sentru Detensaun iha Komandu munisipiu Dili, inklui iha tempu badak atu rehabilita Sentru Formasaun total hodi tau biblioteka iha laran para depois Polisia sira hanorin iha laran kuandu hasoru difikuldade rum abele konsulta no konfirma iha livru.

Iha fatin hanesan Vice Ministru Interior Antonio Armindo hateten Ministeriu Interior iha programa prioridade tolu (3) ne’ebe maka define ona ba tinan 2023 maka hanesan Siguransa Nasional, Boa Governasaun no Jeneru Inkluzaun, programa tolu ne’e maka inplementa desde tinan kotuk no sei kontinua iha tinan oin.

Nia hatutan iha aprejentasaun programa ohin iha elementu lubuk ida ne’ebe enkaixa hotu atu halo iha tinan oin ne’ebe maka sai hanesan ita nia mehi no ita hare kompara ho orsamentu ne’ebe maka ita iha. Ita mos bolu doadores sira mai atu hare saida maka ita bele halo no ida ne’ebe maka governu labele halo naturalmente sira bele apoiu hodi komplementa.

Prioridade inportante maka infraestrutura , Formasaun, Ekipamentu, Treinamentu, no programa foun ne’ebe makai ta husu doador sira atu ajuda maka Cibber Crime (formasaun ba membru sira para oinsa kompriende diak liu konaba Cibber crime ) ohin hau koalia ona ho Reprejentante husi Embaixada Nova Zelandia sira iha interese los tanba tinan-tinan sira halo formasaun entre Indonezia ho Nova Zelandia iha Jakarta no hau husu ba sira aldende planu ne’ebe maka iha governu tau osan utuan depois parseru sira hotu-hotu apoiu ita atu membru sira hetan formasaun.

Konaba ekipamentu tinan oin sei diak alende sira nia Stik, Gas Gun, Aljema, Farda Botas, ekipamentu esensial sir aba UPF no UPM ita preve ona orsamentu ba tinan oin.

Planu Estratejiku ne’ebe maka sai prioridade ba PNTL iha tinan 2023 maka hanesan Dezenvolve Seguransa Nasional, Dezenvolve Boa Governasaun e Jestaun Institusional no Dezenvolve Igualidade Generu; Ho sub programa espesifiku Operasaun Seguransa Interna, Jestaun Equipamentus  E Seguransa, Alimentasaun  Ransum Kombate, Jestaun Seguransa Terestres e Kosteira, Dezenvolvimentu Formasaun de Rekursu Umanu, Dezenvolvimentu Polisia Komunitaria, Dezenvolvimentu Tranzitu Rodoviaria, Prevensaun Kriminal, Servisu Investigasaun no Informasaun, Jestaun Institusional PNTL no Implementasaun Nap Gab. Jeneru,

Partisipa iha kolokiu loron ida ne’e Inspetur Jeral PNTL, Komandante Komandu Operasaun, Komandante munisipiu 13 no RAEOA, Komandante Unidade, Xefe Departamentu, Xefe gabinete no Xefe Servisu sira nomo parseru Dezenvolvimentu TLPDP, Fundasaun Azia, Embaixada nova Zelandia, JICA, Cruz Vermelha no seluktan. Media PNTL

Dili-Sentru Formasaun Polisia (CFP-sigla portuges) fo treinamentu kursu kondutor ba motorista PNTL hamutuk nain 20 resin konaba oinsa kondus viatura PNTL ho responsabilidade .

Reprejentante Komandante Jeral PNTL Superintendente Xefe Polisia Carlos Jeronimo hateten kursu ida ne’e hanesan politika Komandante Jeral nian tanba hare ba situasaun balu ne’ebe sai prekupasaun ba Komandu tanba tinan-tinan ita sempre diskuti konaba kareta, Nia hato’o asuntu ne’e iha abertura kursu iha CFP Komoro Dili, tersa (04/10).

Nia haktuirtan objetivu husi kursu ne’e atu motoristasira iha konyesementu diak no uza kareta ho diak hodi garante dura ba tempu naruk tanba kareta barak ne’ebe aat tanba deit la tau be no la troka oli entaun inplika ba Radiador no motor gripa nune’e wainhira gripa maka nia kustu manutensaun boot.

“Husu ba partisipante sira aproveta formasaun durante loron tolu (04-06) outubru ne’e ho diak saida maka ita boot sira hetan husi ne’e no wainhira atu halo viajen tenke kontrola be’e, oli, hare travaun no volante hodi evita aisedente tanba fator umanu,” dehan Inspetur Jeral.

Nia esplikatan kareta PNTL nian balu foin sai semana rua soke no kareta aat hotu nune’e wainhira soke maka implika ba Orsamentu Jeral Estadu no sai problema ba Instituisaun tanba osan balu ne’ebe ita bele poupa hodi halo dezenvolvimentu iha parte balu maibe osan la to’o tanba ita hadia kareta.

Entretantu Komandante CFP Superintendente Xefe Polisia Arquimino Ramos hateten kursu ida ne’e nudar programa no politika husi Komandante Jeral ba Sentru Formasaun Polisia no Lojistika PNTL atu bele organiza kursu ba motorista sira tanba problema barak iha PNTL darabarak kareta foun foin mak mai uza aat tia tanba ne’e maka sira ne’ebe liu husi kursu maka sei autorija lori kareta PNTL nian.

“Ba oin PNTL sei iha karta kondusaun (SIM) rua ida ne’ebe hasai husi DNTT no ida PNTL rasik maka produs liu husi kursu ida ne’e no sira ne’ebe la liu husi kursu maka sei hetan sansaun disiplinar tanba ho desijaun no medidas ne’ebe rigor mos bele ajuda resolve problema mal gastu ba viaturas PNTL nian,” Nia dehan.

Laos deit karta kondusaun ne’ebe ita hetan husi Diresaun Nasional Transporte Terrestre (DNTT) ita bele lori ona kareta Polisia nian maibe lae ba oin regra ida ne’e mak sei lao Ita boot sira mak primeru turnu no sira seluk sei tuir maitan selae ita boot sira mesak maibe PNTL iha kareta barak no atende kazu barak entaun motorista sira lori kareta oinsa tanba ne’e maka ba oin hotu-hotu tenke partisipa kursu no iha sertifikadu maka bele kondus kareta PNTL nian.

Partisipa iha serimonia ne’e Xefe Departamentu Administrasaun CFP, Kordenador Kursu, Reprejentante kompania Auto Timor, Instrutor no Motorista PNTL husi munisipiu 13 no Kuartel Jeral hamutuk nain 20 resin. Media PNTL