Uncategorized

Dili- Unidade Espesial Polisia (UEP) hahu ona Treinamentu, Formasaun no Fiziku iha aulas ba membru hotu hodi halo preparasaun oinsa atu asegura seguransa ba Eleisaun Prezidensial tinan 2022.

Komandante UEP Superintendente Xefe Orlando Gomes hateten UEP hahu daudaun ona preparasaun liu husi treinamentu no formasaun hirak ne’e hodi prepara ba eleisaun nian, Nia hato’o asuntu ne’e ba Jornalista sira iha Kuartel UEP Bairo-Pite Dili, tersa (25/01).

Nia hatutan UEP iha membru kuaje nain 800 ne’ebe durante kampana no eleisaun sei hatun hotu ba terrenu atu halo seguransa.

Kestiona konaba transporte no ekipamentu servisu komandante ne’e hatan UEP hetan apoiu husi Komandu Jeral atu ejerse nia servisu lao ho diak hodi garante seguransa ba Eleisaun Prezidensial, agora daudaun ita prepara hela membru sira atu eskolta kandidatu Prezidente Republika maibe Ita hein orentasaun husi Komandu Jeral.

“Hau labele foti desijaun, UEP prepara deit membru sira, wainhira hetan despasu husi Komandante Jeral maka ita nomeia membru CSP atu asegura kandidatu sira,” dehan Komandante Gomes.

CSP fo Eskoltu ba Alta Entidade

Komandante CSP Inspetur Xefe Marcos Soares Lopes hateten CSP iha efetivu hamutuk 265 ne’ebe koloka hodi fo seguransa ba Orgaun Soberania hat (4) maka hanesan Governu, Parlamentu Nasional, Prezidente Republika no Tribunal de Rekursu, Eis Titular nomos instituisaun hanesan PDHJ, KAK no Embaxador Estadus Unidus America.

Tuir planu Kompania CSP nian kolokasaun membru depende ba grau amiasa ba orgaun soberania Eskoltu nain 5 ba leten, membru governu eskoltu nain 3 ou 4 no ba Eis Titular hanesan Prezidente Republika, Primeiru Ministru no Prezidente Parlamentu mos iha eskoltu nain 4 ou 3.

Desde inisiu CSP hari iha tinan 2001 UNPOL sira maka fo treinamentu ba PNTL hafoin iha tinan 2004 UNPOL prepara membru sira ba trenu iha rai liur inklui Tailandia hodi prepara PNTL to’o tinan 2010 hafoin PNTL mos prepara nia membru atu sai treinador nune’e iha tinan 2010 mai oin CSP rasik mak fo trenu ba membru foun sira hodi halo eskoltu ba VIP sira.

Relasiona ho prekupasaun publiku konaba eskoltu ba Konsileru partidu KHUNTO Naimori Bucar Komandante CSP esplika: membru CSP hetan kolokasaun bazeia ba orentasaun Komandu nian wainhira iha orden no despasu mai atu koloka membru Hau ejekuta.

Iha despasu husi Primeiru Ministru ba Komandante Jeral hafoin Komandante Jeral Despasu mai Komandante Unidade no Komandante Unidade despasu tutan ba Komandante Kompania hodi ejekuta no koloka membru nain tolu (3) hodi fo eskoltu ba Naimori tanba agora situasaun ladun iha amiasa.

Lei asegura kualker sidadaun nune’e wainhira sidadaun sente la seguru no amiasadu bele halo karta ba Entidade sira wainhira hetan aprovasaun no despasu mai Hau koloka, Nia hakotu. Media PNTL

Dili- Membru Unidade Espesial Polisia (UEP) kompania Corpo Segurança Pessoal (CSP) nain 24 partisipa kursu baziku Eskoltadu hodi hasae konyesmentu no abilidade oinsa fo protesaun ba Alta Entidade sira.

Reprejentante Komandante Jeral Supertintendente Xefe Orlando Gomes hateten treinamentu ka formasaun ne’e inportante teb-tebes ba membru PNTL liu-liu iha UEP atu iha konyesementu no abilidade diak atu ejerse funsaun seguransa nian, tanba membru tomak iha responsabilidade ba ida-idak nia funsaun, Nia hato’o asuntu ne’e iha deskursu avertura segundu Kursu Eskoltadu iha Kuartel UEP Bairo-Pite Dili, tersa (25/01).

Nia haktuirtan membru PNTL iha kompania CSP sai hanesan autor prinsipal atu fo protesaun ka evakuasaun ba entidade sira nune’e ita presija trenu tekniku ba seguransa pessoal ninian tanba ita boot hirak ne’ebe maka mai husi Kontijente Jeral, BOP, COE no Peltaun Apoiu Servisu seidauk tuir trenu tekniku no taktiku konaba Seguransa Pessoal nian.

Treinamentu ka formasaun nudar fator ida ne’ebe maka determina oinsa ita halao ita nia servisu ho diak, professional hodi fo protesaun ba entidade tomak; Nesesidade ne’ebe maka presija atu nune’e ita boot sira iha formasaun diak, iha treinamentu diak atu ejerse funsaun ho diak atu salva guarda nai ulun sira, ne’e hanesan servisu ida ne’ebe esensial no espesial ba ita boot sira atu halao knar ho diak tuir Lei organika ne’ebe atribui ba UEP atu halao servisu ho professional no diak liu hodi modernija ba ita nia servisu tomak iha CSP

Durante ne’e ita boot sira halao servisu diak maibe persija aumenta tan kapasidade no aumenta tan skill iha situasaun balu ne’ebe maka mosu ita boot sira preparadu ona para bele atua no la duvida atu foti desijaun, halo atuasaun no la duvida atu lori VIP sira ba fatin ne’ebe maka seguru.

Iha okajiaun ne’e Komandante CSP Inspetur Xefe Marcos Soares Lopes hateten kursu baziku ida ne’e ho objetivu atu hasae sira nia konyesementu no abilidade hodi halao servisu operasional iha terrenu ho professional no proporsional tuir prosedimentu ne’ebe iha.

Nia hatutuan realijasaun kursu ida ne’e tanba iha tinan 2018-2021 iha membru barak husi Kontijente Jeral, BOP, COE no Peltaun Apoiu Servisu halo seguransa pesoal ba Alta Entidade la liu husi selesaun ka priense rekejitu ruma maibe tanba nomeasaun direta husi Alta Entidade.

“Husu ba partisipante sira atu hatudu disiplina nafatin hodi kumpri regras ne’ebe iha no inportante disiplina no aproveta saida maka instrutor sira fo ba imi, espera katak sei kumpri instrutor sira nia koalia no imi sei aprende saida maka sira hanorin,”dehan Komandante Marcos.

Partisipante segundu kursu hamutuk nain 24, kompostu husi mane nain 22 no feto nain rua(2) treinamentu ne’e rasik halao durante semana hat(4) ho fokus konaba siguransa pessoal, evakuasaun no proteje wainhira iha situasaun perigu. Instrutur ba kursu ne’e husi UEP no CSP

Formasaun segundu kursu bazika espesialidade CSP hetan apoiu husi parseru TLPDP.

Turnu da huluk halao iha tinan 2001 ho partisipante nain 17 agora hanesan kontinuasaun

Serimonia ne’e prejidi husi Komandante UEP Reprejenta Komandante Jeral no partisipa husi Segundu Komandante UEP, Reprejentante Komandante CFP, Reprejentante Komandante UPM, Komandante BOP ho nia Adjuntu, Segundu Komandante COE, Instrutor, partisipante no membru UEP. Media PNTL

Dili- Kazu Insidente ne’ebe akontese iha Munisipiu Covalima ne’ebe rejulta vitima nain ida (1) mate no nain rua seluk kanek oras ne’e daudaun sei iha prosesu investigasaun hodi identifika motivu husi akontesementu ne’e.

Xefe Gabinete Relasaun Publika Komandu PNTL, Superintendente Xefe Armando Monteiro esplika kazu insidente  ne’ebe maka akontese iha loron 23/01 oras tuku 4:00 madrugada iha Suailoro ne’ebe maka rejulta joventude ida ho inisial JA(23) anos mate no nain rua seluk hetan mos agresaun fizika, MA no MN Nia hato’o asuntu ne’e ba Jornalista sira liu husi Komferensia Emprensa iha Kuartel Jeral PNTL Kaikoli Dili (24/01).

Nia haktuir tan Komandu PNTL Munisipiu Covalima hola medidas detensaun 72 horas ba sidadaun nain 6 (nen) ho identidade MDD (29), LMA (33), GDM (28), MMF(29), JB(32).nudar Autoridade seguransa-PNTL destakadu iha Munisipiu Covalima hodi submete ba prosesu investigasaun no tempu badak sei tuir prosesu Primeiro interogatotio iha Tribunal Distrital Suai-Covalima, kazu ne’e rejista ho numeru prosesu NUC.0007/22.CV.SUI.

Husi akontesementu ida ne’e Komandu PNTL Munisipiu Suai-Covalima sei kontinua halo prosesu investigasaun no relata nia progresu mai Komandu Jeral hodi kontinua monitor situasaun ida ne’e.

Espera katak husi prosesu finalidade investigasaun ida ne’e ita bele identifika autor hodi responsabilija aktus ne’ebe sira halo tuir lei ne’ebe maka vigora iha Nasaun Timor-Leste.

Kronolojia: tuir deklarasaun inisiu ne’ebe maka Komandu Jeral simu iha loron 22/01 suspeitu nain 6 simu konvite hodi partisipa iha serimonia inagurasaun uma lisan, nune’e mos vitima na’in tolu (3) mos partisipa iha serimonia ne’e.hafoin asaltu no ofensa Intergidade Fijika simples no agravadu vitima (matebian) mosu perante asaltu ida ne’e; Ita hein prosesu investigasaun remata maka foin hatene lolos kazu ne’e nia lalaok.

Husu ba media atu akompana nafatin prosesu ba kazu ida ne’e atu nune’e ita fo informasaun ne’ebe maka transparante, faktual no akuradu hodi nune’e labele halo konfujaun ba publiku.

Komandante Jeral PNTL bolu ona Xefe Departamentu Justisa no Servisu Investigasaun Kriminal, kazu ida ne’e persija atensaun no involvimentu husi instituisaun seluk hanesan PDHJ atu nune’e iha independente no transparante.

Iha biban ne’e Komandu PNTL atualija mos situasaun atual semana datoluk fulan Janeiru 2022; PNTL rejista kazu insidente (6) maka hanesan Ofensas Integridade Fijika Simples, no asaltu ne’ebe maka akontese iha Becora, Taibesi, Comoro  ne’ebe maka akontese iha kapital Dili maibe la prejudika estabilidade seguransa nasionalmente, husi kazu ida ne’e PNTL Munisipiu Dili nia intervensaun ho apoiu operasional husi Unidade Espesial Polisia (UEP) halo intervensaun lalais bazeia ba kolaborasaun no kontribusaun informasaun husi komunidade no ita bele restabilija fali estabilidade seguransa.

Alende ne’e iha mos asidente singular tolu (3) ne’ebe maka akontese iha area Tasi-Tolu, Hudi Laran no Kolmera maibe iha komitmentu no vontade husi komunidade sira hodi rejolve familiarmente.

Ida ne’e maka informasaun ne’ebe maka ami atualija ba publiku hein katak ho Kritika ne’ebe maka konstrutivu ba PNTL hodi nune’e ita hamutuk oinsa atu mellora PNTL nia empenamentu servisu diak liutan hodi servi ita povu no nia rai doben Timor Leste. Media PNTL

Dili- Komandu Polisia Nasional Timor-Leste halo enkontru ho Prezidente Republika Francisco Guterres ‘Lu Olo’ hodi koalia konaba preparasaun seguransa ba kampaña no Eleisaun Prezidensial.

Komandante Jeral PNTL Komisariu Polisia Faustino da Costa hateten ohin Hau ho Segundu komandante Jeral mai hodi aprejenta servisu ne’ebe maka PNTL halao ona iha tinan 2021 no tinan 2022 foka liu ba preparasaun kampaña no Eleisaun Prezidensial ne’ebe sei mai, Nia hato’o asuntu ne’e ba Jornalista sira iha Palasiu Prezidente bairo-pite Dili, kinta (20/01).

“Enkontru ne’e sita liu konaba preparasaun PNTL ba iha eleisaun no kampaña ne’ebe PNTL prontu asegura, maske ami nia rekursu bele dehan katak sai prekupasaun ida ne’ebe ami presija hare hodi jere didiak membru sira,”dehan Komisariu.

Nia haktuirtan konaba transporte iha Orsamentu Jeral Estadu (OJE) tinan 2022 PNTL sei halo kompras ba viaturas nomos aluga kareta iha rental sira iha Dili laran ba loron 50 nian minimu kareta 32 ba atividade kampaña no eleisaun, alende ne’e sei kompleta mos ekipamentu seluk ba pessoal sira atu uza.

Situasaun seluk ne’ebe maka aprejenta ba Xefe Estadu maka identifika katak iha sentru votasaun balu dalaruma difisil asesu ba transporte,rede komunikasaun no eletrisidade tanba ne’e Komandu hare hela hodi kordena ho parte relevante atu koloka situasaun hirak ne’e ho kondisaun atu nune’e atividade hotu bele lao diak hodi asegura seguransa.

Iha enkontru ho Xefe Estadu ne’e ne’e atualija mos konaba kazu balu ne’ebe maka PNTL atende no rejistu durante ne’e, liu-liu iha tinan 2021 asidente viasaun ka tranzitu nian ema nain 59 maka lakon vida no iha fulan janeiru 2022 mos kazu asidente barak tia ona, numeru ne’e sai prekupasaun.

Komandante Jeral esplika Ami detekta katak kauja prinsipal husi asidente hirak ne’e maka neglijensia humana katak ita ema maka seidauk iha konsiensia diak bainhira lori kareta no motor nomos sira ne’ebe nain ba transporte la tau atensaun ba kondisaun viaturas ne’e maka kauza rejulta asidente ne’ebe halo sidadaun timor oan sempre lakon vida.

Enkontru semanal ohin hanesan enkontru ba da huluk iha tinan 2022, Komandante Jeral PNTL Komisariu Polisia Faustino da Costa no Segundu Komandante Jeral Komisariu Polisia Mateus Fernandes ho Prezidente Republika Francisco Guterres “Lu Olo’. Media PNTL

Dili-Komandu Polisia Nasional Timor-Leste (PNTL) halo enkontru evaluasaun servisu ligadu ho inplementasaun diretiva hirak ne’ebe maka Komandu hatun ba munisipiu Unidade no Xefe Servisu sira.

Komandante Komandu Operasaun Nasional Superintendente Xefe Pedro Belo hateten Evaliusaun Servisu Unidade Patrulamentu Fronteira (UPF) nudar topiku prinsipal tanba situasaun ikus-ikus ne’e sidadaun hirak ne’ebe maka ultrapasa fronteira ilegalmente to’o Indonezia depois POLRI kaptura no deporta mai fali ita oras ne’e daudaun kontinuasaun konaba sira nia prosesu no seguransa iha fatin karantina ne’ebe maka sira hela ba, Nia hato’o auntu ne’e iha Sentru Formasaun Polisia (CFP) Comoro Dili, (25/08).

Nia haktuirtan liu husi enkontru ne’e Komandante sira hare hamutuk forsa, frakeja no oportunidade ne’ebe iha; Frakeja ne’ebe maka Ami identifika maka distansia entre Postu ida ho postu seluk ne’ebe maka naruk no dok teb-tebes(km 12-25), limitasaun ekipamentu no transporte oinsa bele kontrola masimu tanba ne’e maka ema barak ultrapasa fronteira illegal tanba ne’e maka Komandu PNTL nafatin husu ba governu no Politiku sira atu hare asuntu hirak ne’e selae susar utuan.

“Kestaun fronteira laos Polisia deit maka resolve Ami so bele asegura kuandu iha ona fasilidade adekuadu, Hau hanoin katak Komandante Jeral hato’o ona relatoriu hotu-hotu nune’e ami fiar katak laos agora maibe tempu oin mai sei bele rezolve naton maibe sufsiente atu asegura seguransa iha fronteira,” dehan Komandante Belo.

Maske ho kondisaun minimu maibe PNTL-UPF sempre firme atu servisu ho Espiritu servi nafatin povu no nasaun hodi asegura seguransa ba rai ida ne’e.

 Enkontru ne’e Prezidi husi Komandante Jeral komisariu Faustino da Costa, no Segundu Komandante Jeral Komisariu Mateus Fernandes no partisipa husi Inspetor Jeral, Komandante Komandu Administrasaun, Komandante munisipiu, Komandante Unidade no Xefe Servisu sira. Media PNTL

Dili- Polisia Nasional Timor-Leste (PNTL) halo lansamentu Normas Organizasaun no Prosedimentu (NOP) konaba planu asaun polisiamentu komunitaria munisipiu no rejional nudar matadalan ida hodi halao servisu.

Xefe Departamentu Administrasaun e Planeamentu Superintendente Calistro Gonzaga hateten Lansamentu ida ne’e ho objetivu ita tama espasu ida ne’ebe Komandante munisipiu sira mos involve iha planeamentu atu reforsa evolusaun instituisaun nian, tanba durante ne’e iha Komandu Jeral maka sempre lansa hela nia planeamentu ne’e atu bele hatun ba kraik mais iha tinan ne’e ba oin munisipiu sira mos dezenvolve rasik sira nia planu saida maka atu bele koloka iha estratejiku instituisaun nian, Nia hato’o asuntu ne’e ba Jornalista sira iha Sentru Formasaun Polisia Comoro Dili, kuarta (12/01)

Nia haktuirtan NOP ne’e sai hanesan dokumentu padraun ida ne’ebe Komandante munisipiu sira maka sai hanesan jestor munisipal nian no nia hatene padraun ida ne’e ba atividade ne’ebe atu koloka kada tinan bele mai iha Komandu Jeral nomos ba iha parseru dezenvolvimentu TAF, JICA, TLPDP no seluktan, portantu Normas ida ne’e jeral maibe hanesan dokumentu padraun ba instituisaun.

Hafoin lansamentu NOP ne’e entrega direta husi Segundu Komandante Jeral, Embaxador Nova Zelandia no Parseru TAF atu nune’e tempu tuir mai parseru sira no ekipa Departamentu Polisiamentu Komunitaria ho Planeamentu bele halo sensibiljasaun hodi reforsa artigu balu ne’ebe iha padraun nia laran espesifiku liu para membru hotu hatene hodi haforsa sira nia involvimentu no empenamentu servisu.

Tuir ajenda ne’ebe iha semana oin ekipa sira sei tun ba munisipiu ida-idak hodi halo sosialijasaun konaba informasaun hirak ne’ebe iha padraun nia laran.

Iha okajiaun ne’e Country Representative Fundasaun Asia Hector Salazar hateten lansamentu NOP ida ohin hanesan mos reflesaun ida ba ita hotu atu hare konaba oinsa maka iha planemanetu ida ne’ebe diak laos deit iha nivel nasional maibe inportante iha nivel munisipiu atu hare konaba planu prioridade sira liu-liu to’o iha nivel suku.

Nia hatutan Planeamentu ne’e inportante maibe oinsa maka ita bele hare fila-fali laos konaba saida maka ita atu halo maibe hanesanmos reflesaun ida atu hare no avalia fila-fali saida maka ita halo ona durante ne’e.

Fundasaun Asia nudar parseru ida ne’ebe forte ho PNTL hahu iha tinan 2018 ho apoiu husi governu Nova Zelandia, iha jullu 2020 konsege estabelese estrutura Konsellu Seguransa Munisipal (KSM) iha munisipiu 12 no Rejiaun Oecusse nomos apoiu estabelese Konsellu Polisiamentu Komunitaria (KPK) ne’ebe kobre 333 suku iha teritoriu Timor-Leste tomak.

TAF kongratula no rekonyese esforsu PNTL tanba PNTL uza fundus rasik hodi espanda KPK iha munisipiu sira ne’ebe agora daudauk lao hela.

Fundasaun Asia sente orgullu servisu hamutuk ho PNTL ne’ebe lao diak teb-tebes nune’e ho kontinuasaun apoiu husi governu Nova Zelandia ho kontinuasaun programa ho titlu Programa Apoiu Seguransa Komunidade ne’ebe sei foka liu iha nivel estratejiku hodi hare posibilidade saida makai ta bele apoiu liutan tanba ne’e ita deseja hodi hare saida makai ta bele kontinua kopera no servisu hamutuk iha future.

Entretantu Embaxador Nova Zelandia Philip Hewitt hateten planeamentu iha organizasaun ka inspeturizasaun ida ne’e inportante tebes tanba planemntu nudar instrumentu ida ne’ebe bele ajuda ita atu identifika rekursu sira ne’ebe instituisaun ne’e presija.

Nia  sente kontente tebes tanba bele asisti momentu inportante ida ne’e tanba PNTL adopta ona planu asaun municipal ne’ebe hakerek iha NOP ida ne’ebe sai hanesan dokumentu legal ida ba PNTL no ema hotu bele kompriende hau hein katak Komandu munisipiu sira hotu bele utilija formatu planu asaun municipal ho diak liutan hodi bele reforsa planu servisu sira hotu nomos bele jere rekursu ho diak ba benefisia servisu hotu iha munisipiu atu nune’e bele hametin liutan servisu Polisiamentu komunitaria nudar meius prevensaun iha prosesu polisiamentu.

Ikus liu Hau hato’o parabens ba PNTL no Fundasaun Asia tanba bele to’o iha pontu ida ne’e hodi bele integra PAM hanesan NOP ida.

NOP ne’e kompostu husi artigu 13 ne’ebe lansa husi Segundu Komandante jeral hafoin lansamentu entrega direta husi Segundu Komandante Jeral, Embaxador Nova Zelandia no Parseru TAF ba Komandante munisipiu 12 no RAEOA.

Serimonia ne’e partisipa husi Inspetur Jeral PNTL, Komandante Komandu Operasaun, Komandante CFP, Komandante munisipiu, Xefe Unidade, Xefe seksaun, Xefe Departamentu no parseru sira. Media PNTL

Dili- Polisia Nasional Timor-Leste(PNTL)-Departamentu Polisiamentu Komunitaria (POLKOM) selebra Natal hamutuk ho familia boot PNTL ba susesu ne’ebe maka atinji ona iha tinan 2021

Reprejentante Komandante Jeral Superintendente Xefe Polisia Agostinho Gomes hateten hametin unidade laos deit entre membru PNTL maibe mos ho familia PNTL tomak tanba familia sira maka sai baze no fundu hodi suporta membru PNTL nia servisu lor-loron sem familia maka servisu ne’ebe sira halo labele susesu, Nia hato’o asuntu ne’e iha Sentru Formasaun Polisia Comoro Dili, Sexta (07/01).

Nia haktuirtan Departamentu POLKOM halao servisu barak iha tinan 2021 hanesan programa Edukasaun Sivika ‘Kultura Hadomi Vida’ hodi tama sai universidade iha Dili laran ka Hau hanaran Gerilia Universidade ne’ebe hahu iha Universidade da Paz (UNPAZ) no termina iha Universidade Nasional Timor-Loro Sae (UNTL) iha kampus Politeknik Hera ne’ebe maka hetan partisipasaun maximuno antusiasmu husi universitariu, dosente nomos inan aman sira.

“Hau fiar katak ho festeja Natal hamutuk ida ne’e sei hamosu kreatividade membru PNTL iha Departamentu Polisiamentu Komunitaria hodi dezenvolve POLKOM atu servi povu no nasaun tanba hetan konfiansa mai husi povu liu husi servisu ne’ebe maka sira halo ho ezemplu real ne’ebe maka ita hare, kreatividade ho lideransa Xefe departamentu POLKOM hodi hamosu ideia hodi halo Natal konjuntu no komvida familia sira mai hodi aprejeneta familia sira ida-idak,” dehan Komandante Gomes.

Atual Xefe Departamentu Justisa ne’e hatutan PNTL atu hetan susesu maka departamentu POLKOM tenke servisu makaas hodi kontinua nafatin saida maka imi halo ona durante tinan 20 tanba filosofia ne’ebe PNTL adopta maka Polisiamentu Komunitariu katak Povu maka PNTL no PNTL maka Povu, servisu no susesu PNTL depende ba koperasaun diak entre PNTL no komunidade.

Momentu Hau rasik komanda Komandu PNTL munisipiu Manufahi vizita suku balu estabelese Konselu Polisiamentu Komunitaria (KPK), mentorija Ofisial Polisia Suku (OPS) atu servisu hamutuk ho komunidade atu nune’e bele hetan komfiansa mai husi povu no ida ne’e susesu.

Unidade iha instituisaun PNTL importante hodi hametin unidade entre Superior ho Sub-Ordinadu, kolega ho kolega nomos familia sira maibe familia deit la to’o ho ita nia vizinu, amigu no kolega sira ho nune’e sira sei suporta servisu PNTL nian sai susesu liutan.

Hau fiar ho imi nia servisu hamutuk, servisu makaas ho sensiaridade ho neon ho laran no responsabilidade POLKOM sei halo servisu diak liutan hanesan servisu ne’ebe imi halo tia ona iha tinan 2021.

Serimonia Natal hamutuk ne’e ho Tema “Hametin Unidade Hodi Haburas Kreatividade Iha Polisiamentu Komunitaria” no partisipa husi Xefe Departamentu Polisiamentu Komunitaria Nasional Superintendente Antonio da Lúz, Xefe Departamentu Tranzitu Seguransa Rodoviariu  Superintendente João Belo Reis, Amu kapelaun PNTL Inspetor Xefe Pe. Nelino Americo OCARM, parseru Fundasaun Azia, Ofisiais Superior, Ofisiais Sub-Alternos, Sarjentu, Ajente kombidadu no familia boot PNTL. Media PNTL

Dili- Polisia Nasional Timor-Leste (PNTL) sei asegura Seguransa ba prosesu Eleisaun Prezidensial tinan 2022 ne’ebe maka semana oin Prezidente Republika sei dekreta kalendariu.

Komandante Jeral PNTL Komisariu Polisia Faustino da Costa hateten PNTL hanesan instituisaun estadu tanba ne’e kualker atividade saida dever polisia nian liu-liu atu garante katak seguransa ba kampana no eleisaun lao diak maka PNTL sei servisu hodi asegura, Nia hato’o asuntu ne’e ba Jornalista sira hafoin abertura Vasina Pfizer Booster iha Kuartel Jeral PNTL Kaikoli Dili, sexta (07/01)

Komisariu ne’e haktuirtan hanesan Hau dehan tia ona ba ita boot sira no ba publiku katak PNTLnia obrigasaun maka ne’e liu-liu membru sira iha terrenu halao servisu tuir lei no ordem tuir Konstituisaun RDTL haruka PNTL nudar instituisaun estadu.

“Ami sira Komandante nia obrigasaun maka ne’e hare saida maka nesesita ba sira atu bele halao sira nia servisu ho diak liutan,” dehan Komandante Jeral.

Atu asegura prosesu demokrasia ne’e lao ho paz no hakmatek maka PNTL sei hatun membru tomak hodi asegura seguransa ba prosesu Eleisaun Prezidensial periodu 2022.

Atu apoia servisu membru sira nian iha terrenu maka Komandu sei fasilita transporte hodi halo kompra kareta operasional ho Orsamentu Jeral Estadu(OJE) 2022  hamutuk 90 resin fiar katak depois de ejekusaun OJE ne’e bele inisia ona prosesu atu nune’e bele utilija, maibe iha OJE ba PNTL tinan ne’e mos ita preve atu aluga kareta 65 signifika kuandu ida ne’ebe iha prosesu aprovijionamentu kuandu atraja maka bele aluga no utilija hodi fo ba membru sira halao servisu. Media PNTL

Dili- Polisia Nasional Timor-Leste (PNTL) kontinua simu vasina Pfizer Booster hodi hasae imunidade membru PNTL atu nune’e kontinua halao servisu ho saudavel.

Komandante Jeral PNTL Komisariu Polisia Faustino da Costa hateten governu liu husi ministeriu relevante desidi atu kontinua vasina Pfizer laos deit ba labarik tinan 12-17 maibe kontinua mos ba ema adultu programa ne’e lao ona no hanaran Booster Pfizer (Booster katak vasina ne’ebe aumentatan), Nia hato’o asuntu ne’e iha abertura vasina iha Kuartel Jeral PNTL Kaikoli Dili, sexta (07/01).

Komisariu ne’e husu ba membru PNTL atu aproveta oportunidade ida ne’e desde ke Ministeriu Saude iha posibilidade nafatin apoia ba PNTL nia membru sira maka Komandu ho laran luak tebes tanba saude inportante.

Hau hakarak atu dehan ba ita hotu iha ne’e katak iha nasaun seluk vasina sira hanesan ne’e ita sira Komandante iha ne’e tenkeser selu laos gratuita maibe iha Timor-Leste buat hotu gratuita mos sei iha nafatin ema ida rua ke sei hanoin dehan katak maske gratuita mos lakoi, Hau hanoin katak ita tenke tau situasaun ida ne’e didiak.

Apela ba membru tomak atu aproveta ita nia governu nia programa ida ne’ebe gratuitu, ita tenkeser partisipa tanba ne’e diak ba ita ida-idak nia saude tanba tuir relatoriu ne’ebe iha no fo sai liu husi komferensia emprensa iha Timor-Leste kontinua rejista kazu ida rua-rua ate iha munisipiu mos iha entaun dala idatan dehan ba membru PNTL tomak ho nia familia aproveta ne’e para diak ba ita, ita nia familia no instituisaun nomos diak ba ita hotu.

Governu Timor-Leste desidi ona halo programa vasina nasional COVID-19 ba sidadaun hotu-hotu no iha modelu vasina oin tolu maka hanesan: AstraZeneca, Cinovax no ikus liu Pfizer ne’ebe maka nasaun barak iha mundu utilija.

Atu termina Komandante Jeral agradese ba ekipa Mediku PNTL no Ministeriu Saude ne’ebe mai husi Sentru Saude Vera-Cruz katak susesu no saude diak ba ita boot sira. Aproveta hato’o mos tinan foun diak, ksolok, paz no saude diak ba ita.

Programa vasina Pfizer Booster ne’e partisipa husi Segundu Komandante Jeral PNTL Komisariu Polisia Mateus Fernandes, Komandante Komandu Operasaun PNTL, Superintendente Xefe Pedro Belo, Xefe Departamentu Justisa PNTL, Superintendente Xefe Agostinho Gomes, Xefe seksaun, Xefe Departamentu, Xefe Servisu, Ofisial Superior, Ofisial Sub-Alternus, Sarjentu, Ajente no Funsionariu Sivil. Media PNTL

Dili- Ekipa konjunta PNTL (Departamentu Justisa) no F-FDTL (Unidade Polisia Militar) ensera operasaun disiplina konjunta ho kodigu “HABERAN” ne’ebe maka instituisaun rua ne’e halao durante semana tolu (3) iha kapital Dili hodi prevene infrasaun disiplina.

Xefe Departamentu Justisa PNTL Superintendente Xefe Polisia Agostinho Gomes hateten atividade ne’ebe halo iha terrenu operasional lao diak liu husi patrullamentu, cek point no responde kazu balu ne’ebe maka involve membru militar F-FDTL no PNTL, operasaun ne’e halao durante semana tolu (3) hahu loron 13 dezembru to’o 03 Janeiru 2022, Nia hato’o asuntu ne’e iha Kuartel Jeral PNTL Kaikoli Dili, tersa (04/01).

Komandante ne’e haktuirtan operasaun ne’ebe maka ita halao maske iha tempu badak deit maibe konsege atinji duni apoiu operasaun ne’ebe ita hakarak maka halo liu prevensaun infrasaun disiplina husi membru instituisaun rua ne’e hatudu duni disiplina durante periodu Natal no Tinan Foun ho realidade katak laiha problema entre membru instituisaun rua ne’e hodi kontribui ba paz no estabilidade. ne’ebe fo oportunidade boot ba ita nia komunidade sira ne’ebe hela iha kapital nasaun ne’e hodi festeja Natal no Tinan foun ho hakamtek no trankulidade nia laran ne’e maka esforsu ne’ebe ita hotu halo maske kiik oan, utuan no badak maibe ne’e maka buat ne’ebe ita bele halo.

“Operasaun ohin ita termina tanba ne’e hau lori Departamnetu Justisa nia naran hato’o agradesementu no parabens ba membru militar F-FDTL no membru Departmanetu Justisa PNTL ne’ebe maka involve diretamente iha operasaun HABERAN, obrigadu ba imi nia servisu no dedikasaun ne’ebe maka imi halao tia ona,” dehan Komandante Gomes.

Ex Komandante munisipiu Manufahi ne’e enkoraja membru sira atu servisu hanesan jerasaun heroi sira tanba ita maka kontinua sira nia dedikasaun, sakrifisiu no sofrimentu ne’ebe fo hodi sosa nasaun ne’e entaun ita tenke hamrik metin hodi hatudu ba povu no estadu katak ita bele sai forsa regular ho referensia boot ne’ebe maka uluk ita nia forsa FALINTIL funu maske ho situasaun difisil maibe ho disiplina.

Iha okajiaun ne’e Komandante Interinu Unidade Polisia Militar, Kapitaun Francisco Xavier dos Reis Neto hato’o parabens no obrigadu ba membru Polisia militar (F-FDTL) no membru Polisia Profost (PNTL) durante imi nia servisu ami ovserba diak tebes hodi halo kordenasaun diak nomos imi iha hanoin no inisiatiba hodi hadia no garante disiplina membru husi instituisaun rua ne’e durante periodu Natal no Tinan Foun nune’e ema hotu bele haksolok hodi festeja loron boot ida ne’e.

Nia haktuirtan Ita la sura ita nia susesu maibe ita sura no hanoin ba ita nia funsaun servisu tanba ita nia susesu laos ita mak avalia maibe Nai Ulun no Povu sira maka bele avalia ida ne’ebe diak no ida ne’ebe aat. Ita labele sura ita nia kolen tanba ita nia kolen la sura no la tetu ho ita nia heroi sira. Nudar membru instituisaun rua hamrik nudar herois sira nia jerasaun hamrik iha sira nia fatin hodi servi ba povu no nasaun ida ne’e atu sai diak liutan.

“Ba imi hotu kopera malu diak hare malu nudar timor oan hanesan membru husi instrumentu estadu laos membru ba instrumentu privadu, nudar timor oan ita mak bele hadia no halo diak liutan ba ita nia instituisaun hodi fo garantia ba povu no nasaun atu fo fiar no laran metin ba instituisaun rua ne’e no ita bele hadia diak liutan iha futuru tanba instituisaun rua ne’e maka nasaun nia seguransa hodi fo seguransa ba povu no Defeza ba nasaun ida ne’e atu sai diak liutan,” Kapitaun Neto apela.

Nia hatutan labele hanoin atu sura saida maka imi hanoin no halo diak ba imi nia funsaun no imi nia servisu no misaun ne’ebe imi okupa ida ne’e maka inportante liu. Ba imi membru sira ami nain rua Komandante loron ida maka ami tun ba terrenu hodi hare imi nia servisu, ami nota katak imi servisu duni no iha rejultadu ema hotu haksolok nune’e ita bele redus infrasaun disiplinar ne’ebe komete husi membru instituisaun rua ne’e.

Ohin ita halo enseramentu ba operasaun HABERAN, enseramentu ida ne’e laos final maibe hanesan serimonia kiik oan ida ne’ebe maka ita bele halo deskansa para ita bele halo ita nia isin kolen libre utuan nune’e ita bele hanoin fali aban bainrua ba oin to’o fulan Dezembru ne’e ita bele halo saida.

Dala idatan hau hato’o parabens no agradese ba imi hotu nune’e ita hotu saude diak hodi hasoru malu fali iha loron ohin ita parada hamutuk iha ne’e hodi ensera operasaun ida ne’e.

Serimonia enseramentu Operasaun haberan ne’e partisipa husi Ofisial F-FDTL no PNTL sira hotu, Sarjentu, Soldadu no Ajente sira. Media PNTL