Uncategorized

Dili-Komandante Jeral PNTL no Segundu Komandante Jeral atualija situasaun seguransa teritoriu nasional  ba Prezidente Republika (PR) Francisco Guterres Lu-Olo katak situasaun lao diak.

Komandante Jeral Komisariu Polisia Faustino da Costa hateten   situasaun jeral teritoriu nasional lao diak maske iha akontesementu balu hanesan kazu Homesidiu iha Liquica, akontesementu iha Lahane no informasaun konaba akontesementu balu iha Kovalima, Nia hato’o asuntu ne’e ba Jornalista sira iha Palasiu Prezidensial Bairo-pite Dili, kinta(29/07).

“Durante semana ida ne’e nia laran iha kazu akontesementu hamutuk 50 ida ne’e maka Ami atualija ba Xefe Estadu,” dehan Komisariu.

Iha biban ne’e lideransa maximu instituisaun seguransa ne’e fo sai ba publiku katak governu dekreta ona serka sanitaria ba munisipiu Ermera no mantein serka sanitaria iha Dili tanba ne’e ema hotu tenke mai ho hanoin ida katak virus ne’e iha, Estadu Emerjensia lao no tenke evita aglomerasaun (halibur malu) iha ne’ebe deit no evita halo festa ne’ebe halibur ema barak tanba Komandu sei hare no atua selae fo inplikasaun boot.

Komandu fo ona ordem eskrita ba munisipiu atu kontrola no evita aglomerasaun, nune’e mos ba sidadaun hirak ne’ebe maka tuir ona vasinasaun COVID-19 atu nafatin halo imi nia atividade maibe labele fasilita ema ne’ebe maka la vasina se lae Polisia sei kaer no detein ema ne’ebe lori kartaun no ida ne’ebe maka fo nia kartaun kazu ne’e akontese barak; Orientasaun ida ne’e laos deit ba postu entrada no saída husi kapital Dili ba munisipiu maibe mos ba Ermera no munisipiu hotu hodi evita aglomerasaun, Se numeru infetadu COVID-19 tun ona ida ne’e diak liu ita lakoi kazu sae fila-fali maka tenke disiplina.

Nune’e mos sidadaun sira ne’ebe tenta falsifika rejultadu swab test Ami sei detein hotu, ita tenke konsiente katak moras ne’e risku no ita lakoi atu variante virus foun mosu barak liutan maka ita tenke halo prevensaun tuir protokolu saude mundial.

PNTL kontinua asegura fronteira Komandu orienta atu la tolera sedeit maka halo atividade illegal, ita kordena ho parte relevante sira oinsa atu asegura inklui mos ita identifika timor oan hira maka hela iha Indonezia ilegalmente, informasaun ne’e ita halo no iha tempu ruma bele iha deportasaun husi Indonezia mai timor.

Iha biban ne’e Prezidente Republika husu ba PNTL atu kontinua halo servisu bazeia ba lei, regulamentu no prosedimentu ne’ebe maka iha. Media PNTL

Dili-Durante fulan Jullu (1-26) Polisia Nasional Timor-Leste (PNTL) kaptura sidadaun nain 33 ne’ebe pasa fronteira ilegalmente ba Indonezia hodi submete ba prosesu.

Komandante Jeral PNTL Komisariu Faustino da Costa hateten husi loron 1-26 Jullu autoridade seguransa kaptura sidadaun nain 27 inklui sira ne’ebe komunidade rasik identifika no ikus mai Polisia ba foti no kaptura nain 6 total hamutuk ema nain 33; sidadaun hirak ne’e halao atividade negosiu illegal iha fronteira no joven sira tenta ultrapasa fronteira ilegalmente ba Indonezia, nia hato’o asuntu ne’e ba jornalista sira iha Kuartel Jeral PNTL Kaikoli Dili, tersa (27/07).

Komisariu haktuirtan iha postu sira halo mos cek poin, durante semana rua ne’e nia laran identifika falsifikasaun dokumentus tolu hanesan imprime kartaun falsu, tanba ne’e maka halo mos prosesu ba diretur kompania imprime balu iha Dili laran, segundu ema sira ne’ebe vasina kompletu fo sira nia kartaun kinur ba ema seluk ne’ebe rejista kazu 7 hodi detein no prosesu no mos ema ne’ebe nunka tuir swab derepente iha falsifikasaun rejultadu swab test para sai husi Dili ba munisipiu kazu ne’e mos ita halo prosesu.

“Polisia Unidade Espesial, UPF, Komandu munisipiu no Unidade Polisia Maritima kontinua reforsa seguransa iha fronteira terestre no parte tasi; Polisia lahare deit kestaun fronteira Terrestre maibe hare mos deslokasaun tanba Estadu Emerjensia a nivel nasional maibe serka sanitaria ne’e ba kapital Dili nune’e sidadaun hirak ne’ebe halo viajen husi Dili ba munisipiu tenke tuir prosedimentu tanba ne’e maka ema balu aproveta ida ne’e hodi halo falsifikasaun hodi imprime kartaun falsu ho kuantia boot no faan kada kartaun $5, iha mos sidadaun nain ida ne’ebe maka Polisia kaptura wainhira atu halo viajen ba Maliana lori ho kartaun kinur mamuk ne’ebe hein atu priense nia mos iha lista ema ne’ebe hatama ona osan, hahalok ne’e konsidera krime ne’e falsifikasaun ida ne’ebe ita halo prosesu.”dehan Komandante Jeral.

PNTL mos halo atividade direta ba Oe-Cusse RAEOA hahu kedas husi Dili oinsa atu halo deslokasaun ita prepara halo identifikasaun nune’e mos orientasaun fo ona ba Komandante sira katak viajen Dili-Covalima, Dili -Maliana Polisia sei cek se sidadaun ne’e laos orijen husi munisipiu refere maka husu tuir nia objetivu viajen saida, nune’e buat ne’ebe maka akontese iha semana ida liuba kotuk ita halo kapturasaun joven lubuk ida husi Dili, Ainaro no Manatuto hakarak ba vizita familia iha Maliana maibe laiha objetivu ida klaru entaun ita prosesu no haruka sira fila impede sira nia viajen ba Bobonaro.

Atu termina Komandante Jeral haktuir katak asuntu fronteira ne’e kestaun disiplina se ita lakoi variante virus foun Delta tama timor maibe PNTL no F-FDTL mesak halo servisu iha fronteira ne’e la fasil, atu kombate atividade illegal presija ema hotu nia kontribuisaun hodi solusiona. Media PNTL                           .

Dili, Komandu Polísia Nasional Timor-Leste (PNTL) liu husi ekipa konjunta hanesan Servisu Investigasaun Criminal Nacional (SICN) hamutuk ho Servisu Informasaun Polísia (SIP), Servisu Informasaun Militar (SIM) no Servisu Nasional Informasaun (SNI) kaptura ona suspeitu mane na’in ha’at ne’ebe involve iha kazu homesidiu ida ne’ebe akontese iha loron 9 fulan Jullu tinan ne’e.

Liu husi Konferensia Imprensa ne’ebe hala’o iha segunda-feira (26/07) ne’e Porta Voz Komandu PNTL Superintendente Xefe Arnaldo Araújo ne’ebe akompaña husi Xefe SICN Superintendente Xefe José Neto Mouk hateten suspeitu hirak ne’e ekipa konjunta kaptura iha idak-idak nia residensia.

Insidente refere akontese iha loron 9 fulan Jullu 2021, iha oras mais ou menus 00:45 otl iha area Fomentu, Aldeia Delta 3, Suku Comoro, Postu Administrativu Dom Aleixo, munisipiu Dili ne’ebe rezulta vitima ida ho naran Hilario Vitalicio Soares mate iha fatin akontesimentu.

Relasiona ho kazu refere, maka iha loron 23 fulan Jullu tinan ne’e, Servisu Investigasaun Kriminal Nasional (SIKN) simu Mandadu Detensaun husi Tribunal Distrital Dili ho númeru NUC.0155/21.PNSIC. Tanba ne’e, iha loron 26 fulan Jullu iha oras mais ou menus 08:00 otl, husi SIKN ezekuta mandadu refere hodi halo detensaun ba suspeitu na’in ha’at ne’ebe maka komete iha kazu homesidiu refere.

Agora dadaun, suspeitu hirak ne’e detein hela iha sela Komandu PNTL munisipiu Dili hodi hein aprezenta ba Tribunal Distrital Dili hodi submete ba iha Primeiru Interogatoriu. Suspeitu hirak ne’e ho inisial J.S.P, J.S, M.S.C no M.M.C.P

Media PNTL.    

Dili-Komandu Polisia Nasional Timor-Leste (PNTL) halo reuniaun Konsellu Superior (KS) hodi foti desijaun ba membru ne’ebe komete iregularidade.

Sekretariu KS Superintendente Xefe Carlos Jeronimo hateten reuniaun ohin hanesan reuniaun dahuluk iha tinan 2021 hodi halo diskusaun ba kazu tolu (3) hanesan kazu Homesidiu iha Ainitas hun, kazu Burla no Abandona servisu, nia hato’o asuntu ne’e ba Jornalista sira iha Kuartel Jeral PNTL Kaikoli Dili, Sexta (23/07).

“Komforme opiniaun membru Konsellu kazu Ainitas hun maioria votasaun ba demisaun, kazu falta servisu votus afavor 15, kontra 8 no maioria demisaun nune’e mos kazu burla rejultadu votasaun afavor 22, no kontra 1; Rejultadu votasaun maioria membru Konsellu Superior desidi fo demisaun ba membru hirak ne’ebe maka komete kazu ne’e,” Nia dehan.

Liu husi Reuniaun ne’e Konsellu Superior foti desijaun ba kazu hirak ne’ebe maka nia prosesu hotu ona.

Alende ne’e reuniaun Konsellu superior durante loron tomak ne’e koalia mos konaba preparasaun seguransa ba Eleisaun Prezidensial no Eleisaun Parlamentar nomos situasaun seguransa enjeral agora.

Reuniaun ne’e prezidi husi Komandante Jeral PNTL Komisariu Faustino da Costa no Segundu Komandante Jeral Komisariu Mateus Fernandes no partisipa husi Komandante PNTL munisipiu 12 nomos Komandante Operasaun Nasional, Komandante Administrasaun no Komandante Unidade UPF, UPM no UEP. Media PNTL

Dili, Komandu Polísia Nasional Timor-Leste (PNTL) durante semana rua nia laran konsege kaptura sidadaun Timor oan hamutuk na’in 9 ne’ebe tama ilegalmente liu husi fronteira no sidadaun estrangeiru na’in 14 seluk ne’ebe maka deporta ona ba sira nia rai.

Lia hirak ne’e hato’o husi Komandante Jerál PNTL Komisariu Polísia Faustino da Costa akompaña husi Segundu Komandante Jerál Komisariu Polísia Mateus Fernandes hafoin hala’o enkontru semanal ho Prezidente Repúblika Dr.Francisco Guterres Lu-Olo kinta-feira (22/07) semana ne’e hodi aprezenta mós situasaun seguransa aktual iha nivel teritoriu nasional ne’ebe lao diak no kontroladu.

“Maibé iha ita nia sidadaun balun maka tenta hodi halo nafatin aktividade ultrapasa fronteira illegal, ita halo ona kapturasaun ba sira (Sidadaun na’in 9-red) ne’ebe koko atu sai, balun ne’ebe sai ona ita koordena no iha balun ne’ebe ita deporta, seguransa nafatin iha fronteira ita tau/koloka koordena ho entidades hotu, parte relevante liu-liu ita nia lideransa komunitaria sira iha fronteira, tantu parte tasi nian mós”, esplika Komandante Jerál PNTL ne’e.

Komisariu Polísia ne’e afirma tan kona-ba variante Virus Delta ne’ebe maka iha rai ketan Indonesia komesa iha ona, oinsa atu virus ne’e labele tama mai iha ita nia rai maka ita hotu tenke prevene aktividade illegal tantu ema no sasan tanba polísia sei la tolera ida ne’e atu akontese. Sidadaun hirak ne’ebe polísia kaptura, uluk kna’nain kumpri lai regras Estadu Emergensia (EE) nian, submete ba Kuarantena, wainhira livre ona husi Kuarantena maka kontinua ho prosesu investigasaun. Iha loron 17 fulan ne’e akontese mós kazu ida, inan ida ne’ebe laiha neon hodi soe nia oan iha lixeiru, kazu refere ita prosesu hela.

“Iha enkontru ne’e Xefe Estadu nafatin husu ba autoridade seguransa atu mantein aktualiza situasaun seguransa iha nivel teritoriu nian; husu atu PNTL kontinua kumpri kna’ar no responsabilidade hodi garante seguransa ba ema hotu”, tenik Komisariu Polísia ne’e.

Iha biban ne’e, autoridade másimu instituisaun seguransa ne’e hato’o Parabéns ba Timor oan hotu iha âmbitu komemorasaun loron mundial Saúde nian, husu atu hotu-hotu nafatin kumpri regras EE nian hanesan fase liman bebeik, mantein distansia sosial atu ema hotu iha saúde ne’ebe diak.

Media PNTL.     

Dili-Komandu Polisia Nasional Timor-Leste (PNTL) rejista kazu insidente 63 durante semana ne’e nia laran (28 junho to’o 17 jullu) 2021 hodi prosesu.

Porta Voz PNTL Superintendente Xefe Arnaldo Araujo esplika kazu hirak ne’ebe maka rejista kompostu husi Omisidiu 2, Soe Bebe 1, Asaltu 27 inklui asaltu membru PNTL nain 1, Ema Mate 1, Abuzu Sexual 1, Violasaun Sexual 1, Arma Branka 1, Danu 2, Suisidiu (Oho An/ tara an) 4 Violensia Domestika 16, Ahi han Uma  3 iha Manatuto no Baucau, Tuda Kareta  1, Ameasa 2 no Furto 1, nia hato’o asuntu ne’e liu husi komferensia emprensa iha Kuartel Jeral PNTL Kaikoli Dili, (19/07).

Komandante ne’e haktuirtan entre kazu hirak PNTL rejista mos kazu assaltu membru PNTL (UPF) iha Domingo madrugada loron 18/07oras 02:56 Otl, Delta Base simu informasaun husi PNTL Armada 33 katak, iha ema grupu ida ne’ebe mak halo festa iha Bar Timor Top maka halo asaltu hasoru membru UPF (Agente Policia Gerson Viana) iha area Branca, informasaun ne’e Delta Base pasa ba Cristu Rei 51 ba kedas iha fatin akontesementu ho apoiu husi ekipa Task Force.

Kontinuasaun husi problema ne’e maka iha fali grupu ida ne’ebe maka ho sasan kroat hein fali iha area Metiaut besik Ótel Novo Horizonte nia oin hodi nune’e rezulta kareta Pajero ho chapa matrikula 11.039 tl  hetan estragus,

Kaju ne’e rejistu ona iha Eskuadra Nain Feto, suspeitu identifikadu no sei buka tuir suspetu ni paradeiru.

Iha loron hanesan akontese mos kazu soe bebe iha aldeia Lemocari suku Manleuana Delta Base simu informasaun husi informador ho naran Januario Oleiva nudar Fungsionariu ambulansia,

informador hetan informasaun husi nia Maun Moises katak, Bebe ida tanis hela iha saku laran

Bebe ne’e tau iha plastiku hafoin tau tan iha pasta laran e tautan iha saku mutin ida, hafoin rona labarik tanis sira kore saku, pasta no plastiku hetan Bebe sei moris ho kondisaun diak nooras ne’e halao tratamentu iha Centro Saude Comoro.

Iha biban ne’e Porta Voz ne’e haktuir iha semana kotuk PNTL kaptura sidadaun nain tolu (3) ne’ebe maka utilija ema seluk nia kartaun vasina COVID-19 hodi halo viajen ba munisipiu (2) ba Maliana, no (1) ba Baucau wainhira ekipa husi postu integradu identifika ema ne’e nia naran iha kartaun eleitoral la hanesan ho kartaun vasina ne’ebe maka nia lori hahalok ne’e kontra lei no labele akontese tanba ne’e husu ba komunidade sira atu labele utilija ema seluk nia kartaun vasina hodi halo viajen ba mai.

Sidadaun nain tolu ne’e oras ne daudaun Centro Integrado Gestão Crise maka foti hodi halo identifikasaun.

Antes ne’e governu deklara katak sidadaun hirak ne’ebe maka simu ona vasina COVID-19 kompletu bele uza sira nia kartaun vasina hodi halo viajen husi Dili ba munisipiu maske Dili. aplika hela Serka Sanitaria.  Media PNTL

Liquiça, Komandu Polísia Nasional Timor-Leste (PNTL) liu husi Unidade Espesial Polísia (UEP) seksaun Explosive Ordinance Disposal (EOD) hamutuk ho Kompañia Incanto Weste Unipessoal.Lda sexta-feira (16/07) ne’e harahun material Explosivo Komersial ba asuntu konstrusaun foun Portu Baia Tibar.

Komandante Jerál PNTL Komisariu Polísia Faustino da Costa ba jornalista sira hateten Timor-Leste iha Lei liu-liu Dekretu Lei Nu.7/2020 nian hateten katak Timor-Leste bele explora tanba material explosivo sira ne’e, primeiru uza ba aktividades militar no ida mak ba aktividades komersias, agora material sira ohin ita destroi ne’e material ba komersias nian.

“Tuir Lei ne’ebe hau sita ne’e katak hahu’u kedas, molok atu kompañia ida ne’ebe atu hatama PNTL tenke akompaña hanesan antes hola material sira ne’e husi ne’ebe, ho nia kuantia hanusa; akompaña kedas husi nasaun orijen to’o mai ita nia rai hodi asegura, nune’e mós durante utilizasaun ne’e PNTL maka sei jere ida ne’e ho sintidu ida katak sura, sai hira-hira no nia modelu oinsa hafoin tuir Lei ne’e relata ba Komandu no Komandu sei aprezenta ba governu, ne’e ita halo kada semana”, informa Komandante Jerál PNTL ne’e.

Komisariu Polísia ne’e salienta tan katak material hirak ne’e tama hahu’u kedas husi tinan 2019 ne’ebe maka ho nia kuantia ne’ebe bo’ot ba projetu Timor Gap (Projetu Tibar), maibé utilizasaun ida ne’e la konsege utiliza hotu, maibé saida maka akontese desde sasan ne’e sai husi nasaun orijen membru PNTL liu-liu seksaun EOD akompaña kedas no durante sasan ne’e tau iha Dili no lori mai to’o area Liquiça la utiliza, ne’e PNTL asegura durante oras 24 to’o ohin loron.

Tuir nota ne’ebe Media PNTL asesu liu husi kompañia Incanto Weste Unipessoal.Lda katak aktividades destriosaun ne’e halo basea ba Despasu konjuntu Nu.1/2017, 16 Agostu relasiona ho utilizasaun material explosivo ho ninia orijen husi PT.Dahana-Indonesia, hodi utiliza ba nesesidade prosesu konstrusaun Portu Foun Baia Tibar. Maibé projetu Marine and Land Works liu husi aktividade Blasting ba projetu refere remata, material explosive komersial utiliza la hotu no restu sei rai hela iha armajen explosivo komersial iha Kasait, Ulmera, Liquiça ne’ebe hetan kontrolu no seguransa husi UEP-PNTL no tenke halo destroisaun ba material explosivo refere.

Hola parte iha aktividade distruisaun ne’e maka Vise Ministru Interior, Komandante Jerál PNTL, Komandante PNTL munisipiu no Xefe Departamentu Justisa.  Media PNTL.

Dili, Komandu Polísia Nasional Timor-Leste (PNTL) liu husi ekipa konjunta hanesan Servisu Investigasaun Criminal Nacional (SICN) hamutuk ho Servisu Informasaun Polísia (SIP) konsege kaptura suspeitu ba kazu omesidiu ida ne’ebe maka akontese iha loron 07 fulan Jullu tinan 2021 iha suku Madohi, Postu Administrativu Dom Aleixo, munisipiu Dili.

Liu husi Konferensia Imprensa ne’ebe hala’o iha sexta-feira (09/07) ne’e Porta Voz Komandu PNTL Superintendente Xefe Arnaldo Araújo ne’ebe akompaña husi Xefe SICN Superintendente Xefe José Neto Mouk deklara ba públiku kronologia husi akontesimentu ne’ebe rezulta membru PNTL ida tenke lakon nia vida.

Iha loron 07 fulan Jullu tinan ne’e iha oras 00:25 akontese kazu omesidiu ida iha aldeia Anin Fuik, suku Madohi ne’ebe rezulta vitíma Rosantina dos Santos ne’ebe hanesan membru PNTL ho deviza Primeiru Sarjentu, servisu iha eskuadra Dom Aleixo hetan sona husi suspeitu ne’ebe hanesan mós vitíma nia kaben ho inisial A.S.S alias A.M. Hafoin akontesimentu ne’e suspeitu halai se’es husi fatin akontesimentu, no vitíma hetan apoiu husi familia hodi transporta ba Sentru Saúde Comoro maibé la konsege salva vitíma nia vida.

Nune’e iha loron 07 ne;e kedas Komandu Jerál PNTL liu husi Komandante Jerál hasai kedas Ordem ba Komandante munisipiu 13 no Xefe Unidade hodi alerta no lkokaliza paradeiru suspeitu nian. Ho razaun ne’e maka Xefe SICN no SIP orienta kedas membru sira hodi buka tuir suspeitu no konsege detekta suspeitu nia paradeiru iha area Eskola São Miguel Comoro no kontinua halo survilansia no ninia finalidade kaptura suspeitu iha area Aeroportu Nasional, Suku Madohi, Aldeia Anin Fuik no imediatamente transporta kedas mai iha edifisiu PNSIK hodi halo indentifikasaun. Iha asaun refere hetan mós apoiu husi ekipa SIM/J2 no Servisu Nasional Intelijensia (SNI).

Media PNTL.

Dili-Komandante Jeral no Segundu Komandante Jeral enkontru ho Prezidente Republika Francisco Guterres Lu-Olo hodi aprejenta situasaun seguransa iha teritoriu nasional.

Komandante Jeral PNTL Komisariu Faustino da Costa hateten iha enkontru semanal Ami aprejenta situasaun seguransa nivel teritoriu nasional ba Prezidente Republika no atualija mos informasaun balu konaba akontesmentu hirak ne’ebe maka iha inkluimos kazu homesidiu membru PNTL Primeiru Sarjentu Rosantina dos Santos nomos servisu Polisia nian hodi fo seguransa ba governu ka diresaun relevante iha ejekusaun mandadu ne’ebe iha, Nia hato’o asuntu ne’e iha palasiu Prezidente bairo-Pite Dili, Kinta (08/07).

Komisariu ne’e informa tan aprezenta mos ba Xefe Estadu konaba asuntu fronteira katak iha Estadu Emerjensia alende reforsa seguransa ba Unidade Maritima ho unidade seluk no Komandu munisipiu.

“Prezidente Republika husu ba PNTL atu asegura nafatin fronteira hodi nune’e variante foun COVID-19 labele tama mai Timor-Leste no husu atu Komandu hare membru sira no kontrola hodi fo hanoin sira atu hare sira nia servisu ho diak, dehan Komisariu Faustino.

Atu evita variante virus foun tama timor presija disiplina no kompri regra ne’ebe iha no kopera ho autoridade sira atu sidadaun hotu livre husi virus corona tanba se ita ida-idak lao sub-subar no halo atividade negosiu illegal maka ita sei lori moras ida ne’e mai tanba realidade hatudu ita kaer ema sira ne’ebe hakarak ba sae sabuk iha Indonezia no ita aprezenta alende ne’e kaer mos ema sira ne’ebe hakarak nafatin ba hola sasan iha Indonezia maibe ita hakarak buka moris liu husi negosiu mais negosiu ne’e ita buka moris ka buka moras ida ne’e maka ita presija konsiente.

Atu termina Lideransa instituisaun PNTL ne’e husu atu hametin koperasaun no sidadaun hotu kumpri no konsiente katak moras ida ne’e risku mai ita. Media PNTL