Uncategorized

Dili, Komandu Polísia Nasional Timor-Leste (PNTL) liu husi ekipa konjunta hanesan Servisu Investigasaun Criminal Nacional (SICN) hamutuk ho Servisu Informasaun Polísia (SIP) konsege kaptura suspeitu ba kazu omesidiu ida ne’ebe maka akontese iha loron 07 fulan Jullu tinan 2021 iha suku Madohi, Postu Administrativu Dom Aleixo, munisipiu Dili.

Liu husi Konferensia Imprensa ne’ebe hala’o iha sexta-feira (09/07) ne’e Porta Voz Komandu PNTL Superintendente Xefe Arnaldo Araújo ne’ebe akompaña husi Xefe SICN Superintendente Xefe José Neto Mouk deklara ba públiku kronologia husi akontesimentu ne’ebe rezulta membru PNTL ida tenke lakon nia vida.

Iha loron 07 fulan Jullu tinan ne’e iha oras 00:25 akontese kazu omesidiu ida iha aldeia Anin Fuik, suku Madohi ne’ebe rezulta vitíma Rosantina dos Santos ne’ebe hanesan membru PNTL ho deviza Primeiru Sarjentu, servisu iha eskuadra Dom Aleixo hetan sona husi suspeitu ne’ebe hanesan mós vitíma nia kaben ho inisial A.S.S alias A.M. Hafoin akontesimentu ne’e suspeitu halai se’es husi fatin akontesimentu, no vitíma hetan apoiu husi familia hodi transporta ba Sentru Saúde Comoro maibé la konsege salva vitíma nia vida.

Nune’e iha loron 07 ne;e kedas Komandu Jerál PNTL liu husi Komandante Jerál hasai kedas Ordem ba Komandante munisipiu 13 no Xefe Unidade hodi alerta no lkokaliza paradeiru suspeitu nian. Ho razaun ne’e maka Xefe SICN no SIP orienta kedas membru sira hodi buka tuir suspeitu no konsege detekta suspeitu nia paradeiru iha area Eskola São Miguel Comoro no kontinua halo survilansia no ninia finalidade kaptura suspeitu iha area Aeroportu Nasional, Suku Madohi, Aldeia Anin Fuik no imediatamente transporta kedas mai iha edifisiu PNSIK hodi halo indentifikasaun. Iha asaun refere hetan mós apoiu husi ekipa SIM/J2 no Servisu Nasional Intelijensia (SNI).

Media PNTL.

Dili-Komandante Jeral no Segundu Komandante Jeral enkontru ho Prezidente Republika Francisco Guterres Lu-Olo hodi aprejenta situasaun seguransa iha teritoriu nasional.

Komandante Jeral PNTL Komisariu Faustino da Costa hateten iha enkontru semanal Ami aprejenta situasaun seguransa nivel teritoriu nasional ba Prezidente Republika no atualija mos informasaun balu konaba akontesmentu hirak ne’ebe maka iha inkluimos kazu homesidiu membru PNTL Primeiru Sarjentu Rosantina dos Santos nomos servisu Polisia nian hodi fo seguransa ba governu ka diresaun relevante iha ejekusaun mandadu ne’ebe iha, Nia hato’o asuntu ne’e iha palasiu Prezidente bairo-Pite Dili, Kinta (08/07).

Komisariu ne’e informa tan aprezenta mos ba Xefe Estadu konaba asuntu fronteira katak iha Estadu Emerjensia alende reforsa seguransa ba Unidade Maritima ho unidade seluk no Komandu munisipiu.

“Prezidente Republika husu ba PNTL atu asegura nafatin fronteira hodi nune’e variante foun COVID-19 labele tama mai Timor-Leste no husu atu Komandu hare membru sira no kontrola hodi fo hanoin sira atu hare sira nia servisu ho diak, dehan Komisariu Faustino.

Atu evita variante virus foun tama timor presija disiplina no kompri regra ne’ebe iha no kopera ho autoridade sira atu sidadaun hotu livre husi virus corona tanba se ita ida-idak lao sub-subar no halo atividade negosiu illegal maka ita sei lori moras ida ne’e mai tanba realidade hatudu ita kaer ema sira ne’ebe hakarak ba sae sabuk iha Indonezia no ita aprezenta alende ne’e kaer mos ema sira ne’ebe hakarak nafatin ba hola sasan iha Indonezia maibe ita hakarak buka moris liu husi negosiu mais negosiu ne’e ita buka moris ka buka moras ida ne’e maka ita presija konsiente.

Atu termina Lideransa instituisaun PNTL ne’e husu atu hametin koperasaun no sidadaun hotu kumpri no konsiente katak moras ida ne’e risku mai ita. Media PNTL

Dili, Komandu Polísia Nasional Timor-Leste (PNTL) tersa-feira (06/07) ne’e hala’o serimonia distribuisaun viatura operasionais hamutuk 21 ba Komandu PNTL munisipiu 13, inklui RAEOA no mós Komandu Unidade sira atu bele haforsa liu tan servisu instituisaun nian hodi servi komunidade iha terenu.

Vise Ministru Interior António Armindo ne’ebe partisipa iha serimonia entrega viatura hirak ne’e ba jornalista sira hateten Komandu PNTL no Ministeriu fó ona viatura ba sira (Komandu munisipiu no unidade-red) ita nia hakarak ba sira ne’e maka sira tenke kuidadu didiak viatura hirak ne’e atu nune’e bele utiliza viatura sira ne’e iha fatin ne’ebe maka sira aloka viatura ne’e ba.

“Ministeriu no Komandu PNTL hatene katak ne’e la naton ba sira, tanba ne’e politika ita sei hanoin atu oinsa maka bele buka meius hanusa hodi aumenta tan transporte ba sira liu-liu hodi halo preparasaun iha Eleisaun Presidensial no mós Parlamentar iha tinan 2022 nian”, tenik Vise Ministru Interior ne’e.

António Armindo haktuir tan katak orsamentu hodi kompra viatura ne’e, preve duni iha Orsamentu Geral Estado (OGE) 2021 nian. Governu liu husi Ministriu Interior nia hanoin katak kada eskuadra ida tenke iha kareta ida, ne’e importante hodi sira bele halo servisu no planu ba tinan oin atu oinsa ita bele atinzi ita nia mehi ida ne’e.

Entretantu, Komandante Jerál PNTL Komisariu Polísia Faustino da Costa iha ninia intervensaun iha serimonia ne’e hateten PNTL iha ninia sistema, ninia regras kona-ba utilizasaun sasan hirak ne’e, ne’ebe ita iha despasu no ita iha mós NOP kona-ba utilizasaun viatura sira Estadu ninian. Além de ita iha mós NOP kona-ba uniforminizasaun matríkulas, sé kareta hirak ne’ebe simu iha tinan kotuk no tinan ne’e ita bo’ot sira simu sei uja xapa matríkula governu, iha tempu tuir mai ita sei uniforminiza ba matríkula PNTL ninian tuir NOP no Diploma Ministerial ne’ebe hatu’ur ba ita.

“Iha intensaun ida ne’e atu dehan saida ba ita bo’ot sira, sé kareta ne’e pertensa ba munisipiu A tenke uza duni ba munisipiu A, sé kareta ne’e pretense ba unidade A tenke uza duni ida unidade ne’e, maibé mós sé nia pertense ba unidade A mak ba ho matríkula husi unidade B, ida ne’e mós situasaun ida ne’ebe Gabinete Inspesaun Auditoria sei halo audit oinsa atu bele identifika sá razaun maka kareta ida husi unidade ida ba iha unidade seluk”, haktuir Komandante Jerál PNTL ne’e.

Komisariu Polísia ne’e husu ba Komandante Munisipiu no Unidade sira ne’ebe simu kareta ne’e atu bele kuida didiak ho responsabilidade to’o tempu ne’ebe maka Gabinete Inspesaun Auditoria ba halo inspesaun, kondisaun transporte ninian sei nafatin hanesan momentu ita bo’ot sira simu. No bele garante sasan hirak ne’ebe fó ba ita bo’ot sira atu uza ho kuidado hodi bele utiliza ba tempu naruk.

Tuir Komandante Komandu Administrasaun PNTL Superintendente Xefe José Soares katak distribuisaun viatura operasionais ne’ebe maka distribui ho total 21, husi 21 ne’e iha fulan kotuk liu ba ita fahe ona viatura hamutuk 6 no ohin loron 06 fulan Jullu ita kompleta tan viatuta hamutuk 15, entaun total iha 21 viatura. Viatura hirak ne’e ita utiliza ho Orsamentu Geral Estadu 2021 ninian, ita sosa ho montante $735 mil (Rihun 735 dolar Amerikanu) liu husi kompañia Auto Timor ne’ebe maka nia iha ajensia própriu iha kapital Dili ne’e maka fornese viatura hirak ne’e ba PNTL.

Hola parte iha serimonia ne’e Vise Ministru Interior António Armindo, Komandante Jerál PNTL Komisariu Polísia Faustino da Costa, Segundu Komandante Jerál PNTL Komisariu Polísia Mateus Fernandes, Komandante Munisipiu no Unidades inklui Xefe Servisu sira iha Kuartél Jerál. Viatura hirak ne’e, kada Komandu PNTL munisipiu no Unidade sira simu ida-ida.

Media PNTL.        

Aileu, Komandu Polísia Nasional Timor-Leste (PNTL) munisipiu Aileu sexta-feira (02/07) semana kotuk halo inagurasaun ba Postu Seguransa Permanente KUNGSING munisipiu Aileu, postu administrativu Laulara,  suku Bokolelo hodi haforsa servisu kontrolu seguransa iha fronteira entre kapital Dili ho munisipiu Aileu.

Komandante Jerál PNTL Komisariu Polísia Faustino da Costa hafoin serimonia inagurasaun iha nia entrevista hateten atu kompleta asesoria iha postu refere maka parte administrasaun presiza hare’e hodi kompleta exemplu hanesan eletrisidade ne’e agora sei latan hela iha rai no iha futuru mós ita hare’e katak fatin ne’e iha rede entaun Komandu PNTL sei koloka mós kámera CCTV hodi halo vizilansia.

“Segundu maka laos deit iha fatin ida ne’e, ita halo ida ne’e ba mós fronteira sira seluk hanesan iha parte Dili ho Aileu nafatin tantu mós Dili ho Metinaro no Dili ho Liquiça, além de postu balun iha fatin seluk ona ne’ebe existe, objetivu husi postu ne’e hari’I laos deit ba situasaun pandemia COVID-19 maske depois COVID ne’e se iha hatene bainhira nia hotu mós la signifika postu ne’e ita foti sai husi ne’e, Polísia sira nafatin hala’o sira nia servisu tanba misaun sira nian ne’e atu bele fasilita ema”, haktuir Komandante Jerál PNTL ne’e.

Komisariu Polísia ne’e afirma tan katak postu refere hari’I iha fatin ne’ebe seguru tanba postu ne’e iha kedas dalan ninin, tanba ita tenke konsente katak agora ita iha hela estadu kalamidade katak ita nia estadu ne’e halo normalizasaun deit entaun bainhira iha situasaun normal klaru sei iha manutensaun, sei iha oportunidade atu bele hare’e mós edifisiu ne’e ninian seguransa husi inundasaun.

Iha fatin hanesan, reprezentante Administrador munisipiu Aileu iha ninia intervensaun hateten agradese ba Komandu PNTL munisipiu Aileu tanba bele estabelese postu ida iha fatin ida ne’e, tanba fatin ida ne’e hanesan sentru ba munisipiu tolu maka hanesan Dili, Aileu no Ermera.

“Fatin ida ne’e mós wainhira laiha postu sai hanesan fatin livre, tanba ne’e agradese tebes ba Komandu PNTL Aileu ninia insiativa hodi estabelese postu ida ne’e atu nune’e bele asegura komunidade lubuk ne’ebe hela iha fatin ida ne’e, asegura sira livre husi karik hahalok ruma intimidasaun ne’ebe sempre akontese iha fatin ida ne’e”, haktuir reprezentante Administrador munisipiu Aileu ne’e.

Nia hatutan agradese mós ba parte governu ne’ebe ho laran kma’an hodi tau fundu ba estabelesimentu postu ida ne’e atu nune’e povu sira ne’ebe hela iha ne’e bele sente seguru no hakmatek hahu’u ohin ba oin.

Konstrusaun postu seguransa ne’e rasik konstrui husi Komandu PNTL munisipiu Aileu durante fulan rua nia laran, ne’ebe kompleta ho fasiludade hanesan sala ida ho kuarto ba deskansa rua inklui dapur no haris fatin. Tuir planu postu ne’e rasik sei sai postu permanente hodi halo kontrolu ba sidadaun sira ne’ebe komete krime ruma no mós komete infrasaun ruma hasoru Lei Kódigu Estrada nian. Total membru ne’ebe dadaun ne’e koloka iha postu refere hodi halo seguransa hamutuk na’in 20 maibé wainhira situasaun normal maka sei halo redusaun ba membru na’in 8.

Postu ne’e inagura direita husi Komandante Jerál PNTL Komisariu Polísia Faustino da Costa no hetan partisipasaun husi membru deputadu Parlamentu Nasional, lideransa lokal, membru PNTL munisipiu Aileu inklui komunidade sira.

Media PNTL.  

Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes iha kinta-feira (01/07) ne’e nomeia aktual Segundu Komandante PNTL munisipiu Dili Superintendente Euclides Belo hodi assume fali kargu hanesan Komandante Unidade Patrullamentu Fronteira (UPF). Nomeasaun ne’e halo basea ba Despasu Gabinete Komandante Jerál Nu. 235-A/CG-PNTL/VII/2021.

Komisariu Polísia Faustino da Costa hafoin serimonia tomada de pose ba media deklara aktual Komandante UPF, iha Dili sai hanesan adjuntu ba tinan barak nia laran ona hahu’u husi tinan 2017 mai to’o ohin loron, hanesan mós Komandante UPF sesante ne’ebe ita muda ba hodi sai fali hanesan adjuntu Komandante PNTL munisipiu Dili, kaer pasta nu’udar Komandante UPF hahu’u husi tinan 2012 to’o ohin loron.

“Hanesan ohin hau dehan katak Komandu nian mak ne’e Kaderiza sira, ita ba iha fatin foun, ambiente foun, kultura foun ita aprende buat foun, entaun oinsa atu desenvolve ida ne’e atu sira bele iha esperiensia ne’ebe diak liu maka ita halo mudansa ida ne’e”, tenik Komisariu Polísia ne’e.

Komandante Jerál PNTL ne’e informa tan katak mudansa ida ne’e mós parte ida husi Komandu ninia ezijensia durante ne’e katak presija halo mudansa, tanba labele husik ema ida iha fatin ida durante tempu naruk nia laran. Dala ida tan kuandu ita kompleta ona ba Komandante sira, tempu tuir mai maka ita halo ba Komadante Eskuadra, Estasaun, Kompañia no Komandante Sub Unidade sira. Além de ita halo mós ba membru sira, ita presija kaderiza sira.

“Depois ita hare fali tempu karik governu autoriza ita halo rekrutamentu, sira ne’ebe foun ita hare fila fali koloka subtitui, ita kaderiza, ida tuan ita muda ba area ida ne’ebe, ida foun ita tau fali ba”, hatutan Komandante Jerál PNTL ne’e.

Iha fatin hanesan, emposadu Superintendente Euclides Belo hateten tomada de pose ne’ebe ohin simu laos premiu ida ne‘ebe maka Komandu fó, maibé ne’e hanesan responsabilidade ne’ebe maka Komandu fó.

“Hau sei lori responsabilidade ne’e hodi bele garante situasaun seguransa iha liña fronteira, servisu hamutuk ho autoridade lokal liu-liu Komandu munisipiu tolu, nune’e mós autoridade religiozu no autoridade komunitaria ne’ebe maka iha ne’eba (fronteira), parseiru husi nasaun viziñu maka TNI no POLRI”, haktuir eis Segundu Komandante PNTL munisipiu Dili ne’e.

Aktual Komandante UPF ne’e seidauk bele fó sai Misaun no Vizaun saida maka sei halo durante mandatu tanba aban maka foin ba Fronteira-Batugade hodi halo transferensia dokumentu operasional balun, hafoin ida ne’e maka foin bele ajusta tuir mehi saida maka iha, mehi ne’e sei hatutan mehi sira ne’ebe Komandu iha ona no misaun ne’ebe Komandu sesante hala’o ona, hau sei hatutan.

Iha serimonia ne’e, Komandu PNTL liu husi Gabinete Komandante Jerál hasai Ordem ida Nomea Definitivamente Komandante hirak ne’ebe maka durante ne’e assume pasta nu’udar Komandante Interinu hanesan Komandante Centro Formação Polícia (CFP) Superintendente Xefe Arquimino Ramos, Komandante PNTL munisipiu Bobonaro Superintendente António Mauluta no Komandante PNTL munisipiu Ermera Superintendente Ludgerio Lay.

Hola parte iha serimonia ne’ebe hala’o iha salaun enkontru Kuartél Jerál maka Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes, Inspetór Jerál, Komandante Komandu Operasaun, Administrasaun, Xefe Departamentu no Servisu sira iha Kuartél Jerál nian.

Media PNTL.                  

Dili- Kazu abuzu sexual husi aman ba nia oan feto minoridade iha Lakluta Viqueque submete ona ba Ministeriu Publiku no suspetu simu konsekuensia husi hahalok nebe nia halo hodi lakon nia orgaun vital.

Porta Voz PNTL Superintendente Xefe Arnaldo Araujo haktuir iha loron 23/06 tuku 15:00 iha postu administrativu Lakluta suku Uma Tolu aman inisial MS (37) halo abuzu sexual ba nia oan feto AJSM (13) anos nune’e nia inan sente moe hodi tesi nia orgaun vital, nia hato’o asuntu ne’e ba Jornalista sira liu husi komferensia emprensa iha Kuartel Jeral PNTL Kaikoli Dili (28/06).

Kronolojia hafoin vitima nia inan ho inisial QM(33) hare nia laen halo abuzu sexual ba nia oan feto maka nia halo planu atu halo relasaun sexual ho nia laen nune’e nia prepara tudik hodi halo tentativa homesidiu ba nia laen hodi koa sai nia orgaun vital.

Suspetu MS oras ne’e daudaun halo tratamentu iha Hospital Nasional Guido Valadares (HNGV) wainhira nia kondisaun diak ona maka submete ba prosesu investigasaun no  Arguida QM ba tentativa homesidiu oras ne’e daudaun kumpri ona prijaun preventiva iha Prijaun Becora; Entretantu vitima AJSM iha hela uma mahon Viqueque; Kazu ne’e lori ona ba Ministeriu Publiku hodi hein prosesu tuir mai.

Iha biban ida ne’e Porta voz PNTL ne’e  informa katak hodi kalan iha mos insidente ema balu sunu Bandeira Portugal nian tanba selasaun futebol Portugal derota iha jogu kontra Belgika iha kopa Euro 2020, Adeptus Portugal sente la kontente nune’e iha ema balun maka laiha responsabilidade sunu bandera Portugal.

PNTL munisipiu Dili sei buka tuir suspetu sira hodi submete ba prosesu tanba sira nia asaun konsidera hanesan krime.

Nia haktuirtan Autor sira la merese atu sunu Bandeira maske sai adeptus fanatiku ba nasaun ida maibe wainhira lakon iha jogu tenke simu ho laran luak no laran diak labele sunu fali simbolu nasaun ida nian tanba ne’e hatudu katak ita la respeita simbolu nasaun seluk nian no husu ba komunidade sira atu labele hatudu tan hahalok hanesan ne’e mai kumpri regras ne’ebe maka vigora iha ita nia rain.

Relata mkos ba publiku konaba insidente ne’ebe maka akontese iha semana ida ne’e nia laran (21-27/06) hamutuk kazu 19 kompostu husi asaltu malu 3, baku malu 2, tuda malu 1, lanu no tuda kareta 1, abuzu sexual ba minoridade 1, tentativa homesidiu 1, no violensia domestika 4.

Entretantu asidente trafegu hamutuk 9 la rejulta kanek todan no mate. PNTL nafatin husu ba motorista sira atu kumpri regra Tranzitu wainhira sai tenke hare kondisaun kareta no motor, lori dokumentu no karta kondusaun. Media PNTL

Dili-Komandante Jeral PNTL Komisariu Polisia Faustino da Costa relata situasaun seguransa iha teritoriu nasional ba Prezidente Republika Francisco Guteres Lu’Olo katak situasaun seguransa lao diak.

Komandante Jeral hateten iha enkontru semanal ohin Ami aprejenta situasaun atual iha nivel teritoriu nasional ba Xefe Estadu katak seguransa iha teritoriu nasional lao diak maske iha akontesmentu no kazu nebe akontese hanesan insidente ne’ebe akontese iha Manufahi  semana liu ba no asidente fatal ne’ebe akontese horseik, Nia hato’o asuntu ne’e ba Jornalsita sira iha Palasiu Prezidensial Bairo-Pite Dili, kinta(24/06).

Komisariu ne’e haktuirtan katak, asidente fatal ne’ebe akontese iha loron 23/06 liga ho kopa Euro 2020 maka hanesan akontesementu iha Kuluhun no Delta ne’ebe maka PNTL atende nia prosesu. Akontesmentu hirak ne’e akontese tanba kestaun adeptus futebol nasaun ida manan no ida lakon depois la satisfas.

Lideransa imstituisaun Seguransa ne’e fo hanoin ba adeptus futeboll sira katak ita bele fens ba nasaun ida ne’e ou ida nemai realidade ita tenke hatene no rekonese mos labele dehan lakon ona ita hare maluk seluk ladiak, ne’e nasaun seluk mak joga bola halo nusa maka ita halo ida ne’e ba ita nia maluk sira.

Situasaun hirak ne’e maka ami aprenjenta no akontesmentu kiik balu iha munisipiu liu-liu ami koalia konaba Estadu Emerjensia no Serka Sanitaria ne’ebe governu hasai ona ba munisipiu Cova-Lima no Bobonaro maibe mantein Dili no Baucau.

Atu termina Komisariu Faustino informa ba publiku katak postu seguransa sira iha fronteira ita koloka husi sala situasaun no Komandu PNTL halo servisu enkonjuntu husi sala situasaun no Komandu munisipiu sira tanba rejolusaun governu nian hateten ona katak postu integradu koloka enkonjuntu hanesan iha munisipiu Baucau no Dili (Tasi-Tolu, Metinaru, Manleu). Media PNTL