Uncategorized

Dili- Durante trimestre daruak fulan Jullu-Setembru tinan 2020 Polisia Nasional Timor-leste (PNTL) munisipiu Dili rejista kazu krime hamutuk 445 ne’ebe maka komete husi sidadaun sira

Komandante PNTL munisipiu Dili Superintendente Xefe Henrique da Costa hateten  iha fulan tolu (3) nia laran Komandu PNTL munisipiu Dili rejista kazu krime hamutuk 445 husi kazu hirak ne’ebe maka iha maioria ofensas integridade fizika hamutuk 155, violensia domestika 47 no kazu seluktan, Nia hato’o asuntu ne’e iha enkontru Konsellu Seguransa Munisipal (KSM) foin lalais ne’e iha CFP Comoro Dili.

Alende ne’e Komandu PNTL munisipiu Dili mos rejista kazu infrasaun hamutuk 1.587 maioria motorista sae motor la uza kapasete no seluktan. Infrator sira selu multa ka koima durante fulan tolu (3) hahu Jullu-Setembru hamutuk $54.459.

Husi kazu krime no infrasaun ne’ebe maka iha loke PNTL Dili nia matan atu buka manera hodi prevene no kombate krime, buka manera oinsa atu bele eduka ita nia sosiedade hodi halo prevensaun ba krime liu husi medida ida maka Vizivilidade, Involvimentu no Profesionalismu (VIP), medida vizivilidade maka hanesan agora ita koloka ita nia Polisia barak iha Estrada, prezensa iha komunidade nia leet liu husi patrula no seluktan.

Involvimentu maka hanesan prezensa KPK sira nian, lider komunitariu sira, joventude no stake holder sira hotu atu servisu hamutuk ho Polisia, involvimentu ita hotu nian hodi apoiu seguransa sai hanesan pontu pojitivu ida hodi  prevene no kombate krime.

Iha sorin seluk ita mos nafatin eduka ita nia povu liu husi programa Polisia vizita ba Kampus, atividade ida ne’e remata iha fulan kotuk ne’ebe maka identifika universidade hamutuk 11 ne’ebe Departamentu Polisia Komunitaria, Investigasaun no Tranzitu sira maka halo sosializasaun konaba Servisu Polisiamentu Komunitaria, Regras Tranzitu no Prevensaun Krime. Programa Segundu ne’ebe maka sei realiza iha fulan Novembru maka programa Polisia Vizita ba Eskola hodi halo sensibilizasaun ba estudante sira.  Media PNTL

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa hamutuk ho Segundu Komandante Jerál Komisariu Polísia Mateus Fernandes tersa-feira (20/10/2020) ne’e realiza enkontru ida ho Komandante PNTL munisipiu, Unidades, CFP, Xefe Servisu no Departamentu sira iha Kuartél Jerál hodi simu orientasaun Komandu nian relasiona ho seguransa ba loron Finadu no selebrasaun seluk iha fulan Novembru nian hanesan loron 12 no 28 Novembru tinan ne’e.

Komisariu Polísia Faustino da Costa hafoin sorumutu ba jornalista sira hateten enkontru ohin ita realiza atu hare’e servisu ne’ebe durante ne’e halo liu-liu iha implementasaun Estadu Emergensia (EE) no mós sá difikuldades no problema ne’ebe Komandu munisipiu sira hasoru.

“Orientasaun ne’ebe Komandu fó ba oin katak buat ne’ebe sira halo durante ne’e hare’e ba saida maka tenke hadia ba oin liu-liu iha fulan Novembru no Dezembru nia laran, ita hatene katak iha fulan Novembru nia laran iha eventu lubuk ida maka loron Finadu, loron Santu sira nian, loron Juventude Assu-Wa’in no mós loron 28 Novembru entaun oinsa maka PNTL, Komandu idak-idak asegura loron importante hirak ne’e”, esplika Komandante Jerál PNTL ne’e.

Autoridade másimu Seguransa ne’e salienta tan situasaun hirak ne’ebe maka Komandu munisipiu aprezenta maioria maka kestaun transporte no kombustivél. Komandu mós aktualiza katak Orsamentu Prezidente Repúblika (PR) promulga ona, oinsa atu hare’e iha Komandu munisipiu no unidades idak-idak durante ne’e iha dividas karik atu hare’e no oinsa maka bele hasa’e proposta/dokumentu mai ona Komandu atu nune’e wainhira iha autorizasaun ba utilizasaun Orsamentu nian bele uza no mós sá nesesidades maka Komandu/Unidades presiza liu-liu iha fulan Novembru, Dezembru no Janeiru nia laran.

“Orientasaun Komandu nian klaru katak tenke asegura loron Finadu, tanba ne’e maka ohin bolu Komandante hotu-hotu mai, tanba ita hatene bain-bain balun iha Misa laran komesa halo problema no iha rate/semiteriu halo problema; nune’e maka ohin realiza enkontru ne’e hodi fó orientasaun oinsa maka bele asegura iha loron Finadu ne’e,” subliña Komisariu Polísia ne’e.

Komandante Jerál PNTL ne’e akresenta tan katak kontrolu ba movimentu transporte iha loron Finadu sai mós asuntu ida ne’ebe Komandu orienta ba Komandu munisipiu idak-idak téknikamente atu oinsa Komandante sira asegura nune’e evita mosu asidente iha loron importante ne’e, hare’e ba kada tinan númeru asidente sempre sa’e maka’as iha selebrasaun loron Finadu. Iha situasaun seluk klaru ita hare’e mós tanba iha EE ne’e, ita orienta Komandante hotu-hotu katak wainhira halo barragem/Chek Point presiza tenke verifika labele ema sira ne’ebe karta kondusaun mate iha fulan Janeiru ka Dezembru tinan kotuk dehan ita uza Lei ne’e atu labele akuza, hanoin ida ne’e lalos. Só ida ne’ebe ninia dokumentu ne’e kuandu expire/mate iha tempu EE. Asuntu ida ne’e ohin orienta ba Komandante hotu-hotu atu hare’e situasaun ida ne’e.

Media PNTL.                      

Dili- Korpu dosente Universidade daPaz (UNPAZ) nain 62 kompleta kursu pedagozia faze formasaun Eskolar durante semana rua iha Sentru Formasaun Polisia (CFP-sigla portuges) no sei kontinua pratika durante fulan tolu (3) iha sira nia kampus.

Komandante CFP Superintendente Xefe Arquimino Ramos hateten kursu ne’e realiza bazeia ba rekomendasaun painel internasional ne’ebe maka Ajensia Nasional ba Avaliasaun no Akreditasaun Akademika (ANAAA-sigla portuges) konvida iha tempu hirak liuba sira halo vizita ba universidade hotu no hare katak Sentru Formasaun Polisia ho padraun nivel internasional nune’e professor Hasma rasik rekomenda ba magnifiku retor sira hotu atu halo estudu komparativu iha CFP tanba iha metodu hanorin ho ninia metodu aprendizajen ne’ebe diak ona iha Timor-Leste, Nia hato’o asuntu ne’e iha enseramentu kursu iha CFP Comoro, Sexta (16/10).

Komandante ne’e haktuirtan hafoin formasaun klase durante semana rua sei kontinua pratika durante fulan tolu (3) no Instrutor sira sei akompana dosente sira oinsa prepara manual, planu lisaun, planu sesaun, metodu hanorin no oinsa avalia paper, wainhira metodu hirak ne’ebe maka instrutor hanorin sira kompleta no hadia diak hotu ona ita avalia no halo ezame iha sira nia universidade.

UNPAZ halo koperasaun ho CFP no sira fo bolsu estudu ba membru PNTL  lisensiadu nain rua no Mestradu nain rua kada tinan no ami sente buat ida koperasaun ne’e ami simu no ami mos tenke fo buat ne’ebe PNTL bele maka kursu pedagozia ne’ebe dezenvolve kleur ona desde tinan 2004 to’o agora.

Iha okajiaun ne’e Retor UNPAZ Adolmandu Amaral  hateten kursu ne’e ajuda tebes UNPAZ atu dosente sira afirma lolos sira nia pojisaun hanesan dosente tanba sai dosente ne’e tenke iha vokasaun, matenek ita iha ona mais badaen no abilidade ne’e presija aumenta liu husi formasaun atu nune’e estudante sira bele aproveta ho sistimatiku.

Nia haktuirtan antes ne’e ami halo ona estudu ne’ebe formasaun semana rua iha teoria no fulan tolu iha pratika ne’e depende ba dosente sira ne’ebe maka prontu ona ekipa formador sira, ANAAA no INDIMO sei akompana pratika iha universidade.

Entretantu Diretor ANAAA Edmundo Viegas hateten inisiativa ida ne’e diak tebes halao bazeia ba koperasaun entre instituisaun Ensinu Superior no CFP husi parte ANAAA apresia persijamente tanba ninia formadu sira ne’e Dosente tanba ne’e ANAAA presta atensaun espesial ida nomos fo apresiasaun ba instituisaun rua ne’e tanba hola inisiativa halao kursu formasaun Pedagozia ba Professor Ensinu Superior nian para hakbiit sira hodi komplementa sira nia kompetensia ne’ebe maka durante ne’e sira iha ona.

Nia haktuirtan Dosente sira barak mak matenek iha sira ida-idak nia area maibe fator esensial ida ne’ebe maka ita hotu-hotu hakarak enkoraja ba instituisaun Superior sira katak mestre sira mos tenke iha kapasidade no kbiit atu transfere sira nia matenek ba estudante sira.

Mensajen ne’ebe Hau hato’o ba Komandante CFP no Magnifiku Retor UNPAZ karik inisiativa kursu ida ne’e bele atrai mos interese no atensaun husi instituisaun Ensinu Superior sira seluk iha tempu badak.

Serimonia enseramentu ne’e partisipa husi Segurndu komandante CFP Superintendente Boavida Ribeiro, Korpu dosente UNPAZ, Instruotr no konvidadu sira. Media PNTL

Dili- Komandu Polisia Nasional Timor-Leste (PNTL) munisipiu Dili realiza enkontru Konsellu Seguransa Munisipal (KSM) hodi haforsa lina kordenasaun no fo solusaun ba problema ne’ebe sempre akontese iha munisipiu Dili.

Prezidente KSM atual Komandante PNTL munisipiu Dili Superintendente Xefe Henrique da Costa hateten kestaun ne’ebe maka ita tau atensaun maximu maka problema ne’ebe sempre akontese iha Dili laran hanesan tuda malu, ataka malu entre grupu no Violensia Domestika tanba ne’e ita husu atu servisu hamutuk ho lider komunitaria sira nune’e bele identifika hun husi problema hirak ne’e hodi buka solusaun, Nia hato’o asuntu ne’e iha CFP Komoro Dili, Kinta (15/10).

Nia haktuirtan PNTL mos introdus programa ba Administrador Postu no lider komunitaria sira katak Komandu munisipiu Dili iha programa Polisia Vizita Kampus ne’ebe remata ona no iha fulan Novembru ba oin sei realizatan programa Polisia Vizita ba Eskola atu halo sosializasaun no koalia ho estudante sira atu hatene regras tranzitu, Polisiamentu Komunitaria no prevensaun krime.

“Ita halo avaliasaun ba Konsellu Polisiamentu Komunitaria (KPK) no KSM apoiu tebes Polisia nia servisu ne’e pozitivu teb-tebes tanba iha problema balu sira nia kapasidade bele resolve iha suku,” dehan Komandante ne’e.

Komandu mos husu apoiu husi KPK no lider komunitaria sira ba inplementasaun programa Polisia Vizita ba Uma husi OPS nomos Patroli sira hodi koalia ho komunidade sira no identifika lolos sese maka hela iha familia uma kain ida no sese maka hela iha bairu ne’e tanba problema barak ne’ebe maka mosu husi bairu ida ba hamutuk fali ho joven sira iha bairu neba hodi ataka malu tanba ne’e maka ita nia programa Polisia vizita ba uma ne’e ita sei halao liu-liu OPS ho KPK nomos lider komunitaria sira ita husu atu servisu hamutuk hodi susesu ba programa ne’e.

Iha okajiaun ne’e Xefe Departamentu Polisiamentu Komunitaria Nasional Superintendente Assistente Helena Das Dores hateten estabelesimentu KPK kompleta ona iha munisipiu Dili oinsa maka atendementu ba komunidade to’o iha aldeia tanba ne’e husu ba Xefe suku no Ofisial Polisia Suku (OPS) atu jere nia membru KPK atu halo prevensaun ba konflitu no identifika autor ba problema hodi tur hamutuk para rezolve no halao servisu tuir Normas Organizasaun no Prosedimentu (NOP) ba KPK hodi asegura servisu ho diak tuir regras ne’ebe maka iha hodi servisu hamutuk ho joventude no komunidade sira.

Iha parte seluk Administrador postu Administrativu Dom-Aleixo Tomas Barros hateten KPK nia prezensa inportante tebes maske iha situasaun pandemia COVID-19 sira ladun halao atividade normal maibe prezensa KPK ne’e faz parte hanesan ain liman Polisia nian hodi tulun Polisia komunitaria atu hare problema ne’ebe sempre akontese iha suku ida-idak iha postu Administrativu Dom Aleixo ne’ebe sai risku ba konflitu liu-liu iha area Rotunda Comoro tanba joven sira seidauk iha hanoin diak no halo provokasaun iha tempu kalan no tuda malu.

Nia haktuirtan ho enkontru ida ne’e ba futuru ita identifika area hirak ne’ebe maka risku ba komflitu no buka mekanismu hodi foti autor hirak ne’ebe involve no halo koperasaun servisu hamutuk ho autoridade lokal no fo formasaun ba sira hodi minimija problema iha fatin neba.

Enkontru loron tomak ne’e partisipa husi Administrador Postu Administrativu, Xefe Suku, Reprezentante NGO, Joventude membru KPK, OPS no Komandante Eskuadra hotu iha munisipiu Dili. Media PNTL

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa no Segundu Komandante Jerál Komisariu Polísia Mateus Fernandes iha loron kinta-feira (15/10) hala’o enkontru semanal ida ho Prezidente Repúblika (PR) Dr.Francisco Guterres Lú-Olo hodi informa situasaun seguransa iha rai laran.

Komisariu Polísia Faustino da Costa hafoin enkontru ba jornalista sira hateten sorumutu ne’e hanesan enkontru semanal ne’ebe Komandu PNTL halo hodi aprezenta ba Xefe Estadu informsaun sira kona-ba situasaun seguransa rai laran lao diak iha nivel territorial no asidente hirak ne’ebe maka koantese durante semana ida nia laran iha âmbitu implementasaun Estadu Emergensia (EE).

“Iha implementasaun EE, parte PNTL nafatin asegura hela liu-liu ba iha area fronteira atu dehan deit katak iha semana ida nia laran ita halo kapturasaun illegal iha fronteira ne’e total ema na’in 14, husi númeru ne’e ida maka indikasaun lori atributu Arte Marsias no 13 sira seluk ita nia estudante hirak ne’ebe hela no kontinua sira nia estudu iha Indonesia”, esplika Komandante Jerál PNTL ne’e.

Autoridade másimu seguransa ne’e hatutan katak iha enkontru ne’e informa mós ba Xefe Estadu kona-ba situasaun rodoviaria katak iha semana ida nia laran ita rezista asidente hamutuk 36, rezulta ema na’in 6 maka mate. Husi asidente sira ne’e kauza maka fátor ema, konduz la ho kuidadu katak negligênsia umana hanesan akontese iha loron dominggu foin lalais ne’e iha Dili, hanesan mós iha Lospalos no Buacau tula sasan barak hasoru motor derepente la konsege kontrolu depois rezulta ema balun tenke husik mundu ne’e no barak hetan kanek.

Media PNTL.    

Viqueque, Manufahi, Aileu, Komandante Jerál Polísia Nasional Timor-Leste (PNTL) Komisariu Polísia Faustino da Costa durante loron rua (12-13/10) hala’o vizita servisu ida ba iha Komandu PNTL munisipiu tolu hanesan Viqueque, Manufahi no Aileu hodi hare’e besik liu tan kondisaun no problema ne’ebe maka Komandu hasoru durante ne’e.

Iha loron 12 fulan Outubru tinan 2020, Komisariu Polísia Faustino da Costa akompaña husi Xefe Gabinete Relasaun Públika no ekipa hala’o vizita dahuluk iha Komandu PNTL munisipiu Viqueque ne’ebe hahu’u kedas hala’o enkontru ho Komandante munisipiu no Komandante eskuadra sira hodi rona preukupasaun no difikuldade ne’ebe maka Komandu ne’e hasoru durante hala’o kna’ar iha terenu.

Iha biban enkontru ne’e, Komandante PNTL munisipiu Viqueque Superintendente Sebastião Alves Quintão aprezenta relatoriu badak kona-ba Koimas ou Infrasaun ne’ebe Komandu PNTL munisipiu Viqueque hatama ba kofre Estadu hahu’u husi fulan Janeiru to’o Outubru tinan 2020 hamutuk $2.181,00. Rezista mós Servisu Investigasaun Kriminal (SIK) durante fulan Janeiru-Outubru ho total kazu 141 ne’ebe maka rezistu ba Ministeriu Públiku (MP) hamutuk 124, kazu 8 maka taka no kazu 9 maka sei iha prosesu nia laran.

Komisariu Polísia Faustino da Costa iha enkontru ne’e hateten vizita ne’e halo hodi mai hare’e no rona difikuldade ne’ebe maka Komandu hasoru. Mai fó mós Komandu PNTL nia hanoin atu ajusta tuir saida maka ita nia governu nia hakarak ba oin, instituisaun Estadu ida ne’e lao husi ne’ebe. Tanba ne’e iha 27 Marsu wainhira simu posse, iha buat haat ne’ebe tau iha importansia bo’ot tebes maka hanesan Mudansa, Konfiansa, Koizaun no Esperansa.

Hafoin hala’o enkontru iha Komandu PNTL munisipiu Viqueuque, Komandante Jerál ho komitiva hala’o fali vizita ba iha eskuadra Fatuberliu munisipiu Manufahi hodi hare’e difikuldade ne’ebe maka membru sira hasoru durante hala’o kna’ar hanesan autoridade seguransa.

Loron 13 fulan Outubru, Komisariu Polísia Faustino da Costa hala’o fila fali enkontru ho Komandante PNTL munisipiu Manufahi hamutuk ho Komandante eskuadra haat hanesan Same, Turiskai, Alas no Faturbeliu inklui Xefe Seksaun no Servisu sira Komandu munisipiu nian. Iha oportunidade enkontru ne’e Komandante PNTL munisipiu Manufahi Superintendente Joni Viana das Regras aprezenta situasaun seguransa iha munisipiu ne’e, servisu no problema ne’ebe maka infrenta durante ne’e.

Iha munisipiu Manufahi, Komisariu Polísia ne’e hala’o vizita mós ba iha Caserna Komandu nian hodi hare’e besik liu tan kondisaun edifisiu no membru hirak ne’ebe maka hela iha fatin ne’e.

Iha loron ikus vizita nian, Komandante Jerál PNTL ho ekipa to’o iha Komandu PNTL munisipiu Aileu hodi hala’o enkontru ho Segundu Komandante PNTL munisipiu Aileu Superintendente Assistente António Lourenço da Costa Soares hamutuk ho Komandante eskuadra sira hanesan Aileu Villa, Lekidoe, Laulara no Remixio.

Objetivu prinsipal husi vizita servisu autoridade másimu seguransa ne’e maka atu hare’e besik liu tan kondisaun no difikuldade hirak ne’ebe maka Komandu munisipiu sira infrenta. No objetivu segundu maka halo preparasaun planu servisu Komandu PNTL nian ba oin iha eventu sira ne’ebe maka Timor-Leste sempre selebra ba.

Media PNTL.   

Atauro, Komandu Polísia Nasional Timor-Leste (PNTL) liu husi Komandu PNTL munisipiu Dili kompleta ona estabelesimentu Konsellu Polisiamentu Komunitaria (KPK) munisipiu Dili iha suku hamutuk 36.

Segundu Komandante PNTL Munisipiu Dili Superintendente Euclides Belo iha loron 08 no 09 fulan Outubru tinan 2020 fó tomada de posse ba membru KPK hamutuk 75 iha suku Beloi Villa postu administrativu Atauro munisipiu Dili, nune’e maka estabelesimentu KPK iha munisipiu Dili kompleta ona 100% ho total hamutuk 1.625 membru KPK.

“Iha munisipiu Dili suku 36 estabelesimentu KPK hotu ona kompara ho munisipiu sira seluk ne’ebe maka balun foin maka ho númeru haat ka lima no agora dadaun ita iha formasaun kontinuasaun ba membru KPK hanesan refreshing training ne’ebe maka hala’o ona iha suku Manleuana no sei kontinua ba suku sira seluk munisipiu Dili nian”, afirma Segundu Komandante PNTL Munisipiu Dili ne’e.

Superintendente Euclides apela ba membru KPK ne’ebe maka foin simu posse atu hala’o kna’ar KPK nian tuir deklarasaun ne’ebe maka iha hodi prontu personalmente hala’o servisu hodi halo identifikasaun ba problema ne’ebe maka mosu iha komunidade nia le’et.

“Kna’ar ne’ebe ohin ita bo’ot sira (Membru KPK-red) simu hanesan vokasaun ida hodi servi ita nia komunidade ho lolos, los no momos tuir matadalan KPK ne’ebe maka iha, espera katak ita sei hasoru dezafiu lubuk ida iha komunidade maibé dezafiu ne’e labele sai obstákulu tanba ne’e ita nia prontidaun ne’e tenke tau prátika iha komunidade nia le’et”, tenik Superintendente ne’e.

Adjuntu Komandante PNTL Munisipiu Dili ne’e hatutan tan ligadu ho kna’ar ida ne’e mak husu ba ita bo’ot sira (Membru KPK-red) atu halo identifikasaun ba problema iha ita nia komunidade karik halo ho lolos tanba Atauro oan mesak religiozu/fiar na’in, nune’e deposita konfiansa iha ita bo’ot sira hodi ita hamutuk.

Kna’ar KPK nian maka sai hanesan ajente hodi halo mediasaun ba kualkér problema komunitaria nian tanba membru KPK sira hetan ona formasaun ne’ebe adekuadu ona ba asuntu kriminal nian tenke refere exsepsaun ba parte ne’ebe ita bo’ot sira hakarak halo mediasaun. KPK mós sai hanesan solusionador ne’ebe maka bele foti solusaun ki’ik ne’ebe laiha impaktu.

Media PNTL.                 

Dili- Durante fulan nen Komandu Polisia Nasional Timor-Leste (PNTL) munisipiu Manufahi rejista kazu Tentativa Homesidiu no Asidente trafiku hodi prosesu ba Tribunal.

Komandante PNTL munisipiu Manu fahi Superintendente Joni Viana das Regras hateten durante Hau nia madatu fulan neen (6) rejista kazu tentativa Homesidiu rua (2) PNTL enkamina ba Ministeriu Publiku no desijaun aplika medida koasaun Prizaun preventiva ba arguidu, Nia hato’o asuntu ne’e ba jornalista sira foin lalais iha Timor-Plaza Komoro Dili.

Nia haktuirtan alende ne’e iha mos kazu asidente iha loron 02/10 iha tuku 19:00 soke labarik ida ho idade tinan 7, PNTL to’o kedas iha fatin akontesementu maibe iha ema ida rua halo agresaun fiziku no mosu problema entaun Ajente ne’e husu apoiu ba Komandu atu fo asistensia urjente ba iha fatin akontesementu to’o iha fatin akontesementu membru PNTL nain tolu (3) mos hetan tuda.

Kazu hirak ne’e hotu submete ona ba prosesu rezultadu husi prosesu ida ne’e finalmente iha Domingu loron 04/10 ita trasporta suspetu sira ne’e ba Tribunal Distrital Suai hodi halo prosesu no rezultadu husi prosesu Interogatoriu Arguido ida ne’ebe maka halo agresaun hasoru PNTL nia hetan Medida Koasaun Aprezentasaun Periodika no arguidu seluk kumri Termu Identidade Rezidensia (TIR) .

Deputadu sira levanta kazu asidente ne’e iha Parlamentu Nasional atu dehan katak infelismente situasaun ida ne’e lao diak maibe parte husi deputadu ou ema ne’ebe maka sente ofendidu hasoru problema, iha dalan ba nia atu hato’o keixa tanba prosesu tomak iha akontesimentu asidente ne’e Polisia nia atendementu professional bainhira to’o iha fatin akontesementu Polisia asegura fatin.

Liga ho situasaun seluk Komandu PNTL Manu Fahi iha relasaun diak tebes ho Kamadas hotu-hotu, liu-liu liga ho Ex Arte Marsiais no juventude sira.

“Hau sente iha Same natureza furak tebes, ema mos diak teb-tebes, autoridade lokal no Ofisial Polisia Suku (OPS) mos iha ligasaun diak no koopera ba malu to’o iha nivel kraik ne’ebe problema laiha,” dehan Komandante Viana.

Antes termina Komandante ne’e relata durante nia mandatu atu tama fulan nen iha munisipiu Manu fahi liu husi atividade pasa revista ba transporte publiku no privadu hodi aplika koima ba Infrator sira ne’ebe kontra regras tranzitu konsege rekola osan hamutuk  $6000.00 hodi hatama reseitas ba kofre estadu; Hau mos fo ordem ba Polisia Komunitariu tenke lao no halo vizivilidade makaas. Media PNTL

Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes kinta-feira (08/10) ne’e hala’o enkontru ho Xefe Estadu Dr. Francisco Guterres ‘Lu-Olo’ hodi aprezenta servisu Komandu nian durante fulan Setembru tinan ne’e.

Komandante Jerál Komisariu Polísia Faustino da Costa hafoin sorumutu ba jornalista sira hateten Komandu mai atu aprezenta ba Xefe Estadu kona-ba situasaun jerál durante fulan Setembru nian no mós kazu balun ne’ebe akontese iha primeira semana fulan Outubru nian.

“Situasaun jerál iha teritoriu lao diak maske asidente ne’ebe sempre mosu, iha fulan Setembru asidente hamutuk 123 akontesimentu to’o asidente rodoviáriu ne’ebe rezulta ema na’in sanulu (10) mak mate no mós ema tolu-nulu resin walu (38) mak kanek todan”, tenik Komandante Jerál PNTL ne’e.

Komisariu Polísia ne’e afirma tan katak ne’e asaun polísia nian hodi halo baragem ka Cheek Point hanesan ita hotu akompaña iha Kapital Dili ne’ebe ita halo 178 Cheek Point no ita identifika Infrasaun ne’e hamutuk 1.355 husi númeru ne’e maka ita prega multa ba motorista no transporte sira tanba barak maka dokumentu laiha tantu karreta no ema nian, nune’e iha Setembru nia laran ita hetan Koimas hamutuk $32.480 ne’ebe maka ita hatama ba Kaixa Jerál Estadu nian.

“Iha Insidente ne’ebe akontese mós ami aktualiza ba Xefe Estadu liu-liu kona-ba kazu sira hanesan Laclo nian ne’ebe ida mate no ida kanek todan, hanesan mós kazu Manufahi ninian, liga mós ho kazu ne’ebe Viral los estudante balun hetan baku iha area Cristal ninian prosesu lao hela mesak ema minoridade deit”, haktuir Komisariu Polísia ne’e.

Autoridade másimu seguransa ne’e subliña tan katak além-de ne’e ba parte Estadu Emergensia (EE) nian maka situasaun iha fronteira ida ne’e maka aprezenta ba Xefe Estadu, oinsa Komandu nian antisipasaun ba iha parte fronteira ninian.

Media PNTL.               

Dili- Polisia Nasional Timor-Leste munisipiu Baucau hahu konsolida joventude Baucau oan hodi hametin unidade, amijade no paz atu nune’e komunidade bele moris iha ambiente ne’ebe seguru.

Komandante PNTL munisipiu Baucau Superintendente Xefe Armando Monteiro hateten agora ita iha faze konsolidasaun joventude ligadu ho problema no konflitu entre joventude ne’ebe akontese iha pasadu tanba ne’e liu husi kordenasaun no komunikasaun ho lider komunitaria, veteranus, Intelektual, joventude no organijasaun Arte Marsiais no Rituais iha faze reuniaun oinsa atu kria ekipa TaskForce ida halo kampana paz ho finalidade maka halo konsolidasaun deklarasaun kompromisiu dame ne’ebe sei halo iha tempu badak, Nia hato’o asuntu ne’e hafoin partisipa iha workshop Analisis SWOT iha Timor-Plaza Dili, Kuarta (07/10).

Alende ne’e Komandante ne’e mos tau ona iha nia ajenda programa Estabelesimentu Konsellu Polisiamentu Komunitaria (KPK) iha suku 45 ne’ebe maka seidauk nune’e autoridade seguransa bele servisu hamutuk ho povu hodi hametin seguransa no estabilidade hahu husi suku to’o munisipiu.

Hafoin simu Posse iha fulan tolu liu ba Hau hasoru difikuldade hahu husi inplementasaun programa Polisiamentu Komunitaria iha tinan 2002 to’o agora iha suku 45 maka seidauk kompleta no ida ne’e nudar Hau nia programa prioridade oinsa atu inplementa estratejia governu konstitusional da-VIII maka Polisiamentu Komunitaria no Seguransa Rodoviariu.

Agora dau-daun faze primeiru hahu ho kolokasaun OPS hodi nune’e OPS bele halo kordenasaun, komunikasaun no reuniaun ho estrutura konselu du suku hodi identifika joventude, intelektual, lider veteranus sira, organijasaun nasional no internasional liu-liu organizasaun nasional no ONG lokal sira atu involve iha estrutura KPK  nune’e bainhira iha problema ruma karik sira bele tur hamutuk hola medidas persuasiva antes hetan apoiu husi Eskuadra.

Programa no planu ida ne’e hetan apresiasaun husi parseru Fundasaun Asia (TAF-sigla ingles) no espera iha tempu badak antes tama tinan foun ita nia formasaun balu lao ona.

Konaba inplementasaun estratejia ba seguransa rodoviaria agora daudaun ita iha faze konsolidasaun hari merkadu seguru, Baucau seguru no iha tempu badak sei halo mudansa ba atividade balu ne’ebe maka durante ne’e okupa movimentu trasporte liu-liu iha terminal ne’ebe maka agora daudaun sai hanesan fatin merkadu PNTL Baucau ho Autoridade munisipiu sei muda negosiante sira  nune’e terminal ne’e bele sai terminal uniku hodi akumula movimentu transporte husi kapital ba Baucau tantu husi suku no postu Administrativu mai Baucau, hodi nune’e ita bele eduka no orienta ita nia komunidade sira hodi respeita no hakruk ba lei kodigu Estrada.  Media PNTL