Uncategorized

Dili- Ofisial Polisia Suku (OPS) halo kontrolu movimentu ema no transporte iha estrada publiku iha suku ne’ebe maka sira halao knaar ba hodi reforsa servisu Unidade Tranzitu Seguransa Rodoviariu.

Komandante PNTL munisipiu Dili Superintendente Xefe Henrique da Costa hateten objetivu Komandu munisipiu Dili koloka OPS sira ba halao atividade iha estrada publiku hodi kontrola movimentu transporte no ema lao ain, sira nia prejensa iha neba atu bele ajuda hodi kontrola movimentu tranzitu iha sira nia area, Nia hato’o asuntu ne’e ba media PNTL foin lalais iha Komandu PNTL munisipiu Dili.

Nia haktuirtan OPS la halo passa revista ba transporte maibe kuandu sira identifika ema ruma ne’ebe lao liu husi neba la uza kapasete, laiha xapa matrikula ka kontra regras tranzitu maka sira komunika kedas ba parte tranzitu ne’ebe maka halao hela servisu iha terrenu atu nune’e sira bele foti medida ruma ou karik OPS sira konsege prende maka sira kontaktu kedas mai District Operation Centre (DOC-sigla ingles) ou parte Tranzitu hodi haruka ekipa ECO ba tula no prosesu tuir regras tranzitu.

OPS besik liu ba komunidade tanba ho sira bele halo prevensaun ba komflitu, OPS halao atividade iha terrenu no akompana atividade iha suku laran hanesan enkontru komunitaria, halo patrula ho motor ba iha area ne’ebe maka mosu problema, halo atividade vizivilidade iha sira nia suku no atividade hamutuk ho juventude iha suku. Media PNTL

Dili- Durante semana ida hahu loron 15-21 Setembru Polisia Nasional Timor-Leste (PNTL) rejista kazu krime (insidente) hamutuk 41 ne’ebe kompostu husi  kazu violensia domestika, ema balu malu, tuda malu, asaltu malu no estraga sasan.

Xefe Seksaun Relasaun Publika no Portavoz PNTL Superintendente Xefe Arnaldo Araujo hateten insidente hirak ne’e Polisia atua hodi prosesa ba Tribunal no ba kazu balu resolve familiar entre parte rua depende gravidade krime, Nia hato’o asuntu ne’e iha komferensia emprensa iha Kuartel jeral PNTL Kaikoli Dili, Kuarta (23/09).

Komandante ne’e haktuirtan iha semana kotuk akontese insidente ida iha munisipiu Lautem traballador nain rua ne’ebe servisu iha kompania Aceil Atroice Fuel sira tun ba hamos tanki mina nian maibe tanba laiha sirkulasaun aár entaun nia maun ne’ebe tun uluk desmaya nune’e  mos nia alin ne’ebe maka tama tuir ikus mai desmaya no mate tanba laiha atensaun ba seguru  da vida (safety).

Alende ne’e PNTL mos rejista kazu Asidente tráfegu hakarak informa mos katak asidente ne’ebe maka mosu iha rai laran hamutuk 41 rezulta ema nain rua (2) mate, kanek todan nain 4 no nain 6 kanek kmaan.Iha fulan janeru to’o Setembru tinan ne’e Asidente Tráfegu  ne’ebe maka mosu iha Janeiru to’o Setembru rejulta ema mate hamutuk 48 barak minoridade ne’ebe uza motor MIO BEAT no hamosu dezastre barak tanba ne’e husu ba inan aman sira atu tau atensaun ba sira nia oan, hare kondisaun motorizada atu nune’e labele mosu asidente hirak hanesan ne’e.

Iha oportunidade ne’e Ex Komandante RAEOA ne’e aviza ba publiku katak Polisia Nasional Timor-Leste Unidade Tranzitu Seguransa Rodoviariu halo passa revista ba motor no kareta privadu, publiku no governu nian ne’e duni husu ba ita hotu atu bele fo atensaun ba dokumentus kareta no motor atu nune’e labele afeta ba motorista no kondutor sira ne’ebe maka lori transporte tanba Polisia agora halo passa revista makaas redus numeru asidente tráfegu.

Iha frontera forsa konjunta ne’ebe kompostu husi PNTL (UPF,Komandu Operasaun Espesial –(COE) no F-FDTL ne’ebe halao seguransa kaptura sidadaun nain 11 ne’ebe halo negosiu illegal iha fronteira, sidadaun hirak ne’e kompostu husi timor oan nain 8 no sidadaun  Indonezia nain 3 ne’ebe tama ilegalmente mai ita nia rain agora dadauk sira iha hela Quarantina Batugade depois Quarantina hotu sei submete ba prosesu investigasaun iha munisipiu Bobonaro. Media PNTL

Dili- Sentru Formasaun Polisia (CFP-sigla portuges) halo formasaun Pedagozia ba korpu Dosente Universidade da Paz (UNPAZ) hodi kualifika dosente sira nia abilidade atu hanorin.

Komandante CFP Superintendente Xefe Arquimino Ramos hateten formasaun Pedagozia ne’e ita dedika liu ba korpu dosente sira ne’ebe presiza iha skill atu prepara oinsa sira hanorin, prepara manual, planu lisaun, planu sesaun, no power point tanba dosente ida-idak presiza iha Konyesementu, Abilidade no Attitude hodi transfere ba estudante sira, nia hato’o asuntu ne’e iha abertura formasaun iha CFP Comoro Dili, Segunda (21/09).

Komandante ne’e haktuirtan ita hatene ita nia kualidade rekursu humanus iha Timor-Leste presija hadia buat balu tanba korpu dosente barak mai ho background oi-oin balu iha siensia sosiais, ekonomia no enjinaria sira iha matenek konaba ida ne’e maibe atu hanorin presija iha abilidade.

Nia akresenta formasaun iha timor maioria ita fo matenek deit ita la fo formasaun karáter entaun ne’e presija kada kurikulu no lisaun tenke iha objetivu aprendijajen estudante sira tenke iha kunyesementu, abilidade no attitude ne’e maka kompoin iha kurikulu ne’ebe mestre sira tuir lolos tenke hanorin, tanba ne’e maka liu husi formasaun ida ne’e korpu dosente sira bele aprende Pedagozia oinsa maka bele hanorin diak iha aula, komunikasaun, lian oinsa no kontrola klase oinsa para sira iha kunyesmentu diak atu hanorin.

Iha okajiaun ne’e Reitor UNPAZ Adolmando Amaral hateten antes ne’e UNPAZ iha ona Nota Koperasaun (MOU-sigla ingles) ho CFP iha koperasaun ne’e ami oferese bolsa estudu ba PNTL no ami aproveta saida maka PNTL iha, depois diskusaun naruk CFP bele fo formasaun ba dosente sira entaun ami aproveta ida ne’e; Ami iha dosente nain 111, ba formasaun etapa primeru ami haruka uluk dosente nain 30 hafoin etapa daruak sei mai.

Nia haktuirtan Ami hili CFP atu fo formasaun hodi sertifika ami nia dosente sira tanba uniku instituisaun iha timor agora dadauk ne’e maka CFP ho INDIMO maka bele sertifika formador sira, ami nia dosente sira konsidera hanesan formador tanba ne’e maka ami lori sira mai iha ne’e atu hetan formasaun para depois sertifika sira hodi prepara aan sai formador ne’ebe diak ba estudante sira.

UNPAZ iha fakuldade neen (6) ho Programa de Estudu 24 ne’ebe ami sei foti reprezentante husi programa estudu hirak ne’e ida-idak mai tuir sira nia area konsentrasaun ho esperansa katak  depois de formasaun ida ne’e dosente sira preparadu ona sai formador ne’ebe diak atu hanorin estudante sira hodi garante kualidade rekursu humanus.

Entretantu Reprejentante Diretor INDIMO Amandio Belo hateten formasaun ida ohin liga liu ho INDIMO katak formasaun hotu-hotu ho nivel I to’o IV ne’ebe maka ita hakarak garante nia kualidade, dokumentu ba formasaun ne’ebe ita halo bazeia ba nesesidade ne’ebe maka ita iha.

Nia haktuirtan iha pontu rua inportante ne’ebe presiza reve ba dosente sira maka kualifikasaun tekniku husi dosente ne’e rasik katak nia hanorin siensia ida ne’e ninia background tenke mai husi area ne’e, iha parte seluk ita mos hare Pedagozia katak nia bele iha konyesementu teknika maibe nia laiha abilidade oinsa transfere ka halo formasaun ida ne’e mos priense kriteria hanesan dosente ida ba Instituisaun akreditadu ida

Formasaun ida ne’e hola parte atu UNPAZ bele garante kualidade diak liutan ba estudante sira ne’ebe partisipa iha kursu ne’ebe maka hetan akreditasaun husi ANAAA,

“ Hau hakarak enkoranza korpu dosente ne’ebe partisipa iha formasaun ne’e katak formasaun ba ita moris la termina wainhira ita hetan ona doutoramentu ka iha nivel ne’ebe ass hau hanoin maske formasaun balu ne’ebe ita seidauk partisipa ita partisipa ne’e motivasaun diak ida atu eleba diak liutan ita nia kapasidade hanesan dosente,” dehan Amandio.

Formasaun Pedagozia ne’e foka liu ba kurikulu ne’ebe dezenvolve konaba Training and Assessment ho Formador husi CFP tuir planu Technical Vocational Educational and Training (TVET) katak kualidade ensinu nian ida ne’ebe iha grau aas hanorin sira ne’ebe grau kiik ida ne’e maka CFP aplika.

Formasaun ne’e kompostu husi teoria halao durante fulan ida (1) no pratika durante fulan neen (6), iha pratika formadu sira hanorin iha sira nia universidade depois avaliador sira ba avalia antes kualifika sira tuir sira nia nivel.Formasaun dahuluk ne’e partisipa husi korpu dosente nain 32 ho lisaun prinsipal konaba oinsa Metodulojia hanorin ne’ebe diak .

Serimonia Abertura formasaun Pedagozia ne’e prezidi husi Segundu Komandante Jeral PNTL Komisariu Mateus Fernandes no partisipa husi Diretor Ajensia nasional Avaliasaun Akreditasaun Akademika (ANAAA), Diretora FDCH, Segundu Komandante CFP, Ofisiais Subalternu sira, Komandante TLPDP, Korpu Dosente UNPAZ no konvidadu sira. Media PNTL

Dili- Investigador Unidade Ema Vulneravel (VPU-sigla ingles) nain 30 kompleta ona kursu kombate krime violasaun no abuzu sexual ba menor ne’ebe maka halao durante semana rua hodi hadia diak liutan atendementu ba vitima.

Komandante Jeral PNTL Komisariu Faustinu da Costa hato’o parabens ba investigador VPU sira ne’ebe maka partisipa kursu ne’e ho susesu hodi nune’e liu husi lisaun ne’ebe maka imi aprende bele sai referensia ba ita boot sira nia asaun iha terrenu, Nia hato’o asuntu ne’e iha serimonia enseramentu iha CFP Komoro Dili, Sexta (18/09).

Komisariu ne’e haktuirtan Violasaun sexual no Abuzu ba menor akontese tanba dependensia ekonomia vitima ba suspetu, estilu moris (life style), no informasaun teknolojia tanba ne’e husu ba imi atu kontinua halo sensivilizasaun violensia bazeia ba jeneru no kontinua servisu makaas atu nune’e bele redus krime ne’e.

Iha okajiaun ne’e Komandante Servisu Investigasaun Kriminal Nasional (SIKN) Superintendente Xefe Jose Neto Mok hateten Kursu ne’e inportante tebes ba investigador sira hodi hasae sira nia kunyesementu no kapasidade membru sira nian konaba oinsa halo auto notisia, oinsa halo prosesu investigasaun nebe klean no seguru ba vitima sira nune’e prokurador ne’ebe maka atende kazu ne’e bele estuda prosesu hirak ne’e bele hetan desijaun ne’ebe maka justu no favorese ba vitima no suspetu.

Komandante ne’e husu ba sira depois de tuir tia kursu ida ne’e matenek no lisaun foun ne’ebe maka sira hetan fahe tutan ba sira nia kolega ne’ebe maka ladauk hetan oportunidade mai tuir kursu ida ne’e, imi bele sai fali instrutor ba maluk sira iha munisipiu tanba iha kada munisipiu iha Centru Formasaun ne’ebe maka halo husi parseru TLPDP, entaun fatin iha ona oinsa kapasita ita nia ema hodi hatutan matenek ne’ebe sira hetan.

Iha okajiaun ne’e Komandante TLPDP Superintendent Darren Booy hato’o parabens ba partisipante hirak ne’ebe maka kompleta ona kursu ne’e durante ita boot sira kursu hasoru dezafiu balu maibe fiar katak liu husi kursu ne’e bele aumenta no habelar liutan ita boot sira nia kunyesementu.

Nia haktuirtan asaltu sexual no abuzu ba menor ne’e hahalok ida ne’ebe labele tolera no hein katak Ofisial VPU sira maka ema ikus atu responde ba kazu hirak ne’e, husu ba ita boot sira ne’ebe maka iha kunyesementu atu halo investigasaun atu bele konyese didiak kazu ne’e hodi lori prosesu to’o Tribunal hodi foti desijaun ne’ebe justu.

Kursu kombate krime violasaun no abuzu sexual ba menor ne’e hahu iha loron 07- 18 fulan Setembru, durante kursu Investigador VPU sira aprende konaba dezenvolvimentu abilidade konaba atendmentu ba vitima, lejislasaun, foti deklarasaun, jestaun ba lokal du krime, meius de inkeritu, entrevista suspetu, mandadu de buska no preparasaun arkivu kazu.

Kursu investigador VPU faze daruak  sei kontinua iha loron 9 fulan Novembru, faze datoluk no dahaat sei halao iha tinan 2021.

Serimonia Enseramentu kursu no entrega sertifikadu ne’e partisipa husi Komandante CFP Superintendente Xefe Arquimino Ramos, Segundu Komandante CFP Superintendente Boavida Ribero, Instrutor kursu Leesa Alexander no partisipante kursu. Media PNTL

Dili- Komandu Jeral Polisia Nasional Timor-Leste (PNTL) relata situasaun Seguransa nomos atividade polisial ba Prezidente Republika (PR) Dr.Francisco Guterres”Lu-Olo”

Komandante Jeral PNTL Komisariu Faustino da Costa hateten enkontru semanal ne’ebe maka halo ho Xefe Estadu Hau ho Segundu Komandandante Jeral aprejenta situasaun rai laran katak situasaun iha nivel teritoriu nasional lao diak no kalma maske ita hotu akompana hotu katak kazu agora tren liu maka fronteira, Nia hato’o asuntu ne’e ba Jornalista sira iha palasiu Prezidensia Bairo-Pite Dili, Kinta (17/09).

“ Aproveta dehan ba ita boot sira katak iha inisiu semana ne’e  Ami enkontru katak PNTL iha periodu Estadu Emerjensia kaer membru Grupu Arte Marsiais(GAM) Persaudaraan Setia Hati Teratai (PSHT) hamutuk nain 290 sira maioria iha Quarantena, ami mos halo enkontru ho sira nia ex lideransa sira atu kopera nune’e sira ne’ebe maka seidauk rejistu atu aprejenta labele husik para iha inportasaun COVID-19 hodi daet ba komunidade,” dehan Komisariu ne’e.

Komisariu ne’e haktuirtan Sidadaun hirak ne’ebe maka ekipa konjunta kaptura sira nia deklarasaun katak laos foin ba fulan ida rua ka semana ida ou rua maibe balu ba Indonezia fulan haat antes tia ona katak sira ba tia ona iha neba, sira ba laos grupu maibe ida-idak lao ninian via terrestre sae bis ba deit pois to’o iha neba maka ida-idak buka nia dalan tanba  sira iha kontaktu iha sorin maibe kuandu sira fila hamutuk grupu no liu husi tasi uza bero peskador sira nian tanba ne’e maka ita reforsa parte tasi hodi halo kapturasaun.

Asaun Polisia nian maka reforsa iha parte tasi husi Liquica to’o Batugade no rai maran nian laos deit Batelaun Ordem Publika (BOP) ho Unidade Patrulamentu Fronteira (UPF) maibe Kompania Operasaun Espesial (COE-sigla portuges) mos destakatan ba iha Maliana.

Iha enkontru semanal ho PR ne’e Autoridde maximu Seguransa ne’e informa mos asidente no insidente hanesan kazu asaltu malu entre GAM iha Tibar, iha festa kazamentu ne’e ida ikus mai GAM Kera-Sakti no PSHT, kazu seluk maka iha Tasi-Tolu feto ida hetan baku depois ema soe ne’e identifikadu no prosesu lao hela halo ona identifikasaun oras 12 ba autor nain 4 ne’e ita prosesu.

Nune’e mos kazu ema ida tuda Xineza iha Tasi-Tolu ne’e identifikadu no prosesu lao hela ita detein tia hein ninia kontinuasaun, kazu seluk maka grupu ida ne’ebe tren teb-tebes hanesan uluk ita dehan Ermera ne’e wao tanba tenta lori motor ba soke aviaun kontinua ida seluk maka hakarak ba sae malae nia aviaun; Ida ne’e mai grupu ida ne’ebe ami prosesu hela halo ona identifikasaun ba ninia responsavel sira ema ne’be organiza ne’e tanba ita nota katak ema sira ne’ebe submete ba grupu ida ne’e nia sai la normal hotu entaun ita detein ema nain 41 ne’ebe submete hela ba prosesu ne’ebe se ita hare tuir lei Nu.5/2017  pratika Arte Rituais ida ne’ebe bele dehan katak  illegal no prosesu lao hela.

Grupu ne’e ho numeru ne’ebe boot Tribunal halo ona Primeiru Interogatoriu ba membru balu no fiar katak sei iha desijaun balu ne’ebe merese ba ninia lideransa ka responsavel sira grupu ida ne’e nian.

Ami mos hato’o ba PR konaba asidente ne’ebe akontese iha Cova-Lima maun ba tula nia alin ne’ebe sai husi eskola  depois soke labarik monu mate nune’e mos iha Liquica sae iha kareta leten pois monutun mate kazu hirak ne’e maka ami atuialija ba PR.

Atu termina Komandante Jeral PNTL nee haktuir PNTL nafatin halo Barajen de Estrada (check point ) ne’ebe ita boot sira balu karik akompana entaun iha fulan Agostu deit ita konsege hatama reseta ba kaixa Estadu hamutuk kuaje $23 mil osan husi koimas ne’ebe motorista sira selu tanba infrasaun  no fiar katak iha Setembru nian sei sae liutan tanba ami la foku deit ba komunidade publiku maibe ba ema hotu-hotu, ne’ebe funsionariu ou Polisia nian mos tenke aplika koimas ba hotu-hotu. Media PNTL

Díli- Komando Polisia Nasional Timor-Leste (PNTL)  Unidade Tranzitu Seguransa  Rodoviaria Nasional halao passa revista Karta Kondusaun no Dokumentus ba Motorizada no kareta membru PNTL nian.

Komandante Unidade Tranzitu Seguransa Rodoviariu Superintendente João Belo Reis hateten pasa revista nee hanesan operasaun polisial seguransa rodaviariu nian hodi aplika lei ba Polisia, Nia hatoo asuntu nee iha Areador Kuartel Jeral PNTL Kaikoli Dili, ohin Kinta (17/09).

 “Ami tenke hamos ami nia uma laran tanba nee halo cek poin ba motorizada no kareta neebe maka membru PNTL uza inklui karta kondusaun membru sira neebe maka uza transporte governu no privadu.

Rezultadu cek poin ohin prende motorizada hamutuk 18, kareta 1, dokumentus 9 no karta kondusaun hamutuk 49. Ami identifika katak Motorista barak nia KIR mate, karta Kondusaun mate, liu-liu kareta governu ami tenke hadia tanba kareta barak nia dokumentu la kompletu.

Husi faze ida nee ami sei aplika situasaun normal hanesan populasaun sira hotu, motorista sira neebe nia karta kondusaun laiha, dokumentus mate, karta kondusaun mate tenke selu koima iha banku hanesanmos populasaun bai-bain nunee laiha esepsional ba sira.

Atu termina ex Komandante UPF nee hateten operasaun nee sei kontinua hahu husi nasional too Komandu munisipiu hotu para bele aplika lei ba Polisia nomos komunidade tanba ita hare grafiku asidente barak tinan nee hahu fulan Janeru too Setembru ohin ema nain 45 mate iha estrada tanba asidente trafegu nunee cek poin ita sei alargada liu-liu ba karta kondusaun. Media PNTL

Dili, Komandu Polisia Nasional Timor-Leste (PNTL) iha kuarta-feira (16/09) ne’e halo despedida ba Koordenadora Kursu lian Português Professora Manuela Isídro ne’ebe maka durante tinan rua nia laran sai hanesan Mestre em Educação de Adultos e Desenvolvimentu Local hodi hanorin lian Português ba membru PNTL sira.

Komandante Jerál PNTL Komisariu Polísia Faustino da Costa iha serimonia ne’e hateten lori Komandu PNTL nia naran hakarak hato’o agradese bo’ot ba sakrifisiu ne’ebe maka Professora Manuela fó durante ninia presensa iha Komandu PNTL hodi fahe matenek lingua nian ba membru sira.

“Lori Komandu PNTL nia naran agradese tebes-tebes ba sakrifisiu, hau la dehan esforsu tanba ho sakrifisiu ne’ebe durante ne’e nia buka meius oin-oin atu oinsa bele suporta PNTL, agradese ida ne’e no tuir mai lori mós membru ne’ebe hanesan estudante sira durante iha aulas nia laran buat ruma ne’ebe maka membru sira halo ba professora sente hanesan La Hanesan Ser-Umano, lori sira hotu nia naran husu deskulpa”, afirma Komandante Jerál PNTL ne’e.

Iha fatin hanesan Professora Manuela Isídro hato’o agradesimentu ba Komandu PNTL tanba sempre bele simu nia hanesan familia ida iha instituisaun ida ne’e nia laran. Tinan rua iha Komandu PNTL hanesan esperiensia ida ne’ebe iha valor bo’ot liu tanba bele hare’e membru sira ne’ebe hanesan hau nia estudante ho neneik bele koalia ona lian Português.

Iha okajiaun serimonia ne’e fahe mós sertifikadu ba membru PNTL husi Unidade Espesial Polísia (UEP) na’in 10 ne’ebe maka durante ne’e frekuenta ona kursu lian Português. Hola parte iha serimonia simples ne’e Komandante Jerál, Inspector Jerál, Xefe Gabinete Relasaun Internasional, Xefe Gabinete Relasaun Públika, Segundu Komandante UEP, Xefe Polisiamentu Komunitariu, Xefe Centro Operasaun Nasional inklui membru UEP sira.

Media PNTL. 

Dili –Komandu Polisia Nasional Timor-Leste (PNTL) halo enkontru semanal ho Komandante Eskuadra, Xefe Seksaun no Unidadade hodi koalia kona-ba planu servisu no orientasaun  husi Komandu Jeral.

Komandante PNTL Munisipiu Dili Superintendente Xefe Henrique da Costa hateten enkontru ne’e hodi reforsa servisu seguransa iha komunidade nia leet ho dixiplina, responsablidade no unidadade, Nia hato’o asuntu ne’e iha Komandu munisipiu Dili, Kuarta (16/09).

“Tenke hala’o mos, atividade rutina patrulla lao ain, cek point, inklui fo seguransa ba karantina tanba ita sei iha faze estadu emergensia,” dehan Komandante ne’e.

Komandante Henrique abiza ba membru sira katak durante periodu Estadu Emerjensia Komandu PNTL la autoriza membru atu lisensa annual.

Atu konklui komandante ne’e husu ba memebru hotu atu kontinua hala’o atividade sensibilizasaun ba Universitariu, estudantes eskola Sekundaria no Pré-sekundaria  iha Kapital Dili hodi esplika Lei Kodigu Estrada, no implementasaun Polisiamentu Komunitaria iha komunidade nia let.

 Media PNTL, Melquiades do Nasscimento

Dili, Vise Ministru Interior (VMI) Antonio Armindo iha tersa-feira (15/09) ne’e hala’o vizita ida mai iha Kuartél Jerál Komandu Polísia Nasional Timor-Leste (PNTL) hodi hala’o enkontru ho Komandante Jerál no Segundu Komandante Jerál hamutuk ho Komandante Komandu Munisipiu sira hodi fó koragem ba Komandu PNTL hodi kontinua implementa Konsellu Seguransa Munisipal (KSM) iha teritoriu laran tomak.

Hafoin enkontru ba jornalista sira, VMI hateten objetivu husi vizita ohin nian maka iha asuntu rua, primeiru maka hamutuk ho Komandante Jerál no Segundu Komandante Jerál atu koalia ho Komandante Komandu Munisipiu sira tuir orientasaun Primeiru Ministru hanesan mós Ministru Interior orienta ami atu koalia hamutuk hodi oinsa bele ativu fila fali KSM nian.

“KSM ne’e agora lao dadaun hela, ita mai fó koragem nafatin ba membru sira atu kontinua lao no envéz kada fulan tolu ita halo maibé pelo menus ita bele halo kada fulan envolve autoridade lokal sira iha munisipiu atu bele koalia kona-ba kestaun seguransa, hanesan ita hotu hatene agora dadaun ne’e seguransa ida ne’ebe ameasa bo’ot liu ne’e maka Pandemia COVID-19 tanba ne’e maka kontinua fó hatene sira, enkoraja sira atu bele kontinua servisu nafatin iha idak-idak ninia munisipiu”, esplika VMI ne’e.

Antonio Armindo haktuir tan objetivu seluk husi vizita mai iha Komandu maka atu hare’e deit konstrusaun ba Kuartél Jerál nian ne’ebe lao dadaun hela. Ba fatin ne’ebe komunidade sira iha area kotuk edifisiu nian ne’e tama hotu iha deseñu ida ne’ebe maka pakote hamutuk ho projetu ida agora lao dadaun ne’e. Prosesu administrativu no legal hotu iha hela no ita hein deit kuando desizaun ne’e tun mai atu oinsa hafoin sira iha terenu ezekuta tuir desizaun ne’ebe governu sei deside.

Iha fatin hanesan Komandante Jerál PNTL Komisariu Polísia Faustino da Costa hafoin hala’o enkontru ho Komandante Komandu munisipiu sira hateten ohin ita halo avaliasaun servisu ho Komandante munisipiu sira hanesan ita hotu hatene implementasaun Estadu Emergensia (EE), entaun saida maka Komandante munisipiu, Unidade sira halo ba iha ezekusaun EE ida ne’e.

“Parte segundu maka ita hare’e mós kona-ba oinsa ba oin problema ka difikuldades balun liga ho tetu orsamentu ne’ebe governu fó mai PNTL, ida ne’ebe maka sai prioridade atu koloka liu-liu iha parte Bens ninian, ne’ebe iha diskusaun implementasaun EE preukupasaun hotu-hotu nafatin maka ema balun ne’ebe gosta hakur fronteira ba sa’e Sintu (Sabuk) ida ne’e”, tenik Komandante Jerál PNTL ne’e.

Komisariu Polísia ne’e akresenta tan entaun ita rezistu hamutuk ida ne’e, saida maka ita husu iha munisipiu no Unidade sira ita instala ona kuase maioria/ metade de suku ne’e Konsellu Polisiamentu Komunitariu, entaun sira iha enkontru ne’eba.

“Iha mós munisipiu ita iha Konsellu Seguransa Munisipal (KSM), agora tuir norma ne’ebe Komandu hasai iha 2017 katak KSM ne’e bele hala’o nia enkontru kada fulan neen (6), maibé ita orienta katak maske normas ou regras fó sai hanesan ne’e ho situasaun emergensia ita halo aktividade ne’e espesial katak laos la respeita normas ne’ebe iha maibé oinsa maka ita bele hamutuk ho Konsellu ida ne’e tanba Konsellu ida ne’e kompostu husi area rua hanesan Estabilisator no Dinamisator ne’ebe estrutura husi munisipiu ninian ho Komandu PNTL sira iha ne’eba”, esplika Komisariu Polísia ne’e.

Autoridade másimu seguransa ne’e afirma liu tan katak iha enkntru balun ne’ebe Komandante munisipiu sira halo detekta nafatin katak konsiensia ema idak-idak nian maka importante, bele autoridade, bele inan-aman, bele lideransa komunitaria sira ita koalia maibé kuandu laiha konsiensia pesoal hodi sente katak Virus COVID-19 ne’e sai hanesan perigu maka sira sei gosta nafatin halo aktividade ho ilegalmente.

Media PNTL.         

Dili- Polisia Nasional Timor-Leste (PNTL) munisipiu Dili kaptura membru Rede Grupu natureza labarik nain 40 ne’ebe maka halo atividade illegal halo aan sagradu hodi ema ba adora hodi submete ba prosesu investigasaun.

Komandante Komandu PNTL munisipiu Dili Superintendente Xefe Henrique da Costa hateten  iha loron 14/09 tuku 18:00 PNTL munisipiu Dili no Eskuadra Dom Alexo ne’ebe halo patrula konsege sobu Rede Grupu Natureza Labarik iha aldeia Rosario suku Madohi hodi kaptura ema nain 40 husi munisipiu Baucau inklui sidaun estranjeru nain ida (1), Nia hato’o asuntu ne’e iha nia knaar fatin Kaikoli Dili, Segunda (14/09).

Komandante ne’e haktuirtan Sidadaun Indonezia ho naran inisial AA ne’e involve ona iha kazu ne’ebe hanesan iha 2014 iha Tasi-Tolu no iha Manleuana ne’ebe maka halo nia aan hanesan ema Sagradu no ema hotu ba adora. Nia hahalok ida ne’e maka akontese nafatin horseik entaun parte investigasaun rekolya hotu dadus no informasaun atu nune’e bele aprezenta ba Ministeriu Publiku iha tempu badak hodi hetan desijaun.

Grupu ne’e nia kordenador ho naran inisial DJ no ida seluk VD maka responsavel hodi lori ema sira husi munisipiu mai atu hela iha sira nia fatin hodi halo atividade ne’e. Sira mai husi Baucau iha loron 30 Agostu atu partisipa iha serimonia balu depois serimonia ne’e remata sira la fila to’o agora.

Iha operasaun ne’e PNTL hetan mos atributu hanesan bandera RDTL rua (2), bandera FRETILIN rua (2), bandera FALINTIL, osan no hahan (háre) no fos ne’ebe maka sira han. Informasaun ne’ebe maka Polisia hetan katak Senhora ida husi estranjeru ne’e buka hahan diak hanesan fos mean, ikan mas mean no hahan diak deit maka fo ba nia han.

Komandu PNTL munisipiu Dili kontinua halo prosesu investigasaun tanba identifika katak sidadaun estranjeru ne’e mos laiha dokumentus hanesan pasaporte entaun ami sei kordena nafatin ho parte Servisu Migrasaun atu nune’e bele hare konaba ida ne. Sidadaun Indonezia ho naran inisial AA Ne’e hela iha Timor-Leste kleur ona nia tama timor iha tinan 2011 hodi halo atividade ne’e to’o agora.

Komandante Henrique esplika ligadu ho kazu ne’e Polisia mos buka hela faktus ruma karik kazu ne’e iha mos ligasaun ho  kazu ne’ebe maka akontese iha fulan hirak liu ba sidadaun ida husi munisipiu Ermera sae motor tenta atu ba soke aviaun iha Aero portu no sidadaun ida seluk ne’ebe maka tenta ba sae aviaun ida ne’ebe maka para hela, ita tenta liga took ba iha neba tanba grupu ne’e hanesan grupu ne’ebe maka sira reza ho imajinasaun makaas katak buat ne’ebe maka la akontese sira dehan tenke akontese. Media PNTL