Uncategorized

Dili- Komandante Eskuadra nain 20 resin kontinua tuir Kursu Investigasaun faze daruak hodi hasae sira nia konyesementu konaba prosesu no lalaok oinsa investiga kazu ruma atu nune’e bele orenta membru sira hodi halo servisu.

Komandante Sentru Formasaun Polisia (CFP-sigla portuges) Superintendente Xefe Arquimino Ramos hateten kursu ne’e foka liu kona ba Dilijensia Investigasaun Kriminal tanba Komandante Eskuadra sira mos presija hatene prosedimentu ne’ebe maka halao iha Kodigu Prosesu Penal no Kodigu Penal Timor-Leste atu bele orenta membru sira halao servisu diak liu, Nia hato’o asuntu ne’e iha CFP Comoro Dili, Segunda (24/08).

Nia haktuirtan dala barak iha interpretasaun Lei ne’ebe lahanesan tanba ne’e maka CFP ho parseru TLPDP realiza kursu ida ne’e atu nune’e Komandante ho Investigador sira interpreta artigu hirak ne’ebe iha lei ho diak atu bele prosesa kazu tuir lei ne’ebe maka vigora.

“Hau rekomenda ba Komandante Jeral atu Komandante sira ne’ebe tuir kursu ne’e pelu menus servisu lai iha Eskuadra neba selae sira kursu tia hotu muda fali ba fatin seluk entaun konyesementu ne’ebe iha la bele transfere ba maluk sira seluk no labele aplika konyesementu ne’ebe maka nia aprende,” dehan Komandante Ramos.

Entretantu Komandante Servisu Investigasaun Kriminal Nasional (SIKN) Superintendente Xefe Jose M. Neto Mok hateten Kursu Investigasaun ne’e ho objetivu atu fo kapasitasaun ba Komandante sira atu iha konyesementu iha area investigasaun nian nune’e sira bele orenta investigador no jere membru sira hodi halo atendementu ba kazu krime hirak ne’ebe maka akontese iha area juridiku Eskuadra ida-idak.

Komandante ne’e haktuirtan Servisu Investigasaun Kriminal iha ligasaun ho Ministeriu Publiku (MP) nudar nain ba asaun penal katak PNTL hasoru no kaer prosesu investigasaun tanba ne’e Komandante sira tenke iha konyesementu klean para bele jere investigador sira iha terrenu bainhira simu delegasaun kompetensia husi MP atu kompleta  prosesu ba kazu ruma.

Kursu Investigasaun ne’e nudar kontinuasaun husi kursu ne’ebe maka halao tia ona iha loron 03-07 Agostu no kursu da toluk sei halao semana oin hodi kompleta Komandante Eskuadra hotu-hotu partisipa iha kursu ne’e; Kursu da ruak ne’e partisipa husi Komandante Eskuadra nain 23 durante loron lima (24-28).

Kursu Investigasaun faze daruak ne’e loke husi Komandante Jeral PNTL Komisariu Faustino da Costa no akompaña husi Segundu Komandante TLPDP, Komandante CFP no Komandante SIKN. Media PNTL

Dili, Komandu Polísia Nasional Timor-Leste (PNTL) segunda-feira (24/08) ne’e hala’o enkontru Ida ho Grupu Movimentu Justisa Ba Dame hodi koalia kona-ba asaun pásifiku ne’ebe maka grupu ne’e sei hala’o iha tempu badak relasiona ho Petisaun ne’ebe maka sira sei hato’o ba Prezidente Repúblika Francisco Guterres “Lu-Olo” relasiona ho situasaun politika rai laran.

Porta-Voz Komandu PNTL Superintendente Xefe Arnaldo de Araujo hafoin enkontru ba jornalista sira heteten Komandu PNTL liu husi Komandante Komandu Operasaun no ekipa hala’o enkontru ho Grupu Movimentu Justisa Ba Dame ne’ebe lidera husi Angela Freitas hodi koalia kona-ba aktividade ne’ebe grupu ne’e sei hala’o tuir planu antes maka iha loron 28 fulan Agostu maibé tanba iha asuntu balun ne’ebe maka seidauk kompleta maka asaun pásifiku ne’e sei realiza iha loron 4 fulan Setembru tinan 2020.

“Iha enkontru ne’e seidauk iha konkordansia ba malu tanba grupu refere seidauk bele kompleta rekezitus sira ne’ebe maka hanesan kumpri Lei Nu.1/2016 kona-ba Liberdade ba Asembleia no Demonstrasaun liu-liu iha artigu 5 kona-ba Ristrisaun ka Limitasaun atu nune’e asaun ne’e bele lao ho diak”, esplika Porta-Voz Komandu PNTL ne’e.

Superintendente Xefe akresenta tan katak wainhira grupu refere la kumpri rekezitus ne’ebe maka iha, maka parte autoridade seguransa sei la autoriza atu halo asaun pásifiku ne’e. Iha enkontru ne’e parte PNTL halo deit konkordansia ho parte Grupu Movimentu Justisa Ba Dame atu oinsa maka aktividade refere labele mosu problema ruma.

Iha fatin hanesan Porta-Voz Grupu Movimentu Justisa Ba Dame Angela Freitas hateten objetivu prezensa grupu nian mai iha Komandu PNTL atu informa deit katak iha mudansa oituan tanba ne’e ami kontinua nafatin koopera husi parte autoridade seguransa nian atu nune’e iha asaun pásifiku ne’ebe maka sei realiza ne’e lao ho paz no trankuilidade.

“Iha mudansa husi loron 28 ba fali loron 4 fulan Setembru tanba ami sei hein rekollamentu husi  formulariu ne’ebe maka ami distribui ba distritu sira seidauk to’o tanba ne’e maka fó tan tempu atu nune’e bele rekolla hotu husi distritu 13 maka ami foin hato’o iha petisaun, iha loron 4 fulan Setembru”, informa Porta-Voz ne’e.

Angela Freitas haktuir tan parte autoridade seguransa ho grupu iha kooperasaun ne’ebe diak tebes, ita hatene katak parte polísia nian hakarak koopera másimu posivel atu nune’e buat hotu bele lao diak no laiha parte terseiru ne’ebe maka baralla prosesu asaun ne’e rasik.

Hola parte iha sorumutu ne’ebe lidera husi Komandante Komandu Operasaun Superintendente Xefe Pedro Belo, Porta-Voz Komandu PNTL Superintendente Xefe Arnaldo de Araujo, Segundu Komandante PNTL Munisipiu Dili Superintendente Euclides Belo ho nia ekipa no Sub-Xefe SIP.

Media PNTL.     

Dili, Komandu Polísia Nasional Timor-Leste (PNTL) durante semana ida hahu’u husi loron 11-18 fulan Agostu tinan 2020 rezista kazu Asidente Tráfegu hamutuk 24. Husi total kazu refere ema ho kanek kma’an hamutuk 26, kanek todan na’in 5 no rezulta ema ida mate iha asidente ida ne’ebe akontese iha loron 16 Agostu liu ba.

Porta Voz Komandu PNTL Superintendente Xefe Arnaldo Araújo kuarta-feira (19/08) ne’e informa além-de asidente ne’ebe maka mosu, iha mós insidente balun ne’ebe maka akontese durante semana ida nia laran rezistu hamutuk kazu 6 maka hanesan kazu sunu uma iha Laga munisipiu Baucau ne’ebe ninia porsesu andamentu iha ona Ministeriu Públiku.

“Durante semana ida nia laran asidente tráfegu hirak ne’ebe maka akontese kauza husi fátor umanu 90%, fátor Veíkulu 5% no fátor dalan 5% hodi nune’e maka rezulta ema kanek no balun tenke lakon vida”, tenik Porta Voz Komandu PNTL ne’e.

Superintendente Xefe ne’e informa tan rekapitulasaun Insidente ne’ebe maka PNTL rezistu hahu’u husi  fulan Fevereiru to’o fulan Jullu tinan ne’e hamutuk 620 kazu. Husi númeru ne’ebe iha, tipu kazu ne’ebe maka akontese maka hanesan Asaltu/Integridade fizika simples, baku malu no tuda malu.

“Ami mós rezista kazu violensia domestika durante fulan Janeiru to’o mai fulan Jullu tinan ne’e hamutuk 449 kazu, ne’e númeru ida ne’ebe ass tebes tanba PNTL liu husi Polisiamentu Komunitaria halo sosializasaun kona-ba Lei Violensia Domestika (VD) ba ita nia komunidade sira, uluk ita nia komunidade sira la hatene saida maka VD, tanba sira hatene deit katak VD ne’e ba rezolve deit iha nivel Suku ou familia”, afirma Superintendente Xefe ne’e.

Xefe Gabinete Relasaun Públika PNTL ne’e haktuir Lei Violensia Domestika agora sai ona Krime Públiku iha Lei Kódigu Penal, nune’e númeru VD ass tanba servisu Polisiamentu Komunitaria hodi habelar informasaun kona-ba Lei VD, ikus mai komunidade sira hatene ona katak VD ne’e Krime Públiku, entaun problema saida deit mak mosu iha uma laran, ita nia komunidade sira halo keixa ba Polísia. Husi prosesu sira ne’e hotu maka ikus mai rezista kazu VD sae maka’as.

Media PNTL.       

Dili, Komandu Polísia Nasional Timor-Leste (PNTL) tersa-feira (18/08) ne’e hala’o enkontru ida ho parseiru desenvolvimentu Timor-Leste Police Development Program (TLPDP) hodi diskuti koordenasaun programa konjunta ne’ebe maka hala’o ona iha tinan 2019-2020 no estratéjia programa ba tinan 2020-2026.

Segundu Komandante Jerál PNTL Komisariu Polísia Mateus Fernandes iha abertura enkontru ne’e hateten lori Komandu nia naran agradese tebes ba apoiu ne’ebe maka parseiru TLPDP fó durante ne’e mai PNTL tanba prezensa parseiru nian ne’ebe maka sempre hamrik iha PNTL nia sorin iha situasaun saida deit.

“Agora dadaun TLPDP servisu maka’as hela hodi identifika postu haat no lima iha liña fronteira tanba governu ezize postu foun ne’e bele realiza lalais, postu foun sira ne’e sei hare’e liu ba ema sira ne’ebe tama illegal, hare’e ba volume ikus-ikus ne’e ema tama illegal liu husi fronteira sae maka’as, tanba ne’e ita presiza kobre lalais asuntu sira ne’e; entaun governu liu husi Vise Ministru Interior no Komandante Jerál husu TLPDP atu fó apoiu ba ita”, tenik Segundu Komandante Jerál PNTL ne’e.

Komisariu Polísia ne’e haktuir tan parseiru TLPDP iha koragem ne’ebe bo’ot hodi apoiu PNTL liu-liu iha konstrusaun Edifisiu Sentru Koordenasaun Krime Trans Nasional (TNCC-Trans National Crime Coordination Center, sigla Ingês) iha resintu Kuartél Jerál PNTL Kaikoli ne’ebe maka oras ne’e dadaun lao hela.

“Tanba ne’e atu servisu koordenasaun bele lao ho diak presiza ita hotu nia kolaborasaun másimu hodi nune’e ita bele atinzi planu hotu ne’ebe maka ita iha ona, tantu parseiru no mós PNTL rasik”, hakotu Komisariu Polísia ne’e.

Iha enkontru ne’e, parte TLPDP aprezenta programa no apoiu hirak ne’ebe maka sira fó ona ba PNTL iha tinan 2019 to’o 2020 no estratéjia programa sira ne’ebe maka sei kontinua oferese ba PNTL iha periodu tinan 2020 to’o 2026.

Hola parte iha enkontru ne’e Segundu Komandante Jerál PNTL, Komandante Komandu Operasaun, Administrasaun, Xefe Planeamentu, Xefe Jenéru no Segundu Komandante TLPDP ho ekipa.

Media PNTL.     

Dili- Polisia Nasional Timor-Leste (PNTL) Unidade Patrulamentu Fronteira (UPF) kontinua hametin vizilansia iha fronteira terrestre hodi kontrola movimentu ema tama no sai hodi prevene COVID-19.

Komandante UPF Superintendente João Sancho Pires hateten Estadu Dekreta ona estadu emerjensia ba dala IV no UPF nafatin halao servisu hanesan periodu Estadu Emerjensia dala III tutuir malu no ita fortifika liutan oinsa bele hasae volume patrulamentu iha fronteira hamutuk ho F-FDTL ne’ebe maka koloka iha Maliana no Suai atu redus ema tama no sai iha fronteira Maliana, Suai no Oecusse  hodi prevene COVID-19 akontese iha ita nia nasaun, Nia hato’o asuntu ne’e hafoin partisipa serimonia aniverariu UEP iha Sexta (14/08).

Nia haktuirtan Komandu UPF mos sosialija ba komunidade hirak ne’ebe maka hela iha lina fronteira oinsa sira kopera ho Polisia para itabele minimija movimentu iha fronteira, UPF mesak labele halo buat ida maibe populasaun no autoridade sira iha lina fronteira servisu hamutuk ho ami ita sei asegura diak liutan.

“Tuir orentasaun Komandu nian katak sidadaun sira ne’ebe maka hasoru malu, kumprimenta no adeus malu iha mota laran deit mos ita lori mai entrega ba parte saude hodi tau iha karantina”.

Iha loron 06 to’o mai ohin ita kaptura sidadaun nain 10 resin hodi entrega ba Ministeriu Saude hodi karantina no sidadaun Indonezia ne’ebe maka to’o mai Mota Ain ita deporta sira, Ami nia orentasaun ba membru sira wainhira hetan sidadaun Indonezia dok husi fronteira Mota Ain, Sakato no Mota-Masin ita haruka duni fila, maibe sidadaun ne’ebe maka hakat mai besik fronteira ita lori mai entrega ba Servisu Migrasaun atu deporta fila tanba ita lakoi hadaet moras mai ita.

Tuir rejolusaun ne’ebe maka iha loron 17tan maka loke fali fronteira, Ami lao tuir orentasaun ne’ebe maka Komandu fo atu asegura hodi buat ruma labele akontese mai ita.

Atu asegura seguransa iha fronteira ho masimu maka Komandu PNTL orenta membru Unidade Espesial Polisia (UEP) ba Munisipiu Bobonaro, Cova-Lima no RAEOA hodi suporta  no apoia UPF para evita ema ne’ebe hakur illegal ba mai Timor-Leste no ba Indonezia. Media PNTL

Dili- Komandante Jeral PNTL husu ba Unidade Espesial Polisia UEP atu halo reflesaun klean ba ejistensia Unidade ne’ebe kompleta ona tinan 11 hodi hadia diak liutan sira nia servisu hodi servi povu no nasaun ho profesional.

Komandante Jeral PNTL Komisariu Faustino da Costa hateten Unidade Espesial tenkeser hatudu katak sira espesial no sira unidade duni hodi halo abaliasaun profunda karik iha servisu balun ne’ebe sira sidauk halo diak no maximu tenke buka atu hadia liu husi manera Polisia Nasional Timor-Leste nia filosofia Polisiamentu Komunitariu ho karater identiku militar, Nia hato’o asuntu ne’e iha Kuartel UEP Bairo-Pite Dili.

Komisariu ne’e haktuirtan Misaun Unidade Espesial atu suporta Komandu Munisipiu sira bainhira nesesita apoiu iha kazu balu ne’ebe bele afeta ba ordem publika no  Komandu munisipiu sira lakonsege atua.

“UEP hamrik dekada ida resin ona katak Sub Unidade tolu tau hamutuk iha Unidade Espesial da Polisia, tinan 11 ne’e katak tinan reflesaun, disiplina sai fator ne’ebe konsidera profesionalismu iha atendimentu no atuasaun ho savi inportante maka Hirarkia, Kadeia de Komandu, Disiplina no estatutu, tenkeser hatene katak Ami Unidade Espesial Ami Polisia Nasional entaun Unidade Espesial husi Polisia Nasional katak iha timor PNTL ida deit ho dutrina ida deit no juramentu ida deit Oinsa atu servi povu rai ida ne’e ho respeita direitu Humanus,” dehan Komandante Jeral.

Iha okajiaun ne’e Vice Ministru Interior Antonio Arminido hateten iha tinan 11 nia laran UEP kontribui signifikamente ba manutensaun Ordem Publika iha nasaun ida ne’e, UEP nia knaar inportante no estratejiku maka atu ajuda no halo manutensaun ba hakmatek no estabelese ordem publika inklui providensia siguransa pessoal ba Entidades Estadu no eminente sira.

Nia haktuirtan UEP ejisti iha mundu tomak no sira mantein postura prontidaun maximu hodi infrenta kualker tipu amiasa iha kualker teatru operasaun ho nivel amiasa esepsional iha terrenu, ho natureja espesial ne’e ita boot sira tenke halo formasaun no treinamentu bebeik hodi hasae ita boot sira nia profesionalismu, aumenta efikasia teknika, abilidade fizika no disiplina maximu.

Vice Ministru ne’e rekonyese katak kapasidade prontidaun ejiji ita nia investimentu tanba ne’e mesmu ami foin atu kompleta fulan rua mais ami promete katak durante mandatu governu ida ne’e ami sei esforsu hodi tau atensaun mos ba dezenvolvimentu UEP hodi bele kumpri nia misaun ho dignu.

Iha okajiaun ne’e Komandante UEP Superintendente Xefe Orlando Gomes hateten UEP konstitui hanesan Unidade rezerva PNTL nian  ho misaun espesifiku hodi promove kapasidade no mobilija forsa Unidade Espesial PNTL atu lidera kualker situasaun perturbasaun ordem publika ho intensidade aas prinsipamente atu kombate krime organizadu ho armas de fogu atu mantein lei no ordem iha teritoriu nasional Timor-Leste.

Nia haktuirtan Membru Operasional hotu iha UEP tenke iha formasaun teknika no professional duke membru PNTL sira seluk, BOP, CSP no COE ne’ebe maka hamutuk bele produs familia ida ne’ebe metin hodi ajuda no apoiu kompleta malu iha misaun hodi kontribui ba seguransa ne’ebe iha efikasia no efisiensia atua hodi nune’e fornese seguransa ba povu ho diak.

UEP moris liu husi prosesu agrupamentu ba Unidade tolu (3) hanesan Unidade Intervensaun Rapida (UIR) agora konyesidu ho naran Batelaun Ordem Publika (BOP), Corpu Seguransa Pessoal (CSP), agora konyesidu hanesan Compania Seguransa Pessoal(CSP), Unidade Rezerva Polisia (URP) agora konyesidu ho naran Compania de Operasaun Espesial (COE) mudansa ne’e hatudu evidensia no konkretija ne’ebe boot ho realidade ezemplu ba aprosimasaun no konyesementu ba membru sira iha sub unidade tolu bazeia ba faktus katak membru sira ne’e hela hamutuk lor-loron iha Komandu ida no hatudu duni sira nia espiritu de korpu ne’ebe aas.

Serimonia aniversariu UEP ba dala 11 ne’e kompleta ho Promosaun Diviza por antiguidade ba Ajente nain tolu(3) hodi promove ba postu Ajente Principal, Entrega Sertifikadu de Louvor ba membru nain 12ne’ebe iha dedikasaun ass, no demostrasaun Abilidade membru UEP.

Serimonia ne’e partisipa husi Prezidente Komisaun B Parlamentu Nasional Jose Agustinho “Xomotso”, Eis Komandante Jeral PNTL Paul de Fatima Martins, Inspetur Jeral PNTL, Komandante Operasaun, Segundu Komadante munisipiu Dili, Komandante UPF, Diretur Jeral Servisu Migrasaun, Komandante Unidade, Xefe Departamentu, Adidu Seguransa Portugal, Reprejentante Veteranus, Administrasaun,  Parseru TLPDP,  Fundasaun Azia, Ofisiais, Superior, Inspetor, Sarjentu no Ajente,   no konvidadu sira. Media PNTL

Dili, Komandu Polísia Nasional Timor-Leste (PNTL) kinta-feira (13/08) ne’e hala’o enkontru ho grupu Aliansa Universitariu Timor-Leste (AUTL) relasiona ho karta rekoñesimentu ida ne’ebe Komandu PNTL simu liu husi Komandu Operasaun kona-ba asaun pásifika ne’ebe AUTL sei hala’o iha semana oin (17/08). AUTL kestiona ho dezisaun politika VIII governu nian iha dekretu Lei Nu.21/2020 hodi fó subsidiu ba estudante non-bolseiru sira ne’ebe frekuenta hela estudu iha estrangeiru relasiona ho Surtu COVID-19 ne’ebe afeta mundu.

Porta Voz Komandu PNTL Superintendente Xefe Arnaldo Araújo hafoin enkontru ba media sira hateten reprezentante AUTL sira ne’e mai hasoru Komandu PNTL relasiona ho karta koñesimentu ne’ebe maka sira dirigi mai Komandu hodi fó apoiu seguransa ba asaun ne’ebe maka sira sei halo iha semana oin.

“Enkontru ohin lao diak, parte AUTL entende diak ho PNTL ne’ebe lidera husi Komandante Operasaun liu-liu kona-ba kritériu ou regra sira ne’ebe sira (AUTL-red) tenke kumpri tanba Lei maka fó dalan hodi halo manifestasaun, hanesan distansia husi fatin manifestasaun ho edifisiu Estadu nian, Lei Armas Brankas mós parte AUTL tenke kumpri hanesan labele lori sasan kroat hodi afeta ba ema seluk”, esplika Porta Voz Komandu PNTL ne’e.

Superintendente Xefe Arnaldo afirma tan molok realiza asaun pásifika, parte AUTL ho Komandu PNTL liu husi Komandu PNTL munisipiu Dili sei asina akta ida ne’ebe hetan ona konkordansia parte rua atu nune’e aktividade manifestasaun bele lao ho diak. Parte PNTL munisipiu Dili sei fó seguransa másimu ba iha asaun refere no manifestante sira tenke kumpri ba Lei Kódigu Estrada Nu.6/2003.

Iha fatin hanesan reprezentante Porta Voz AUTL Moises Soares Magno hateten objetivu mai hasoru Komandu PNTL atu koalia kona-ba karta koñesimentu ba demonstrasaun ninian tanba iha semana kotuk ami submete karta koñesimentu mai parte seguransa hanesan PNTL kona-ba asaun ne’ebe sei hala’o iha loron 17 fulan Agostu tinan ne’e.

“Asaun pásifika ne’e halo primeiru maka atu kestiona dezisaun politika injustu husi VIII governu ne’ebe foti dezisaun politika ida liu husi Lei Nu.21/2020 hodi fó subsidiu ba maluk estudante Timor oan sira ne’ebe hala’o estudu iha rai liur no sira ne’ebe hetan subsidiu ne’e estudante sira non-bolseiru, agora dezisaun ida ne’e fó deit ba estudante sira non-bolseiru iha rai liur maibé estudante Ensinu Superior iha rai laran ami la hetan”, tenik reprezentante Porta Voz AUTL ne’e.

Moises Soares akresenta tan ami laos atu husu subsidiu maibé pelo menus VIII governu ida ne’e responsabiliza netik propinas semester par tinan 2020. Enkontru ne’e parte AUTL laos mai atu husu autorizasaun parte seguransa maibé tuir Lei Demostrasaun Nu.1/2006 hateten katak husu ba demostrante sira molok halo asaun pásifika tenke submete uluk karta koñesimentu ba parte PNTL, hafoin ida ne’e parte PNTL manda karta notifikasaun ida ba parte AUTL.

“Massa sira ne’ebe sei hola parte iha asaun pásifika ne’e maka AUTL ne’ebe konstitui husi Universidade haat hanesan UNITAL, UNDIL, UNTL no UNPAZ, Institutu haat maka hanesan ICS, IEC, DIT no IOB”, haktuir reprezentante Porta Voz ne’e.

Media PNTL

Dili- Durante loron 9 (04-12/08) Polisia Nasional Timor-Leste (PNTL) rejista kazu krime hamutuk 26 hodi presa ba Ministeriu Publiku (MP).

Portavoz Komandu PNTL Superintendente Xefe Arnaldo Araujo relata kazu krime hirak ne’ebe akontese kompostu husi Asaltu 10, Ofensa Integridade Fizika Simples 15 no Tentativa Homesidiu 1. Kazu hirak ne’e nia prosesu iha ona Polisia no sei kontinu ba Ministeriu Publiku, Nia hato’o asuntu ne’e iha komferensia emprensa iha Kuartel Jeral PNTL Kaikoli Dili, Kuarta (12/08).

Komandantye ne’e haktuirtan  alende ne’e PNTL mos rejista kazu asidente trafegu hamutuk 75 husi total kazu ne’e ema nain 59 kanek kmaan, nain 10 kanek todan no nain 6 mate. Asidente hirak ne’e akontese tanba fator humanu, kondisaun transporte no fator estrada.

Asidente ne’ebe rejulta vitima sira mate maioria motor soke malu no motor soke ema lao ain, entre vitima hirak ne’ebe maka mate nain ida sidadaun Indonezia ne’ebe maka ohin (Kuarta 13/08) transporta nia mate isin ba Indonezia. No sira ne’ebe maka kanek halo hela tratamentu.

Informa mos katak Iha 12 de Agostu akontese komfrontus iha munisipiu Baucau ne’ebe rejulta ema balu hetan sona no komunidade nia uma hetan sunu; Suspetu ba kazu ne’e sei deskunyesidu no PNTL Baucau sei buka hela no hein katak iha tempu badak sei kaptura suspetu hodi investiga, prosesa no aprejenta ba Ministeriu Publiku.

Vitima kazu komfrontus iha munisipiu Baucau halao hela tratamentu iha Ospital no hein katak hafoin rekopera vitima bele fo deklarasaun ne’ebe los ba Polisia atu nune’e kaptura lalais suspetu.

Ligadu ho komfrontus ne’ebe maka akotese Komandu PNTL fo ona orentasaun ba Komandante munisipiu sira atu orenta membru sira liu-liu Polisiamentu Komunitaria atu hakbesik aan ba povu hodi sosialija oinsa komunidade kontibui hodi kria paz ho hakmatek atu nune’e komunidade bele halao nia moris ho seguru. Media PNTL

Dili- Formandu kursu Formasaun Avansadu iha Governasaun no Lideransa Estratezia (CFAGLE-sigla portuges) kuaje nain 50 ne’ebe maka halao kursu iha Institutu Defeza Nasional  (IDN) halo vizita estudu komparativu iha Kuartel  Jeral PNTL

Segundu Komandante Jeral PNTL Komisariu Mateus Fernandes hateten liu husi vizita ne’e formandu sira hakarak rona Polisia nia servisu no funsaun hodi servi povu no nasaun formandu hirak ne’e asumi kargu nudar Diretur Jeral iha instituisaun governu no tuir hela kursu iha IDN, Nia hato’o asuntu hirak ne’e ba Jornalista sira iha Kuartel Jeral PNTL Kaikoli Dili, Kuarta (12/08).

Komisariu ne’e agradese ba Diretor Jeral sira ne’ebe kursu iha IDN bele mai vizita PNTL, Xefe suku sira uluk mai vizita ona no Diretor Nasional sira mos sei mai  ne’e atu dehan katak Polisia mai husi povu no prontu simu vizita iha tempu saida deit hodi esplika konaba lalaok no servisu ne’ebe maka Polisia halo no sira mos fahe sira nia esperensia hodi nune’e ita bele lori Polisia ba oin.

Agora dadauk IDN halao mos kursu ba membru governu sira no ita agradese tanba iha timor iha netik Institutu ida ne’ebe bele fasilita formasaun ba ukun nain sira para bele lori nasaun ne’e ba oin tuir ita hotu nia esperansa.

Iha vizita ne’e Diretur Rekursu Humanu PNTL Superintendente Emilio dos Santos halo aprezentasaun konaba Misaun, Vizaun no knar PNTL nian hodi asegura seguransa iha nasaun Timor-Leste nune’e mos Formandu sira fo sujestaun ba komandu PNTL hametin koperasaun no kordenasaun servisu ho instituisaun estadu hotu atu nune’e servisu hamutuk hodi kombate krime trans nasional. Alende ne’e Formandu sira mos vizita Sentru Operasaun Nasional (NOC/IMS) no Servisu Investigasaun Kriminal Nasional (SIKN) hodi hare no rona servisu husi departamentu hirak ne’e nudar esperensia ida ba sira antes remata sira nia kursu.

Vizita ne’e kompleta ho entrega lembansa husi Formandu no Komandu PNTL. Media PNTL.

Dili, Komandu Polísia Nasional Timor-Leste (PNTL) liu husi Komandu Operasaun realiza enkontru ida ho Komandu PNTL munisipiu, Unidades, Xefe Servisu no Departamentu sira iha Kuartél Jerál hodi rona no simu orientasaun kona-ba papel PNTL hodi responde ba implementasaun Estadu Emergensia (EE) tuir Dekretu Governu Nu.10/2020. Iha loron 6 fulan Agostu 2020 oras 00:00 to’o loron 4 fulan Setembru 2020 oras 23:59 Prezidente Repúblika dekreta Estadu Emergensia hodi prevene Kalamidade Pandemia COVID-19 iha Timor-Leste.

Komandante Jerál PNTL Komisariu Polísia Faustino da Costa iha ninia intervensaun hateten objetivu husi enkontru ne’e maka Komandu atu fó informasaun aumezmu tempu orientasaun balun ba munisipiu no unidade sira kona-ba Estadu Emergensia ida agora dadaun ita hahu’u.

“Aprezentasaun kona-ba Diretiva Operasaun Kalamidade Saude Públika ba Prevensaun Propagasaun Pandemia COVID-19 fase dahaat ne’ebe maka hato’o husi Komandante Operasaun tanba saida maka agora ita tama fila fali EE dala ida tan, los katak Timor-Leste livre ona husi Pandemia ida ne’e maibé moras ida ne’e seidauk lakon husi mundu ida ne’e”, tenik Komandante Jerál PNTL ne’e.

Komisariu Polísia ne’e afirma tan EE ida ne’e hahu’u fila fali tanba esperiensia iha nasaun barak iha ne’ebe ita sempre koalia kona-ba ondas ba daruak ninian, ne’e akontese mós iha Timor-Leste antes ita hahu’u fali EE. Tanba husu ba Komandante munisipiu/unidade no xefe servisu sira atu orienta membru sira molok implementa regras balun iha EE ida ne’e.

Iha biban enkontru ne’e, Komandante Komandu Operasaun Superintendente Xefe Pedro Belo aprezenta mós Diretiva Operasional balun relasiona ho servisu PNTL nian iha âmbitu implementasaun EE dahat nian bazeia ba Dekretu Governu Nu.10/2020 kona-ba Medidas lori halo ezekusaun kona-ba Deklarasaun EE nu’udar hala’o dadaun tiha ona husi Dekretu Prezidente Repúblika Nu.55/2020 de 5 Agostu.

Hola parte iha enkontru ne’ebe lidera husi Komandante Jerál maka Komandante PNTL munisipiu 12, Xefe Unidade sira hanesan UEP,UPF,UPF no Xefe Servisu/Departamentu sira iha Kuartél Jerál.

Media PNTL.