Uncategorized

Dili, Situasaun seguransa iha teritoriu nasional durante semana ida hahu’u husi loron 22 to’o 29 fulan Jullu tinan ne’e lao hakmatek maske mosu asidente no insidente balun.

Xefe Gabinete Relasaun Publikae Porta Voz Komandu Polísia Nasional Timor-leste (PNTL) Superintendente Xefe Arnaldo Araujo kuarta-feira (29/07) ne’e informa durante semana ida nia laran akontese asidente rua ne’ebe maka rezulta ema na’in rua mate.

“Asidente karreta Mini-Truk (Angguna) ida baku fila akontese iha munisipiu Aileu diresaun mai Dili ne’ebe hakanek ema na’in 11 no oras ne’e dadaun vitíma sira hala’o hela tratamentu iha HNGV, asidente tráfiku ida mós akontese iha munisipiu Liquiça motorista ida tula ema no monu iha dalan hodi rezulta motorista kaneke todan no nia maluk ida seluk mate iha fatin”, esplika Xefe Gabinete Relasaun Publika PNTL ne’e.

Porta Voz Komandu PNTL akresenta liu tan atu evita asidente hirak ne’e akontese tan maka oras ne’e dadaun PNTL munisipiu Dili hala’o hela aktividade pasa revista (Cek Point) ba transporte hirak ne’ebe maka sirkula iha kapital Dili.

“Tanba ne’e husu ba motorista sira hotu atu bele kumpri regras hirak ne’ebe maka Polísia Tránzitu sira hasai ona hanesan wainhira atu halo viagem tenke hare’e dokumentu transporte ninian, hare’e kondisaun transporte nian atu nune’e labele afeta ba sira nia ann rasik no ba ema seluk nia vida no informa mós ba públiku katak PNTL munisipiu Dili mós oras ne’e dadaun hala’o hela aktividade ida hodi rekolla transporte hirak ne’ebe maka att no para hela iha Estrada públiku tanba situasaun ne’e bele afeta ba engrafamentu”, apela Porta Voz Komandu PNTL ne’e.

Superintendente Xefe Arnaldo afirma tan iha semana ida nia laran akontese insidente hanesan Suisidu (Tara-Ann) hamutuk ha’at ne’ebe maka akontese hanesan iha munispiu Ermera kazu rua, Viqueque kazu ida no Suai kazu ida. Kazu hirak ne’e akontese tanba vitíma sira ho kondisaun moras mental no oras ne’e dadaun kazu hirak ne’e iha ona prosesu investigasaun no sei haruka ba Ministeriu Públiku hodi lori ba tribunal.

Media PNTL.

Dili, Komandu Polísia Nasional Timor-Leste (PNTL) liu husi Departamentu Polisiamentu Komunitaria Nasional (DPCN) kuarta-feira (29/07) ne’e hala’o serimonia enseramentu Formasaun Multimedia ba membru DPCN ne’ebe maka frekuenta formasaun durante fulan rua no oferese husi Kompañia CANXIGO Training Center.

Komandante Jerál PNTL Komisariu Polísia Faustino da Costa iha ninia intervensaun ba serimonia ne’ebe hala’o iha salaun enkontru Kuartél Jerál hateten hare’e ba Planu Estratéjiku Desenvolvimentu Nasional (PEDN) Timor-Leste 2011-2030 ne’ebe koalia kona-ba area PNTL nian, maka to’o iha tinan 2030 PNTL maka primeiru ninia ekipamentu ne’ebe avansadu basea ba desenvolvimentu no evuluasaun informasaun teknologia.

“Segundu maka iha 2030 PNTL ninia emar sira tenke ho koñesimentu ne’ebe ass liga ho informasaun no teknologia, ida ne’e maka hatu’ur iha PEDN nian, nune’e sé ita hare’e ba situasaun aktual evuluasaun no  desenvolvimentu liu-liu ita nia rai doben Timor-Leste”, tenik Komandante Jerál PNTL ne’e.

Autoridade másimu seguransa ne’e haktuir tan Timor-Leste restaura ninia Independensia iha era millennium ida, nia obriga ninia sidadaun sira tenke ajusta ninia koñesimentu no matenek la hare’e ba nia ne’ebe foin maka sai nasaun maibé hare’e ba geografikamente tenke ajusta ho nasaun sira iha area Asia no illa pasifíku nian. Signifika katak maske Timor-Leste iha area Asia no illa pasifíku nia le’et maibé ezizi desenvolvimentu no kapasitasaun sidadaun sira nian atu hanesan emar sira iha Eropa.

“Nune’e maka formasaun, kapasitasaun refere hanesan sub-programa ba implementasaun PEDN ninian katak iha 2030 PNTL tenke matenek iha area ida ne’e no ekipamentu tenke avansadu, signifika ba futuru ita sei identifika atu oinsa tenke iha nafatin kapasitasaun no formasaun ba area relevante hodi responde Planu Estratéjiku PNTL nian tantu mós PEDN”, hatutan Komisariu Polísia ne’e.

Iha fatin hanesan Diretor Kompañia CANXIGO hateten iha tinan 2019 kompañia hatama proposta ida mai iha DPCN atu halo formasaun ba ajente iha area jornalizmu básiku no multimedia, hafoin prosesu sira ne’e hotu maka hahu’u formasaun iha loron 14 Agostu to’o 14 Outubru 2019.

“Tuir lolos aktividade enseramentu ba formasaun ne’e ita hala’o ona iha momentu hirak liu ba maibe tanba ita hasoru situasaun COVID-19 nune’e maka ita bele realiza fila fali iha loron ohin, espera ho formasaun ida ne’e ita nia ajente sira bele aumenta koñesimentu iha area multimedia hodi kontribui ba servisu DPCN nian”, haktuir Diretor ne’e.

Iha serimonia ne’e formandu sira DPCN Demostra Kapasidade durante kursu Multimedia hanesan oinsa hasai foto ho diak no halo video badak. Hola parte iha aktividade ne’e Komandante Jerál, Komandante Komandu Operasaun, Administrasaun, Xefe Servisu no Diretor Departamentu sira iha Kuartél Jerál. Sorumutu ne’e taka ho fahe sertifikadu husi kompañia CANXIGO ba formandu sira.

Media PNTL.      

Dili- Komandu Polisia Nasional Timor-Leste (PNTL) munisipiu Bobonaro hametin vizibilidade iha komunidade nia le’et liu husi estabelesimentu Konsellu Polisiamentu Komunitaria (KPK) iha munisipiu Bobonaro

Komandante PNTL munisipiu Bobonaro Superintendente Xefe Octavio Araujo Bucar hateten

Iha munisipiu Bobonaro estabelese ona KPK iha postu administrativu 5 maibe tanba pandemia COVID-19 maka postu administrativu Lolotoe la halao tanba ne’e agora ami buka hela meius atu halao iha fulan Agostu ou Setembru oin mai bainhira bai loron no rai maran tanba Lolotoe rai malirin no udan hela deit, formasaun ba KPK sei prepara husi Komandu munisipiu ho apoiu husi Fundasaun Azia.

Nia esplika KPK nia servisu atu hare no identifika kazu saida maka akontese iha komunidade nia leet hodi buka solusaun hamutuk ezemplu kazu disputa rai, violensia domestika no seluktan maibe ba kazu sivil Polisia no membru KPK sira sempre halo mediasaun ho parte rua iha suku laran  no kazu krime ne’e prosesa tuir dalan justisa nian.

Hafoin estabelesimentu KPK kompletu Ami sei halo avaliasaun ba OPS iha suku 50 iha munisipiu Bobonaro no hirak ne’ebe sei falta fo formasaun no hirak ne’ebe maka diak ita kontinua fo motivasaun para halo diak liutan.

Atu asegura seguransa iha lina fronteira Komandu PNTL munisipiu Bobonaro sempre iha kordenasaun diak ho UPF wainhira iha kazu kontrabandu UPF kaptura entrega ba Komandu munisipiu hodi rejistu no prosesa ba Ministeriu Publiku hodi halo kontinuasaun.

Situasaun seguransa iha munisipiu Bobonaro oras ne’e daudaun lao normal no kontroladu maske iha asidente no insidente kiik oan ne’ebe maka akontese maibe sempre responde husi governu lokal, PNTL Eskuadra no postu sira hanesan Kailaku, Bobobnaro, Lolotoe, Maliana vila, Balibo, Batugade, Atabae, sempre iha resposta. Krime ne’ebe rejistu iha munisipiu Bobonaro maka hanesan Violensia Domestika, Ofensas integridade fizika no asaltu malu; Wainhira akontese kazu grave ruma sira halo konsultasaun ho Komandu munisipiu no Komandu munisipiu transmite mai Komandu Jeral.

Relasiona ho planu hari infraestrutura PNTL iha tinan 2021 hau sei bolu Komandante Eskuadra, KPK no Xefe suku sira atu hare fatin ne’ebe estratejiku liu nune’e bele hari postu OPS iha fatin adekuadu atu nune’e OPS ho ninia familia bele konsentra no hela metin iha neba hodi observa situasaun iha suku ne’e liuliu suku ne’ebe maka besik fronteira.

Kestiona konaba funsionamentu CCTV ne’ebe maka koloka iha munisipiu Bobonaro Komandante Bucar esplika kamera vizilansia CCTV hamutuk 12 maka instala iha Bobonaro maibe rua (2) avaria nia funsionamentu ladun adekuadu tanba prasija Air Condisionadu (AC) ne’ebe durante ne’e ami uza deit Vintunas. Ami halo ona proposta mai Komandu Jeral maibe seidauk iha resposta husi Komandu tanba ne’e ami sei esforsu hodi buka manera oinsa atu mantein kondisaun CCTV ne’e diak nafatin.         Media PNTL

Dili- Komandante Jeral no Segundu Komandante Jeral Polisia Nasional Timor-Leste(PNTL) halo enkontru ho Komandante munisipiu no Komandante Unidade hodi evalua servisu ne’ebe maka durante ne’e halao ona.

Komandante Jeral PNTL Komisariu Faustino da Costa hateten liu husi enkontru ne’e Komandu fo hanoin hodi hadia ba oin nomos kestaun orsamentu ba tinan ida ne’e hau fo hanoin ba Komandante sira no orenta sira atu lalika tau orsamentu ba kompras nian, Nia hato’o asuntu ne’e ba Jornalista sira iha Sentru Formasaun Polisia Dili, Tersa (28/07).

Alende ne’e koaliamos konaba uma ba OPS sira atu halo iha ne’ebe Komandante sira maka hatene liu tanba ne’e ami bolu Komandante sira nune’e waihira sira fila ba koalia ho parseru servisu sira hodi identifika suku ne’ebe maka atu halo uma nune’e sira hato’o ba Komandu atu halo planu asaun servisu ba tinan 2021.

Nia haktuirtan prioridade tinan 2020 maka hare ba dividas ne’ebe maka PNTL iha atu selu hahu  tinan 2017-2019 ho total hamutuk  $ 2.7 miloens no rezerva ba orsamentu operasional to’o fim do anu.

Iha tinan 2021 PNTL identifika prioridade tuir governu nian maka infraestrutura tanba ne’e PNTL tenke hatene infraestrutura saida maka presija atu halo iha nebe tanba ne’e maka ami koalia ho Komandante sira atu hatene fatin no rai iha ka lae nomos estatutu rai ne’e rasik.

Komandu mos informa ba Komandante sira konaba situasaun seguransa lao kalma no hakmatek maibe ikus-ikus ne’e situasaun asidente trafegu ne’ebe maka rejulta ema mate no kazu boot liu iha Oecusse  no kestaun agora ita koalia konaba natureja ka fator ema nomos insidente ema tara aan no mate iha Dili no Ermera nune’e hau husu ba Komandante sira tenke hatene ida ne’e para oinsa relata no asaun saida maka PNTL halo.

Enkontru evaluasaun servisu ne’e partisipa husi Inspetur Jeral, Komandante Administrasaun, Diretur Servisu Migrasaun, Sub Xefe Casa Militar, Komandante CFP, Komandante munisipiu, Komandante Unidade no Xefe departamentu sira. Media PNTL

Dili- Formadu Curso Promoção Oficiais Superior (CPOS) husi Instituto Defeza Nasional (IDN-sigla portuges)  nain 29 halo vizita estudu komaparativu iha Kuartel Jeral Polisia Nasional Timor-Leste (PNTL) hodi kompleta sira nia estudu antes gradua.

Diretor Diresaun Servisu Ensinu no Formasaun Tanente Coronel Punufanu hateten vizita ne’e ho nia objetivu atu rekola dadus no informasaun hodi kompleta sira nia materia individual ne’ebe sira simu ona atu dezenvolve iha tempu oin mai tanba ne’e ami halo programa vizita iha fatin hotu hodi foti dadus ne’ebe instituisaun sira fo hanesan Komandu Jeral PNTL, Kuartel Jeneral F-FDTL, no Komandu Unidade sira, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Kinta (23/07).

Nia esplika Materia ne’ebe maka sira hetan durante kursu tinan ida (hahu iha Fevereiru no hotu iha Dezenbru) nia laran maka konaba area Operasaun, Lojistika, Area Administrasaun alende ne’e sira mos tuir kursu ida ne’ebe hanaran Post graduasaun Mestradu ba area estratejia ne’ebe maka hanorin husi Profesor nain 10 ne’ebe mai husi Universidade Lisboa.

“Ita nia esperansa ho kursu ne’e bele prepara sira atu sai Komandante diak ida ne’ebe preparadu wainhira sira remata kursu no fila ba servisu bele aptu ona atu Komanda Batalao, sai Segundu Komandante Batalao ou sai Komandante Operasional iha batalao nia laran ou Komanda kompania Independentes,”dehan Punufanu.

Formadu 5^o kursu CPOS hamutuk nain 29 kompostu husi PNTL ho postu Inspetor Xefe nain 9 no F-FDTL ho postu Kapitaun nain 20.

Iha okajiaun ne’e Komandante do Komandu Administrasaun Superintendente Xefe Jose Soares hateten iha vizita ne’e Komandu PNTL aprezenta materia balu konaba Rekursu Humanu, Rekursu Lojistika no Rejimi Promosaun alende ne’e formadu sira mos halo vizita ba departamentu no diresaun sira iha Kuartel Jeral PNTL hanesan Sentru Nasional Komunikasaun (NOC-sigla Portuges), Servisu Investigasaun Kriminal Nasional (SICN-sigla Portuges), Diresaun Tranzitu Seguransa Rodaviariu Nasional (DTSRN-sigla Portuges) no Polisiamentu Komunitaria (POLKOM) ho vizita ne’e bele partilaa servisu Polisia nian iha Kuartel Jeral no munisipiu atu nune’e forsa rua ne’e bele partila informasaun no konyesementu ba malu atu membru husi instituisaun rua ne’e garante estabilidade seguransa rai laran atu nune’e fo espasu ba dezenvolvimentu ba país ida ne’e .

Kestiona konaba partisipasaun membru PNTL ne’ebe minimu liu eis Komandante munisipiu Baucau ne’e esplika emprinsipiu Komandu PNTL hakarak priense kuota 20 ne’ebe maka IDN fo maibe ita nia Ofisiais Inspetor sira falta konyesementu lingua portuges no rajaun seluk maka balu asumi hela kargu balu maibe Komandu esforsu hodi oferese kursu lingua portuges ba Ajente no Sarjentu sira maibe ba inspetor sira rekursu tempu minimu tebes ba sira atu hola parte iha kursu tanba sira servisu hela iha terrenu.

Iha vizita ne’e Komandu PNTL fo rekordasaun ba Formadu sira nune’emos Formadu sira entrega rekordasaun ba Komandu PNTL. Media PNTL

Dili- Komandu Polisia Nasional Timor-leste halo ona atuasaun ba kazu konfrontu no sunu uma ne’ebe maka akontese iha loron Sabadu 18 Jullu iha Aldeia Loirae suku Namanei Postu Quelikai ne’ebe maka rejulta vitima ida kanek no uma ida hetan sunu.

Xefe Gabinete Relasaun Publika/Protukulares e Porta Voz PNTL Superintendente Xefe Arnaldo Araujo informa  PNTL munisipiu Baucau iha momentu ne’e kedas halo atuasaun no oras ne’e daudauk lori ona suspetu sira mai iha Komandu munisipiu atu nune’e foti sira nia deklarasaun no halo prosesu tuir lei ne’ebe maka iha, nia hato’o asuntu iha entrevista ho Jornalista RTTL.Ep iha Kuartel jeral PNTL Kaikoli Dili, Tersa (22/07).

Nia haktuirtan hafoin akontesementu ne’e situsaun seguransa kontinua lao hakmatek laiha problema ruma ne’ebe maka akontese no seidauk iha informasaun ruma konaba involvimentu membru grupu artes marsiais.

Atu redus problema hirak ne’e politika PNTL nian foka liu ba Polisiamentu Komunitaria hodi lori Polisia hakbesik ba povu husi suku to’o nasional atu nune’e ho prejensa Ofisial Polisia Suku (OPS) bele servisu besik no hamutuk ho komunidade sira atu  bele redus problema.

Orientasaun Komandu Jeral ba Komandu munisipiu atu lori OPS sira hakbesik liu ba komunidade tanba sira maka nudar ain liman, matan, dalan, tilun no ibun PNTL nian iha komunidade nia leet.

Iha parte Seluk Porta Voz Komandu PNTL ne’e mos komenta rejolusaun governu hodi reativa organizasaun artes marsiais liu husi rejolusaun governu Nu. 4/2020 maka Komandu PNTL husu ba Grupu Artes Marsiais (GAM) atu kontribui no kumpri regras ne’ebe maka iha liu-liu oinsa atu reorganija aan hodi ba rejistu fila-fali iha Komisaun Reguladora Artes Marsiais(KRAM) atu nune’e bele halao hikas imi nia atividade tuir regras no prosedimentu ne’ebe maka governu hatur ona no wainhira la kumpri maka PNTL sei atua tuir Lei Nu.5/2017

Tuir observasaun PNTL nian oras ne’e daudauk GAM balu kumpri  maibe balu maka seidauk kumpri maibe enjeral buat hotu lao diak la hanesan uluk no ita hein katak ita sei mantein situasaun hanesan ne’e hodi kria estabilidade diak nune’e komunidade no ema hotu bele halao ida-idak nia vida moris ho livreno dezenvolvimentu bele lao.

PNTL sempre servisu hamutuk ho KRAM oinsa atu kria kondisaun diak no fornese informasaun ba organizasaun Artes Marsiais sira atu halao knaar tuir rejolusaun ne’ebe maka governu hasai tia ona, Komandante munisipiu sira halo ona enkontru ho GAM sira ne’ebe maka halao sira nia atividade trenu atu mantein situasaun ida kalma no kondizivu. Organija aan oinsa prepara nia membru sira atu bele kompete iha kompetisaun desportu iha nivel nasional no international.

Antes termina Komandante ne’e apela ba joventude sira atu respeita malu no membru GAM sira atu fo liman ba malu hodi kria paz no estabilidade iha ita nia nasaun nudar airin nasaun nian, joventude hamutuk no unidade maka airin ne’e sei metin no forte.

Atualija mos situasaun seguransa Rodoviariu katak Kazu asidente viasaun durante semana kotuk hamutuk 45 rejulta ema kanek kmaan hamutuk 29, kanek todan 12 no mate  nain 4. Asidente hirak ne’e akontese tanba fator humanu no kondisaun strada tanba ne’e husu ba motorista sira wainhira kondus kareta ka motorijada tenke hare kondisaun motor no kareta nune’e labele mosu asidente. Media PNTL

Dili- Komandu Polisia Nasional Timor-Leste (PNTL) halo despedida ho Adidu Defeza no Seguransa Republika Popular Cina ne’ebe maka kompleta ona nia misaun.

Adidu Defeza no Seguransa Cina Senyor Koronel Hwang Damin iha nia intervensaun hato’o agradese ba kordenasaun no kolaborasaun servisu ne’ebe maka lao diak durante halao nia knaar iha Embaixada Cina Dili, Nia hato’o asuntu ne’e iha Kuartel Jeral PNTL Kaikoli Dili, Segunda (20/07).

“Hau halao ona hau nia misaun iha Timor-Leste durante tinan hat(4) fulan walu (8) nia laran tempu ne’e naruk iha ne’e Komandante PNTL nain rua maka troka malu ona lidera PNTL nomos Ministru Interior nain tolu(3).

Nia haktuirtan iha ne’e ami halo koperasaun no kolaborasaun entre PNTL ho Polisia Republika Popular Cina nomos kordenasaun servisu ne’ebe maka diak ho F-FDTL tanba ne’e hau hakarak hato’o obrigadu ba imi hotu nia suporta no kordenasaun servisu durante hau nia misaun iha Embaixada Cina no Adidu foun ne’ebe troka hau sei kontinua kolaborasaun servisu ne’ebe maka halao tia ona no espera katak koperasaun servisu ne’ebe maka iha sei fo rejultadu ba PNTL, F-FDTL no Polisia Cina.

Iha okajiaun ne’e Komandante Jeral PNTL Komisariu Faustino da Costa lori Komandu PNTL nia naran hato’o agradesementu  ba Senyor Koronel nia apoiu, suporta no esforsu tomak ne’ebe maka nia halo ba PNTL Ami hato’o obrigadu barak no viajen diak bele halao knar iha fatin foun ho embairomentu foun.

Komisariu haktuirtan PNTL espera katak Susesor ba Senyor Hwang sei bele servisu hamutuk ho ita atu nune’e iha koperasaun diak tanba PNTL nia Ofisial balu kontinua hela estudu iha nasaun Republika Cina alende kursu no formasaun sira seluk ne’ebe lao ho tempu badak ho ohin loron seidauk bele realija tanba surtu COVID-19.

Despedida ida ne’e halao tanba ita hasoru malu hamutuk antes no iha kordenasaun servisu ne’ebe maka diak, maske serimonia ne’e simples, ami espera ita sei hanoin nafatin Timor-Leste no loron ruma ita sei fila fali mai atu hare progresu ne’ebe maka PNTL atinji.

Serimonia despedida ne’e kompleta ho Entrega sertifikadu no plaka husi Komandante Jeral ba Senyor Koronel Hwang Damin.

Serimonia ne’e partisipa husi Inspetor Jeral, Komandante Operasaun, Koamndante Administrasaun, Komandante CFP, Diretor SIK, Segundu Komandante munisipiu Dili, Xefe Relasaun Internasional, Komandante Profost, Xefe departtamentu, reprejentante Komandante UEP, Reprejentante Komandante UPM, Ofisiais Superior, Sarjentu no Ajente. Media PNTL

Batugade, Komandu Polísia Nasional Timor-Leste (PNTL) liu husi Diresaun Tránzitu Seguransa Rodoviaria Nasional (DTSRN) iha sexta-feira (17/07) semana kotuk hala’o aktividade ida hodi identifika fatin estabelsimentu Postu Integradu iha Fronteira-Batugade.

Adjuntu DTSRN Inspector Xefe Inocêncio da Costa Maria Freitas hafoin hala’o aktividade refere hateten objetivu husi vizita ne’e maka hare’e fatin estabelesimentu Postu Integradu tanba iha Dekretu Lei Nᵒ.28/2017 de 2 de Agosto ne’ebe koalia kona-ba Regime de Controlo de Circulação de Veículos, à Entrada e à Saída do Território Nacional.

“Katak ho Lei ida ne’e, iha koordenasaun ida entre PNTL ho parte Alfândega no Diresaun Nasional Transporte Terrestre (DNTT) atu oinsa maka bele hala’o servisu hamutuk hodi kontribui taxa entrada karreta husi nasaun Indonesia nian ba Estadu Timor-Leste”, esplika Adjuntu DTSRN ne’e.

Inspector Xefe Inocêncio afirma tan iha vizita ne’e nota katak fatin hirak ne’ebe maka tuir planu sei monta postu integradu sei iha faze preparasaun. Tanba tuir observasaun ekipa DTSRN katak to’o agora seidauk bele monta ou koloka membru PNTL parte Tránzitu iha postu refere tanba fatin hirak ne’e sei menus tebes husi fasilidade servisu nian hanesan menus mobiliariu no transporte .

“Tuir planu wainhira postu hirak ne’e iha ona kondisaun maka sei koloka membru PNTL parte Tránzitu na’in lima (5) kada postu sira hanesan Salele, Bobimeto no Batugade, iha fatin refere maka sei hare’e mós parker ba karreta hodi hala’o prosedimentu legais nian hanesan taka stiker no selu taxa”, tenik Inspector Xefe ne’e.

Media PNTL.

Dili- Komandante Polisia Nasional Timor-Leste (PNTL) munisipiu Dili ho nia estrutura halo vizita servisu ba Dili Institute of Technology (DIT-sigla ingles) hodi konyese no rona hanoin balu husi akademiku sira atu hametin seguransa no estabilidade iha kapital Dili.

Superintendente Xefe Henrique da Costa hateten vizita ne’e ho objetivu atu aprejenta no introdus hau nia aan ba sivitas akademika DIT ho hanoin ida se ita la konyese malu no la kria komunikasaun ida ne’ebe diak ita sei la apoiu malu iha servisu, Nia hato’o asuntu ne’e iha Kampus DIT Manleuana Dili Kuarta (15/07)

Nia haktuirtan vizita ida ne’e hanesan servisu proativu ida husi parte Polisia nian duke ita tur no hein deit iha eskritoriu, ita mos mai buka sira tanba servisu Polisia nian laos atu hein deit maibe tenke tun ba terrenu hodi buka servisu hamutuk oinsa atu nune’e bele redus no prevene krime liu husi servisu hamutuk ho parte universidade.

“Hau mai ho Komandu munisipiu Dili nia mehi katak servisu hamutuk garante Dili sai fatin ne’ebe maka seguru ba ema hotu entaun identifika katak universidade hirak iha Dili laran iha papel inportante tebes atu nune’e bele sai parseru ba Polisia partikularmnte PNTL munisipiu Dili para kopera no ajuda servisu Polisia nian iha terrenu,” dehan Komandante Henrique.

Tuir programa ne’ebe maka iha Komandante PNTL munisipiu Dili sei hakbesik aan no servisu hamutuk ho Ensinu Suprior hafoin kontinua ba ensinu Sekundaria, Pre-Sekundaria no primaria tanba ita hakarak atu lori Polisia ba fatin hotu. Alende halao vizita iha futuru ekipa PNTL mos sei ba halo sensibilijasaun konaba Servisu Tranzitu nian, Polisia Komunitaria, no Investigasaun.

Iha okajiuan ne’e Reitor DIT Alvaro Menezes hateten Ami agradese tebes tanba ohin Komandu PNTL munisipiu Dili vizita mai DIT husu ami oinsa bele kolabora atu halo susesu ba servisu seguransa nian tanba ne’e maka ohin DIT husu para ideia brilante ne’ebe maka Komandante Euclides Belo nian atu Dosente sira uza minutu 5 antes ou depois de aulas hodi hato’o mensajen sidadania ba universitariu sira loro-loron no sira simu ho diak hodi halao sira nia papel nudar joven iha komunidade nia leet liu-liu iha Universidade sira.

Nia hatutan ami husu ba Komandante PNTL Dili foun atu kontinua ideia ida ne’e no diak liutan habelar ba Universidade hotu. Agora daudaun kolborasaun servisu ho PNTL lao diak no estudante sira aprende ho diak  hodi halo sira nia knaar nudar joven hodi prepara aan ba futuru.

Iha oportunidade ne’e Komandante munisipiu Dili relata dadus ne’ebe iha numeru krime iha Dili durante fulan neen (6) rejista kazu kuaje 700 no difisil atu halakon tanba durante ema moris sei iha iis ho nia interese, hanoin no mehi ne’ebe maka la hanesan nomos problema sosial hanesan menus kampu de traballu maka hamosu krime tanba ne’e maka PNTL nia servisu operasional barak tun iha terrenu hanesan Polisia Tranzitu halao servisu hodi kontrola movimentu ema no transporte, no patrulla sira mos iha neba ne’e katak kuandu iha lei ita hotu tenke inplementa no ba sidadaun hirak ne’ebe maka la kumpri no viola lei PNTL sei prosesa tuir lei ne’ebe maka vigora.

Ho prezensa Polisia nian liu husi atividade patrula bele halo prevensaun ba krime hodi atinji mehi ida ne’ebe ami tau iha neba katak servisu hamutuk hodi garante Dili sai fatin ne’ebe seguru ba ema hotu.

Vizita servisu dahuluk Komandante PNTL munisipiu Dili ne’e akompana husi Segundu Komandante Superintendente Euclides Belo, Komandante Operasaun, Komandante Administrasaun no Komandante Tranzitu no simu husi Reiror DIT ho nia estrutura tomak. Media PNTL