Uncategorized

Dili, Kompañia Mie Sedap Iha Timor-Leste iha kuarta-feira (15/07) ne’e fó apoiu ba faze daruak Supermie hamutuk kaixa 700 ba Komandu Polísia Nasional Timor-Leste (PNTL) iha âmbitu ba kombate surtu COVID-19 iha Timor-Leste durante hala’o kna’ar iha terenu.

Komandante Jerál PNTL Komisariu Polísia Faustino da Costa hafoin serimonia entrega apoiu ne’e iha salaun enkontru Kuartél Jerál ba jornalista hateten apoiu ne’e hanesan aktividade dahuluk ne’ebe maka Kompañia Mie Sedap iha Timor-Leste fornese PNTL no apoiu ne’e mós laos ba dala ikus maibé apoiu ne’e sei kontinua hodi hare’e oinsa maka koordenasaun iha futuru.

“Aproveita iha oportunidade ne’e lori Komandu nia naran agradese ba dirétur kompañia Mie Sedap iha Timor-Leste ho ninia estrutura, agradese mós ba Embaixada Indonesia nian iha Timor-Leste no adidu seguransa Indonesia nian koordensaun hodi ikus mai bele realiza aktividade ohin loron ne’e”, tenik Komandante Jerál PNTL ne’e.

Autoridade másimu seguransa ne’e akresenta katak apoiu hirak ne’ebe maka kompañia Mie Sedap iha Timor-Leste fó, laos atu hela ba iha Komandu maibé sei distribui ba membru sira iha terenu hodi bele apoiu sira nia servisu loron-loron.

Iha fatin hanesan Embaixador Indonesia iha Timor-Leste Sahat Sitorus hateten prezensa embaixada nian maka hamutuk ho kompañia Mie Sedap iha Timor-Leste hodi bele fó apoiu lojistika ba PNTL, maibé uluk knana’in hato’o parabéns ba Estadu Timor-Leste no ba Komandu PNTL ne’ebe maka ho susesu hamutuk ho parte hotu bele servisu hodi Timor-Leste bele livre husi surtu COVID-19.

“Dala ida tan hau hato’o obrigadu ba Komandante Jerál ne’ebe maka hamutuk ho hau ohin bele marka prezensa hodi simu apoiu ki’ik ida ne’e husi maluk Kompañia Mie Sedap nian no espera ba oin bele iha servisu hamutuk ida ne’ebe maka diak”, hateten Embaixador Indonesia iha Timor-Leste ne’e.

Sahat Sitorus dala ida tan hato’o parabéns ba Komandu PNTL ho nia estrutura tomak no komunidade tomak ne’ebe maka susesu hala’o tuir protokolu COVID-19 ne’ebe maka termina husi Ministeriu Saúde (MS) no Organizasaun Mundial Saúde (OMS) no mensagem maka ne’e ita tenke nafatin tau atensaun hodi kumpri nafatin regras ne’ebe maka iha ona.

Hola parte iha serimonia ne’e Komandante Jerál, Embaixador Indonesia iha Timor-Leste, Adidu Seguransa Indonesia, Country Manager Kompañia Mie Sedap ho nia ekipa, Komandante Komandu Administrasaun, Planeamentu, Diretur Rekursu Umanu, Xefe Gender no Xefe Servisu sira iha Kuartél Jerál.

Media PNTL.   

Dili- Hafoin Ministeriu Publiku Distrital Baukau halo audensia hodi halo abaliasaun ba dokumentus katak laiha indikasaun krime husi tripulante nain 13 ne’ebe maka terdampar iha Jako nune’e Polisia Nasional Timor-Leste (PNTL) Sevisu Investigasaun Kriminal Nasional entrega dokumentus no tripulante hirak ne’e ba Servisu Migrasaun atu prosesu tuir Lei Migrasaun no Ajiliu.

Diretor Servisu Migrasaun Superintendente Xefe Agustinho Gomes hateten Ohin PNTL/SIKN entrega sidadaun estranjeiru nain 13 ne’ebe maka tama teritoriu Timor-Leste iha loron 12 de Jullu ba Diresaun Jeral Servisu Migrasaun tanba sira nia prosesu kazu despaxu ona husi Ministeriu Publiku Baucau, Nia hato’o asuntu ne’e iha ministeriu interior Vila-Verde Dili Tersa (14/07.)

Komandante ne’e haktuir hahu ohin ba oin ema nain 13 ne’e sai ona responsabilidade Diresaun Jeral Servisu Migrasaun atu kontrola nia prosesu maka sei halo investigasaun ba sidadaun hirak ne’e tuir lei migrasaun nian depois maka hare atu halo desijaun ne’ebe maka loos ba sira.

Tuir planu hafoin halo investigasaun sei kordena ho embaixada Indonezia iha Dili nomos Ajensia Internasional ba Migrasaun (IOM-sigla Ingles) atu halo Repatrisaun ba sira no kustu repatriasaun sei responsabilija husi governu Timor-Leste. Ami konvida hotu Adidu Indonesia no reprejentante IOM iha Dili mai iha ne’e atu ita halo kordenasaun nune’e bele halo prosesu Repatria lalais ba sira nia nasaun.

Tripulante nain 13 ne’e kompostu husi Sidadaun Vietnam nain 11 (mane nain 9 no feto nain tolu) no sidadaun Indonezia nain 2  nune’e prosesu repatria ba sidadaun Indonezia Embaixada Indonezia iha Dili maka sei lori sira fila no ba sidadaun Vietname ami kordena ho IOM atu buka manera ida diak liu atu lori sira fila.

Kestiona konaba Embaixada Vietname iha Timor-Leste laiha Diretor ne’e hateten Embaixada Vietname iha Jakarta tanba ne’e maka IOM bele kordena ou bele husu ajuda husi embaixada Indonezia para atu kontaktu embaxada Vietname iha Jakarta ou liu husi Ministeriu Negosiu Estranjeiru no Koperasaun (MNEK) para atu liga embaixada Vietname iha Jakarta.

Iha okajiaun ne’e Adidu POLRI iha Embaixada Republika Indonezia iha Dili Senior Superintendent Dra. Muji Dia Setiani hatetenh KBRI Dili hein prosesu investigasaun nia kontinuasaun, hafoin investigasaun remata maka sidadaun Indonezia nain rua ne’e sei entrega ba Embaixada Indonezia iha Dili hafoin haruka fila ba Indonezia.

Nia hatutan tanba Embaixada Vietnam iha Jakarta tanba ne’e Embaixada Indonezia sei kontaktu no kordena ho Embaixada Vietname iha Jakarta.

Sasan hirak ne’ebe maka entrega hanesan Dokumentus Desijaun Tribunal, Telefone, pasaporte no tripulante nain 13 ne’ebe oras ne’e hela iha Karantina QY Hotel hodi hein rposesu investigasaun.

Serimonia entrga dokumentu no sasan tripulante nian husi SIKN ba Servisu Migrasaun halao iha Diresaun Jeral Servisu Migrasaun Vila-Verde Dili husi Sub Xefe SIKN Superintendente Paulino Carmo Perreira ba Diretor Jeral Servisu Migrasaun no akompana husi investigador sira. Media PNTL

Dili, Ekipa Promosaun Komandu Polísia Nasional Timor-Leste (PNTL) iha tersa-feira (14/07) ne’e entrega Relatoriu Primeiru Prosesu Promosaun Por Eskolla ba Komandante Jerál. Komisaun Promosaun PNTL nu’udar Orgaun Administrativu ne’ebe estabelese iha Instituisaun PNTL atu bele hare’e no prosesu ba desenvolve karreira pesoal efetivu PNTL.

Promosaun por Eskolla ne’ebe hala’o ona iha inisiu tinan 2017 no finaliza iha tinan 2020 ho realizasaun Promosaun por Eskolla iha loron 27 Marsu 2020 ba postu sira hanesan Superintendente Xefe hamutuk na’in neen (6), Superintendente na’in 15, Superintendente Assistente na’in 14, Inspector Xefe na’in 32 no Sarjentu Xefe hamutuk na’in 23.

Segundu Komandante Jerál PNTL Komisariu Polísia Mateus Fernandes hanesan mós Prezidente Komisaun Promosaun iha ninia intervensaun ba serimonia ne’ebe hala’o iha salaun enkontru Kuartél Jerál hateten maske hetan difikuldade no obstákulu durante prosesu ne’e lao maibé ho Komisaun tomak no Asessor sira nia tulun, konfiansa mai husi Komandante Jerál ne’ebe fó mai ekipa promosaun hodi jere prosesu ne’e to’o remata ho susesu.

“Agradese no parabéns ba ita hotu ne’ebe maka hola parte iha ekipa Komisaun Promsosaun ne’e ba servisu tomak ne’ebe maka hala’o ona to’o ohin ita realiza serimonia entrega Relatoriu ba Komandante Jerál”, tenik Komisariu Polísia Mateus Fernandes.

Entretantu, Komandante Jerál Komisariu Polísia Faustino da Costa iha ninia diskursu deklara razaun tanba saida maka halo Promosaun ne’e maka iha Legalidade hodi fó dalan atu bele halo prosesu promosaun refere, tanba iha tinan 2015, 2016 no 2017 hanoin atu halo promosaun maibé dalan   atu ita lao tuir ne’e maka sai situasaun ida.

“Iha sorin seluk Promosaun ne’e ita halo tanba presiza mós atribui responsabilidade ne’ebe maka Legalidade iha ona fó ba ita, nune’e iha halo prosesu ne’e ba dahuluk iha loron 27 Marsu tinan ne’e no ita hotu hatene katak Legalidade ne’ebe iha será que ida ne’e naton ona mantein ba ita atu bele lao ba oin ka durante diskusaun iha Komisaun nian keta iha hanoin ruma ba oin atu hadia ka altera diploma ministerial ne’ebe iha tantu mós iha dekretu governu nian”, hateten Komandante Jerál PNTL ne’e.

Autoridade másimu seguransa ne’e informa ba Komisaun Promosaun katak oportunu hanesan ne’e tinan oin ita bele halo, bele mós akontese, bele mós depois tinan ida tan maibé ida ne’e la signifika Komisaun nia servisu remata ona tanba ita nia Regime Promosaun rasik termina katak Segundu Komandante Jerál maka prezide asuntu Promosaun ne’ebe Departamentu Rekursu Umanu maka sai hanesan Sekretaria ba iha prosesu tomak, tanba ne’e atu realiza Promosaun iha tinan oin ka tinan rua mai preparasaun tenke hahu’u agora ho maneira hare’e ba Diploma Ministerial ne’ebe no RAM (Regulamentu Avaliasaun Méritu).

Partisipa iha serimonia ne’e Komandante Jerál, Segundu Komandante Jerál, Inspector Geral, Komandante Komandu Operasaun, Administrasaun, Xefe SIKN, Diretur Rekursu Umanu, Ofisias Superior no membru Komisaun Promosaun PNTL.

Media PNTL.                           

Dili- Kazu asidente trfego iha Leolbatan Oecusse rejulta vitima nain tolu (3) mate no nain hitu(7) seluk kanek hodi halao tratamentu iha Ospital Referal Oeccuse.

Portavoz PNTL Superintendente Xefe Arnaldo de Araujo Relata iha RAEOA postu Administrativu Pantemakasar suku Naimeko entre Oelulan no Lakfuan akontese asidente trafiku iha loron Domingo 12 de Jullhu 2020 tuku 19:45 kareta kamioneta ida baku fila no rejulta  ema nain tolu (3) mate (nain rua mate fatin no ida seluk mate iha Ospital), Nia informa asuntu ne’e iha Komferensia emprensa iha Seksaun Relasaun Publika Kuartel Jeral Kaikoli Dili (13/07).

Komandante ne’e klarifika asidente ne’e akontese tanba kareta la konsege sae subida ne’ebe naruk ho sasan no pasajerus barak, nune’e nia hakiduk no kareta baku fila  ba kotuk ho distansia entre 25-35M husi diresaun Oecusse Vila ba Lakfuan suku Naimeko.

Aproveta oportunidade Portavoz mos hakarak informa  ba povu iha Timor-Leste laran tomak katak situasaun seguransa iha teritoriu laran lao diak no kontroladu durante oras 24 nia laran. Media PNTL

Dili- Primeiru Ministru nudar mos Ministru Interior (MI) ho Vice Ministru halo vizita ofisial mai Kuartel Jeral Polisia Nasional Timor-Leste (PNTL) hodi hare no rona situasaun servisu no difikuldade ne’ebe instituisaun seguransa ne’e hasoru.

Vice Ministru Interior Antonio Armindo hateten ho vizita ne’e governu hatudu nia komitmentu hodi fo apoiu ba dezenvolvimentu instituisaun PNTL ba futuru hodi sai instituisaun ida ne’ebe professional kompara ho nasaun seluk ne’ebe maka bele orienta nia membrus sira hodi servisu professional atu servi povu no nasaun, Nia hato’o asuntu ne’e ba jornalista sira iha Kuartel Jeral PNTL Kaikoli Dili, Kinta(09/07).

Iha enkontru durante oras ida ho balu ne’e MI husu ba PNTL atu servisu makaas no tau prioridade ba Tranazitu hodi hamenus ema mate no kanek tanba asidente tranzitu, fortifika Polisiamentu Komunitaria hodi servisu besik liu ba povu nudar parte husi vizibilidade no mellora kondisaun servisu Unidade Patrulamentu Fronteira (UPF) hodi garantia seguransa ho nasaun vizinu.

Iha okajiaun ne’e Komandante Jeral PNTL Komisariu Faustino da Costa hateten vizita ne’e ho objetivu atu prepara, koalia no konyese Komandante sira no ba oin ami sei nafatin hasoru malu ho Primeiru Ministru nudar mos Ministru Interior no Vice Ministru hodi halao enkontru regular ho Komandante sira.

Komisariu ne’e haktuirtan Primeiru Ministru nudar Ministru Interior koalia liu konaba Disiplina, Hirarkia, Lealdade no sente orgulhu ba kargu no konfiansa ne’ebe maka fo ba Komandante sira tanba ema sira ne’ebe maka sai ona Komandante ne’e maka diak liu hotu iha tempu ida ne’e hodi komanda unidade ka munisipiu ida hodi defende sentidu de estadu.

Primeiru Ministru mos hato’o agradesementu ba membru PNTL hotu no apresia servisu ne’ebe maka PNTL halo iha tempu naruk nia laran nune’e estabilidade no seguransa lao diak.

Iha vizita ofisial ne’e Komandante Jeral PNTL Komisariu Faustino da Costa halo aprejentasaun konaba situasaun no servisu PNTL nian nune’e Primeiru Ministru no vice Ministru hatene situasaun atual PNTL nian no fo orentasaun ba PNTL katak orsamentu 2020 tenke hare ba tempu ejekusaun nune’e tenke tau proposta OJE bazeia ba nesesidade no kapasidade ezekusaun nune’e  orsamentu ba atividade PNTL nia sei tau iha OJE 2021.

Vizita dahuluk MI no Vice MI ne’e simu ho tara tais. Partisipa iha enkontru ne’e Komandante munisipiu 12 no RAEOA, Komandante UEP, UPM, UPF, Xefe seksaun no Xefe Departamentu sira. Media PNTL

Dili, Komandu Polísia Nasional Timor-Leste (PNTL) iha loron kinta-feira (09/07) hetan vizita ida husi membru Komisaun B Parlamentu Nasional (PN) ne’ebe maka trata kona-ba Asuntu Defesa, Seguransa no Negosiu Estrangeiru hodi halo fiskalizasaun no buka solusaun ba problema ne’ebe maka Instituisaun PNTL hasoru hanesan Dividas husi tinan 2015 to’o tinan 2019.

Prezidente Komisaun B (PN) José Agostinho Sequeira “Somotxo” hafoin sorumutu ho Komandu PNTL ba jornalista sira iha Kuartél Jerál Kaikoli hateten vizita ne’ebe maka membru Parlamentu Komisaun B halo ba iha Komandu PNTL hanesan aktividade fiskalizasaun ho ninia baze fundamental/razaun ne’ebe maka lori ami mai to’o iha ne’e maka problema ne’ebe maka sai hanesan preukupasaun públiku liu-liu ami reprezentante povu iha PN.

“Iha buat rua mak ami diskuti hanesan Dividas Finanseira no Dividas Não Finanseira ba PNTL ninian, hau la presiza esplika razaun tanba saida maka mosu Dividas, maibé dividas sira ne’e mosu tanba iha razaun husi parte Komandu no kompañia, ami mós koalia kona-ba tetu Orsamentu 2020 no rekomenda mós ba Komandu PNTL atu prepara Orsamentu ba tinan 2021”, tenik Prezidente Komisaun B (PN) ne’e.

Aktual deputadu bankada Fretelin ne’e afirma tan prezensa husi Komisaun nian maka atu hatene Dividas sira ne’ebe Komandu PNTL iha hahu’u husi tinan 2015 to’o tinan 2019 ho Orsamentu rua (2020 no 2021) ne’ebe maka agora hotu-hotu prepara iha ne’ebe Orsamentu 2020 nian sei aprezenta iha loron 15 fulan Setembru tinan ne’e.

“Dividas ne’ebe maka Komandu iha maka ho montante milliaun $2,7 durante tinan lima nia laran (2015-2019) no tetu Orsamentu ba PNTL ne’e sei iha mudansa, tetu Orsamentu ne’e rasik ohin sai mós preukupasaun ida ba Komisaun B, rekomendasaun ohin hato’o ona ba Komandante sira atu defende tetu ida ne’ebe sira rasik prepara”, hateten eis ministru Interior ne’e.

Entretantu, Komandante Jerál PNTL Komisariu Polísia Faustino da Costa ba jornalista sira hateten Dividas hirak ne’e mai husi buat rua hanesan Bens de Servisu no Kapitál Menór. Husi buat rua ne’e sei fahe tan ba kategoria Dividas Finanseira no Dividas Não Finanseira, ida ne’e maka ohin Komandu PNTL justifika ba Komisaun B PN.

“Ohin ami justifka kada item husi dividas sira ne’e, balun manutensaun viatura, kombustivél, aluga kareta iha tinan 2017 no 2018 la konsege selu hotu, ida barak liu maka kompañia Telekomunikasaun Telemor, kamera CCTV no EDTL”, esplika Komandante Jerál PNTL ne’e.

Autoridade másimu seguransa ne’e haktuir tan kona-ba Tetu Orsamentu 2020 nian ba PNTL ne’e mai husi governu, iha tinan 2020 prioridade PNTL nian maka Dividas ne’e no ami laiha planu atu kompras buat ida ne’ebe maka bo’ot ba Kapitál Menór, Kapitál Dezenvolvimentu hodi konstrui buat foun ne’e laiha, maibé foku ba Dividas no iha Orsamentu 2021 maka sei hare’e ida ne’ebe prioridade liu hodi aloka Orsamentu ba.

Iha audiénsia ne’ebe hala’o iha salaun enkontru Kuartél Jerál ne’e partisipa husi membru Komisaun B PN kompostu husi Prezidente Komisaun José Agostinho Sequeira “Somotxo”, Vise Prezidente Komisaun Cornelio Gama “L-7”, Secretaria Elvina de Sousa, membru Komisaun David Dias Ximenes “Mandati” no Luis Roberto da Silva. Husi parte Komandu PNTL nian maka Komandante Jerál, Segundu Komandante Jerál, Inspector Jerál, Komandante Komandu Operasaun, Administrasaun, Pleamentu, Finansas hamutuk ho Ofisias Superior no Xefe Gabinete, Servisu sira iha Kuartél Jerál.

Media PNTL.

Dili, Kazu membru Polísia Nasional Timor-Leste (PNTL) ne’ebe baku joven ida iha postu administrarivu Atabae munisipiu Bobonaro ne’ebe akontese iha semana kotuk, submete ona ba prosesu investigasaun. Kronologia husi akontesimentu ne’e maka iha loron sabado 04 fulan Jullu tinan ne’e mais ou menus iha oras tuku 12 meudia iha ne’ebe akontese asaltu malu entre grupu rua ne’ebe maka akontese iha Gisu postu administrativu Maubara munisipiu Liquiça.

Porta voz Komandu PNTL Superintendente Xefe Arnaldo de Jesus Almeida D.C. Araújo liu husi konferensia imprensa ne’ebe hala’o iha kuarta-feira (08/07) ne’e iha salaun enkontru haktuir tan kronologia husi akontesimentu ne’e katak iha asaltu entre grupu rua ne’e rezulta vitima ida kanek.

“Iha momentu ne’eba membru/ajente polísia ho inisial F.S iha duni fatin akontesimentu no nia halo atuasaun imediatamente hodi lori suspeitu husi konfrontu ne’e ba iha eskuadra PNTL Atabae hodi bele foti ninia deklarasaun, entaun iha momentu ne’ebe membru ne’e halo atuasaun ida ne’ebe maka la tuir regras disiplina PNTL nian”, haktuir Porta voz Komandu PNTL ne’e.

Superintendente Xefe Arnaldo hatutan tan membru PNTL refere fó razaun tanba saida maka mosu agresaun fíziku hasoru suspeitu husi konfrontu ne’e katak, nia (Membru PNTL-red) duni ema ho insial Y.A (Suspeitu-red) ne’e no nia kolen hodi emosional maka nia halo asaun ida ne’ebe la tuir Lei haruka. No nia rasik maka halo video ne’ebe maka to’o ikus viral iha Media Sosial.

“Oras ne’e dadaun membru refere submete ona ba iha prosesu investigasaun disiplinar iha Komandu PNTL Maliana no husu ba vitima ne’ebe maka hetan agresaun físiku husi membru PNTL ne’e atu bele fó informasaun ne’ebe los, koopera ho didiak atu nune’e membru refere bele prosesa tuir Lei ne’ebe maka iha; andamentu ba prosesu ne’e agora dadaun lao hela no ita hein katak iha tempu badak prosesu ne’e sei lori ba tribunal sé karik membru ne’e komete krime no ita hotu hein rezultadu husi prosesu investigasaun ne’e”, tenik Xefe Gabinete Relasaun Públika ne’e.

Iha sorin seluk, Segundu Komandante Jerál PNTL Komisariu Polísia Mateus Fernandes mós kondena ba aktu ne’ebe maka halo husi membru PNTL ne’e. Tuir Komisariu ne’e aktu refere kontra regras disiplinar Instituisaun PNTL nian, wainhira iha investigasaun maka hetan motivu ruma husi aktu ne’e nia (Membru PNTL-red) tenke simu konsekuensia ne’ebe hateten iha Lei Disiplinar PNTL nian.

“Iha prosesu investigasaun maka sei denunsia/informa buat ne’ebe lolos husi motivu agresaun ne’ebe maka membru refere halo ba joven ne’e”, hateten Segundu Komandante Jerál PNTL iha Centro Formação Polícia Dili, ohin (08/07).

Media PNTL.

Dili- Polisia Nasional Timor-Leste (PNTL)  inagura Salaun Auditoriu Centru Formasaun Polisia (CFP-sigla portuges) ne’ebe maka rehabilita husi parseru Timor-Leste Police Development program (TLPDP) hodi fasilita PNTL.

Salaun Auditoriu ne’e ho fasilidade kompletu tuir estandar hodi akumula ema nain 250 nune’e salaun ne’e sei utilija ba Seminariu no worksop.

Segundu Komandante Jeral PNTL Komisariu Mateus Fernandes hato’o agradese ba parseru TLPDP liu husi Embaxador Australia iha Timor-Leste, ne’ebe maka sempre akompana dezenvolvimentu instituisaun PNTL, Nia hato’o asuntu ne’e ba Jornaslita sira iha CFP Comoro Dili, Kuarta (08/07).

Nia haktuirtan Infraestrutura no Rekursu Humanus nudar fator determinante iha Dezenvolvimentu PNTL atu sai professional tanba ne’e liu husi koperasaun servisu ne’ebe maka iha TLPDP apoiu ona PNTL hodi hari Centru Formasaun iha munisipiu 12 no RAEO, konstrusaun Sentru Nasional Krime organizadu iha Kuartel Jeral hodi hametin kordenasaun ho instituiisaun interligadu sira.

PNTL laiha buat diak ruma atu oferese ba Embaxador Australia maibe hein katak iha terrenu Polisia sei hatudu nia servisu ho ptrofesiaonal hodi servi povu no nasaun nune’e responde ba apoiu hirak ne’ebe maka parseru sira fo, nune’e PNTL sente kontente no komfortabel wainhira parseru TLPDP sempre akompana ami iha formasaun no dezenvolvimentu Rekursu Humanus.

Iha okajiuan ne’e Komandante TLPDP Superintendent Darren Booy hateten kapasidade no abilidade servisu Polisiamentu nian nudar ami nia komitmentu atu fo apoiu hodi dezenvolve nune’e liu husi Salaun Auditoriu ida ne’e sei sai fatin ne’ebe atu dezenvolve komprimisiu PNTL nian atu sai nudar instituisaun seguransa ida ne’ebe ema hotu bele orgulu.

Nia haktuirtan nudar parseru PNTL nian iha tinan barak onaami hola parte iha dezenvolvimentu instituisaun ne’e liu husi formasaun oi-oin ne’ebe fo no ami iha komitmentu no komprimisiu  boot atu apoiu nafatin PNTL.

Entretantu Embaxador Australia iha Timor-Leste Peter Robert hato’o parabens no agradese ba PNTL tanba servisu makaas iha tempu difisil hanesan durante periudu Estadu  Emerjensia hasoru pandemia Corona Virus no knar PNTL nian inportante tebes nune’e presija mantein vizilansia nafatin.

Nia hatutan Salaun Auditoriu ne’e iha fasilidade ne’ebe kapas nune’e bele suporta treinamentu iha Dili laran no fasilidade seluk ne’ebe suporta treinamentu iha munisipiu.

Asina Nota Koperasaun entre PNTL/CFP no UNPAZ

Atu dezenvolve rekursu humanus PNTL maka Polisia Nasional Timor-Leste (PNTL) liu husi Centru Formasaun Polisia (CFP) asina nota koperasaun ho Universidade da PAZ (UNPAZ) atu bele realija formasaun no peskija hamutuk entre instituisaun rua ne’e.

Komandante CFP Superintendente Arquimino Ramos hateten Nota de Intendementu ne’ebe maka asina ohin atu kesi instituisaun rua (2) hodi kontinua dezenvolve rekursu humanus liu husi formasaun.

Nia esplika Fokus husi nota koperasaun ne’e maka Instrutor sira iha CFP bele ba estudu iha UNPAZ nune’e mos dosente sira iha UNPAZ bele partisipa iha kursu ne’ebe maka CFP realiza nune’e ba oin ita kontinua servisu hamutuk iha area peskija nian liu-liu iha area siensia Polisial nian. MOU ne’e ho durasaun tempu tinan lima hafoin sei halo revizaun fila-fali.

Instituisaun PNTL liu husi CFP halao ona koperasaun ho UNTL, UNPAZ, Carles Darwin University (CDU) no sei kontinua ho Ensinu Superior sira seluk.

Iha okajiaun ne’e Reitor UNPAZ Adolmando Amaral hateten UNPAZ agora organiza aan atu servisu hamutuk ho instituisaun sira iha rai laran tantu publiku no privadu no ohin ita asina nota intendimentu ho PNTL nune’e depois iha area formasaun no kapasitasaun ba Dosente sira, pesija hamutuk, no halo seminariu hamutuk.

Nia haktuirtan UNPAZ mos sei oferese bolsu estudu hat (4) ba PNTL iha nivel Lisensiatura no Mestradu no selesaun atu asesu ba bolsu estudu ne’e UNPAZ entrega ba Komandante CFP atu halo selesaun hafoin entrega lista ba UNPAZ.

Serimonia inagurasaun ne’e partisipa husi Diretor FDCH, Diretor Ensinu Suoperior, Diretora Indimu, Xefe Seksaun no sefe Departamentu sira iha PNTL.

Serimonia ne’e kompleta ho entrega sertifikadu Autoridade Akuntabilidade no Responsabilidade (AAR) ba partisipante nain 58 ne’ebe kualifikadu certified practitioner nain 38 no nain 20 simu sertifikadu de partisipasaun, no Asinatura koperasaun entre CFP no UNPAZ hodi bele dezenvolve rekursu umanus PNTL. Serimonia asina Nota koperasaun ne’e kompleta ho entrega Souvenir husi reitor UNPAZ ba Segundu Komandante Jeral no konvidadu de onra sira. Media PNTL

Dili, Komandu Polísia Nasional Timor-Leste (PNTL) segunda-feira (06/07) ne’e hetan apoiu Supermie Mie Sedap hamutuk kaixa 270 husi Kompañia Mie Sedap iha Timor-Leste. Apoiu umanitaria ne’e hanesan meius ida atu ajuda membru PNTL sira ne’ebe hala’o servisu iha terenu durante kombate Surtu COVID-19 iha Timor-Leste.

Komandante Komandu Administrasaun PNTL Superintendente Xefe José Soares ne’ebe reprezenta Komandu iha serimonia simu apoiu ne’e hateten lori Komandu nia naran hato’o agradese ba apoiu ne’ebe maka fó husi kompañia, atu bele ajuda membru sira wainhira hala’o servisu loron no kalan iha terenu.

“Espera apoiu ne’ebe maka fó ba PNTL bele sai hanesan motivasaun ba kompañia sira seluk atu bele hala’o asaun karidade ne’e, ami mós agradese ba reprezentante adidu seguransa no mós Embaixada Indonesia nian iha Timor-Leste ne’ebe ajuda hodi apoiu hirak ne’e mai to’o iha PNTL”, tenik Komandante Komandu Administrasaun PNTL ne’e.   `

Superintendente Xefe afirma tan liu husi apoiu ne’e maka bele hametin liu tan amizade entre PNTL ho Kompañia, tanba kna’ar PNTL nian maka atu garante seguransa ba ema hotu no la fihir ba sidadaun estrangeiru ka sidadaun Timor. Maibé firme katak ema hotu iha Timor-Leste bele sente seguru wainhira hala’o aktividade.

Iha fatin hanesan Country Manager Kompañia Mie Sedap iha Timor-Leste Henny Kurniawan iha ninia lia menon hateten objetivu husi apoiu ne’e maka hakarak ajuda instituisaun PNTL iha tempu pandemia ida ne’e iha ne’ebe PNTL sempre hala’o kna’ar iha tempu loron no kalan. Ajuda hirak ne’e hanesan fase dahuluk ne’ebe sei fó supermie hamutuk 270 no faze daruak nian sei oferese tan 730.

“Ami mós hato’o agradese ba PNTL tanba durante tempu Estado Emergensia hala’o kna’ar ne’ebe diak, iha ne’ebe buat hotu lao ho diak no seguru, ami sidadaun estrangeiru mós hala’o aktividade ho diak tanba ami sente seguru ho PNTL nia servisu iha terenu”, hatutan Country Manager ne’e.

Partisipa iha serimonia ne’e Komandante Komandu Administrasaun, Dirétur Rekursu Umanu,  Komandante Administrasaun no  Planeamentu, Xefe Lojistika, reprezentante adidu seguransa Indonesia nian iha Timor-Leste.

Media PNTL.       

Dili- Komandante Jeral PNTL fo Tomada de Posse ba Xefe Relasaun Publika Superintendente Arnaldo de Araujo no Sub Xefe Servisu Investigasaun Kriminal Nasional Superintendente Paulino Carmo Pereira.

Nomeasaun ne’e halao bazeia ba Despasu Nu. 213/CG-PNTL/VII/2020 tuir artigu 26 husi Rejime promosaun hodi nomeia Superintendente Xefe Arnaldo de Araujo ba kargu Xefe Relasaun publika no Despasu Nu. 196/CG-PNTL/VII/2020 tuir artigu 28 husi Rejime promosaun nomeia Superintendente Paulino Carmo Perreira ba kargu Sub Xefe Servisu Investigasaun Kriminal.

Komandante Jeral PNTL Komisariu Faustino da Costa hateten kontinuasaun serimonia ne’e tuir los halao iha dia 01/07 maibe Komando konsiente katak tanba kestaun transporte Komandante nain rua labele hola parte iha serimonia ne’e maske nune’e ohin ita kontinua halao nafatin hodi kompleta sistema no ordem ne’ebe Komandu fo sai, Nia hato’o asuntu ne’e iha serimonia tomada de posse ne’ebe maka halao iha salaun Gabinete Komandante Jeral Kaikoli Dili (02/07).

Komisariu ne’e haktuirtan nomeasaun no transferensia ne’ebe Komandu halo sem iha influensia politika no Komandante ne’ebe la konsege halo transferensia maka Komandante PNTL munisipiu Bobonaro, Aileu, Ainaro, Manufahi no Cova-Lima.

“Mensajen badak ba Komandante nain rua (2) katak PNTL infrenta problema barak tanba ne’e tau Komandante sira atu mai ita hola parte iha problema ne’e hodi buka solusaun”.

Eix Komandante Rejiaun Autonomu Espesial Oecusse Ambeno (RAEOA) Superintendente Xefe Arnaldo de Araujo nomeadu sai Xefe Servisu Relasaun Publika hodi subtitui Inspetor Xefe Honorio Assis Barreto; Alende ne’e asumi mos kargu hanesan Porta Voz Komandu PNTL no Eis Segundu Komandante RAEO Superintendente Paulino Carmo Perreira subtitui  Inspetor Xefe Mousinho Correia ne’ebe maka ba halao misaun ONU iha loron 04/02/2020.

Serimonia tomada de posse ne’e partisipa husi Xefe Servisu Investigasaun Kriminal, Komandante CFP, Inspetor Jeral no Segundu Komandante Jeral. Media PNTL