Uncategorized

Batugade, Polísia Nasional Timor-Leste (PNTL) liu husi Departamentu Saúde servisu hamutuk ho Organizasaun Mundial Saúde (OMS) sexta-feira (06/03) semana kotuk hala’o aktividade Sensibilizasaun ba Prevensaun Moras Corona Virus (COVID-2019) ba membru PNTL husi Servisu Migrasaun, Unidade Polísia Fronteira (UPF) no Unidade Polísia Maritima (UPM).

Reprezentante OMS ba Timor-Leste Dr. Rajesh Pandav liu husi ninia reprezentante Luis dos Reis ne’ebe hanesan mós Ofisial ba Planeamentu Jestaun ba Programa nian iha ninia intervensaun ba aktividade ne’e hateten uluk kna’ain agradese ba PNTL liu-liu ba iha Unidade servisu Klinika no Manutensaun Saúde ne’ebe maka bele koalia ho ami kona-ba prioridade saida maka sei halo ba iha membru PNTL sira iha Unidade Fronteira, Polísia Maritima no Servisu Migrasaun.

“Ami kontente tebes tanba iha Instituisaun Polísia ho Migrasaun nian fó atensaun makas ba iha Saude tanba ita sempre koalia katak Saude ne’e iha ita nia liman rasik entaun laos ema Saude deit maka hare’e maibé ita hotu liu-liu ba membru sira ne’ebe maka servisu iha fronteira, ida ne’e sai preukupasaun ba ema hotu”, tenik Ofisial ba Planeamentu Jestaun ba Programa husi OMS.

Luis dos Reis afirma tan katak aktividade ne’e ita halo liga ba moras ne’ebe oras ne’e sai preukupasaun ema mundu tomak nian maka Corona Virus 2019 hanesan moras foun ida ne’ebe maka akontese iha sidade Wuhan nasaun China iha fulan Dezembru 2019 no to’o agora kazu barak maka akontese, nune’e nasaun China halo ona medidas barak hanesan bandu ninia sidadaun halo viagem ba rai liur no simu ema estrangeiru tama ba nasaun China.

Iha fatin hanesan, reprezentante Departamentu Klinika PNTL Inspector Gaspar Nheu hateten além de halo aktividade Sensibilizasaun, ekipa Saúde PNTL hamutuk ho OMS no Banco de Sangue HNGV hala’o mós Asaun Doasaun Ran iha âmbitu komemorasaun Aniversariu PNTL nian iha tinan 2020.

“Ohin ita halo aktividade doasaun ran hodi selebra aniversariu PNTL nian ba dala 20, nune’e ekipa Saude PNTL lori Komandu nian naran mai hala’o aktividade doasaun ran iha Batugade-Motain no membru husi UPF no UPM maka volontariamente halo doasaun ran”, hateten Inspector ne’e.

Media PNTL.     

Dili- Komandante Jeral Polisia Nasional Timor-Leste (PNTL) no Segundu Komandante Jeral halo enkontru semanal ho Prezidente Republika (PR) hodi atualija situasaun atual iha teritoriu nasional katak buat hotu lao diak no hakamtek maske iha akontesimentu kiik balu ne’e normal .

Komandante Jeral PNTL Komisariu Faustino da Costa hateten iha enkontru ho Xefe Estadu Francisco Guteres ”Lu-Olo” ne’e ami aprezenta asidente no insidente ne’ebe akontese durante fulan Fevereiru, nomos provokasaun iha media sosial relasiona ho situasaun politika rai laran, Nia hato’o asuntu ne’e ba Jornalista sira iha Palasiu Prezidensial Bairo-Pite Dili, Kinta (05/03).

Komisariu ne’e haktuir durante fulan Fevereiru PNTL rejista kazu asidente hamutuk 345 husi ida ne’e kompara ho fulan Janeiru kazu asidente ass liu no sai prekupasaun boot, asidente hirak ne’e akontese tanba fator humanu hanesan kondus sem karta kondusaun, transporte laiha kondisaun nomos ignoransia pessoal tanba mai ho hanoin ida dehan katak ami la uza kapasete no monu mos ami mak simu konsekuensia laos Polisia entaun ita ignora oinsa atu asegura ita nia aan.

No parte ida seluk ne’ebe famoju tebes maka inan ho aman lao uza kapasete hodi asegura sira nia aan maibe sira nia oan la uza kapasete, inan-aman haluha sira nia responsabilidade atu asegura sira nia oan buat hirak ne’e hotu maka kontribui ba asidente; Maske ita halo sensivilazasaun ba eskola-eskola, lider komunitaria no liu husi programa kafe dader iha RTTL.

Alende ne’e situasaun seluk konaba insidente maka ami aprenzenta kazu infantisidiu (oho bebe) ne’ebe mosu iha fim da semana no fim de fulan Fevereiru mos akontese hanesan  horseik komunidade sira hetan bebe ida  iha Tasi-Tolu.

“Kazu soe bebe ne’ebe ass tanba globalizasaun no dezenvolvimentu teknolojia ema utilija sala media la uza ba buat ne’ebe diak maibe ita hare parte ne’ebe negativu no kauza seluk maka ho asesu ba buat hirak ne’ebe maka tau iha internet no facebook ita la tau nia referensia ba buat ne’ebe diak maibe koko hodi interpreta sala demokrasia iha ita nia rai katak tanba demokrasia no liberdade entaun  inan aman mos labele mete no halo buat hotu tuir nia hakarak no nia konsekuensia maka kazu infantisidiu ne’e iha,”Komisariu Faustino esplika. Media PNTL

Dili, Komandu Polísia Nasional Timor-Leste (PNTL) Kuarta-feira (04/03) ne’e liu husi Komandante Jerál Komisariu Polísia Faustino da Costa hamutuk ho Segundu Komandante Jerál Komisariu Polísia Mateus Fernandes hala’o konferensia imprensa ida atu informa ba públiku kona-ba publikasaun ne’ebe viral iha Media Sosial kona-ba kazu ne’ebe akontese iha Indonesia. Komandu PNTL simu informasaun husi Servisu Informsaun Polísia (SIP) iha loron 28 Dezembru liu ba katak iha informasaun indikasaun ema ou grupu balun ne’ebe halo aktvidade balun hodi envolve sidadaun Timor oan balun ba iha aktividade ne’ebe deskonfia hanesan Burla. Nune’e iha loron 06 Janeiru 2020, Komandu PNTL liga ho informasaun ne’ebe iha tenta koordena no aktualiza situasaun ne’e.

“Basea ba akordu ne’ebe PNTL halo ho Polísia Repúblika Indonesia (POLRI) maka Komandu husu autorizasaun ba governu hodi desloka ekipa ida husi PNTL atu nune’e hamutuk ho autoridade Indonesia ba kazu deskonfia ida ne’e, nune’e iha loron 19 Janeiru ekipa husi PNTL hasoru malu ho POLRI no hahu’u halo identifikasaun no rekolla informasaun ba kazu ne’ebe deskonfia hanesan Burla”, tenik Komandante Jerál PNTL ne’e.

Komisariu Polísia Faustino da Costa afirma tan husi prosesu sira ne’e hotu hala’o iha Indonesia husi autoridade Indonesia ne’ebe los duni katak iha dadus no gravasaun balun ne’ebe halo durante aktividade ida ne’e. Desde ida ne’e sei iha prosesu nu’udar informasaun katak seidauk konsidera hanesan krime ida maka PNTL nunka divulga informasaun saida deit ba públiku liga ho prosedimentu penais ne’ebe iha. Maske nune’e, iha inisiu fulan Marsu no fim fulan Fevereiru 2020 detekta katak iha publikasaun dadus no informasaun balun liga ba prosesu ne’ebe husi autoridade Indonesia hala’o sai hanesan konsume públiku ida.

“Iha publikasaun ne’e mensiona momos katak ita nia maun bo’ot Kay Rala Xanana Gusmão hanesan mós  aman veteranu Brigadeiru Jerál Mau-Nana nia naran ne’ebe temi iha video ne’ebe publika, husi konfirmasaun informasaun ne’ebe iha husi parte autoridade tantu husi PNTL no mós autoridade seguransa Indonesia ne’ebe prosesa hela, detekta katak primeiru informasaun ne’ebe hato’o husi autor iha Media ne’ebe publika katak ne’e lalos tanba ho intensaun ida atu hetan influensia, konfiansa no kredibilidade ba vitima sira ne’ebe oras ne’e autor rasik lansa hela propaganda ida ne’e”, hatutan autoridade másimu seguransa ne’e.

Na’in ulun PNTL ne’e salienta segundu autor ne’ebe oras ne’e parte autoridade Indonesia investiga hela sempre uza ho maneira ema sira ne’ebe nia hasoru liu-liu lider istoriku sira no aman maun veteranu sira nia fotografia hanesan prova ida katak nia iha relasaun diak no hetan autorizasaun hodi hetan konfiansa ba nia hahalok ne’ebe ikus mai lalos no bosok. Hare’e ba publikasaun ida ne’e, tanba ekipa PNTL maka desloka ba iha Indonesia iha Janeiru 2020 maka Komandu PNTL hasai ona despasu ida hodi orienta Inspector Jerál PNTL ho ekipa Investigasaun Kriminal halo investigasaun no mós interogasaun ida ba ekipa ne’ebe desloka ba Indonesia.

Dadus ho informasaun ne’ebe deskonfia ba Burla Agravadu, dadus sira ne’e Komandu PNTL aprezenta mós ba governu tantu ba Prezidente Repúblika no Primeiru Ministru varbalmente. Husi informasaun ne’ebe SIP rekolla sempre halo koordenasaun no aktualizasaun ba informasaun ho parte relevante hanesan Zota Dois (Z2), Servisu Informasaun Militar F-FDTL, Servisu Intelijensia (SNI) no Kaza Militar Gabinete Prezidensial Repúblika. Aproveita oportunidade ne’e, Komisariu Faustino hato’o ba veteranu sira hotu katak informasaun ne’ebe husi autor sira uza hodi temi lider sira nia naran ne’e lalaos no bosok.

“Iha publikasaun detekta katak atu halo fabrika ba osan falsu ida ne’e prosesu la detekta no lalos, husu ba públiku katak publikasaun iha Media Sosial ne’e tenta atu kria instabilidade iha Timor-Leste no aproveita situasaun politika aktual hodi hamosu konfuzasaun entre lider istoriku, veteranu no lider partidu politiku no instituisaun Defesa no Seguransa. Tanba ne’e Komandu PNTL katak Inspector Geral sei halo Inkéritu ba membru sira ne’ebe desloka ba Indonesia no mós karik iha detekta publikasaun ida ne’e iha ligasaun ou relevansia kontribuisaun husi oknum ruma PNTL ninian maka Komandu PNTL sei la tolera aktu sira ne’e no sei la tolera ba individu ka grupu sira ne’ebe halo ba publikasaun ida ne’e no prosesu kazu ne’e ba Ministeriu Públiku”, hakotu Komisariu Polísia ne’e.

Media PNTL.

Dili- Segundu Komandante Jeral Polisia Nasional Timor-Leste (PNTL) Komisariu Mateus Fernandes apela ba membru hotu atu la mete politika liu husi media Sosial Facebook ou saida deit nomos labele tuir trenu Grupu Arte Marsiais (GAM).

Liu husi serimonia isar bandeira primeira semana Segunda ohin (02/03) Segundu Komandante Jeral nudar Inspetor da serimonia hateten ita hotu hatene no akompana katak tensaun politika iha rai laran ohin loron ema barak nakonu iha media sosial facebook no media oi-oin tau komentariu barak los maibe diak liu nudar Polisia ita nonok deit no fo komentariu ba ita nia servisu deit tanba liga ba politika ne’e fora husi ita nia kompetensia.

“Ita nia kompetensia maka garantia seguransa lei no ordem iha rai ida ne’e laiha buat seluk tanba asuntu seluk ne’e kompetensia orgaun seluk nian, tenke kuidadu tanba iha ema seluk mos hakarak aproveta ita,” Segundu Komandante Jeral fo atensaun.

Fo hanoin konaba reativa artes marsiais bolu atensaun nafatin ba maluk PNTL hotu atu kuidadu ita nia pojisaun no kuidadu ita nia aan nafatin, dalan ne’e laos ita nian labele tama ba dalan neba tanba governu agora ejiji para Grupu Artes Marsiais (GAM) halo rejistrasaun iha Sekretariu Estadu Joventude no Desportu iha Komisaun Reguladora Artes Marsiais (KRAM) ba sira ne’ebe maka la hatene dalan karik nudar Polisia fo hatene no wainhira la rejistu maka ita sira ne’ebe halao lei no ordem iha kraik hato’o ba governu no rekomenda atu hare asuntu hirak ne’e.

“PNTL tenke mantein nia pojisaun la bele mete no labele tama ba grupu hirak ne’e ita nia prejensa atu fo hanoin katak saida maka governu fo sai ne’e ordem no lei; so ita hotu koopera wainhira timor oan hotu kopera no iha bontade diak maka buat hotu sei lao diak, maibe kuandu ita la kopera ema pergunta ita nia prejensa.

Ita tenke ho vontade tomak  tau iha konsiensia katak hau tenke kontribui se hau lahatene buat ida hau lalika komentariu no halo asaun ruma pior liu ema fo informasaun katak Polisia maka involve iha GAM.

Ikus liu fo hatene mos ba ita hotu katak ekipa promosaun Divija fo sai ona lista naran promosaun ba postu Superintendente Xefe katak wainhira la satisfas maka bele halo rekursu ba Ministru Defeza no Interior Interinu nune’e karik la satisfas ba buat ruma iha neba bele hetan resposta no ba sira ne’ebe maka dokumentu la hanesan regras kontinua buka konsulta hadia para depois iha futuru mai ita sei hare. Media PNTL

Dili, Komandu Polísia Nasional Timor-Leste (PNTL) iha kinta-feira (27/02) ne’e hala’o serimonia despedida ba Assesor Komandante Jerál Komisariu Polísia Faustino da Costa, Major Felisberto Contente ne’ebe remata ona ninia misaun durante tinan neen iha Komandu PNTL.

Komandante Jerál PNTL Komisariu Polísia Faustino da Costa iha ninia lia menon ba serimonia ne’e hateten hanesan ita hotu hatene Major Contente hala’o nia kna’ar iha Timor-Leste hodi hamutuk apoiu, fasilita no transmite ninia koñesimentu balun ba PNTL iha Komandu ne’ebe hahu’u husi Centro Formação da Polícia (CFP) no kontinua mai iha Gabinete Komandante Jerál desde tinan 2015.

“Atu dehan ohin ita halo despedida la signifika katak despedida ita halo saida maka Major Contente halo hela iha ne’e ka remata iha ne’e, esforsu no mós servisu sira ne’ebe hetan apoiu no mós hato’o husi Major ida ne’e dala-wain ita uza mós ba iha aktividade servisu polísia ninian ne’ebe ita durante ne’e hala’o, iha mós aktividade ou eventu sira ne’ebe halo husi Major ida ne’e ne’ebe ikus mai husi Komandu Guarda Nacional Repúblicana (GNR) tau mós iha ne’ebe katak Major Contente durante hala’o nia kna’ar iha Gabinete hanesan Assesor Komandante Jerál sem uza farda katak tenke hatais sivil, ida ne’e regra ne’ebe Komandu GNR fó”, hateten na’in ulun PNTL ne’e.

Komisariu Polísia Faustino afirma tan katak atu deside no hakotu misaun Major ninian laos buat ida fasil tanba kestaun buat balun maka hanesan, sé kuando Komandu mantein Major nu’udar Assesor entaun ida ne’e sei prejudika futuru Major ninian no sé kuando ita hakotu ninia misaun mós problema maka ninia esposa mós sai profesora iha Timor aumezmu tempu Major nia oan feto mós frekuenta hela estudu iha Timor.

Entretantu iha ninia Mensagem Ofisial, Major Felisberto Contente hato’o ninia agradesimentu ba Komandu PNTL liu-liu pesoal gabinete Komandante Jerál ninian ne’ebe hatoman ann ho hau hanesan familia lolos. Durtante hau nia mandatu tinan neen nia laran buat barak maka hau hasoru hanesan dezafiu, obstákulu, Aventura, difikuldades, maibé ho didikasaun ne’ebe hau oferese ba instituisaun ida ne’e hau konsege ultrapasa ho diak.

Major Felisberto Contente hahu’u ninia misaun iha tinan 2014 ne’ebe hala’o servisu Kooperasaun Bilateral entre GNR no PNTL hafoin hala’o ona ninia funsaun servisu iha CFP durante tinan ida nia laran no tinan lima iha Gabinete Komandante Jerál hanesan Assesor. Além de hala’o servisu hanesan Assesor ba Komandante Jerál, Major Contente sai mós hanesan responsavel hodi fó ajuda ba 2ᵒ Konkursu Públiku Admisaun ba Kursu Formasaun Agentes ne’ebe sei aumenta tan ba 3ᵒ, 4ᵒ no 5ᵒ Kursu Formasaun Agentes. Ikus mai fó mós ajuda ba iha Primeiro Konkursu Admisaun ba Kursu Promosaun ba Ofisias Inspetores no prosesu dahuluk ba Promosaun por Eskolla iha PNTL, hala’o servisu assesoria ba Komandante Jerál ne’ebe tama mós momentu eleisaun dala-tolu no produz dokumentu oin-oin. Komandu PNTL Entrega mos diploma louvor hanesan lembransa ba Major Contetente.

Hola parte iha serimonia simples ne’ebe hala’o iha salaun enkontru Kuartél Jerál ne’e Komisariu Polísia Faustino da Costa, Komisariu Polisia Mateus Fernandes, Ofisial Ligasaun Ministeriu Administrasaun Interna Portugal iha Dili, Superintendente Xefe Miguel Mendes, Xefe Misaun ba Kooperasaun GNR iha Timor-Leste Tenente Coronel Luis Candeias, Inspector Jerál, Komandante Komandu Operasaun, Komandante Komandu Administrasaun, Komandante SIP, Komandante Justisa, Diretur no Xefe Servisu sira iha Kuartél Jerál PNTL.

Media PNTL. 

Dili- Komandante Jeral Polisia Nasional Timor-Leste (PNTL) Komisariu Faustino da Costa no Segundu Komandante Jeral Komisariu Mateus Fernandes atualija situasaun seguransa rai laran no atuasaun PNTL iha terrenu.

 “Ami atualija situasaun seguransa atual iha teritoriu nasional sei lao kalma no hakmatek maske ita hotu akompana situasaun politika rai laran; informasaun estudante sira asalta malu iha Comoro nomos asidente trafiku ne’ebe mosu liu-liu hanesan mos ohin madrugada akontese asidente monu mesak iha parte Balidi Maskarenhas ne’ebe rejulta vitima mate,” dehan Komandante Jeral.

Iha enkontru Semanal ohin Kinta (27/02) iha Palasiu Prezidensial Bairo-Pite Dili, Autoridade masimu instituisaun seguransa ne’e mos hato’o informasaun konaba servisu Polisia nian, kazu saida maka Polisia atende durante ne’e hanesan mos aprezenta ba Primeiru Ministru iha inisiu semana ida ne’e ninian.

Relasiona ho revogasaun Rezolusaun Governu hodi reativa hikas Grupu Arte Marsiais (GAM) Komandante Jeral afirma maske governu revoga rezolusaun Governu Nu.16/2013 hodi reativa GAM mais la signifika arte marsiais hotu-hotu halo atividade tuir nia hakarak maibe tenke halo tuir saida maka Lei Nu. 5/2017 hateten :

Kualker Grupu Artes Marsiais ne’ebe halao nia atividade tenke rejistu laos tanba governu revoga tia rejolusaun ida-idak halo atividade tuir nia hakarak ne’e la laos no PNTL uza nafatin Lei Nu.5/2017 hodi halo ninia asaun bainhira GAM sira kontra lei. Media PNTL

Dili, Atu aktualiza situasaun seguransa iha rai laran, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa segunda-feira (24/02) ne’e hala’o enkontru ida ho Primeiru Ministru (PM) Repúblika Demokratika Timor-Leste (RDTL) Taur Matan Ruak iha Palacio do Governo.

Hafoin enkontru ba Media, Komandante Jerál PNTL ne’e informa Komandu mai aprezenta ba PM liu-liu liga ba situasaun aktual katak primeiru situasaun iha teritoriu nasional lao diak maske iha akontesimentu no movimentu balun hanesan kuandu governu hasai ona Rezolusaun kona-ba Arte Marsias no Arte Marsias balun komesa hatudu ann, hatais farda lao ba mai.

“No ami mós koalia ona katak, lolos Rezolusaun Governu iha ona maibé sira ne’ebe uluk tama Arte Marsias ne’e agora tenke kumpri Dekretu sira seluk hanesan halo rezistu, halo ninia estrutura, fatin ne’ebe atu halo treinamentu laos atu halo uluk treinamentu tanba iha munisipiu balun mak komesa halo dadaun ona asaun hatudu ann”, informa na’in ulun PNTL ne’e.

Komisariu Polísia Faustino hateten tan diak liu ita labele ho buat sira ne’ebe hau dehan bebeik ona katak ema ruma husi rai seluk fó informasaun ou pasa mensagem balun iha Media Sosial ita labele simu buat ne’e, diak liu buka tuir atu ikus mai labele monu ba sala ne’ebe ita rasik la espera.

“Aprezenta mós ba PM kona-ba ezijensia maluk sira husi Uniaun Nasional Juventude Maubere (UNIJMA) kona-ba edifisiu eis sede CPD-RDTL aktual Eskuadra Polísia Na’in Feto, Balide katak husi parte Komandu PNTL entrega ona dokumentu no karta sira ba Ministru Interior no hato’o mós ba Ministru Justisa tanba iha tinan 2014 iha despasu konsesaun de uzu ba rai aumezmu tempu nu’udar atribuisaun ba PNTL no parte PNTL mós aprezenta ona dokumentu kompletu husi Ministeriu Justisa bainhira entrega rai ne’e ba Polísia hodi utiliza to’o agora”, hakotu autoridade másimu seguransa ne’e.

Media PNTL.              

Dili, Atu avalia situasaun seguransa iha teritoriu Timor laran tomak maka iha segunda-feira (24/02) ne’e Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa dirije enkontru mensal ida ho Komandu Operasaun, Diretur no Xefe Departamentu sira iha Kuartél Jerál Kaikoli.

Porta Voz Komandu PNTL Superintendente Xefe Pedro Belo ba jornalista hafoin enkontru semanal  hateten sorumutu ne’e halo kada segunda-feira ne’ebe dirije diretamentu husi na’in ulun PNTL nian hodi halo avaliasaun ba situasaun seguransa iha rai laran liu-liu iha semana ne’ebe akontese ona.

“No ami mós hare’e ba situasaun aktual ne’ebe maka lao hela no informasaun ne’ebe lao hela ami halo ida ne’e no ami kumpri ba ordem ne’ebe maka mai husi Komandante Jerál atu halo planu operasaun nian husi Komandu hodi hatutan ba membru sira”, tenik Porta Voz Komandu PNTL ne’e.

Superintendente Xefe ne’e afirma tan katak ami halo avaliasaun situasaun en jerál iha semana ida ne’e hodi hare’e kona-ba saida maka hanesan governu deside ona, Polísia tenke halo tuir no ami mós tenke halo Planu tuir ida ne’e.

“Ita hatene katak rezolusaun (Re-ativa aktividade Arte Marsias) ne’ebe foin dadaun husi parte Konsellu Ministru fó sai ona maibé to’o oras ne’e dadaun seidauk públika iha Jornal da República no husi parte seguransa mós seidauk hetan nia kopia ruma atu ami mós bele hare’e ida ne’e tanba ne’e atu Lei ou Rezolusaun ruma ne’ebe maka seidauk públika iha Jornal da República entaun otomatikamente ida tuan ne’e sei lao hela (Lei Nu.5/2017) sei aplika nafatin tanba tuir informasaun ne’ebe ami hetan katak Rezolusaun ne’e maka iha maibé Lei ne’e seidauk iha”, afirma Superintendente Xefe ne’e.

Aktual Komandante Komandu Operasaun subliña tan informasaun ne’ebe aktualiza iha enkontru ne’e maka hanesan kona-ba situasaun politika no arte marsias mós lao hela entaun presiza polísia halo avaliasaun ba ida ne’e. Hola parte iha enkontru ne’e Komandante Komandu Operasaun, Komandante SIP, Komandante CFP, UEP, UPM, Diretur no Xefe Departamentu sira iha Kuartél Jerál.

Media PNTL.         

Dili- Organizasaun Mundial Saude (OMS ou WHO sigla inglesh) halo senseblizasaun moras corona virus ba membru Polisia Nasional Timor-Leste (PNTL) no Servisu Migrasaun hodi bele halo prevensaun.

Reprezentante OMS ba Timor-Leste Dr. Rajesh Pandav hateten ami halo kordenasaun ho PNTL Diretor Jeral Servisu Migrasaun atu fahe informasaun ba membru PNTL no Ofisial Servisu Migrasaun sira konaba situasaun corona virus, situasaun global, prevensaun  no atividade preparasaun iha Timor-Leste atu atende kazu ne’e, Nia hato’o asuntu ne’e ne’e ba Jornalista sira iha ministeriu Interior Vila-verde Dili, Sexta (21/02).

 Nia haktuirtan OMS suporta Ministeriu Saude (MS) no kolborasaun ho Servisu Migrasaun no Aeroportu hodi suporta kartaun kinur (karta deklarasaun saude) atu nune’e wainhira ema ne’ebe halo viajen ba rai liur tenke prinse kartaun kinur ne’e iha Aeroportu, informasaun konaba prevensaun corona virus no hadia Termu Escaner ne’ebe instala ona iha Aeroportu atu detekta temperatura pasajeru sira ne’ebe mai karik afeta ho virus ne’e.

Iha okajiaun ne’e Pontu Fokal Jestaun Risku no emerjensia Diresaun Nasional Servisu Hospitalar Ministeriu Saude(MS) Dra. Costodia B.Florindo hateten hare ba situasaun corona virus oras ne’e dadaun MS hetan suporta husi OMS ba preparasaun hotu-hotu atu responde ba situasaun emerjensia ida ne’e.

Nia esplika iha parte emerjensia nian iha Emergency  Health Closter group ne’ebe maka hetan apoiu barak husi parseru dezenvolvimentu sira, ajensia ONU, NGO Nasional no Internasional hirak ne’ebe maka servisu hamutuk ba preparasaun oinsa Timor-Leste atu hasoru situasaun emerjensia ida ne’e.

“MS hare ba oinsa preparasaun Hospital Nacional Guido Valadares (HNGV) hodi hare karik iha suspetu ruma inportante liu maka oinsa preparsaun ba iha sala ijolamentu, ho apoiu parseru sira nian iha ona kama 10 iha sala ijolamentu atu ijola karik iha suspetu sira ne’ebe mai ho sintoma corona virus hanesan isin manas, mear no susar dada iss,” Dra. Costodia haktuir.

Alende ne’e husi parte servisu ambulansia ita mos agora iha preparasaun ba viatura ne’ebe atu dejigna ba iha kazu refere, no pessoal saude , ema ne’ebe lori ambulansia, infermeru no mediku ne’ebe sei halo preparasaun wainhira atu atende kazu ne’e foti husi fatin ne’ebe ita hetan suspetu corona virus hodi transfere ba HNGV. Maske durante ne’e seidauk identifika ema roma afeta ho virus ne’e.

Programa Sensibilizasaun ne’e partisipa husi Diretur Jeral Servisu Migrasaun Superintendente Agustinho Gomes, Xefe Klinika no Saude PNTL Dra. Inspetor Marcelina Eugenia da C. Ximens, membru PNTL, Ofisial Servisu Migrasaun no funsionariu sivil sira. Media PNTL.

Dili, Basea ba Despasu Comandante Geral Nu.105-A/CG-PNTL/II/2020 Komandu Polísia Nasional Timor-Leste (PNTL) halo nomeasaun ba kargu Komandante Unidade Polísia Marítima (UPM) Superintendente Assistente Basilio de Jesus hodi subtitui Saudozu Superintendente Xefe Lino da Silva Saldanha ne’ebe fila hikas ba Aman Maromak iha loron 13 fulan Fevereiru tinan 2020.

Enposadu Superintendente Assistente Basilio de Jesus antes ne’e assume kargu hanesan Diretur Finansas no Orsamentu PNTL. Serimonia tomada de posse ne’e hala’o antes realizasaun enkontru Konsellu Superior PNTL nian ba dala uluk iha tinan 2020. Posse ne’e entrega diretamente husi Komandante Jerál PNTL Komisariu Polísia Faustino da Costa no partisipa husi Segundu Komandante Jerál no membru Konsellu Superior sira.

Media PNTL.