Uncategorized

Kuarta Loron 22, fulan Janeiru tinan 2020, Ministru Interior Interinu DR. Filomeno da Paixão de Jesus, Akompaña husi Jenerál Lere Anan Timur, Komisariu Polísia Faustino da Costa realiza enkontru ho Prezidente da República Francisco Guterres Lú Olo, iha Palasiu Prezidente Bairu-Pite Dili.

Enkontru refere hanesan enkontru semanál ne’ebé hala’o ho Prezidente da Repúblika hodi koa’lia kona-ba situasaun Siguransa Nasionál iha Teritoriu Timor-Leste nian. Alende ne’e sei iha mós setenta dias Prezidente da República sei bolu lider Polítiku sira hotu atu tu’ur hamutuk, liu-liu lider rezisténsia sira ne’ebé iha influénsia iha Timor-Leste atu bele hetan konsensu nasionál ida para bele forma fali governu foun ou atu hetan solusaun ida ba iha situasaun impase polítika ne’ebé mosu iha ita-nia nasaun. “Ohin Prezidente bolu Ministru Defeza no Ministru Interior Interinu mai para atu halo preparasaun durante periodu ida-ne’e oinsa atu reforsa no asegura liutan siguransa rai laran, Brigadeiru jeneral F-FDTL reformadu ne’e.

Dili, Membru Polísia Nasional Timor-Leste (PNTL) na’in ida hetan asaltu husi joventude na’in neen iha area Aimutin wainhira nia atu ba Eskuadra PNTL Dom Aleixo hodi hare’e nia alin ne’ebe maka hetan uluk asaltu. Husi asaltu ida ne’e, membru PNTL Inspetor Honorio Horta ne’ebe hanesan Médiku iha Centro Formação da Polícia (CFP) hetan konsekuensia ne’ebe bo’ot tanba hetan tá husi joven na’in neen.

Komandante Operasaun Nasional PNTL Interinu Superintendente Xefe José Soares liu husi konferensia imprensa iha tersa-feira (21/01) ne’e iha Salaun Enkontru Komandu Jerál PNTL esplika, kronologia akontesimentu ne’e katak antes membru PNTL ne’e hetan asaltu, iha joven na’in rua (Maun-alin,red) ne’ebe hanesan alin husi membru PNTL ne’e, hetan asaltu iha loron segunda-feira kalan iha oras tuku ida madrugada ho diresaun Hudi-Laran mai Aimutin, maibé wainhira hatu’un tiha nia maun hafoin nia fila iha kruzamentu Aimutin, iha joven na’in tolu halo asaltu ba joven ne’ebe lori motor. Tanba nia mesak, nia lakon kontrola no monu ho motor entaun nia halai ba nia maun iha Aimutin ne’ebe antes ne’e nia hatun ba.

“Iha tempu ne’e kedas sira na’in rua komunika ba nia maun ne’ebe servisu hanesan membru PNTL ho profisaun hanesan Médiku ba PNTL ne’ebe destaka iha CFP. Iha tempu ne’e kedas sira na’in rua ba halo keixa iha eskuadra Dom Aleixo hafoin minutu 15 ou 20 hanesan ne’e, membru PNTL ne’ebe ho naran Honorio Horta, nia ba iha nia alin nian uma, nia rai hela nia kareta iha nia alin nian uma hodi tuir sira na’in rua ba eskuadra Dom Aleixo, maibé wainhira seidauk to’o iha eskuadra, iha kruzamentu Aimutin ninian nia hetan fali tan asaltu husi ema na’in neen”, haktuir Komandante Operasaun PNTL Interinu ne’e.

Aktual Komandante Komandu Administrasaun PNTL ne’e hatutan tan kona-ba konsekuensia husi asaltu ne’e, membru PNTL hetan tá iha parte ulun no hasan ho total pankada hamutuk 11. Oras ne’e dadaun membru refere hetan tratamentu iha Hospital Nasional Guido Valadares (HNGV) tanba hetan suku ho pontu 11.

“Horikalan kedas membru PNTL eskuadra Dom Aleixo ho servisu sira seluk halo kedas operasaun no joven hirak ne’ebe envolve ann iha asaltu refere konsege kaer kedas, iha na’in lima no ohin loron sira entrega ona iha Komandu Distritu Dili atu bele konklui ninia prosesu, atu nune’e iha oras 72 nia laran atu aprezenta ba iha Ministeriu Públiku (MP)”, hatutan Komandante Komandu Administrasaun PNTL ne’e.

Superintendente Xefe José afirma katak, ida ne’e maka asaltu ne’ebe akontese iha kapital Dili ho situasaun politika ne’ebe ohin loron Timor hasoru, tanba ne’e PNTL nafatin iha ninia kna’ar atu identifika klean liu tan atu bele hatene motivu saida maka hakauza sira atu bele halo aktu-aktu krime hodi hatu’un dignidade Estadu ida ne’e, hodi fó imagem ladiak ba ita nia rai Timor-Leste.

“Iha operasaun ne’e, ita halo kapturasaun ba ema na’in neen ne’e, iha balun sira lori atributu pertense ba iha grupu Arte Marsias balun, iha balun lori Samurai, fiska no balun lori fatuk; objetu sira ne’e maka sira uza hanesan arma ida atu bele hakanek ema ou hamate ema iha situasaun oinsa deit no aktu sira ne’e krime kuandu ita liga ba iha Lei Nu.5/2017 no ita hato’o ba investigadoers sira maka elabora nia prosesu tomak atu bele aprezenta ba MP”, tenik Superintendente Xefe ne’e.

Media PNTL.                            

Dili- Ministeriu Saude (MS) halao programa vasinasaun Hepatitis B doze da-ruak ba membru Polisia Nasional Timor-Leste (PNTL) hodi prevene moras Hepatitis ne’ebe fo perigu ba ema nia saude.

Segundu Komandante Jeral PNTL Komisariu Mateus Fernandes hateten programa vasinasaun ne’e nudar koperasaun Ministeriu Saude ho PNTL hodi antisipa virus hepatitis tanba Hepatitis B hanesan moras ida ne’ebe maka perigu ba ema nia saude.

Komisariu ne’e haktuirtan Ministeriu Saude ho Klinika Saude PNTL halo antisipasaun antes liu husi halo skrining no fo vasinasaun nune’e ita nia isin bele forte no Anti corpo (daya tahan tubuh ) hasoru virus ne’e tanba Virus Hepatitis B hamate ema barak ona nune’e persija halo antisipasaun antes liu husi vasinasaun.

Programa vasinasaun Hepatitis B doze daruak ne’e halao dahuluk iha Kuartel Jeral PNTL Kaikoli Dili no teknikamente Ministeriu Saude no Klinika Saude PNTL sei kontinua programa ne’e ba membru PNTL iha Komandu PNTL munisipiu 12, RAEOA, Unidade UPM, UEP no UPF nomos Eskuadra hotu.

Programa vasinasaun Hepatitis B doze da-huluk halao iha Dezembru tinan 2019. Media PNTL

Dili, Tribunal Distrital Dili (TDD) Sabadu (18/01) liu husi sesaun primeiru interrogatoriu deside aplika prizaun preventiva ba suspeitu ho inisial CMB (30), ne’ebe akuzadu envolve iha krime tráfiku ilísitu ba droga.

Tuir advogadu privadu suspeitu, Fernando da Costa, hateten ministeriu públiku akuzadu ninia kliente ho krime tráfiku ilísitu ba droga ne’ebe previstu iha lei Númeru 2/2017, 25 Janeiru.

Hanesan advogadu, Fernando simu desizaun tribunal ne’e, maibé la konkorda, tanba ne’e iha prazu loron 15, sei rekorre rekursu ba tribunal rekursu, ligadu ho desizaun primeiru instansia ne’e.

Nia afirma, tuir lolos, labele hare’e deit ba tipu krime, no moldura pena ne’ebe mais superior tres anus, maibé in-prinsipiu presiza liga mós ho artigu 183 kódigu penal.

“Ne’e desizaun tribunal, maibé ita iha loron 15 atu rekorre. Hanesan defeza hau sei rekorre ba Tribunal Rekursu ne’e desizaun primeiru instánsia nian”, nia afirma, iha TDD, sabadu (17/01).

Nia informa tan, antes ne’e iha sesaun primeiru interrogatoriu dahuluk, hanesan defeza solisita ba tribunal atu aplika aprezentasaun periódika enkuantu MP husu ba tribunal atu aplika prizaun preventiva duni”, nia hateten.

“Ikus mai tribunal deside prizaun preventiva duni”, nia hateten.

Fernando konta, nia kliente simu pakote ne’e, husi malae ida ne’ebe suspeitu hatene liu husi facebook, no kontinua chatting liu husi whatshap, maibé bainhira suspeitu ne’e seidauk to’o iha aeroportu atu foti, maibé alfándega dehan iha ona deskonfia buat ruma ona iha laran.

“Tanba ne’e maka komprova ba tribunal hodi foti desizaun prizaun preventiva”, nia hakotu.

Kazu droga ne’e, antes iha sexta (17/01) tribunal halo ona primeiru interrogatoriu ba arguidu tanba deskonfia lori ai-moruk droga ho tipu sabu-sabu ho nia kuantidade kilograma 3,253 tama Timor-Leste.

Timor oan ho insial CMB sai suspeitu tanba simu pakote droga ho tipu sabu sabu 3,253 kg ne’ebe ema estrangeiru haruka husi Nigeria mai, tama liu husi Aeroportu Internasional Presidente Nicolau Lobato, Comoro Dili, tersa (14/01).

Kazu droga ne’e prende liu husi operasaun konjunta autoridade seguransa ne’ebe kompostu husi Alfándega, Servisu Investigasaun Kriminal Nasional (SIKN), Servisu Informasaun Polísia (SIP), Servisu Nasional Intelijénsia (SNI), Polísia Militar no Unidade Polísia Maritima (UPM).

Audensia julgamentu ba desizaun ne’e preside husi juiz Antonio Fonseca, Ministeriu Públiku reprzenta husi Hernani, arguido hetan asistensia legal husi advogadu privadu Fernando Da Costa.

Fontes: Media Timor Post (Edisaun Segunda, 20 Janeiru 2020).    

Dili, Komandu Polísia Nasional Timor-Leste (PNTL) iha loron sexta-feira (17/01) fó Posse ba Komandante PNTL munisipiu Manatutu no Manufahi hodi kompleta estrutura Komandu PNTL nian. Basea ba Despasu Comandante Geral Nu.11.A/CG-PNTL/I/2020 hodi nomea Superintendente Julia Gama hanesan Komandante PNTL munisipiu Manatuto ne’ebe antes ne’e assume husi Superintendente Inacio Saldanha dos Santos no Despasu Comandante Geral Nu.10.A/CG-PNTL/I/2020 hodi nomea Superintendente Damião da Silva Correia ba kargu hanesan Komandante PNTL munisipiu Manufahi ne’ebe antes ne’e assume husi Superintendente Julia Gama. No Superintendente Inacio Saldanha dos Santos transfere husi Komandu munisipiu Manatuto mai iha Komandu Jerál iha Gabinete Inspesaun Jerál.

Komandante Jerál PNTL Komisariu Polísia Faustino da Costa iha ninia intervensaun ba serimonia ne’e hateten mudansa ne’ebe maka halo basea Komandu nia nesesidade sei iha hela naha bo’ot ida ne’ebe Komandu hare’e atu oinsa atu koloka Superior sira ne’ebe iha.

“Ita hotu hatene katak dala-wain ita sempre koalia Instituisaun ida ne’e ninia emar sai exemplu, ita sai servidor, ita sai protector ba ita nia povu, ita nia komunidade; ita mós konsente katak seguransa responsabilidade ita hotu nian maibé prinsipal liu ba autoridade oinsa atu koordena, oinsa buka meius atu bele kria relasaun ida ho alta entidade no autoridade sira, tanba ne’e situasaun ida sai preukupasaun bo’ot iha tinan 2019 no ita bele muda iha tinan 2020”, tenik Komandante Jerál PNTL ne’e.

Ba ensposadu na’in rua, Komisariu Polísia ne’e deklara katak sira iha esperiensia ne’ebe naton hodi lidera Komandu munisipiu, tanba Superintendente Julia Gama antes ne’e lidera Komandu munisipiu Manufahi no ba Superintendente Damião da Silva Correia iha esperiensia tantu iha Unidade Patrullamentu Fronteira (UPF), Unidade Espesial Polísia (UEP), Komandu munisipiu Aileu no ohin assume fila fali responsabilidade hanesan Komandante iha munisipiu Manufahi.

Hafoin hala’o serimonia Tomada de Posse, Komandante Jeral hala’o kedas enkontru ho Ofisias Supeiror sira hodi koalia kona-ba servisu PNTL nian iha tinan 2020. Hola parte iha serimonia ne’ebe’e lidera husi Komandante Jerál ne’e maka Komandante Komandu PNTL munisipiu 12 inklui RAEOA, Komandante UPM, Komandante UEP, Segundu Komandante Interinu CFP no Xefe Departamentu sira iha Komandu Jeral.

Media PNTL.

Dili- Polisia Nasional Timor-Leste (PNTL) liu husi Unidade Servisu Investigasaun Kriminal (SIK) kaptura suspetu ho inisial CH ne’ebe maka simu pakote droga husi Nigeria mai Timor-Leste.

Sub Xefe Investigasaun Kriminal Nasional Inspetor Xefe Mouzinho Correia hateten iha loron 14 de Janeiru oras tuku:16:00 SIK hamutuk ho funsionariu Alfandega kargo Aeroportu Internasional Nicolao Lobato konsege prende pakote balu ne’ebe manda husi Nigeria mai Timor-Leste ne’ebe maka simu husi suspetu CH, Nai hato’o asuntu ne’e liu husi komferensia emprensa iha Kuartel Jeral PNTL Kaikoli Dili, Kinta (16/01).

Nia haktuirtan hafoin liu oras rua (2) SIK no Alfandega lori pakote ne’ebe suspeta hela mai eskritoriu SIK nasional, wainihra loke pakote ne’e iha laran hetan droga ho tipu sabu-sabu (Metam fetamin ) ho kuantidade 3.253 Kg.

Modus foun ne’ebe maka autor uza maka droga ne’e hatama iha kompresor Ac kareta nian no falun metin depois manda mai Timor-Leste no destinasaun final sei haruka ba Indonezia.

Suspetu CH servisu nudar resepsionista iha Hotel Timor-Plaza, no prosesu ba suspetu ne’e tuir lei ne’ebe maka vigora iha Timor-Leste, tanba kaptura ho flagrante delitu maka hafoin kompleta investigasaun oras 72 PNTL sei aprezenta ba Tribunal hodi submete ba julgamentu primeiru interogatoriu.

Enkuantu autor ne’ebe maka manda pakote ne’e husi Nigeria nia prosesu lao hela, ita fiar katak kazu ne’e iha relasaun ho kazu ne’ebe maka PNTL atende iha tinan kotuk pil eskasi 4684 Kg ne’ebe maka hetan iha Mota-Ain.

Iha tinan kotuk autor manda pakote ne’ebe hanesan maibe lahatene saida maka iha laran, pakote ne’e nia destinasaun ba Indonezia tanba nbe’e maka prosesu sei buka tuir nafatin liu husi koperasaun ho INTERPOL no POLRI iha Indonezia.

Relasiona ho akontesementu hahu iha tinan 2019 to’o ohin loron maka “Hau apela ba ita hotu liu-liu joven sira ne’ebe maka uza media sosial atu evita simu pakote ou kualker sasan husi ema deskonesidu tanba ita lahatene karik pakote ne’e kontein droga ruma;  ida ne’e sei prejudika ita boot sira tanba se ita la kuidadu ho sasan hirak ne’e maka ita nia ema inosente barak sei sai vitima ba autor krime sira”.

Antes termina sub Xefe investigasaun Kriminal ne’e informa katak iha ona evidensia barak hatudu katak Timor-Leste sai fatin tranzitu no destinasaun ba droga tanba autor sira hatene katak iha fator barak hanesan falta  ekipamentu atu detekta droga no menus rekursu humanus nomos fator seluk maka folin droga iha Timor-Leste karun liu kompara ho nasaun seluk grama ida (1) $200.00 to’o $350.00. Media PNTL

Dili, Prezidente Repúblika Demokratika Timor-Leste (PR-RDTL) Dr.Francisco Guterres Lu-Olo apresia servisu konjuntu ne’ebe maka Komandu Polísia Nasional Timor-Leste (PNTL) ho Forsa Falintil Defesa Timor-Leste (F-FDTL) hodi asegura seguransa ba komemorasaun loron bo’ot Natal 2019 no selebrasaun Tinan Foun 2020 iha teritoriu Timor laran tomak.

 Apresiasaun hirak ne’e PR hato’o ba Komandu PNTL liu husi Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes wainhira hala’o enkontru ba dahuluk iha tinan foun 2020 iha kinta-feira (16/01) ne’e iha Palasiu Prezedente Aitarak-Laran.

Hafoin enkontru ba jornalista sira, Komisariu Polísia Faustino da Costa relata katak iha sorumutu ne’e Komandu aprezenta ba PR kona-ba situasaun Natal, Tinan Foun no mós akontesimentu hirak ne’ebe maka akontese durante fulan ida nia laran.

“PR apresia PNTL ho F-FDTL nia servisu hamutuk ba Natal no Tinan Foun ne’ebe mantein seguransa hodi ema hotu bele festeja ho diak no PR husu nafatin ho akontesimentu sira ne’ebe iha membru PNTL halo nia servisu basea nafatin ba Lei no Ordem ne’ebe iha”, esplika Komandante Jerál PNTL ne’e.

Komisariu Polísia afirma tan katak durante periode Natal hahu’u husi loron 1 to’o loron 31 fulan Dezembru 2019 PNTL rezista akontesimentu hamutuk 449 kazu ne’ebe mai husi ema lanu, halo asaltu ba malu. Fatór ne’ebe mak kontribui hodi rezulta ema lanu barak tanba livre atu asesu ba tua sabu ne’ebe maka faan iha fatin hotu no ho folin ne’ebe baratu.

Iha biban ne’e, Komisariu Polísia Faustino da Costa hato’o mós mensagem badak ba komunidade hotu relasiona ho Timor oan balun iha loron hirak liu ba hetan kapturasaun husi autoridade seguransa tanba lori Droga tama mai Timor-Leste. Ba ida ne’e, Komandante Jerál apela: “Ba sidadaun Timor oan hotu karik sasan balun ita bo’ot sira koñese liu husi Media Sosial husi nasaun ne’ebe deit, haruka sasan ruma ba ita bo’ot sira, husu atu evita sasan hirak ne’e labele ba foti no simu deit, tanba ida ne’e maka akontese ba ita nia sidadaun Timor oan balun ne’ebe maka iha loron hirak liu ba ami kaptura”.

Media PNTL.

Dili- Governu Ofisialmente halo lansamentu fatuk da-huluk ba konstrusaun edifisiu Kuartel Jeral Polisia Nasional Timor-Leste (PNTL) atu nune’e PNTL iha infraestrutura ne’ebe diak hodi bele halao knar lor-loron nian.

Ministru Defeza no Interior Interinu Filomeno Paixão hateten edifisiu foun ne’e inportante ba PNTL sira bele hetan instalasaun no ambiente ne’ebe maka diak liu ba servisu hodi nune’e PNTL bele halao servisu ho diak tanba PNTL halao servisu durante oras 24 hodi asegura seguransa  rai laran tanba ne’e maka Governu da-VI to’o mai governu da-VIII kaer nafatin politika kontinuidade hakarak fo apoiu ba PNTL hodi halo lalais konstrusaun edifisiu ida ne’e, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Sexta (10/01)

Nia haktuirtan konstrusaun edifisiu ne’e ho montante orsamentu hamutuk $10, 177,638.20 ne’ebe responsabilija husi kompania Shanghai Construction Group Co Ltd ho durasaun tempu tinan rua (2020-2022) no hein katak ita iha buat diak ida tanba ne’e maka ohin hau bolu atensaun Polisia sira katak governu tau aternsaun ba PNTL hodi foti povu nia osan ne’e halo imi nia uma halo diak tanba ne’e imi mos tenke atensaun atu halo servisu diak liutan.

Entretantu Komandante Jeral PNTL Komisariu Faustino da Costa hateten konstrusaun edifisiu Kuartel Jeral PNTL nudar projetu boot ida ne’ebe estadu no governu prepara ba instituisaun ida ne’e dala uluk iha PNTL ne’ebe mai ho intensaun ida ba bem estar ne’ebe faz parte ba kondisaun ifraestrutura atu membru sira halao sira nia knaar ho diak no responsabilidade.

Nia haktuirtan edifisiu ne’ebe ohin lansa sei sai fatin atu nune’e membru PNTL halao knaar ho responsabilidade tuir planu ne’ebe governu no estadu prepara antes tinan 2030.

Tuir planu estratejiku dezenvolvimentu nasional  2011-2030 defini katak bainhira to’o 2030 PNTL nudar instituisaun estadu ida ne’ebe kredibel no konfiabel ho ninia ekipamentu ne’ebe adekuadu, abansadu no modernu.

Konstrusaun edifisiu PNTL ne’e kompostu husi lobby, garajen kareta no motor, sala hodi halao servisu, salaun komferensia, fatin ba treinamentu, fatin ezersisiu (gym) no seluktan.

Istoria badak preparasaun ba konstrusaun

Planu ne’e hahu kedan iha tinan 2014 momentu Dr. Longuinhos Monteiro maka hanesan Komandante Jeral PNTL ne’ebe maka fo orentasaun ba Komandu Administrasaun Dirasaun Nasional Administrasaun no Planeamentu oinsa atu bele inisia prosesu ruma ba konstrusaun Kuartel Jeral PNTL.

Iha tinan 2017 Ministru Defeza no Seguransa Sr. Agustinho Sequera Xomoco atual deputadu Komisaun B asina kontratu ho kompania Shanghai Construction Group hodi ejekuta prosesu refere bazeia ba  prosesu ne’ebe halao husi CNA, ADN no MPS, iha loron 5 fulan Marsu tinan 2019 notifikasaun husi Ministeriu Justisa ba familia hitu (7) ne’ebe simu ona kompesasaun no indimizasaun husi governu hodi hamamuk fatin ne’ebe to’o ohin loron maske sei ejisti infrastrutura maibe laiha atividade ne’ebe halao iha fatin ne’ebe sei halao kontrusaun.

Maibe maske simu ona notifikasaun maibe iha Xefe familia hamutuk 10 maka seidauk husik mamuk fatin ne’e tanba sei ejiji oinsa atu hetan indimijasaun ne’ebe merese husi governu.

Serimonia lansamentu ne’e hahu ho serimonia kultural tuir lisan Lakoto ne’ebe maka partense ba rai Dili hodi hamulak no husu lisensa ba rai nain atu fo matak malirin ba PNTL.

Serimonia ne’e partisipa husi Sekretariu Estadu Terras Propriedade, Reprejentante Komisaun B Parlamentu Nasional Cornelio Gama “L-7”, Embaxador Republika Popular Cina iha Timor-Leste, Diretor kompania Shanghai Construction, Diretor Jeral Servisu Migrasaun, Komandante TLPDP, Komandante PNTL munisipiu 12 no RAEOA, Komandante UEP, UPF no UPM, Xefe suku Kaikoli, lia nain Lisan Lakoto Rumbia Kaikoli nomos kombidadu sira. Media PNTL

Dili, Komandu Polísia Nasional Timor-Leste (PNTL) hamutuk ho Komandu Forsa FALINTIL Defesa Timor-Leste (F-FDTL) iha loron segunda-feira dahuluk fulan Janeiru tinan 2020 (06/01) realiza enkontru ida ho objetivu atu halo avaliasaun ba servisu ne’ebe maka Komandu rua ne’e hala’o ona durante tinan 2019.

Ministru Defesa no Ministru Interior Interinu Filomeno Paixão ba jornalista sira hateten enkontru ne’e insiativa husi Komandu rua (PNTL no F-FDTL) ho hau nia kolaborasaun, apoiu tomak tanba tinan-tinan ita koalia bebeik Natal hamutuk, entaun tinan ida ne’e ita hola forma ida seluk no konteudu mós oin seluk oituan, forma ne’e maka Ofisias Superior sira mai hotu iha ne’e ita tur hamutuk koalia.

“Avaliasaun total ba seguransa nasaun nian, avaliasaun ita rona hotu husi parte PNTL no F-FDTL, no husi parte hau nian sei fó resumu ida ba avaliasaun rua ne’e no sei hare’e medidas konkretas saida maka sei foti iha tinan 2020”, esplika Ministru Defesa no Ministru Interior Interinu ne’e.

Tuir Filomeno Paixão haktuir iha 2019 mezmu iha problema oituan maibé PNTL konsege kontrola no atúa antepadamente, tanba ne’e ita atu hare’e no hadia diak liu tan servisu ne’ebe ita halo ba komunidade, atu Forsa rua ne’e bele kontribui diak liu intergradamente ba iha seguransa Nasional.

Iha fatin hanesan, Xefe Estadu Maior Jeneral FALINTIL Forsa Defesa Timor-Leste (F-FDTL) Major Jeneral Lere Anan Timur hateten hanesan ema humanu ne’ebe maka la perfeitu no sempre iha defisiensia maibé ita ema moris mai ne’e laos mai deit ho defisiensia no derota, ita moris mai ne’e derota mós iha vitoria mós iha.

“Tanba ne’e maka ohin PNTL ho F-FDTL liu-liu Ofisias sira hamutuk no Ministru Defesa, ami hare’e no halo reflesaun oituan kona-ba balansu oituan, desenvolvimentu aktividades iha tinan 2019 nia laran no tama ona ba iha tinan 2020, sempre iha 2019 laos hotu-hotu lao diak maibé sala mós iha, diak mós iha no ida ne’ebe maka sala ita buka despede ho tinan tuan, ita tama ba tinan foun ho buat foun”, tenik Xefe Estadu Maior Jeneral F-FDTL ne’e.

Major Jeneral Lere Anan Timur apela mós iha enkontru Avaliasaun ne’e ba Ofisias sira hotu katak primeiru ita tenke muda ita nia mentalidade, ita nia karakter atu sai lutu ba nasaun lolos, liu-liu kona-ba arte marsias, koalia kona-ba deslokasaun ba Indonesia no hau fó ordem ba Ofisias sira atu kontrola ninia membru sira.

Entretantu, Komandante Jerál PNTL Komisariu Polísia Faustino da Costa iha ninia entrevista heteten enkontru ne’e nu’udar avaliasaun servisu ba tinan 2019 no oinsa atu hadia diak liu tan iha tinan 2020 tanba ne’e maka ohin ita envolve Ofisias Subalternu, Kapitais, Ofisias Superiores no mós parte Polísia ho F-FDTL.

Hola parte iha enkontru avaliasaun ne’ebe hala’o iha Salaun Enkontru Ministeriu Finansas Aitaral-Laran ne’e maka Ministru Defesa no Ministru Interior Interinu, Sekretariu Estadu Pretesaun Sivil, Xefe Estadu Maior Jeneral F-FDTL, Komandante Jerál PNTL, Estrutura Komandu F-FDTL no PNTL, Ofisias Subalternu, Kapitais, Ofisias Superiores F-FDTL no PNTL.

Media PNTL.