Uncategorized

Dili, Loron 04 fulan Novembru nu’udar loron segunda-feira dahuluk, Komandu Polísia Nasional Timor-Leste (PNTL) hala’o serimonia Isar Bandeira ne’ebe maka dirige husi Ministru Interior Interinu aktual Ministru Defeza Brig. Gen (Ref) Filomeno Paixão.

Iha ninia diskursu ba serimonia Isar Bandeira ne’ebe hala’o iha resintu Kuartél Jerál, Filomeno Paixão hato’o parabéns ba Komandu PNTL, ba esforsu ne’ebe halo durante fulan ida nia laran, kalan loron durante oras 24 hodi estabelese ordem iha sidade Dili.

“Hafoin tempu ida ne’e ita nota katak kriminalidade haburas fali iha distritu, ne’e hatudu katak grupu kriminozu eziste ona iha Timor-Leste, infelizmente! Grupu kriminozu organizadu no violentu, la violentu maka sira ne’ebe ataka husi Facebook, ataka husi Media maibé kaundu ataka fizikamente, ne’e grupu violentu, kriminozu violentu tantu ida ne’e maka realidade maka ita enfrenta, hanesan dezafiu ba PNTL no dezafiu ba ita hotu”, tenik Ministru Interior Interinu ne’e.

Aktual Ministru Defeza ne’e afirma tan katak ita labele ema ida hein uma ida, muito menus ema ida hein ema ida, hafoin tempu tinan ida ita hamutuk, ita to’o konkluzasaun katak krime mosu iha Timor-Leste laos PNTL maka sala, iha faktores vertentes barak maka halo krime sira ne’e mosu.

“Vertentes sosio-kultural, vertentes edukasional, vertentes ekonomiku no media rasik ajuda hodi krime haburas iha ita nia rai, hafoin ita iha tiha nasaun ida, patria ida, ita iha Konstituisaun, ita labele admite ida ne’e tenke redobra ita nia esforsu iha vizilansia, iha antisipasaun, iha prevensaun; diretiva operasional ne’ebe tun ba iha baze diak tebes-tebes, ajuda!”, hatutan Ministru ne’e.

Situasaun Seguransa Durante Finadu Lao Normal

Relasiona ho selebrasaun loron finadu ne’ebe foin liu dadaun ne’e, Komandante Jerál PNTL Komisariu Polísia Faustino da Costa hateten em prinsipiu katak laos laiha liu, sempre iha akontesimentu maibé situasaun bele dehan sei kalma, hakmatek no kontrolu.

“Iha akontesimentu balun ne’ebe durante ne’e sai preukupasaun katak iha kapital Dili mak akontesimentu mosu barak liu mais ita konsege resolve maibé buat ne’e hadaet fali ba munisipiu, iha akontesimentu ida iha Leolima-Balibo uma lima maka hetan sunu ne’ebe mosu entre membru eis arte-marsias, iha fali mós munisipiu Baucau parte Quelikai ninian iha ne’ebe xefe suku nia motor ema balun lori halai tiha no iha uma rua ne’ebe hetan sunu inklui uma lulik ida ne’ebe maka iha, ema balun ita kaer lori ba prosesu, maibé iha Dili laran ita bele dehan katak lao normal”, esplika autoridade seguransa ne’e.

Komisariu Polísia Faustino afirma tan katak aktividade cek point/ pasa revista nafatin halo, konsege foti rama ambon, ita foti katana laos iha Dili deit, iha Liquiça mós iha, iha Manufahi mós iha akontesimentu balun maka mosu. Suspeitu sira ligadu ba kazu hirak ne’e, halo prosesu lori ba Ministeriu Públiku no ida ne’ebe kaer iha Baucau, balun ita kaer iha Dili ne’e ita halo identifikasaun durante oras 12 liu-liu iha akontesimentu parte Bekusi ninian.

Media PNTL.   

Bobonaro, Komandu Polísia Nasional Timor-Leste (PNTL) liu husi Komandu Munisipiu Bobonaro iha loron 30 fulan Outubru tinan 2019 hala’o serimonia tomada de posse ba membrus Konsellu Polisiamentu Komunitariu (KPK) ba suku hamutuk 18 ho total membru KPK 54 iha postu administrativu Bobonaro.

Komandante PNTL munisipiu Bobonaro Superintendente Xefe Ocatvio de Araújo Bucar ne’ebe reprezenta Komandante Jerál iha ninia diskursu hateten serimonia ne’e hanesan serimonia ba daruak ne’ebe dahuluk nian hala’o ona ba postu administrativu lima no ida ne’ebe hala’o iha Bobonaro ne’e ba dala neen no iha tempu badak sei halo formasaun ba membru KPK iha postu administrativu Lolotoe ne’ebe kompostu husi suku 7.

“Ohin halo ona komprimisiu iha Bandeira Nasional ne’ebe sosa ho ema barak nia ran ho ruin no barak amk mate, tanba ne’e munisipiu Bobonaro sai hanesan odamatan ne’ebe maka ninia terestre baliza ho rai vizinhu”, tenik Komandante PNTL munisipiu Bobonaro ne’e.

Superintendente Xefe ne’e husu ba enposadu sira atu bele servisu hamutuk ho polísia hodi garante paz no estabilidade iha munisipiu Bobonaro tanba Estatistika ne’ebe iha hatudu katak Ofensas Korporais ka  Ofensa ba integridade fizika hanesan baku malu no tuda malu mak hatudu númeru bo’ot liu no tuir fali maka kontra bandu.

Entretantu, reprezentante Presidente Autoridade Munisipal iha ninia intervensaun koalia ba membru sira ne’ebe maka simu posse atu bele mantein kna’ar no responsabilidade ne’ebe fó hanesan mata-dalan, kondisaun no situasaun ne’e fila fali mai ita idak-idak atu bele hakbesik ba joventude hodi bele halo mudansa ba ida-idak nia suku.

“Hau fiar katak ho presensa KPK foun sira ne’ebe ohin simu tomada de posse ne’e, katak sei iha mudansa diak ida ba postu administrativu Bobonaro no husu ba xefe suku sira atu bele mantein estabilidade no paz iha munisipiu Bobonaro tanba tuir planu ne’ebe iha serimonia 28 Novembru tinan ne’e munisipiu Bobonaro nian sei hala’o iha postu administrativu Bobonaro”, relata reprezentante Presidente Autoridade Munisipal.

Partisipa iha serimonia ne’e, Komandu PNTL munisipiu Bobonaro, ekipa Departamentu Polisiamentu Komunitaria Nasional, parseiru The Asia Foundation, Administrador, Veteranu no komunidade sira iha postu administrativu Bobonaro. Media PNTL.

Belu-Atambu, Komandu Polísia Nasional Timor-Leste (PNTL) iha loron 29 fulan Outubru tinan ne’e hala’o enkontru bilateral ho autoridade husi Badan Narkotika Nasional Repúblika Indonesia (BNN-RI) hodi diskuti kooperasaun servisu entre parte rua nian iha futuru.

Segundu Komandante Jerál PNTL ne’ebe reprezenta Komandu PNTL Komisariu Polísia Mateus Fernandes hato’o agradesimentu ba autoridade BNN Indonesia tanba bele realiza enkontru bilateral hodi bele kombate kazu droga entre nasaun Timor-Leste ho Indonesia iha futuru. Iha biban sorumutu ne’e, Komisariu Polísia Mateus mós husu ba parte BNN atu bele kapasita nafatin membru PNTL sira iha area Droga atu sira bele hala’o servisu diak liu tan iha tempu oin mai. Aktual Segundu Komandante Jerál ne’e koalia tan katak populasaun iha Timor ho Atambua sira laos ema seluk, sira inan aman ida deit, sira nia kultura ida deit, tanba ne’e ho realizasaun enkontru ne’e bele haburas liu tan amizade povu nasaun rua ne’ebe moris iha liña fronteira.

Iha parte seluk, autoridade BNN RI deklara katak parte BNN pronto apoiu nafatin PNTL iha area kapasitasaun no mós IT nian hodi fasilita membru ne’ebe servisu iha area Droga. Nune’e mós iha fulan Novembru tinan ne’e, parte BNN sei konvida membru PNTL na’in rua hodi partisipa formasaun iha area Narkotika Interdiksion iha Lido-Bogor Indonesia. Autoridade BNN mós hateten, Memorandum de Entendimentu entre PNTL ho BNN importante hodi hametin relasaun entermu kapasitasaun no servisu hamutuk ka hodi troka informasaun iha futuru.

Media PNTL.

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa iha tersa-feira (29/10) simu vizita servisu husi Prezidente União Nasional dos Escuteiros de Timor-Leste (UNE-TL)  Idelta Maria Rodrigues iha gabinete Komandante Jerál.

Komisariu Polísia Faustino da Costa hafoin enkontru ba jornalista sira hateten agradese ba enkontru ne’ebe halo hafoin parte Komandu PNTL simu karta ida Prezidente UNE-TL ninian katak presiza atu fahe informasaun balun ba polísia no mós karik ba oin oinsa maka PNTL ninia aktividade ou eventu bele iha suporta mós ba UNE-TL.

“Ne’ebe ohin ami rua Prezidente koalia asuntu informasaun barak, en prinsipiu atu dehan katak ita presiza sensibiliza liu tan tanba maioria iha Timor ema barak maka sei entende katak União Escuteiros Timor-Leste nian hanoin ne’e halai liu ba Escuteiros Katóliku Timor-Leste ne’ebe maka tuir lolos ne’e ninia kobre ba buat hotu”, esplika Komisariu Polísia ne’e.

Komandante Jerál PNTl ne’e afirma liu tan katak parte segundu ne’ebe maka diskuti iha enkontru ne’e maka ba oin maka oinsa atu hare’e servisu hamutuk iha area balun liu-liu hanesan ita hotu hatene katak PNTL ne’e mai ho ninia filosofia Polisiamentu Proximidade, Polísia Komunitaria ne’ebe maka agora dadaun hanesan ita hotu akompaña katak PNTL eziste estrutura kona-ba Polísia Proximidade hahu’u kedas husi suku, Konsellu Polisiamentu Komunitariu (KPK) ne’ebe maka laos PNTL mesak deit maibé lider komunitariu, reprezentante feto, juventude iha ne’eba até-que munisipiu Konsellu Seguransa Munisipal (KSM).

“Entaun iha hanoin ida katak karik iha futuru ne’e ita hare’e para bele koloka mós UNE-TL tama iha parte KSM no mós KPK ne’e rasik, alén-de area sira seluk ne’ebe sei hare’e no sei halo diskusaun ba area ne’ebe espesifiku balun ne’ebe importante”, afirma autoridade másimu PNTL ne’e.

Entretantu, Prezidente União Nasional dos Escuteiros de Timor-Leste (UNE-TL) Idelta Maria Rodrigues hateten ninia parte sente onra bo’ot ida atu bele mai halo sorumutu ho Komandante Jerál PNTL nian atu informa kona-ba movimentu Eskutismu iha Timor-Leste, hato’o mós progresu no saida maka ita bele halo hamutuk.

“No hau hanoin katak ami iha aseitasaun ida ba futuru atu bele asina akordu ida entre Komandu Jerál PNTL ho UNE-TL iha tempu badak nia laran, iha diskusaun balun ne’ebe maka ami halo kona-ba formasaun ba karakter foin-sae sira nian no hau hanoin oinsa maka juventude bele halo servisu, haklekar liu tan informasaun ba joven foin-sae sira tanba ita preukupa los ho ita nia problema barak ne’ebe akontese iha Timor no hau hanoin katak konflitu ne’ebe mosu ne’e laos PNTL nian responsabilidade mesak, laos governu nian responsabilidade mesak maibé nu’udar Prezidente UNE-TL ne’ebe mós hamahan ann ba joven foin-sae sira no dirigente hirak ne’ebe maka hola parte iha movimentu Eskutismu iha União Nasional dos Escuteiros de Timor-Leste presiza atu koopera hamutuk atu buka dalan, meius oin-oin atu nune’e bele responde ba problema ne’ebe maka Estadu hasoru, hau hanoin katak ita hotu iha obrigasaun nu’udar sidadaun atu bele fó nafatin ita nia kontribuisaun hodi bele resolve problema ne’ebe sai naruk no nunka kotu”, informa Idelta Maria Rodrigues.

Media PNTL.                        

KOMUNIKADU IMPRENSA

Tuir akordu kooperasaun ne’ebe eziste entre Timor-Leste ho Portugal, ofisias Seuperior PNTL na’in rua Superintendente Arnaldo Araújo no Superintendente Lino Saldanha partisipa 2.º Seminário ba Ofisias Superiores CPLP nian, iha Guarda Nacional Republicana (GNR) iha loron 9 to’o loron 23 Outubru tinan ne’e ne’ebe maka envolve ofisias superiores oin-oin husi países CPLP.

eminario ne’e hala’o iha sidade Queluz, eskola ida Guarda nian ne’ebe aktividade sira kompustu husi prátika grupu desenvolvimentu nian, tantu iha organizasaun funsionariu ne’ebe ho nia karakter ka iha grupu planu nian iha parte oin-oin, atu halo aktualizasaun ba informasaun no proposiona atu hato’o ho livremente iha ambiente ne’ebe fó benefisiu atu troka esperiensia no prepara planu ne’ebe intergradu durante loron 13 nia laran ho durasaun oras 76.

Problema no prinsipiu sira ne’ebe komum ba forsa seguransa nasaun CPLP nian diskuti durante seminariu ne’e, husi ne’ebe ami bele salienta, no seluk tan: papel no programa polisiamentu komunitariu no proximidade iha âmbitu aktividade polisial ninian; prinsipiu sira ne’ebe regula aktividade servisu Forsa Seguransa; Regime Jurídiku ba Direitus Umanus; dezafiu prinsipal ba prosesu hodi foti dezisaun; prosesu no planu; prosesu manajamentu rekursu umanu; importansia servisu hamutuk no  halo kooperasaun entre polísia internasional sira no ikus mai, jestaun estratéjika.

Sesaun sira iha seminariu ne’e hala’o ho lian português, no ofisias superior PNTL na’in rua ne’e partisipa iha aula, exersisiu, debate, servisu grupu, hala’o estudu ba simulasaun, ho objetivu atu haklean kompetensia no koñesimentu tekniku ne’ebe presiza iha kargu no ba exersisiu funsaun iha area Komandu, Diresaun ka Xefia no Estadu Maior.

Media PNTL.

Dili, Polísia Nasional Timor-Leste (PNTL) liu husi seksaun Servisu Investigasaun Kriminal Nasional (PNSIK) sexta semana kotuk (25/10) hala’o destruisaun ba material Droga ho tipu Kokaína kilograma rua ho balun iha sentru prosesamentu lixu Tibar postu administrativu Bazartete munisipiu Liquica.

Sub-Xefe Interino SIKN Inspector Xefe Mouzinho Tavares Correia iha ninia entrevista hateten aktividade destruisaun ne’e halo basea ba Despasu Tribunal Distrital Dili (TDD) no objetu hirak ne’e SIKN prende iha tinan 2012.

“Droga ida ne’e ho tipu Kokaína ne’ebe ita hotu hatene katak Kokaína ne’e mai husi rai Amerika Latin (Colombia) ho kuantidade kilograma rua ho balun, ida ne’e iha ita nia istoria foin dala ida ita hetan Kokaína iha kuantidade bo’ot, durante ne’e ita hetan maka droga ho tipu Sabu-sabu, Eroi, Ekstasi maibé Kokaína ne’e ho kuantidade bo’ot ne’e foin ita hetan iha tinan 2012 ne’e”, esplika Sub-Xefe Interino SIKN ne’e.

Inspector Xefe ne’e salienta tan katak relasiona ho kazu ida ne’e sidadaun Indonezia na’in rua, feto ida no mane ida ho inisial EP no HH iha ona prizaun maibé sira sai ona iha tinan hirak liu depende ba desizaun husi Tribunal iha altura ne’eba na’in rua mak tama iha prizaun preventiva. Droga ne’e tama husi Aeroportu Internasional Prezidente Nicolau Lobato husi Denpasar-Indonezia.

Objetu ho evidensia sira ne’e, hatama mai ho modus opranding, hatama iha kopu laran no falun ho jornal inklui balun falun ho surat tahan aluminium.

Media PNTL.

Dili- Komandante Komandu Polisia Nasional Timor-Leste munisipiu Dili apela ba joventude sira atu kontribui ba paz no estabilidade nune’e povu bele halao ida-idak nia knar ho seguru.

Superintendente Xefe Armando Monteiro hateten Hau lori estrutura Komandu PNTL munisipiu Dili apela ba joventude no foin sae sira ne’ebe nudar futuru ba nasaun Timor-Leste nian imi nia kontribuisaun no partisipasaun ba estabilidade seguransa  iha munisipiu Dili inportante hodi asegura seguransa tanba munisipiu Dili nudar kapital nasaun, Nia hato’o asuntu ne’e ba Jornalista sira iha Komandu PNTL munisipiu Dili, Kuarta (24/10).

 Nia haktuirtan imi desidi no define imi nia aan saida maka imi halo oinsa atu bele partisipa no kontribui ba dezenvolvimentu husi aspetu oi-oin ne’ebe maka iha no oinsa akumula imi nia abilidade kapasidade no talentu ne’ebe maka iha hodi hatudu ba publiku duke imi halo problema ne’ebe sei lori konsekuensia ba imi hasoru prosesu justisa.

“ Hapara ona konflitu ne’ebe maka durante ne’e imi halo iha kapital Dili nune’e halo inan aman  no komunidade sira loron kalan la hakmatek tanba deit joventude komesa lakon fiar aan, lakon identidade, lakon espiritu nasionalismu entre juventude ho juventude,” dehan Komandante Monteiro.

Fulan oin tama ona Novembru fulan istoriku ba prosesu joventude nia luta, liu husi imi nia partisipasaun no kontribuisaun ba prosesu seguransa no estabilidade iha sidade Dili inportante hodi nune’e atividade governante sira bele inplementa no lao diak tuir planu ne’ebe maka iha.

Joventude nia kontribuisaun no partisipasaun luta iha tempu pasadu inportante  tanba ne’e maka ita ne’ebe agora dadauk hatutan no kontinua tenke respeitu no tane aas valores prosesu luta ida ne’e hodi nune’e bele halo netik buat diak ida ba ita nia aan, ita nia familia no ita nia futuru nasaun no povu ida ne’e ninia progresu.

Relasiona ho loron finadu ne’ebe besik ona Komandante Jeral hasai ona diretiva ba Komandu munisipiu hotu no Komandu munisipiu Dili inplementa ona tatika to’o iha natal no tinan foun hodi asegura seguransa.

Atu kontrola movimentu transporte publiku hanesan bis ne’ebe tula pasajeru liu kapasidade kareta nian maka Komandu PNTL munisipiu Dili servisu hamutuk ho lina ministerial hamutuk 16 hodi halo lebantamentu dadus iha Hera tuir programa governu nian katak lakleurtan sei estabelese terminal ba transporte publiku ba diresaun leste nune’e bele kontrola movimentu transporte Publiku diresaun Viqueque, Lospalos no Baucau nune’e bele minimija engarafamentu iha kapital Dili. Media PNTL

Dili- Komandu Polisia Nasional Timor-Leste (PNTL) munisipiu Dili fo formasaun ba membru Konselu Polisiamentu Komunitaria (KPK) konaba oinsa prevene komflitu no rezolve problema ne’ebe akontese iha suku laran.

Komandante PNTL munisipiu Dili Superintendente Xefe Armando Monteiro hateten membru KPK iha suku 12 iha munisipiu Dili maka seidauk  tuir formasaun ho nune’e ami desidi hodi hahu fo formasaun ba estrutura KPK iha suku tolu hanesan Vila-Verde, Motael no Kolmera no sei kontinua ba suku sia (9), finalidade husi formasaun ida ne’e maka halo tomada de posse dala ida, Nia hato’o asuntu ne’e ba Jornalista sira iha Komandu PNTL munisipiu Dili, Kuarta (23/10).

Nia haktuirtan ita halo esforsu tomak tuir planu estratejiku governu da-VIII ne’ebe maka fo prioridade ba proximidade no vizivilidade ne’ebe agora ita kontinua formasaun ba estrutura KPK nomos Seguransa Rodaviariu ne’ebe maka ita foka liu ba kontrolu no movimentu iha Estrada publiku liu husi servisu hamutuk ho Diresaun Nasional Transporte Terestre (DNTT) no Unidade Tranzitu Seguransa Rodoviariu iha Komandu PNTL oinsa hare movimentu rodaviariu iha Dili.

Lei poder lokal fo kompetensia ba autoridade lokal maske dalaruma ema prekupa tanba sira lahatene kompetensia lei seguransa komunitaria atu halo vizilansia, monitoria  no observa atividade ruma ne’ebe viola lei iha sira nia suku no bairu, nudar autoridade lokal no komunidade mos iha kbiit no kompetensia atu impede no prevene aktus krime ne’ebe maka lao iha sira nia bairu, aldeia no suku.

Iha okajiuan ne’e Xefe Departamentu Polisiamentu Komunitaria Nasional Inspetor Xefe Helena da Dores hateten ohin ita hamutuk iha ne’e oinsa atu asegura trankulidade no paz iha rai laran liu-liu iha Dili nudar kapital nasaun ne’ebe maka sempre mosu disturbiu no polemika barak liu-liu komflitu entre juventude nomos munisipiu 11 no RAEOA ne’e ho karakteristika no hahalok ne’ebe diferente.

Nia hatutan Komandu PNTL iha planu atu halo inklina aan no hakbesik ba komunidade hodi kria Ofisial Polisia Suku (OPS) hodi nune’e bele servisu hamutuk iha suku atu halo prevensaun ba problema ne’ebe maka akontese iha suku maka estabelese ona iha suku 272 iha teritoriu Timor-Leste.

Formasaun durante loron tolu (3) 23-25 ne’e sei foka liu konaba prevensaun komflitu, rezolve problema, oinsa identifika problema no refere kazu krime ne’ebe halai liu ba krime publiku.

 Abertura Formasaun ne’e ho prezensa husi parseru Fundasaun Azia no partisipa husi Ofisial Polisia Suku (OPS), Membru KPK suku Vila-Verde, Kolmera no Motael hamutuk nain 70 resin nomos Xefe suku sira. Media PNTL

Dili- iha loron segunda-feira, 21 outubru 2019, Xefe Departamentu Polisia Komunitária Nasionál (DPKN), Inspetór Xefe Polisia, Sra. Helena Dores konvoka enkontru ho Diretór Diresaun Nasional Prevensaun Konflitu Komunitária (DNPKK), Sr. António Viegas ho motivu atu buka solusaun ba kazu konfrontasaun iha Beto, suku Madoi.

Iha enkontru Diretór DNPKK, Sr. Antonio Viegas hateten parte DNPKK prontu serbisu hamutuk ho ekipa Polisia Komunitária atu enkontru ho komunidade no juventude sira iha Beto, suku Madoi hodi buka solusaun ba kazu konfrontasaun akontese iha suku refere.

Iha okaziaun ne’e, Xefe Departamentu Polisia Komunitária Nasionál (DPKN), Inspetór Xefe Polisia, Sra. Helena Dores heteten enkontru parte ida atu serbisu hamutuk hodi buka solusaun ba problema akontese iha Beto.

“Ha’u simu orientasaun hosi Komandante Jerál PNTL no Komandante Operasaun hakarak organiza eventu ida iha Beto nian, oinsa atu buka rezolve problema, tanba akontese problema rezulta uma rahun no autór sira saidauk kaer, ita la hatene abut problema ne’e saida. Ita-nia la’o hamutuk ba ne’e la’os atu halo buat, maibé halo uluk sensibilizasaun lai iha fatin refere, hafoin ita identifika abut problema tanba saida mak akontese problema, nune’e mak ita forma fali ekipa kiik ida hodi ba rezolve problema sira ne’e”, esplika Inspetór Xefe Polisia, Sra. Helena.

Entretantu, tuir planu ekipa DNPKK no Polisia Komunitária sei hala’o enkontru ho komunidade no juventude Beto, iha loron kinta feira 23 outubru 2019 atu buka dalan no solusaun ba problema refere. *InfoDNPKK*

Dili, Komandu Polísia Nasional Timor-Leste (PNTL) liu husi ekipa konjunta Operasaun Koordenada ne’ebe kompostu husi Unidade Patrullamentu Fronteira (UPF), Polísia Militar (PM-F-FDTL) no diresaun Alfândega (Ministeriu Finansas) iha loron kinta-feira (17/10) hala’o pasa revista no resultadu hetan sasan husi eis Organizasaun Persaudaraan Setia Hati Teratae (PSHT).

Porta Voz Komandu PNTL Superintendente Xefe Pedro Belo iha loron sexta-feira (18/10) ne’e liu husi Konferensia Imprensa deklara katak iha loron kinta-feira (17/10) iha oras 14:30 otl ekipa konjunta Operasaun Koordenada deskonfia paket foun ne’ebe tama iha area Alfândega fatin halo pasa revista tanba sasan/paket ne’e deskonfia entaun UPF ho PM haruka sobu no hetan kartaun identidade no mós fardamentu eis Organizasaun PSHT.

“Paket ne’ebe tama liu husi travel Paradise ne’e laiha identidade ou ema ne’ebe atu simu la klaru, hakerek deit númeru no naran inisial no mós ema ne’ebe haruka naran laiha, evidensia sira ne’ebe maka ekipa koordenada prende maka hanesan fardamentu hamutuk 53, kaos 23, sintu ki’ik no bo’ot, hare’e mós ba kartaun identidade ne’ebe maka hetan hamutuk 29 maibé kartaun ida ne’e hatudu momos katak eis Organizasaun PSHT iha ligasaun metin ho Indonesia tanba uza sigla bandeira Merah Putih”, esplika Superintedente Xefe ne’e.

Aktual Komandante Operasaun ne’e subliña tan tanba ne’e módus sira ne’ebe oras ne’e dadaun  sira uza, módus ida ne’ebe krime organizadu nian tanba ita hotu akompaña no hatene katak iha krime organizadu ida ne’ebe oras ne’e dadaun liu-liu droga ne’ebe maka lori paket/sasan ba iha rai ne’ebe deit, sira la uza naran no sira nia hela fatin.

“Oras ne’e dadaun ita hotu hatene katak eis Organizasaun sira ne’ebe maka Estadu taka ona maibé sira uza módus sira ne’ebe hanesan droga, tanba ne’e lori naran Komandu Jerál husu ba Komunidade hotu tenke tau atensaun maka’as ba grupu organizadu sira ne’e tanba grupu hirak ne’e bele estraga estabilidade nasional no tanba sira iha ligasaun ho parte Indonesia ninian tanba sira uza bandeira Merah Putih atu akompaña no mós oras ne’e dadaun sira halo ona rede iha Timor laran tomak”, hakotu eis Komandante Komandu Munisipiu Dili ne’e.

Media PNTL.