Uncategorized

Dili- Komandu Polisia Nasional Timor-Leste (PNTL) munisipiu Dili fo formasaun ba membru Konselu Polisiamentu Komunitaria (KPK) konaba oinsa prevene komflitu no rezolve problema ne’ebe akontese iha suku laran.

Komandante PNTL munisipiu Dili Superintendente Xefe Armando Monteiro hateten membru KPK iha suku 12 iha munisipiu Dili maka seidauk  tuir formasaun ho nune’e ami desidi hodi hahu fo formasaun ba estrutura KPK iha suku tolu hanesan Vila-Verde, Motael no Kolmera no sei kontinua ba suku sia (9), finalidade husi formasaun ida ne’e maka halo tomada de posse dala ida, Nia hato’o asuntu ne’e ba Jornalista sira iha Komandu PNTL munisipiu Dili, Kuarta (23/10).

Nia haktuirtan ita halo esforsu tomak tuir planu estratejiku governu da-VIII ne’ebe maka fo prioridade ba proximidade no vizivilidade ne’ebe agora ita kontinua formasaun ba estrutura KPK nomos Seguransa Rodaviariu ne’ebe maka ita foka liu ba kontrolu no movimentu iha Estrada publiku liu husi servisu hamutuk ho Diresaun Nasional Transporte Terestre (DNTT) no Unidade Tranzitu Seguransa Rodoviariu iha Komandu PNTL oinsa hare movimentu rodaviariu iha Dili.

Lei poder lokal fo kompetensia ba autoridade lokal maske dalaruma ema prekupa tanba sira lahatene kompetensia lei seguransa komunitaria atu halo vizilansia, monitoria  no observa atividade ruma ne’ebe viola lei iha sira nia suku no bairu, nudar autoridade lokal no komunidade mos iha kbiit no kompetensia atu impede no prevene aktus krime ne’ebe maka lao iha sira nia bairu, aldeia no suku.

Iha okajiuan ne’e Xefe Departamentu Polisiamentu Komunitaria Nasional Inspetor Xefe Helena da Dores hateten ohin ita hamutuk iha ne’e oinsa atu asegura trankulidade no paz iha rai laran liu-liu iha Dili nudar kapital nasaun ne’ebe maka sempre mosu disturbiu no polemika barak liu-liu komflitu entre juventude nomos munisipiu 11 no RAEOA ne’e ho karakteristika no hahalok ne’ebe diferente.

Nia hatutan Komandu PNTL iha planu atu halo inklina aan no hakbesik ba komunidade hodi kria Ofisial Polisia Suku (OPS) hodi nune’e bele servisu hamutuk iha suku atu halo prevensaun ba problema ne’ebe maka akontese iha suku maka estabelese ona iha suku 272 iha teritoriu Timor-Leste.

Formasaun durante loron tolu (3) 23-25 ne’e sei foka liu konaba prevensaun komflitu, rezolve problema, oinsa identifika problema no refere kazu krime ne’ebe halai liu ba krime publiku.

 Abertura Formasaun ne’e ho prezensa husi parseru Fundasaun Azia no partisipa husi Ofisial Polisia Suku (OPS), Membru KPK suku Vila-Verde, Kolmera no Motael hamutuk nain 70 resin nomos Xefe suku sira. Media PNTL

Dili- iha loron segunda-feira, 21 outubru 2019, Xefe Departamentu Polisia Komunitária Nasionál (DPKN), Inspetór Xefe Polisia, Sra. Helena Dores konvoka enkontru ho Diretór Diresaun Nasional Prevensaun Konflitu Komunitária (DNPKK), Sr. António Viegas ho motivu atu buka solusaun ba kazu konfrontasaun iha Beto, suku Madoi.

Iha enkontru Diretór DNPKK, Sr. Antonio Viegas hateten parte DNPKK prontu serbisu hamutuk ho ekipa Polisia Komunitária atu enkontru ho komunidade no juventude sira iha Beto, suku Madoi hodi buka solusaun ba kazu konfrontasaun akontese iha suku refere.

Iha okaziaun ne’e, Xefe Departamentu Polisia Komunitária Nasionál (DPKN), Inspetór Xefe Polisia, Sra. Helena Dores heteten enkontru parte ida atu serbisu hamutuk hodi buka solusaun ba problema akontese iha Beto.

“Ha’u simu orientasaun hosi Komandante Jerál PNTL no Komandante Operasaun hakarak organiza eventu ida iha Beto nian, oinsa atu buka rezolve problema, tanba akontese problema rezulta uma rahun no autór sira saidauk kaer, ita la hatene abut problema ne’e saida. Ita-nia la’o hamutuk ba ne’e la’os atu halo buat, maibé halo uluk sensibilizasaun lai iha fatin refere, hafoin ita identifika abut problema tanba saida mak akontese problema, nune’e mak ita forma fali ekipa kiik ida hodi ba rezolve problema sira ne’e”, esplika Inspetór Xefe Polisia, Sra. Helena.

Entretantu, tuir planu ekipa DNPKK no Polisia Komunitária sei hala’o enkontru ho komunidade no juventude Beto, iha loron kinta feira 23 outubru 2019 atu buka dalan no solusaun ba problema refere. *InfoDNPKK*

Dili, Komandu Polísia Nasional Timor-Leste (PNTL) liu husi ekipa konjunta Operasaun Koordenada ne’ebe kompostu husi Unidade Patrullamentu Fronteira (UPF), Polísia Militar (PM-F-FDTL) no diresaun Alfândega (Ministeriu Finansas) iha loron kinta-feira (17/10) hala’o pasa revista no resultadu hetan sasan husi eis Organizasaun Persaudaraan Setia Hati Teratae (PSHT).

Porta Voz Komandu PNTL Superintendente Xefe Pedro Belo iha loron sexta-feira (18/10) ne’e liu husi Konferensia Imprensa deklara katak iha loron kinta-feira (17/10) iha oras 14:30 otl ekipa konjunta Operasaun Koordenada deskonfia paket foun ne’ebe tama iha area Alfândega fatin halo pasa revista tanba sasan/paket ne’e deskonfia entaun UPF ho PM haruka sobu no hetan kartaun identidade no mós fardamentu eis Organizasaun PSHT.

“Paket ne’ebe tama liu husi travel Paradise ne’e laiha identidade ou ema ne’ebe atu simu la klaru, hakerek deit númeru no naran inisial no mós ema ne’ebe haruka naran laiha, evidensia sira ne’ebe maka ekipa koordenada prende maka hanesan fardamentu hamutuk 53, kaos 23, sintu ki’ik no bo’ot, hare’e mós ba kartaun identidade ne’ebe maka hetan hamutuk 29 maibé kartaun ida ne’e hatudu momos katak eis Organizasaun PSHT iha ligasaun metin ho Indonesia tanba uza sigla bandeira Merah Putih”, esplika Superintedente Xefe ne’e.

Aktual Komandante Operasaun ne’e subliña tan tanba ne’e módus sira ne’ebe oras ne’e dadaun  sira uza, módus ida ne’ebe krime organizadu nian tanba ita hotu akompaña no hatene katak iha krime organizadu ida ne’ebe oras ne’e dadaun liu-liu droga ne’ebe maka lori paket/sasan ba iha rai ne’ebe deit, sira la uza naran no sira nia hela fatin.

“Oras ne’e dadaun ita hotu hatene katak eis Organizasaun sira ne’ebe maka Estadu taka ona maibé sira uza módus sira ne’ebe hanesan droga, tanba ne’e lori naran Komandu Jerál husu ba Komunidade hotu tenke tau atensaun maka’as ba grupu organizadu sira ne’e tanba grupu hirak ne’e bele estraga estabilidade nasional no tanba sira iha ligasaun ho parte Indonesia ninian tanba sira uza bandeira Merah Putih atu akompaña no mós oras ne’e dadaun sira halo ona rede iha Timor laran tomak”, hakotu eis Komandante Komandu Munisipiu Dili ne’e.

Media PNTL.      

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa hala’o enkontru semanal ho Prezidente Repúblika (PR) Dr.Francisco Guterres Lu-Olo hodi informa situasaun seguransa rai laran inklui akontesimentu motor ida ne’ebe tenta soke Aviaun Sriwijaya iha Aeroportu Internasional Nicolau Lobato foin lalais ne’e.

Hafoin enkontru, Komisariu Polísia ne’e ba jornalista sira hateten situasaun jerál iha teritoriu rai laran lao diak, kalma nafatin asidente balun ne’ebe mosu, insidente ne’ebe dala-ruma mosu sai preukupasaun no esplika mós ba Xefe Estadu kona-ba insidente ne’ebe mosu iha Aeroportu foin lalais ne’e.

“Aktualiza prosesu sira ne’e hotu ba PR, inisiu komesa oinsa ema ne’e lao to’o iha ne’eba no saida mak parte PNTL ninian obrigasaun halo ba ida ne’e, ne’ebe aktualiza rezultadu ikus ba prosesu ida ne’e aumezmu tempu asuntu interna katak hanesan Komandante Jerál hasai ona Ordem atu ekipa ida ba halo inspesaun ba polísia sira ne’ebe servisu iha ne’eba (Aeroportu-red) tanba iha polísia rua mak koloka iha ne’eba hanesan husi Unidade Patrullamentu Fronteira (UPF) no husi Komandu munisipiu Dili”, tenik autoridade másimu seguransa ne’e.

Komandante Jerál PNTL afirma tan kona-ba seguransa sira seluk ne’ebe koloka iha area Aeroportu nian hau la koalia, entaun ekipa ida ne’e ba atu halo inspesaun ba membru UPF no Komandu munisipiu Dili nian. Informa mós ba PR kona-ba kazu akontesimentu balun hanesan iha Lacluta ninian, kazu Lahane ne’ebe joven sira rasik baku fali membru Konsellu Polisiamentu Komunitaria (KPK) hanesan mós ida iha parte Comoro ninian.

“Além de insidente sira ne’e, iha mós asidente hanesan ita hotu hatene katak iha fulan Setembru nia laran, kazu ne’ebe ita koalia ona katak ba hafolin feto, hafoin iha Manatuto ninian parte Laivai nian kareta baku fila ne’ebe rezulta ema na’in neen mak mate, motivu husi kazu sira ne’e mak fátor ema rasik laos natureza, fátor ema ne’e mak barak liu kontribui ba rezulta asidente sira ne’e; ne’e delizensia umana katak dala-ruma iha kareta ho motor maibé lakoi tau atensaun atu kuidadu”, hatutan na’I ulun PNTL ne’e.

Komisariu Polísia ne’e haklean katak liga ba asidente sira ne’ebe mosu, além de iha kapital Dili ita nafatin aumenta membru ba iha Tránzitu maibé sensibilizasaun ne’e ita halo nafatin, oinsa atu bele reduz importante maka ida ne’e. iha biban enkontru ne’e, PR mós hato’o ninia agradesimentu ba Komandu PNTL liu-liu Lautem tanba foin lalais ne’e PR hala’o vizita servisu nian ba iha ne’eba, katak buat hotu lao diak.

Media PNTL.

Dili- Polisia Nasional Timor-Leste (PNTL) investiga hela  suspeitu ne’ebe maka ho motor tama Aeroportu laran no tenta atu soke aviaun Sriwijaya Air.

Xefe Servisu Investigasaun Kriminal Nasional (SIKN) Superintendente Xefe Henrique da Costa hateten iha loron 14 fulan Outubru iha oras tuku 17:00 Polisia Aeroportu Internasional Nicolao Lobato entrega mane ida ho inisial CDJ tinan 45 mai SIKN hodi halo investigasaun tanba ne’e PNTL liu husi SIKN hala’o kedas identifikasaun ba pessoal refere no aplika flagrante délitu bazeia ba partisipasaun husi ANATIL, Nia hato’o asuntu ne’e liu husi komferensia Emprensa iha Kuartel Jeral PNTL Kaikoli Dili, Tersa (15/10).

Nia haktuir tan  Prosesu investigasaun sei kontinua husi PNTL Servisu Investigasaun Kriminal, kazu refere rejista ho numeru NUC  0201/19.PNSIC.

Mane ne’e ho motorizada bebek marka Revo laiha xapa matrikula no la uza kapasete halai tama ba iha Taxi Run way Aeroportu Internasional Nicolao Lobato, mane ne’e tenta lori motor ba soke aviaun Sriwijaya Air ne’ebe momentu neba tun ka landing nune’e ekipa seguransa Aeroportu kompostu husi PNTL, ANATIL, Bombeiros no seguransa sira seluk iha fatin refere hala’o kedas prevensaun hodi kaptura  mane ne’e.

PNTL seidauk identifika suspeitu ne’e moras mental ou lae maibe depois ida ne’e Polisia sei lori Suspeitu ba Ospital Nasional hodi halo teste mediku.

“Iha prosessu indentifikasaun nia laran Polisia iha kompetensia oras 72  atu buka tan informasaun, tanba agora foin hetan informasaun husi suspeitu mais ami sei ke’e klean tan atu hetan informasaun karik suspeitu ne’e halo asaun mesak ou sei iha ema ruma tan mak involve”, dehan Xefe SICN.

Kazu ne’e sai hanesan prekupasaun no atensaun PNTL nian nune’e ba futuru situasaun hanesan ne’e labele akontesetan, Polisia sei servisu hamutuk ho seguransa Aeroportu sei hare’e hamutuk konaba asuntu seguransa.

Suspeitu CDJ nu’udar kaben nain hela iha aldeia Lakoico, suku Teraco, postu Administrativu Railako, Munisipiu Ermera. Media PNTL

Dili, Komandu Polísia Nasional Timor-Leste (PNTL) iha segunda-feira dahuluk fulan Outubru nian (07/10) hala’o serimonia Isar Bandeira ne’ebe dirige husi Segundu Komandante Jerál Komisariu Polísia Mateus Fernandes.

Iha nia diskursu ba serimonia ne’e, Komisariu Polísia ne’e koalia liu kona-ba situasaun ne’ebe maka lao iha kapital Dili ne’ebe kontinua iha konfrontu, orientasaun ita informa dala-barak ona katak husu ba Ofisial Polísia Suku (OPS) sira ne’ebe maka koloka iha Dili laran tenke funsiona sira nia presensa iha ne’eba ho diak hodi nune’e kualker problema ruma ne’ebe lao iha ne’eba sira sempre hatene hela deit.

“Tanba wainhira sira hatene hela deit signifika ita nia patrulla, ita nia inteligen sira mós la falla sé kuando OPS nia aktividade diariu laiha, relatoriu ba Komandante Eskuadra laiha entaun ita la hatene, ema atu halo deit buat ruma iha ne’eba mós sira la hatene, OPS balun servisu diak”, tenik adjuntu Komandante Jerál PNTL ne’e.

Komisariu Polísia Mateus fó orientasaun ba Komandante Operasaun, Komandante Tránzitu no Komandante Departamentu Polisiamentu Comunitaria Nacional (DPCN) atu hare’e oinsa maka OPS tomak, liu-liu iha Dili laran tenke halo relatoriu ba sira nia Komandante Eskuadra depois sei kontinua ba Komandante Distritu no kontinua mai iha nasional, atu nune’e saida maka lao iha baze.

“Foin lalais ami enkontru ho Ministru Interior Interinu no Ministru dehan Dili laran deit seidauk bele kontrola tanba ne’e maka rekrutamentu foun ba PNTL seidauk bele halo, tanba ne’e maka aproveita tok ita nia OPS ne’ebe iha, inklui identifika potensia ameasa sira ne’ebe Dili laran bain-bain provoka kalan-kalan sempre mosu iha fatin ne’ebe hanesan, entaun oinsa maka ita nia OPS sira bele funsiona ho diak iha fatin ne’eba atu nune’e bele fasilita informasaun, fasilita ita nia patrulla atu nune’e labele falla tan”, hatutan Segundu Komandante Jerál PNTL ne’e. Media PNTL.

Tuir akordu kooperasaun ne’ebe eziste entre Timor-Leste ho Portugal, membru PNTL na’in rua Sargentu Xefe Luis Castro Doutel no Ajente Francisco Viana partisipa 49.º Kursu Tránzitu ba seguransa iha Guarda Nacional Republicana (GNR) iha loron 25 Marsu to’o loron 27 Setembro tinan ne’e.

Kursu refere hala’o iha Queluz, eskola Guarda ida ne’ebe iha ninia komponente teoria, aplika materias ho módulu formasaun tekniku professional, módulu formasaun júridika no investigasaun kona-ba asidente no módulu teknika operasional. Inklui komponente prátika ne’ebe traduz estagiu ida kurikular, iha Unidade Tránzitu GNR, ne’ebe lori tempu oras 320 no iha kursu ida ho total oras 890.

Além de apresiasaun akádemika, avaliasaun ba alunos sira iha ninia varidade husi kualidades físika, moral no sosias, intelektuais no kulturais, ikus liu profesionais na’in rua membru PNTL hetan susesu iha konkretizasaun kursu ninian. Ne’e mak instructor na’in rua dahuluk atu forma membru PNTL sira seluk iha kursu Tránzitu dahuluk ba PNTL.

Dadaun ne’e PNTL sei prepara hela regras admisaun Planu Formasaun no Regras Kursu Tránzitu ba membru PNTL, ne’ebe sei hala’o iha Centro Formação Polícia ho nia objetivu atu hametin no hasa’e kresimentu Seguransa Rodoviariu nian.

Maliana-Instituisaun Polísia Nasional Timor-Leste (PNTL), Unidade Patrullamentu Fronteira (UPF) iha loron 30 Setembru 2019, selebra nia loron aniversariu ba dala XVI, ne’ebe hala’o iha kampu futubol, Suku Holsa Maliana Vila.

Ministru Defeza no Ministru Interior Interinu Brigadeiru Jenerál (Ref) Filomeno da Paixão de Jesus, iha nia diskursu kongratula esforsu membru UPF nian hodi impede kriminozu sira.

“Ha’u fó parabéns ba membru UPF tomak ne’ebe ohin festeza nia aniversariu ba dala sanulu resin nen, ami nia avaliasasaun ba UPF durante ne’e ass tebes, ami kontente ho imi nia servisu hodi hala’o kna’ar hasoru kontra bandu, apezar 16 anos deit, UPF halo nia papel importante tebes hodi impede kriminalidade lokal no internasional relasiona krime organizadu ne’ebe lori arte marsiais nia naran iha fronteira hodi tama mai iha ita nia rai, tanba ne’e ba oin presiza tebes fó enfaze (hare’e liu) liu ba tráfiku ema no droga”, tenik Ministru Interior Interinu ne’e.

Aktual Ministru Defeza ne’e salienta tan katak entaun servisu ida ne’e ba oin, UPF sei la halo mesak, tanba F-FDTL sei hadia nia misaun hodi apoiu UPF,antes ne’e hau aprezenta ona iha Konsellu Ministru atu F-FDTL apoiu tan UPF hadia hodi forsa rua ne’e iha interasaun metin liu tan, hodi halo kooperasaun másimu, ita nia Primeiru Ministru rasik hatene katak ita iha difikuldade nune’e nia husu atu f’o atensaun makas ba forsa rua.

“Iha Abril tinan ida ne’e ha’u ho ekipa vizita ona ba Postu Integradu UPF hirak hanesan postu Salele, Mota Masin, Tilomar, Wala Lama, Foholulik, Aikakar, Belulik Kraik, Belulik Leten, Fatumea no Postu Aeroportu Suai Munisipiu Covalima inklui postu balun iha RAEOA, husi vizita hirak ne’e ita nota katak kondisaun UPF iha fronteira seidauk diak no imi pasa difikuldade barak tebes, tanba ne’e ba tinan ida ne’e mós ita hasa’e proposta hodi hadia infraestutura ba UPF ho dezeñu foun, nune’e tinan oin ita planu ona atu alarga (halo luan) tan, hodi fó espasu ne’ebe diak atu membru sira bele hela ho comfortable (hakmatek) no badinas.

Ministru Interior ne’e afirma tan katak ba UPF úniku forsa estadu maka bele lao armada, hodi hamrik iha estadu nia kotuk, estadu RDTL tau konfiansa no fiar tomak ba imi hala’o patrullamentu no vijilánsia iha fronteira territoriál sira, hodi kontrola movimentu ema no sasán sira ne’ebe tama sai teritoriu nasional, husu nafatin atu mantein koordenasaun no kooperasaun husi F-FDTL, Servisu Migrasaun no mós Alfándega.

Iha serimonia ne’e, Ministru Interior Interinu DR. Filomeno da Paixão de Jesus mós atribui sertifikadu de louvor ba membru UPF hamutuk ema nain 12 ne’ebe presta sira nia papel ho diak.

Marka prezensa iha loron importante ne’e reprezentante Komando Jeral PNTL, Komandante Munisipiu Bobonaro, Komandante Sentru Formasaun, Konsuladu Timor-Leste iha Atambua, lider relijiozu sira, komandante Corpo Bombeiro Maliana, Autoridade lokal, lia nain, veteranus no komunidade sira ne’ebe hela besik iha area refere.

Fontes: Media Ministeriu Interior (MI)  

Dili, Ministru Interior Interinu Filomeno Paixão de Jesus kinta-feira (26/09) ne’e hala’o enkontru ida ho Komandu Polísia Nasional Timor-Leste (PNTL) hodi diskuti planu prioridade Oitavu governu nian iha tinan 2020 liga ba area seguransa nian.

Ministru Filomeno Paixão hateten enkontru sira hanesan ne’e sempre realiza atu nune’e bele tur koalia hamutuk, fó esplikasaun, fó esklaresimentu liu-liu kona-ba politika Oitavu Governu ninian, prioridade hirak ne’ebe maka governu hakarak ba Polísia no fó hanoin ba malu kona-ba disiplina, hirakria, prosedimentu sira seluk ne’ebe bele halo ita nia polísia servisu diak liu tan ba oin.

“Ohin ita koalia buat barak, primeiru maka politika governu hanesan hateten bebeik ona katak primazia ba iha Polísia Komunitaria no Polísia Rodoviaria, la signifika katak ita tau sees tiha buat seluk-seluk maibé sira seluk ne’e hela ba prioridade ne’ebe maka tuir mai, tanba ne’e durante tinan lima ba oin ita prioriza buat balun no ba tinan lima oin tan ita fo fali ba buat seluk”, esplika Ministru Interior Interinu ne’e.

Hatan ba preukupasaun na’in ulun balun kona-ba krime ne’ebe ikus-ikus ne’e sempre mosu tanba vizibilidade polísia nian maka menus, Ministru Filomenu hatan katak sim, hau laos dehan másimu no hau mós la dehan mínimu, polísia halo patrullamentu durante ne’e, halo kontrolu klaru iha ne’eba dezastre ida ne’ebe hau la espera, ami hotu la espera. Ba oin hanesan hau ohin koalia ona ho sira (Komandu PNTL-red) além-de ita rona ema koalia, ita mós tur hanoin ita keta halo sala ruma karik, ita halo introspeksaun no ba oin ita tur hanoin oinsa bele hadia ann.

Entretantu, Komandante Jerál PNTL Komisariu Polísia Faustino da Costa iha ninia intervensaun ba enkontru ne’e katak objetivu husi sorumutu ne’e hanesan kontinuasaun husi enkontru ne’ebe hala’o ona ba Komandu munisipiu Dili iha CFP, enkontru ida ne’e halo mós ba Komandu PNTL munisipiu sira hotu inklui departamentu no unidade hotu PNTL nian.

“Informa ba Ministru katak los duni iha akontesimentu balun ikus ne’e halo ema barak sai hanesan preukupasaun bo’ot ida iha ita nia komunidade no sosiedade liu-liu aktividade ne’ebe hala’o iha Taibesi no husi akontesimentu hirak ne’e prosesu sira ami halo no ami aprezenta ona kazu ne’e ba iha Ministeriu Públiku”, tenik Komandante Jerál ne’e.

Komisariu Polísia Faustino akresenta tan katak dala wain informasaun sira ne’ebe espalla iha Media Sosial katak sei iha konsentrasaun mobilizasaun ne’ebe durante ne’e PNTL mós akompaña nafatin hela, ita antisipa hela ida ne’e maibe relatoriu husi Komandu munisipiu 13 katak laiha movimentu balun maka atu mai husi parte Ermera no mos husi parte Aileu ninian. PNTL nafatin halo ninian preparasaun ba antisipada liu-liu ba iha parte entrada, rai klartan no mós parte leste ninian.

Enkontru ne’e lidera husi Ministru Interior Interinu, Komandante Jerál, Segundu Komandante Jerál no hetan partisipasaun husi Komandante Komandu Operasaun, Komandante Komandu Administrasaun, Komadante SIP, Xefe SIKN, Komandante PNTL munisipiu 13, Komandante Unidade, departamentu, ofisias subalternu sira iha Komandu Jerál ninian.

Media PNTL.

Dili, Komandu Polísia Nasional Timor-Leste (PNTL) kuarta-feira (25/09) ne’e hala’o tan tomada de posse ba dahat nian hodi nomeia Superintendente Xefe Henrique da Costa nu’udar Xefe Servisu Investigasaun Krimanal Nasional (SIKN).

Tomada de posse ne’e hala’o basea ba Despasu Komandante Jerál nian N.ᵒ 257/Cg-PNTL/IX/2019 hodi koloka Superintendente Xefe Henrique da Costa hanesan Xefe Servisu Investigasaun Kriminal Nasional (SIKN). No Inspector Xefe Mouzinho Tavares Correia ne’ebe durante ne’e assume kargu hanesan Xefe SIKN Interino, iha despasu ne’e subtitui fali kargu no funsaun hanesan Sub-Xefe Interino ba Servisu Investigasaun Kriminal Nasional (SIKN).

Partisipa iha serimonia simples ne’e Komandante Jerál, Komandante Komandu Operasaun, Komandante SIP, Komandante Komandu Administrasaun no Xefe Departamentu Justisa.

Media PNTL.