Dili, Komandu Polísia Nasional Timor-Leste (PNTL) ho parseiru Timor-Leste Police Development Program (TLPDP) liu husi nivel altu iha hanoin ida atu aumenta kapasidade matenek, abilidade no attitude membru PNTL iha atuasaun uza forsa hasoru komunidade hodi bele professional liu tan iha terenu ne’ebe nafatin tau respeita ba Direitus Umanus.

Kursu ba treinamentu ida (OST- Official Safety Training) ne’ebe maka hetan aprovasaun husi Komandante Jerál PNTL ne’e sei fahe ba etapa rua, etapa primeiru iha kuarta-feira (14/08) ne’e realiza ba Komandante Munisipiu, Unidade no Departamentu sira PNTL nian hodi halo aprezentasaun ba materia ka lisaun Uza Forsa liga ba Direitus Umanus antes fahe ba membrus PNTL hotu iha munisipiu 13. No etapa segundu sei realiza iha kada Komandu munisipiu ho durasaun tempu loron lima (5) ho objetivu atu aumenta kapasidade matenek, abilidade no attitude membru PNTL iha atuasaun uza forsa hasoru komunidade.

Notisia Relevante: Membru PNTL Na’in 41 Kompleta Kursu OST

Komandante Jerál PNTL Komisariu Polísia Faustino da Costa iha abertura ba serimonia ne’e hateten aktividade hanesan ne’e ita halo iha fulan balun ba kotuk, ita halo buat ne’e hanaran OST (Official Safety Training) signifika katak menyederhanakan buat ne’ebe ita koalia kona-ba treinu uza forsa, ita ba fali OST ne’ebe kada munisipiu ema na’in rua preparadu ona sai treinador ne’ebe sira frekuenta kursu iha CFP (Centro Formação Polícia) nune’e treinamentu ne’e atu halo iha kada munisipiu.

“Agora, sé ita koalia kona-ba uza forsa ne’e ita nia hanoin halai buat ketak ida, maibé kuandu ita ba Official Safety Training ne’e parte ida hanesan ita tempu liu ba ita diskuti katak dala-wain ita uza forsa ne’e katak ita oho ema maibé interpretasaun ne’e lalos, uza forsa signifika ita atu reduz risku no ameasa mas laos atu oho ema”, tenik Komandante Jerál PNTL ne’e.

Komisariu Polísia Faustino subliña liu tan katak além-de Konstituisaun, Regime Jurídiku uza forsa nian atu bele reduz ameasa aumesmu tempu salva ema, salva ita nia ofisial sira rasik idak-idak no mós salva ema seluk nia sasan ou patrimoniu públikus.

“Tanba ne’e maka molok materia ida ne’e hato’o ba Komandu munisipiu idak-idak atu halo formasaun ba membru sira iha terenu, parte ida hau hamutuk ho parseiru TLPDP ami koalia atu ita Komandante sira iha ne’e, ita iha ona ide pokok ne’ebe kuandu aban-bainrua halo iha Komandante sira nia munisipiu karik, Komandante sira nia intervensaun ba abertura no enseramentu ida ne’e”, hatutan Komisariu Polísia ne’e.

Iha fatin hanesan, Peter Cros ne’ebe hanesan responsavel ba Uza Forsa iha TLPDP nian iha nia introdusaun ba programa ne’e koalia Kursu ida ne’e ami desenvolve tanba ami hetan input husi TLPDP, Polísia Nova-Zelandia no mós UNDP (United Nations Development Programme) ne’ebe ami koko deseña Kursu ne’e hare’e ba rekerimentu ne’ebe presiza husi PNTL relasiona ho Kursu OST uza forsa ninian.

“Iha abertura materia ida ne’e, Komandante sira atu bele fó hela garis besar kona-ba Kursu OST ninian ne’ebe maka kursu ida ne’e ami hato’o ona ba ita bo’ot sira nia membru ne’ebe maka antes ne’e mai atende Kursu uza forsa, tanba ne’e maka saida maka ami atu fó ba ita boo’t sira maka komponente oituan deit husi kursu ida ne’ebe ninia kompletamentu ne’e ita bo’ot sira nia membru hetan ona”, hateten responsavel ba Uza Forsa iha TLPDP nian.

Partisipa iha aktividade ne’e Komandante Jerál, Inspector Jerál, Komandante Komandu Operasaun, Komandante Komandu Administrasaun, Komandante SIP, Komandante Komandu Munisipiu, Unidade no Departamentu sira iha PNTL.

Media PNTL.

Atauro-Polisia Nasional Timor-Leste(PNTL/ Unidade Polisia Maritima (UPM) oferese ró ida ba Ministeriu Saude (MS) hodi bele fasilita transporta pasiente husi Atauru mai Dili.

Komandante Jeral PNTL Komisariu Faustino da Costa hateten iha fulan balu ba kotuk Vice Ministra Saude ba Kuidadu Saúde Primaria Elia A.A dos Reis haruka karta ba Ministru Defeza no Interior Interinu hodi husu atu parte PNTL mos bele fasilita transporte tula pasiente ba mai Atauro-Dili, Nia hato’o asuntu ne’e iha Atauro Sexta (09/08).

Komisariu ne’e haktuirtan ohin iha Atauro PNTL asina akordu nota Intendementu ho Ministeriu Saude hodi renova nota intendementu ne’ebe halo iha tinan rua ba kotuk hodi aumentatan klausula balu maka PNTL bele suporta apoia transporte ró ba mai Atauro- Dili.

Durante ne’e Ministeriu Saude apoia PNTL ba formasaun, apoiu aimoruk ba Polisia no Mediku PNTL nian atu halo atendementu ba membru PNTL no ninia familia sira.

Hafoin asina MOU ho Vice Ministra Saude hato’o agradesementu ba Komandu PNTL ne’ebe maka apoia hodi fasilita Ministeriu Saude hodi fasilita povu Atauro asesu ba Saude.

Iha oportunidade ne’e Komandu PNTL no F-FDTL halo limpeza hamutuk ho Autoridade postu Administrativu Atauro, Autoridade Lokal nomos Populasaun Atauro nudar parte preparasaun hodi komemora tinan 20 loron konsulta popular no forsa INTERFET mai Timor-Leste.

Komandante Jeral mos hato’o parabens ba Autoridade postu administrativu Atauro, Autoridade local sira ne’ebe tau moto ba Atauro ida Moos katak Matak, Organizadu no Saudavel  ne’e hau nia apresiasaun boot ida ba Administrador, Xefe Suku sira no Komandu PNTL Eskuadra Atauro nian espera katak iha munisipiu seluk mos iha sira nia moto ba postu administrativu rasik tanba ema dehan hanesan ne’e se ita laiha mehi atu ba ne’ebe maka ita bele lao loron lao kalan mos ita sei nunka atu to’o fatin ne’ebe ita atu ba.

PNTL preparadu asegura Seguransa Ba Serimonia Konsulta Popular

Polisia Nasional Timor-Leste (PNTL ) preparadu atu asegura serimonia tinan 20 loron konsulta popular 30 de Agostu no forsa INTERFET mai Timor-Leste.

Komandante Jeral PNTL Komisariu Faustino da Costa hateten preparasaun seguransa ba komemorasaun tinan 20 loron konsulta popular no forsa INTERFET mai Timor-Leste en kordenasaun entre instituisaun Seguransa no Defeza tanba iha bainaka inportante hanesan Xefe governu, Xefe Estadu no eis titulares sira mos mai marka prejensa hotu entaun involvimentu Forsa Defeza ba seguransa Xefe estadu ne’e iha no preaparadu ona, ita hein deit komfirmasaun husi bainaka hirak ne’ebe maka atu marka prezensa iha serimonia ne’e.

Nia haktuirtan oras ne’e daudauk PNTL rasik prepara hodi halo formasaun ba nia membru ne’ebe atu sai eskoltu ba entidade sira ne’e. Iha parte segundu maka Komandu PNTL no F-FDTL hasai diretiva konjuntu ida atu membru PNTL no F-FDTL halo atividade sosiais konjuntu hanesan limpeja jeral iha Dili nomos Atauro objetivu ba atividade preparasaun loron konsulta popular no INTERFET mai Timor-Leste iha 20 de Setembru.

Iha parte seluk Komandu munisipiu sira nafatin lao  en kordenasaun ho autoridade munisipal no Prezidente Autoridade, Administrador no enkaminamos Forsa Defeza no lider komunitariu sira tanba selebrasaun loron konsulta popular halao mos iha munisipiu no RAEOA.

Alende ne’e sei halao mos atividade pasa revista iha loron hirak tuir mai ne’ebe sei involve F-FDTL no Polisia Militar hodi halo passa revista iha kapital Dili no munisipiu.

Kestiona konaba seguransa rai laran Komandante Jeral ne’e komfirma katak oras ne’e situasaun seguransa enjeral lao diak kalma no hakmatek. Media PNTL

Dili- Sentru Komandu Kontrolu Operasaun Koordenada (SKKOK) Polisia Nasional Timor-Leste (PNTL) servisu hamutuk ho Falintil-Forsa Defeza Timor-Leste (F-FDTL) hodi halo operasaun ba Grupu Arte Marsiais(GAM) no Grupu Arte Rituais (GAR) iha teritoriu laran tomak ne’ebe kontinua trenu subar.

Komandante Jeral PNTL Komisariu Faustino da Costa hateten Ami forma ona operasaun koordenada entre F-FDTL no PNTL atu hametin ambiente ida ne’ebe dame no hakmatek iha teritoriu tomak ho atensaun espesial ba grupu illegal GAM no GAR ne’ebe lei bandu, nune’e iha situasaun ida ne’e sita mos atensaun katak laiha toleransia, Nia hato’o asuntu ne’e liu husi komferensia emprensa hamutuk iha Kuartel Jeral PNTL Kaikoli Dili, Segunda (05/08).

Komisariu ne’e haktuirtan katak toleransia zero mos sei habelar iha atuasaun PNTL nia rasik ne’ebe tenke atua ho imparsial ho rigoroju hodi defende lei no ordem publika iha sidadaun sira nia oin, atu hodi delikadeza nomos defende lei no ordem ba situasaun sidadaun sira nian, sei fo mos atensaun espesial bainhira uza armas ou kilat ho maneras ne’ebe obriga atu uza forsa, laiha ligasaun ho atividade husi grupu illegal hirak ne’e.

“Ami hakarak lori hamutuk ida ne’e ho fim ida maka legal ho objetivu ba situasaun hakmatek no paz, sei halo tuir mos lei ne’ebe vigora prinsipalmente rezimi juridiku uza forsa  no mos rejimi pratika Arte Marsiais, Arte Rituais nomos regras atuasaun Polisia nian no regras ne’ebe tau ona iha Kodigu Prosesu Penal  no normas sira seluk ba Forsa Defeza no Seguransa atu halao,” dehan Komisariu ne’e.

Ba sidadaun sira ami husu atu servisu hamutuk ho lideransa prinsipal sira atu fo hatene konaba rezimi juridiku relativa ba pratika Artes Marsiais, Artes Rituais, Armas Brankas, Rama Ambon nomos atividade hodi prevene no iha aprensaun ne’ebe sei halao iha terenu no teritoriu nasional tomak.

PNTL iha responsabilidade atu garante hodi tau ordem no seguransa hakmatek ba publiku nomos prevene atu mosu krime ka hahalok seluk ne’ebe kontra lei, PNTL dedika aan tomak atu hametin no kumpri ordem ne’ebe fo ba sira prinsipalmente iha tempu ida ne’e, ita prepara aan hela atu halo selebrasaun nasional ba loron 30 fulan Agostu.

Hodi Komandu PNTL nia naran hato’o ba membru sira tomak PNTL katak iha ona Diretiva konjuntu husi PNTL no F-FDTL atu hahu asegura atividade sira hotu liga ho preparasaun loron konsulta popular ninian iha nivel nasional no munisipiu, Postu Administrativu no suku sira.

Iha okajiaun ne’e Xefe Estadu Maior Jeneral das F-FDTL Maijor Jeneral Lere Anan Timur hateten Diretiva konjunta ida ne’e atu halo operasaun kordenada entre instituisaun Defeza no Seguransa ho ninia objetivu maka prevensaun no represaun ba kuaker krime organizadu liu-liu arte marsial ne’ebe ohin loron naran boot iha timor maibe ita hare arte marsiais governu taka ona no hau bolu hanesan krime organizadu.

Diretiva Konjunta entre Komandu rua ne’e atu inpelemnta iha teritoria laran ba seguransa no defeza ita nia estadu no ita nia soberania ninian no liu-liu ba ita nia populasaun, joven no komunidade sira ne’ebe la sente seguru.

Ami nia planu ekipa konjunta ida ne’e mos atu asegura dias nasional loron istoriku sira ne’ebe iha ita nia oin 30 de Agostu ita halo tinan 20 Referendum, 20 Setembru ita halo 20 anus prejensa forsa INTERFET

Hau hakarak husu ba Timor oan hotu-hotu PNTL nia misaun mak atu garante estabilidade nasional iha planu internu no lei mos fo dalan atu Forsa Defeza Timor-Leste nudar forsa armada nasaun nian iha misaun defeza externu ne’ebe lei fo dalan atu bele kopera iha area seguransa interna nian.

Mensajen konaba ida ne’e ami hato’o bebeik ona, ami iha ne’e laos atu reprime deit maibe ami mos prevene, prevensaun signifika katak buka formas hotu-hotu no meius hotu –hotu liu husi media no liu husi kontaktu ho komunidade iha suku no aldeia atu halo oinsa ita nia rai ne’e bele estavel tanba ita hotu hatene katak so estabilidade iha maka dezenvolvimentu iha, estabilidade laiha dezenvolvimentu laiha.

Iha fatin hanesan Komandante Jeral mos kestiona konaba kazu soe bebe ne’ebe ikus-ikus ne’e mosu iha fatin barak inan feton sira komesa soe bebe iha fatin-fatin ne’ebe balu konsege salva no balu la konsege salva.

Aproveta oportunidade ida ne’e atu hato’o ba inan aman sira, joven sira tantu feto no mane katak hahalok soe bebe no oho bebe la refleta kultura timor nian, konaba akontesementu sira ne’ebe liu ona PNTL sei nafatin esforsu atu buka tuir autor laos deit inan ida ne’ebe kous no soe nia bebe maibe se maka hamutuk ho inan ida ne’e no ikus mai laiha responsabilidade hodi husik no oho ema inosente ou anju oan sira ne’e.

Komferensia Emprensa hamutuk entre Komandu PNTL no F-FDTL ne’e akompaña husi Xefe Ispesaun Jeral F-FDTL Brigadeiru Jeneral Maunana no Segundu Komandante Jeral PNTL Komisariu Mateus Fernandes ho prezensa husi Ofisiais Superior Instituisaun PNTL no F-FDTL. Media PNTL.

Dili, Komandu Polísia Nasional Timor-Leste (PNTL) iha loron dahuluk fulan Agostu tinan ne’e hala’o serimonia tomada de posse ba Komandante Munisipiu Manufahi no Segundu Komandante Interinu Centro Formação Polícia (CFP) iha Kuartél Jerál PNTL Kaikoli.

Baseia ba despasu Gabinete do Comandante Geral Nu.215/CG-PNTL/VIII/2019 hodi nomeia Superintendente Júlia Gama ba kargu nu’udar Komandante PNTL Munisipiu Manufahi hodi subtitui Superintendente Agostinho Gomes ne’ebe iha loron hirak liu ba simu posse hanesan Diretór Migrasaun Ministeriu Interior (MI) nian baseia ba dezisaun Komisaun Funsaun Públika (KPF) númeru 3247/2019/PCFP hodi halo nomeasaun titulares foun ba kargu diresaun no xefia iha MI no sei tama iha vigor  hahu’u loron 1 fulan Agostu 2019 (Fontes Media MI) no despasu Gabinete do Comandante Geral Nu.214/CG-PNTL/VIII/2019 hodi nomeia Diretór sesante Migrasaun Superintendente Asistente Boavida Ribeiro hanesan Segundu Komandante Interinu CFP.

Komandante Jerál PNTL Komisariu Polísia Faustino da Costa iha ninia intervensaun ba serimonia ne’e hateten misaun ne’ebe maka ita iha maka oinsa ita servi ita ita nia komunidade, ita nia populasaun ne’ebe laos ema seluk maibé mesak ita nia inan-aman deit.

“Primeiru, agradese ba Superintendente Agostinho ne’ebe servisu halo iha munisipiu Manufahi, hau hetan relatoriu progresu lubuk ida katak membru sira Manufahi disiplina tebes no kapas tebes-tebes iha sira nia servisu, hau mós agradese ba Superintendente Asistente Boavida hanesan Diretór iha Migrasaun ho operasaun ne’ebe halo ho PNTL durante ida ne’e kooperasaun, koordenasaun lao diak tebes hanesan kazu balun ne’ebe akontese, kazu vitíma tráfiku umanu, ita iha kooperasaun diak, agradese ba ida ne’e”, tenik Komandante Jerál PNTL ne’e.

Komisariu Polísia ne’e hato’o parabéns ba Diretór Jerál ne’ebe asumi kargu foun iha ne’eba, hanesan hau hateten konfiansa ida ne’e atu ita bele uza ho responsabilidade, konfiansa ida ne’ebe governu fó aproveita ida ne’e, atu nune’e laos ita bo’ot pesoal maibé konfiansa ida ne’e afeta mós konfiansa mai instituisaun PNTL.

“Parabéns ba Superintendente Júlia, komesa ohin ba oin nia hanesan Komandante Munisipiu Manufahi hodi subtitui Superintendente Agostinho Gomes ne’ebe asumi fali kargu hanesan Diretór Migrasaun, hau mós hato’o parabéns ba Superintendente Asistente Boavida atu fó ho hanoin atu tau koloka nia hanesan Segundu Komandante CFP nomeadu mas depois hau hare’e no avalia fila fali Komandante Centro aktual ne’e mós Komandante CFP Interino tanba kestaun Deviza ne’ebe seidauk to’o tanba ne’e maka hau prepara no hasai ordem nomeasaun hanesan adjuntu Komandante CFP Interino”, salienta Komisariu Polísia ne’e.

Ho prezensa Superintendente Júlia Gama hanesan Komandante Munisipiu Manufahi nian maka 30% husi númeru membru PNTL ne’ebe iha, Ofisias Femenina na’in tolu maka iha ona pozisaun hanesan Komandante munisipiu no adjuntu Komandante munisipiu. Partisipa iha serimonia ne’e Komandante Jerál, adjuntu Komandante Jerál, Inspector Jerál, Komandante Operasaun, Komandante Munisipiu Dili, Komandante SIP, Komandante Justisa, Diretór Finansas no reprezentante CFP.

Media PNTL.

Dili- Komandu Polisia Nasional Timor-Leste (PNTL ) no Falintil Forsa Defeza Timor-Leste (F-FDTL) halo limpeza jeral hodi hamos simbolu Arte Marsiais ne’ebe ema hakerek no pinta iha parede no fatin Publiku iha kapital Dili.

Komandante Operasaun Superintendente Xefe Pedro Belo hateten atividade limpeza ba simbolu arte marsiais ne’ebe ema pinta iha didin lolon nomos lia fuan hirak ne’ebe la edukativu nudar parte hodi halo prevensaun alende ne’e iha mos ekipa ida ne’ebe maka sei halo sosializasaun ba Lei Nu.5/2017 nomos sei halo operasaun, Nia hato’o asuntu ne’e ba Jornalista sira iha Kapu Futebol Kampun Baru Comoro Dili, Sexta (29/07)

Nia haktuirtan Operasaun ne’e sei lao ba fatin balu ne’ebe maka identifika ona no ba se deit maka suporta, fo apoiu moral, apoiu lojistika, apoiu orsamentu no finansia atu atividade hirak ne’e lao nafatin maka ami sei buka tuir no kaptura tanba GAM nia atividade demais liu ona hodi kria komflitu hanesan kazu Leorema ne’ebe maka rejulta ema mate, kanek, estragus no sunu uma 13 no populasaun balu sai husi sira nia hela fatin no sira mos asalta Polisia no membru F-FDTL sai vitima ba sira nia asaun tanba ne’e ital abele tolera bebeik ho situasaun ida ne’e.

Komandante Jeral PNTL no Xefe Estadu Maijor Jeneral F-FDTL hasai ona diretiva ida ba Centro Comandu Controlu e Operasaun Espesial (CCCOE) iha Kuartel Jeral PNTL atu inplementa diretiva ida ne’e hodi halo operasaun ba GAM ne’ebe maka bandu hanesan Persaudaraaan Setia Hati Teratai (PSHT), Ikatan Kera Sakti (IKS) Komanek Oan Timor Rai Klaran (Korka) no Arte Rituais 7-7 (Sete-Sete).

Operasaun ne’ebe maka sei halao forte ami sei buka tuir sira ne’ebe maka trenu subar iha uma laran no sei kaer hotu uma nain ne’ebe maka fo fatin atu sira halo trenu no ami husu ema hotu atu respetu no halo tuir nomos komunidade kopera ho Polisia no F-FDTL atu operasaun ne’e lao ho susesu tanba ita hakarak arte marsiais no arte rituasais ne’ebe maka bandu ona labele halo sira nia atividade no sei la iha Toleransia ba sira.

Iha okajiaun ne’e Tanente Koronel Mercelino Cesario Marcal Ximenes “Haksolok” hateten Limpeza ne’e ho objetivu atu garante sidade Dili sai mos no husu mos ba joven sira atu kuidadu  no la hakerek ka pinta simbolu arte marsiais arbiru tanba PNTL no F-FDTL nia servisu laos atu halo limpeza hodi hamos lia fuan hirak ne’ebe la merese ne’ebe sira hakerek iha fatin-fatin.

Nia haktuirtan tuir informasaun ne’ebe maka Servisu Informasaun Militar (SIM) iha grupu hirak ne’e sei kontinua treinu subar  iha fatin balu no iha uma laran no komunidade sira hatene maibe sira tauk no la fo hatene tanba GAM nia ema barak.

“Husu ba joven sira liu-liu membru Grupu Arte Marsiais (GAM) atu kontribui selae sira sei simu nia konsekuensia PNTL no F-FDTL sei atua no tiru nune’e lei bele rezolve, tanba povu hakarak moris hakmatek laos GAM maka mai ukun,” dehan Haksolok.

Atividade limpeza ho tema “Dili livre husi publisidade la educativu, mos no seguru” iha postu administrative Don Aleixo ne’e hahu iha suku Comoro, suku Madohi, Manleuana no suku Bebonuk; no partisipa husi membru PNTL hamutukho F-FDTL, Sekretariu Estadu Joventude no Desportu, Autoridade munisipiu Dili, Administrador Postu, Konselu do Suku no Konsellu Polisiamentu Komunitaria (KPK) sira hodi inplementa Lei Nu.5/2017 konaba Arte Marsiais, Arte Rituais no Rama Ambon. Media PNTL

Dili, Komandu Polísia Nasional Timor-Leste (PNTL) liu husi departamentu Rekursu Umanu hamutuk ho Diresaun Jerál Ministru Interior (MI) nian kinta-feira (25/07) ne’e hala’o enkontru ho funsionariu sivil sira kona-ba preparasaun teste Konkursu Internu ne’ebe maka sei hala’o husi Komisaun Funsaun Públika iha fulan Agostu tinan ne’e.

Diretora Jerál MI Guilermina Ribeiro iha ninia intervensaun hateten enkontru ne’e hala’o atu bele fahe informasaun balun relasiona ho teste ne’ebe maka tuir planu sei hala’o iha fulan Agostu tinan ne’e.

“Konkursu Internu ne’e desentratliza iha Komisaun Funsaun Públika tanba iha distritu balun identifika katak durante tempu tomak desde 2002 mai identifika katak ema barak ne’ebe desde foti nia sai hanesan funsionariu nia nunka hetan promosaun”, tenik Diretora Jerál MI ne’e.

Guilermina Ribeiro  hatutan katak entaun ho ida ne’e politika Funsaun Públika nian sira halo estudu foti dadus katak presija sentraliza konkursu internu iha funsaun públika ho ida ne’e funsaun públika maka detekta dadus, identifika katak ema ne’e mínimu tinan haat ba leten iha Grau, laos ano-de-servisu/tinan servisu nia bele sai hanesan kandidatu ba promsaun internu.

“Além-de tinan haat iha Grau, funsionariu ne’e labele hetan sansaun disiplinar no nia mós sei ativu servisu, fora husi lisensa annual ka lisensa maternidade ne’e ema refere bele tuir, maibé kuandu ema ne’e iha lisensa espesial/lisensa sem vensimentu signifika ema ne’e labele tuir ou ninia lisensa espesial sem vensimentu ne’e ninia tempu remata nia halo pedidu atu integra fila fali servisu maka sei fó biban atu bele tuir fali aktividade konkursu internu ida ne’e”, esplika Guilermina Ribeiro .

Iha enkontru ne’e, esplika mós kona-ba lalaok teste ne’ebe maka sei hala’o hanesan materia tuir Grau, vestimentu wainhira partisipa teste, maneira ne’ebe uza iha exame nia laran no regras seluk ne’ebe maka Komisaun Funsaun Públika aplika.

Partisipa iha sorumutu ne’e Diretor Rekursu Umanu PNTL Superintendente Assistente Emilio dos Santos, Diretora Jerál MI ho nia ekipa, funsionariu sivil sira husi Ministeriu Interior no PNTL rasik.

Media PNTL.       

Dili, Seksaun Information Technology (IT) Komandu Polísia Nasional Timor-Leste (PNTL) tersa-feira (23/07) ne’e entrega ekipamentus informatika sira ne’ebe maka ho kondisaun att ona ba seksaun Patrimonio Estadu Ministeriu Finansas nian.

Responsavel Rekollamentu José Paulo Noronha iha entrevista hateten Ministeriu Finansas liu husi seksaun Patrimonio Estadu iha tinan 2012 dezentraliza jestaun patrimoniu ba iha liňa ministeriu, só úniku lelaun no sasan sira hanesan logistik.

Tuir Dekretu Lei ne’ebe iha fó kompetensia ba seksaun Patrimonio Estadu, katak sasan sira ne’ebe mai husi liňa Ministeriu ne’e seksaun Patrimonio Estadu iha kompetensia atu rekolla no konsentra iha kampaun tuir mai depende ba jestaun Patrimonio Estadu.

José Paulo esplika tan katak sasan hirak ne’ebe rekolla ona bele halo doasaun ou lelaun inklui transporte sira hanesan motor no kareta, hanesan responsavel sei halo tuir pedido ne’ebe mai husi liňa ministeriu ou instituisaun.

Sasan sira ne’ebe rekolla tuir pedidu ne’ebe iha hanesan sasan atu destroi, parte Patrimonio Estadu sei asegura sasan hirak ne’e iha armazen Tasi-Tolu maske nia kondisaun grave no sasan hirak ne’ebe maka ekipa Patrimonio Estadu identifika ou hare’e sei iha valor atu sai fali osan maka sei submete kedas.

Ekipamentus elektronika hirak ne’ebe maka husi parte seksaun IT PNTL nian ho kondisaun grave tebes maibé dezisaun atu halo destroisaun ou lae, ne’e kabe kompetensia superior Patrimonio Estadu nian. Total Ekipamentus elektronika ne’ebe maka seksaun Patrimonio Estadu nian foti maka hanesan: CPU hamutuk 81, Monitor 27, UPS 49, Mouse 25, Keyboard 89, Laptop 10 no Printer hamutuk 16.

Media PNTL.         

Dili- Komandu Polisia Nasional Timor-Leste (PNTL) realiza jogu Futebol Salaun (FUTSAL) PNTL cup hodi hametin relasaun entre Polisia ho Komunidade no entre joven ho joven.

Xefe Komisaun organizadora Superintendente Assistente Antonio da Luz hateten jogu ne’e hanesan kontinuasaun husi jogu ne’ebe maka realiza iha tinan 2018 ba Taxa PNTL Cup no taxa rotativa manan husi klubu FC Kaicardante tanba ne’e tinan ida ne’e realiza fila-fali nune’e klubu sira ne’ebe maka partisipa kompete hodi  manan Taxa rotativa ne’ebe maka iha, tanba taxa rotativa ne’e permanente wainhira klubu ida manan taxa ne’e dala tolu tui-tuir malu, Nia hato’o asuntu ne’e iha kampu Futsal BOP kaikoli Dili, Segunda (22/07).

Nia haktuirtan liu husi jogu ne’e mos sei halo selesaun ba ekipa futsal nasional ne’ebe sei prepara atu partisipa iha eventu nasional no internasional ba torneiu futsal.

Premiu ne’ebe maka sei fornese ba manan nain sira maka I lugar osan $1500.00 + taxa permanente no Taxa rotativa, II lugar $1000.00 + Taxa, III lugar $750.00 + Taxa no IV lugar $500.00 + Taxa.

Jogu ne’e sponsor husi kompania Esilva Car Rental, Pertamina Internasional Timor, kompania TELEMOR, kompania Heineken no Instanshop.

 Iha okajiaun ne’e reprejentante FFTL Sr. Quintão hateten Futsal hanesan elementu futebol ida inportante tebes ne’ebe ema bolu  five site game ne’ebe elabora iha diresaun tekniku FFTL nian.

Husi diresaun tekniku hakarak hateten imi kompete didiak ba tanba kompetisaun futsal mos laos atu joga deit iha nivel klubu iha Dili laran deit maibe dala barak ita timormos reprezenta Timor-Leste ba iha kompetisaun futsal Internasional iha AFF no AFC nian iha Azia.

Federasaun hato’o mensajen ba jogador sira ne’ebe maka hola parte iha jogu ne’e atu bele  compete ho esportivu no didiak no kadi didiak imi nia talenta individu ka ekipa atu ita mos bele iha no hetan selesaun iha tempu oin mai

Jogu ne’e realiza tanba servisu hamutuk PNTL ho Federasaun Futebol Timor-Leste (FFTL) hodi halo preparasaun no realiza eventu ida ne’e no torneiu ne’e sei halao iha loron Sabadu no Domingo lorokraik iha Kampu Futsal Kuartel BOP kompania Alfa hahu iha loron 22 de Jullu to’o Setembru.

Klubu ne’ebe maka rejista hodi compete iha jogu amizade ne’e hamutuk 23 kompostu husi FC MOP, FC Boa Sorte, FC Bermeta, FC Esilva, FC Battosae, FC Casardante, FC Madohi, FC VDL, FC Amor Timor, FC Kuartel Jeral PNTL, FC Acpol, FC Because United, FC Estrela Baguia, FC Ramelau, FC Maudoko,   FC RRCN FC Triple, FC DLP, FC Gijel, FC Gezema Bataka, FC HFC, FC Mankodo no FC Becusi de Baixo.

Klubu ne’ebe maka joga iha abertura maka klubu FC Boa Sorte VS klubu Battosae ne’ebe asisti husi Komandante BOP Superintendente Abrão Quintas, Main Sponsor Sr. Sevastião no adeptus sira. Media PNTL

Dili, Diresaun VPU (Vulnerable Person Unit) Polísia Nasional Timor-Leste (PNTL) hahu’u husi fulan Janeiru to’o agora rezista kazu Violensia Domestika hamutuk 128.

Xefe VPU Nasional Inspector Ricardo da Costa iha sexta-feira (19/07) liu ba wainhira sai orador iha aktividade Kampaña no Sosializasaun Prevensaun Krime ne’ebe organiza husi Departamento Policiamentu Comunitario Nacional (DPCN) ba Joventude no Komunidade sira iha jardim 5 de Maio Kolmera hateten husi númeru Kazu Violensia ne’ebe rezista, iha kazu Tráfiku Umanu ida maka foin akontese.

“Kazu sira agora dadaun númeru ass ne’e uza Media Sosial no hemu tua lanu, Media Sosial mak ohin hau koalia dala-barak ita livremente uza telefone diak sira ne’e hodi asesu ba informasaun maske telefone ne’e ninia diak ne’e iha maibé balun uza sala bele impaktu ba sira, dala-ruma fen ou laen halo komunikasaun ho ema ruma depois halo tiha ninia servisu iha uma laran tomak”, esplika Xefe VPU Nasional ne’e.

Inspector Ricardo haklean tan kazu hirak ne’e akontese tanba fen-laen utiliza sala media sosial, facebook (FB) lao tiha ona, mais sei nafatin husu númeru WhatsApp (WA) ho intensaun sira ne’e sira komesa lori malu ona ba hamosu Krime Violensia Domestika no Violensia Seksual.

“Tanba ne’e maka husi parte VPU rasik halo ona programa ida “Prevene Sedu” ho nia aktividade koalia kona-ba Think You Know →Saida Maka Ita Hare iha Telefone Laran, Saida maka Ita Koalia ba Malu no Saida maka Ita Halo, tanba ne’e programa ne’e iha loron 24 fulan Maiu 2019 liu ba, lansa ona husi Ministra Edukasaun no Komandante Jerál hodi hala’o programa ne’e iha eskola sekundaria munisipiu sira hotu”, haktuir Inspector ne’e.

Programa ne’e ho intensaun ida katak foka ba iha estudante sira ne’ebe iha eskola sekundaria, hodi hasa’e sira nia koñesimentu, tanba estudante sira ne’e maioria ho idade ne’ebe produtivu, bainhira sira akaba ou finaliza sira nia estudu balun forma uma kain, sira bele iha ona koñesimentu kona-ba Lei kontra Violensia Domestika. Nune’e aban bain-rua sira iha oan, sira bele hatutan informasaun ida ne’e ba sira nia oan, entaun ba tinan 10 oin mai, ita labele koalia bebeik ona krime violensia domestika tanbe ne’e bele reduz ona.

Media PNTL.

Dili, Komandu Polísia Nasional Timor-Leste (PNTL) liu husi Departamento Policiamentu Comunitario Nacional (DPCN) iha sexta-feira fim-de-semana liu ba hala’o aktividade Kampaña no halo Sosializasaun Prevensaun Krime ba Joventude no Komunidade sira iha jardim 5 de Maio Kolmera.

Diretór DPCN Superintendente Assistente António da Luz hafoin halo abertura hateten objetivu husi aktividade refere primeiru maka basea ba planu Polísia Komunitaria nian hakarak atu halo sosializasaun informasaun liu-liu kona-ba kampaña prevensaun krime nian ba ita nia joven sira, ba ita nia komunidade sira ne’ebe maka iha sidade Dili nian.

“Tanba ne’e ohin ami hala’o aktividade ne’e hamutuk ho parte Tránzitu nian, Investigasaun no mós Gabinete Apoiu Jurídiku atu bele fahe informasaun liu-liu kona-ba kódigu Estrada nian, kona-ba VPU (Vulnerable Person Unit) problema violensia domestika no mós ba iha Lei Nu. 5/2017 kona-ba Arma Branka no Arte Marsias nian”, tenik Diretór DPCN ne’e.

Superintendente Assistente ne’e afirma tan aktividade ne’e ita hotu iha esperansa katak liu husi dezeminasaun informasaun sira ne’e ita nia komunidade sira liu-liu ita nia joven sira atu bele komprende no mós bele evita hahalok sira ne’ebe maka kontra-bandu no kontra Lei.

“Liu-liu ba ita nia estudante sira, dala-barak sira mak sai hanesan transformador informasaun ba komunidade sira entaun sira mós bele komprende didiak oinsa maka bele hatutan informasaun sira ne’e ba ita nia komunidade liu-liu ba inan-aman sira, ba joven sira ne’ebe hela besik nune’e sira bele fahe tutan informasaun sira ne’e ba maluk sira seluk”, hatutan Superintendente Assistente António.

Aktividade ne’e sei kontinua halo iha kada sexta-feira no iha semana oin tuir planu ne’ebe maka iha aktvidade hanesan sei hala’o iha Jardim Largo Lecidere, semana tuir tan iha Jardim Igreja Motael oin liu-liu iha fatin sira ne’ebe maka joven sira halibur ann ba. Aproveita oportunidade iha oras ida ou rua nia laran fahe netik informasaun ba sira.

Tuir Diretór DPCN ne’e katak aktividade ida ne’e sei hala’o mós iha eskola sira hanesan eskola Sekundariu no mós Universitariu sira atu fahe informasaun sira ne’e ba sira no mós informasaun sira liga ba seguransa, oinsa maka ita husu ba komunidade/sosiedade hotu atu bele kontribui ba seguransa hodi kria estabilidade no paz iha rai ida ne’e.

Aktividade ne’e hala’o ho maneira lori Banda Musika, toka halo animasaun. Hafoin parte Tránzitu, Investigasaun no mós Gabinete Apoiu Jurídiku nian fahe informasaun, hala’o mós sesaun pergunta ba joven sira ne’ebe maka partisipa no hirak ne’ebe hatan pergunta sira ne’e, hetan premiu pasta no kadernu. Observasaun Media PNTL nian durante aktividade ne’e hala’o estudante, joventude, labarik no komunidade sira ne’ebe hela besik Jardim 5 de Maio apresia hodi partisipa aktividade ne’e to’o remata.

Media PNTL.