Uncategorized

Dili- Komandu Polisia Nasional Timor-Leste (PNTL) munisipiu Liquisa sei kontinua buka tuir autor prinsipal ne’ebe maka oho vitima no subar hela.

Komandante PNTL munisipiu Liquica Interinu Superintendente Asisstente Luis da Silva hateten ami kontinua halo operasaun hodi buka tuir suspetu nain ida ne’e’ebe maka agora subar aan ba mai hela hodi bele responsabilija hahalok ne’ebe nia halo, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Tersa (16/07).

Nia haktuirtan suspetu ne’e diskumfia hanesan autor prinsipal tanba nia maka oho vitima nia alin tanba ne’e maka ami sei buka tuir nia, Arguidu ida seluk oho vitima nia maun maka kumpri hela  medida koasaun prijaun preventiva.

“Kazu ne’e liu ona tempu entaun hein mandadu kapturasaun husi Ministeriu Publiku maibe ami promote katak ami sei kaer nia ho apoiu husi povu no Autoridade lokal sira karik hetan informasaun ruma passa mai Polisia no hau fiar katak ami sei kaer.”

Komandante Luis esplika liutan tuir informasaun katak agora daudaun suspetu ne’e hafoin halo krime nia halai mai Dili, Ermera tanba ne’e hau kontaktu ona Komandante munisipiu Ermera no Dili para buka tuir nafatin.

Entretantu Komunidade hamutuk nain 53 maka refujia hela iha Komandu munisipiu Liquica tanba ne’e komponente hotu iha munisipiu Liquica hanesan Ministeriu Solidaridade Sosial, Ministeriu Saude, Ministeriu Edukasaun fo apoiu ba sira no Komandu PNTL fo apoiu seguransa nafatin.

Refujiadu sira ne’e iha mos estudante nain 15 kompostu husi nain 3 eskola iha nivel Secúndaria, no seluk Pré-Secúndaria tanba ne’e ami koalia ho diretur edukasaun munisipiu Liquica mai ami nia fatin identifika katak estudante  Pré-Secúndaria sira ne’e distansia besik entaun provijoriu sira sei eskola nafatin no nain tolu Secúndaria ne’e sei muda ba Liquica vila hodi eskola iha neba.

Komandu munisipiu Liquica hamutuk ho autoridade sira kontinua halo dialogu ho komunidade parte rua atu bele reintegra hikas sira wainhira iha ona nomeasaun ba Xefe suku foun.

 Situasaun ikus iha loron 13/07 lorokraik Komandu munisipiu Liquica simu informasaun katak arte marsiais balu mos rasa sira nia planu atu asalta merkadu Liquisa sai hanesan Leorema tanba ne’e maka foin dadaun iha loron 14/07 purvolta tuku 2 ka tolu lorokraik ami Alerta-1 tama sai merkadu atu revista negosiante no komprador sira ne’ebe mai bazaar karik lori sasan kroat.

“Agora daudauk hau orienta ona ba Komandante Eskuadra tolu (3) para Ofisial Polisia Suku (OPS) hotu-hotu iha sira nia fatin no Komandu mos halo Alerta-1 halo servisu oras 24 atu bele atende  situasaun saida deit maka akontese”.

PNTL kaptura ona suspetu nain 13, nain ida (1) kumpri ona desijaun Tribunal hodi aplika medida koasaun prijaun preventiva, no nain 10 seluk iha ona prosesu.

Kazu ne’e involvemos Xefe suku Leorema ne’ebe maka nudar membru husi grupu arte marsiais ne’ebe maka governu taka ona, no Xefe suku ne’e rasik oras ne’e iha hela Komandu munisipiu Liquica.

 Kronolojia akontesementu iha loron (04/07) akontese komfrontus grupu rua asalta malu no rezulta ema nain rua (2) mate, nain tolu (3) kanek todan, uma 13 hetan sunu, motor hitu (7) hetan sunu, no uma tolu (3) hetan estragus. Media PNTL

Dili- Komandu Polisia Nasional Timor-Leste (PNTL) halo reuniaun Konsellu Superior Extra Ordinaria hodi diskute kona-ba proposta alterasaun Lei Organika PNTL, Regulamentu Disiplinar no Estatutu.

Sekretariu Konsellu Superior Superintendente Xefe Carlos Jeronimo hateten liu husi reuniaun ne’e ekipa tekniku aprezenta Proposta Alterasaun Lei ba Komandante Munisipiu no Unidade sira atu fo sira nia opiniaun depois Sekretariadu Konsellu Superior halo notulen hodi prepara pareser ida para  Komandante Jeral haruka ba Ministru Interior Interinu Filomeno Paixão, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Tersa (16/07).

Nia haktuirtan proposta ne’e sei halo revijaun ba artigu balu tuir nesesidade Instituisaun PNTL no nia membru tomak; Ho alterasaun ne’e sei fo forsa no hakbiit Komandante Jeral nia kompetensia atu foti desijaun tomak ba nia membru maibe tanba nasaun Timor-Leste hanesan Estadu Demokratiku maka maske Komandu PNTL foti ona desijaun maibe membru ne’e bele rekore dala ida deit ba Ministru Interior.

Alende projetu tolu kona-ba Lei Organika PNTL, Regulamentu Disiplinar no Estatutu ita iha mos Normas Organizasaun no Prosedimentu (NOP) rua (2) kona-ba Oinsa Uza no Aguarda Kilat nomos Orsamentu Alimentar.

“Diskusaun ohin lao ho diak no ita espera katak ita hetan opiniaun ne’ebe mai husi Komandante sira atu bele dezenvolve no hariku liutan Lei sira ne’ebe orsida atu halao ba.”

Atu termina atual Inspetor Jeral ne’e tau esperansa katak ho diskusaun ohin bele hamosu Estatutu PNTL tanba  durante Instituisaun PNTL nia ejistensia tinan 19 to’o agora seidauk iha Estatutu rasik no ami halo esforsu tomak atu nune’e diskusaun ne’e bele remata ohin.

Reuniaun Konsellu Superior Extra Ordinaria ne’e prezidi husi Prezidente Konsellu Superior Komisariu Faustino da Costa akompaña husi Sekretariu Konsellu Superior Superintendente Xefe Carlos Jeronimo no partisipa husi Komandante munisipiu 12, komandante PNTL RAEO, Komandante Unidade Espesial Polisia (UEP), Komandante Unidade Patrullamentu Fronteira (UPF), Komandante Unidade Polisia Maritima (UPM) no membru Konsellu Superior sira. Media PNTL

Dili, Komandu Polísia Nasional Timor-Leste (PNTL) sexta-feira (12/07) semana kotuk halo mudansa ba estrutura Komandu munisipiu nian hodi fó posse ba Komandante munisipiu Aileu basea ba Despasu Nu.198/CG-PNTL/VII/2019 hodi nomeia Superintendente Jorge Nelson Amado Monteiro no Xefe Servisu Investigasaun Krimanal Nasional (SIKN) interinu basea ba Despasu Nu.199/CG-PNTL/VII/2019 hodi nomeia Inspector Xefé Mouzinho Tavares Correia.

Komandante Jerál PNTL Komisariu Polísia Faustino da Costa iha ninia intervensaun husu ba enposadu na’in rua atu bele kria aktividade ruma iha sosiedade, veteranu no komunidade sira le’et hodi bele manan fila fali konfiansa sira nia mai instituisaun PNTL.

“Mantein ita nia servisu hodi bele hetan nafatin konfiansa husi komunidade ne’ebe mak ita servi ba no dezafiu bo’ot mak hau atu fó ba Inspector Xefe Mouzinho, sé tinan oin maka governu deside taka PSIk (Polísia Siêntifika Investigasaun Kriminal) hodi matein PNSIK (Polísia Nasional Siêntifika Investigasaun Kriminal) hau agradese tebes”, hateten ho koragem ba enposadu na’in rua ne’e.

Komisariu Polísia agradese ba Superintendente Jorge ne’ebe maka durante ne’e didika ann hodi hala’o servisu diak iha PNSIK ho relatoriu sira ne’ebe aprezenta mai Komandu klaru no kompletu tebes, husu atu mantein nafatin servisu diak ba iha Komandu Munisipiu Aileu.

Partisipa iha serimonia simples ne’e Superintendente Xefé Carlos Jerónomi, Superintendente Xefé Pedro Belo, Superintendente Xefé José Soares no Superintendente Xefé Armando Monteiro. Serimonia ne’e hala’o iha gabinete Komandante Jerál PNTL.

Media PNTL.  

Dili, Komandu Polísia Nasional Timor-leste (PNTL) hahu’u husi loron 14 fulan Juñu to’o inisiu fulan Jullu tinan ne’e rezista asidente hamutuk 127, iha ne’ebe husi númeru refere ema na’in 8 mak mate.

Komandante Jerál PNTL Komisariu Polísia Faustino da Costa no Segundu Komandante Jerál Komisariu Polísia Mateus Fernandes, quinta-feira (11/07) ne’e hasoru malu ho Presidente Repúblika (PR) Dr. Francisco Guterres Lu-Olo hodi informa situasaun rai laran inklui akontesimentu sira ne’ebe maka akontese ikus-ikus ne’e. Hafoin enkontru ba media Komisariu Polisia Faustino esplika katak durante fulan ida maka Komandu la informa aktividade polísia nian ba PR tanba aktividade PR nian, maka ohin ami mai aprezenta fila fali aktiviadade polísia ninian.

“Informa situasaun jerál teritoriu nasional lao diak, kalma dala-ruma preukupasaun maka akontesimentu ikus-ikus, ida ne’e mós ohin ami aproveita informa ba PR kona-ba akontesimentu loron 4 fulan ne’e nian iha Bazartete-Liquiça, nune’e mós kazu ida loron 29 iha Qelikai kuandu iha Señora ida mate, ida tan maka kazu hatalik ann ne’ebe iha Dili no mós iha Liquiça, ida ne’e ami informa hotu, inklui saida maka polísia halo kona-ba kazu sira ne’e”, esplika Komandante Jerál PNTL ne’e.

Komisariu Polísia Faustino hatutan alénde ne’e ami informa mós kona-ba asidente husi loron 14 Juñu to’o inisiu fulan Jullu ne’e iha kazu asidente hamutuk 127 akontesimentu husi númeru ne’e bele dehan katak iha fulan ida nia laran ema na’in 8 mak mate, Komandu mós halo ona karta ba Governu sá maneira, sá aktividade ou solusaun maka ita atu hare’e oinsa bele reduz ema ne’ebe kada fulan sempre mate ba halo aktividade viagem tantu ho karreta no mós lao ain.

Kontinuasaun Kazu Leorema-Liquiça

Relasiona ho akontesimentu ne’ebe maka akontese iha suku Leorema munisipiu Liquiça foin lalais ne’e, Komisariu Polísia Faustino esplika,”Iha xefe familia hamutuk 13 maka Komandu PNTL Liquiça asegura hela tanba kestaun seguransa ne’ebe sira rasik preukupa, balun uma laiha tanba sira nia uma hetan sunu hanesan hau dehan ona ba imi katak Komandu munisipiu hamutuk ho Presidente municipal oinsa maka ita bele responde primeiru maka emergensia, segundu maka ninia kontinuasaun ba ida ne’e será que ita atu halo dialogu hodi integra fila fali komunidade sira ne’e”.

Preukupasaun agora maka entre ema na’in 53 ne’ebe iha Komandu munisipiu ne’e, sira ne’e ema na’in 14 maka estudantes, agora imagina kuaze semana ona maka sira labele partisipa aula, ita koalia ida ne’e tanba farda no sira nia sasan sira seluk hetan sunu no sira fila sente tauk no trauma tanba ne’e maka parte Komandu munisipiu no administrasaun mós ita nafatin será iha posibilidade ou lae atu sira halo transferensia imediatu ba fatin seluk, maibe ida ne’e diskusaun ne’ebe iha nivel Komandu munisipiu halo hela.

Preparasaun Loron 30 Fulan Agostu, Komandu PNTL Hasai Ona Diretiva ba Komandu Munisipiu

Hatan ba preparasaun seguransa ba eventu 30 Agostu, Komandante Jerál PNTL ne’e informa katak ita koalia kona-ba 30 Agostu laos ami hein to’o 30 Agostu. Tanba ne’e diretiva balun ami fó ona ba Komandu munispiu sira atu koordena ho Presidente Autoridade no mós administrador munisipiu sira, sá aktividade ou eventu maka presiza inisia agora. Hanesan ita hotu akompaña katak kooperasaun ida ne’e, ita fó mós ba laos deit munisipiu sira iha liur maibé kapital nasional. Tanba ne’e kapital nasional alénde ita fó ba Komandu munisipiu Dili, husi Komandu Jerál mós deseña hela programa balun katak ami ho Forsa sei hare’e hamutuk saida maka ami sei halo antisipa ba iha loron 30 Agostu.

Media PNTL.  

Dili- Komandu PNTL ho autoridde munisipiu Liquica halo kordenasaun servisu atu reintegra hikas komunidade hirak ne’ebe maka sai vitima ba kazu komfrontasaun iha munisipiu Liquisa suku Leorema hodi husik hela sira nia hela fatin.

Komandante Jeral PNTL Komisariu Faustino da Costa hateten Komandu PNTL hamutuk ho autoridade munisipal ho Xefe departamentu sira kordena oinsa atu reintegra komunidade sira ne’ebe maka sai husi sira nia hela fatin, iha tempu hanesan haremos estudante sira ne’ebe la eskola tanba sira nia roupa sunu hotu. Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Kuarta (10/07).

Hafoin akontesmentu komfrontus iha loron 04/07 Komandu PNTL halo evakuasaun ba komunidade hamutuk 53 mai hela iha Komandu PNTL Liquisa nune’e PNTL bele fo siguransa ba sira no evita mosutan vitima.

Komisariu ne’e haktuirtan alende ne’e internalmente PNTL koloka postu temporariu iha suku Leorema hodi bele asegura seguransa ba komunidade hirak ne’ebe maka hela iha neba no prevene atu komflitu hanesan ne’e la akontesetan.

Relasiona ho suspetu ba kazu komfrontasaun ne’e Komandante Jeral hateten to’o horseik dia 10/07 PNTL halo kapturasaun hodi deteintan ema nain 12 suspetu hirak ne’ebe maka detein alende munisipiu prosesu suportamos husi investigasaun nasional tanba kazu ne’e grave.

Antes ne’e liu husi primeiru interogatoriu Tribunal Distrital Dili (TDD) aplika medidaun koasaun prijaun preventiva ba arguidu SP ne’ebe maka rekonñese halo krime omisidiu ba vitima sira .

Kronolojia akontesementu iha loron (04/07) akontese komfrontus grupu rua asalta malu no rezulta ema nain rua (2) mate, nain tolu (3) kanek todan, uma 13 hetan sunu, motor hitu (7) hetan sunu, no uma tolu (3) hetan estragus. Media PNTL

Dili- Komandu PNTL halo enkontru revizaun ba Lei Organika PNTL Lei Nu. 9/2009 , Regulamentu Disiplinar Lei Nu. 13/2004 no Estatutu pessoal Polisia antes aprezenta ba Konsellu Superior

Komandante Jeral PNTL Komisariu Faustino da Costa hateten Komandu PNTL halo enkontru ho Ofisiais Superior iha Kuartel Jeral ne’ebe involve Asesor husi PNTL no Ministeriu Interior (MI) hodi halo revijaun ba Lei Organika, Regulamentu Disiplinar PNTL no Estatutu Pessoal Polisia ne’ebe maka durante ne’e ami prepara hela, Nia hato’o asuntu ne’e ba jornalista sira iha Kuartel Jeral PNTL Kaikoli Dili, Kuarta (10/07).

Nia haktuirtan ita boot sira akompaña durante ne’e ami prepara, koalia konaba Estatutu, Lei Organika no Regulamentu Disiplinar  para depois dokumentu hirak ne’e hotu ekipa husi MI aprezenta tia ona ba Ministru Interior Interinu Filomeno Paixão no Ministru fo fila ba PNTL atu halo revizaun depois lori ba Konsellu Superior.

Dokumentus hirak ne’e ami halo revizaun antes semana oin hodi hetan apresiasaun  antes aprezenta dokumentus final fila-fali ba Ministru.

“Ami sei halo revizaun antes konvida Komandante sira hotu mai semana oin para hetan apresiasaun husi Konsselu Superior,” dehan Komandante Jeral.

Enkontru ne’e diriji husi Komandante Jeral akompaña husi Segundu Komandante Jeral Komisariu Mateus Fernandes no partisipa husi Ofisiais Superior iha Kuartel Jeral PNTL ho prejensa husi Asesor Juridiku PNTL no Ministeriu Interior. Media PNTL 

Dili, parseiru desenvolvimentu The Asia Foundation (TAF) sexta-feira (05/07) semana kotuk halo apresentasaun ba survey ne’ebe maka halo durante tinan 2018 kona-ba Persepsaun Polísia No Komunidade ba Komandu Polísia Nasional Timor-Leste (PNTL).

Komandante Jerál PNTL Komisariu Polísia Faustino da Costa iha intervensaun hateten agradese tebes ba Fundasaun Asia ne’ebe maka halo survey ida ne’e hodi hatudu servisu polísia nian hodi atende konflitu iha komunidade durante tinan 2018 nia laran.

“Governu Nova Zelandia durante ne’e apoiu barak ona mai PNTL hanesan halo Uma ba Ofisial Polísia Suku (OPS) no mós halo formasaun no kapasitasaun ba membru sira ne’ebe maka hatudu momos ona iha Diploma Ministerial ida katak sira ne’ebe tuir hela iha Kursu Promosaun Ofisia Superior nian iha materia ida maka kona-ba Polisiamentu Komunitariu”, tenik Komandante Jerál PNTL ne’e.

Iha fatin hanesan, Country Director Fundasaun Asia Paulina hateten sei la koalia liu ba survey ne’ebe maka halo ba PNTL maibé koalia liu kona-ba Suvey ne’ebe Fundasaun Asia halo iha fatin barak no halo Survey ba dala sanulu-resin-hitu no survey bo’ot liu maka halo iha rai Afganistan.

“Survey ida ne’e atu identifika area sira ne’ebe maka presiza atu hadia no area sira ne’ebe halo servisu diak liu tan, iha rai Srilanka ami mós halo survey no mai besik liu ho polísia Srilanka nian hodi hare’e sira nia problema no fó tulun ba problema sira ne’ebe sira hasoru”, hateten Country Director Fundasaun Asia ne’e.

Paulina salienta tan katak durante ne’e ami servisu diak tebes ho PNTL no survey ida ne’e ba dala lima nian no informasaun hotu iha survey ida ne’e prepara husi ami nia ekipa no sei aprezenta ba ita bo’ot sira hotu no ami nia sujestaun atu Governu sé bele karik mós rona no hatene kona-ba saida deit maka PNTL presiza atu bele hala’o servisu diak liu tan.

Hafoin ekipa TAF halo aprezentasaun ba resultadu survey ne’ebe maka halo, Komandu PNTL mós hato’o kedas resposta ba informasaun hotu iha survey ne’e liga ba servisu PNTL nian.

Media PNTL.  

Dili- Komandu Polisia Nasional Timor-Leste (PNTL) munisipiu Liquica detein ona suspeitu nain ida (1) ne’ebe diskumfia involve iha komfrontus ne’ebe maka akontese iha suku Leorema munisipiu Liquisa ne’ebe rezulta vitima nain rua (2) mate no halo estragus.

Portavos PNTL Superintendente Xefe Pedro Belo hateten PNTL detein ona suspeitu nain ida (1) iha sela Komandu munisipiu Liquisa hodi submete ba investigasaun, no sei buka tuir suspetu seluk ne’ebe maka iha indikasaun involve iha kazu ne’e hodi responsabiliza ba hahalok ne’ebe maka sira halo hodi hatan ba justisa iha Tribunal, Nia hato’o asuntu ne’e iha Komferensia Emprensa Sexta (05/07) iha Kuartel Jeral PNTL Kaikoli Dili.

Nia haktuirtan vitima ne’ebe maka mate oras ne’e daudauk iha ona Hospital Nasional Guidu Valadares hodi halo otopsia no vitima nain tolu (3) ne’ebe maka kanek todan mos iha ona Ospital hodi halo tratamentu.

“Suspetu ne’ebe maka detein sei iha prosesu investigasaun nune’e la publika nia identidade maibe nia mos lider ida husi organizasaun no kaer organizasaun”.

Agora daudauk iha fatin akontesementu situasaun lao normal tanba hodi kalan kedas membru Unidade Espesial Polisia (UEP) seksaun Task Force no Patrulamentu to’o kedas iha fatin akontesementu no kontinua buka tuir grupu hirak ne’ebe maka involve iha duni malu no asaltu malu hodi servisu hamutuk ho komunidade sira iha neba atu buka tuir suspetu sira.

Komandante Operasaun ne’e komfirma katak komunidade barak mak halai sai husi sira nia fatin tanba ne’e ohin ekipa husi Polisiamentu komunitaria munisipiu Liquisa fo avizu ba komunidade sira atu fila ba sira nia hela fatin no Unidade Espesial no Komunidu munisipiu Liquisa sei asegura nafatin hodi fo garantia ba komunidade sira atu fila fali ba sira nia hela fatin.

Kronolojia akontesementu horseik (04/07) komunidade sira iha tempu bazaar  ema hotu ba neba maka iha tuku 16:00 derepente mosu akontesementu grupu rua asalta malu no rezulta ema nain rua (2) mate, nain tolu (3) kanek todan, uma 13 hetan sunu, motor hitu (7) hetan sunu, no uma tolu (3) hetan estragus maibe atu hatene motivu lolos ita entrega ba investigasaun tanba kazu ne’e oras ne’e daudauk sei iha hela prosesu investigasaun no rezultadu investigasaun maka deskobre kauza ne’e saida los.

Atu prevene kazu hanesan akontese iha munisipiu seluk maka iha orientasaun Komandante Jeral liu husi Komandu Operasaun hasaitan orientasaun ida ba Komandu munisipiu 12, RAEOA, no Unidade sira hodi antisipa liu husi halo patrulamentu, halo auto stop para prevene no kopera hamutuk ho autoridade lokal sira, Prezidente Autoridade sira, veteranu sira no parte igreja hotu-hotu atu kopera ho sira para kazu ne’e labele mosutan iha fatin seluk.  Media PNTL

Dili, Komandu Polísia Nasional Timor-Leste (PNTL) tersa-feira (02/07) ne’e realiza Workshop ida hodi diskuti Submisaun Orsamentu Jerál Estadu (OJE) ba tinan 2020 nian ne’ebe maka partisipa husi Komandante Munisipiu, Xefe Administrasaun no Pontu Fokal sira PNTL nian.

Komandante Jerál PNTL Komisariu Polísia Faustino da Costa iha ninia intervensaun ba partisipantes sira hateten ita iha ne’e atu halo diskusaun kona-ba Orsamentu PNTL nian ba iha tinan 2020, Orsamentu ne’ebe ita sei hetan iha 2020 sei refere ba programa no sub-programa sira ne’e Komandante sira ita hotu koloka ona iha ita nia diskusaun iha loron balun hirak liu ba ne’e duni husu ba Komandante sira dala ida tan husi Ministerio Finansas.

“Ho nune’e programa hirak ne’e husu ba Komandante sira apar halo didiak, ida ita interpreta ita nia programa sira ne’e ba práktiku periodu ida ne’e nian ita tenta iha programa governu nian ba tinan ha’at- tinan lima, ita naran hatudu mai tau ba tinan ida entaun ita interpreta menus governu sei hamenus ho itensaun ita sei presiza separa mais importante ida Presidente ne’e importante saida mak ita hakarak tau ita bele hetan”, tenik Komandante Jerál PNTL ne’e.

Komisariu Polísia Faustino salienta tan katak se ita hakarak 2020 ita nia eskuadra ita nia Komandu munisipiu labele iha 2020 mós ita tau kedas osan ba mobiliarios Komandante sira presiza apar ida ne’e sé 2020 ita hakarak halo miliaun atus ida iha 2020 ita tenke-ser antisipa projetu loke programa depende ba ohin hau dehan prioridade ita agora halo ba Komandu iha segundu trimester garante ga lae uma ne’e sei hotu iha fulan ne’en nia laran tamba se lae osan mobiliarios to’o Dezembru nia laran laiha buat ruma depois fila nonok deit ita hotu iha ne tau ideas, maibé parte Komandu Administrasaun sei halo prezensaun ba ita bo’ot sira hodi hetan hodi hetan ideas mais klarus depois tuir mai sei tama ba fase diskusaun pois hetan osan ba programa sub-programa nian sé ita bo’ot sira husu proridade saida mak Komandu sira hakarak atu fo ita bo’ot sira.

Entretantu, Komandante Komandu Administrasaun PNTL Superintendente Xefe José Soares hateten iha intervensaun katak importante tebes ba ohin loron, iha loron tolu nia laran Komandante, pontu fokal, xefe administrasaun atu koloka orsamento tinan 2020 ninian atu nune’e iha tinan oin mai ita bele ezekuta didiak.

“Iha tinan 2019 ezekusaun ba orsamento la hanesan tinan ba kotuk diferente tebes husi kategoria ba item no Komandante sira balun akompaña didiak entaun aproveita iha submisaun ida ne’e iha tempo ida agora PNTL iha ne’ebe ona iha Estadu ida ne’ebe ita hakarak atu ba ne’ebe atu nune’e ita bele hatene, atu nune’e ita bele hatene ita nia Estadu ho lao ba oin atu nune’e kontinuasaun ita nia hakarak dala-ruma la hanesan ita nia hakarak buat hotu koloka tuir ita nia hakarak maibé dala-ruma to’o iha ezekusaun ita labele ezekuta tamba kapasidade ita nian hanesan mós iha tinan ida ne’e iha verbal balun ita labele ezekuta ba iha tradusaun nian ho mós verbal sira seluk”, tenik Komandante Komandu Administrasaun PNTL ne’e.

Superintendente Xefe José akresenta tan katak entaun klaru governu liu husi ministeriu interior ne’e mak foka liu ba iha area hitu ba iha Polisia Komunitariu, Tránsitu, UPF, Feminia, dezenvolve Infrastutura ho sira seluk la signifika katak sira seluk la importante, importante hotu maibé ita tau importante ensima de importante ita hare’e dala-ruma iha verbal balun ba membrus sira nia moras koloka ba iha distritu sira dala ruma ita uza mós ladun los tamba osan ita koloka ona ita moras oituan ona ita ba tratamentu diak ona mais ita husu tamba orsamentu iha ita mai husu Komandu hasai osan ida ne’e ona iha mós verbal sira seluk ita entaun ita tau iha prioridade tuir ita nia kapasidade ne’ebe mak ita jere iha tinan 2020 atu nune’e ita bele jere ho diak hau espera katak pontu fokal, xefe administrasaun ho komandante sira elabora ona hanoin hamutuk atu nune’e iha submisaun ida ne’e bele lao ho diak iha ezekusaun tuir mai ita bele hala’o ho diak.

Workshop ne’e sei hala’o durante loron tolu hahu’u husi loron 02 to’o loorn 04 fulan Jullu 2019.

Media PNTL.

Dili- Partisipante Curso Promosão a Ofisial Superior (CPOS) iha Institutu Defeza Nasional (IDN) nain 38 halo vizita estudu mai Kuartel Jeral Polisia Nasional Timor-Leste (PNTL) hodi hare no rona direta servisu ne’ebe maka instituisaun seguransa ne’e halao.

Supervijor Kursu Polisiais no Militar Tanente Koronel Alberto Santos hateten partisipante hirak ne’e agora mai iha terrenu hodi hare kompatibilidade teoria ne’ebe maka sira aprende ho pratika ne’ebe agora halo daudaun iha terrenu tanba iha sira nia kursu koalia mos konaba efikasia no efisiensia iha organizasaun hotu-hotu, Nia hato’o asuntu ne’e ba Media PNTL iha Kuartel Jeral PNTL Kaikoli Dili, Sexta (28/06).

Nia haktuirtan hafoin vizita ne’e partisipante sira sei halo relatoriu konaba vizita ne’e, saida maka sira hare no realidade iha terrenu ne’e oinsa iha komparasaun ho teoria ne’ebe maka sira aprende iha IDN para iha futuru depois de kursu ne’e karik sira promove ba Superintendente Assistente ou Maijor sira hatene ona  saida maka tenke halo wainhira sira dezempena kargu ruma hanesan Ofisiais Supeiror iha sira nia instituisaun rasik.

“Hau nia esperansa katak aban bainrua depois de kursu ne’e sira bele iha mudansa signifikativa iha sira nia lideransa tanba sira ne’e futuru Komandante no mudansa signifikativa iha sira nia atuasaun, iha sira nia linguajen, sira nia komportamentu no seluktan,” dehan Tanente Koronel Alberto Santos.

Iha Okajiaun ne’e Inspetor Jeral PNTL Superintendente Xefe Carlos Jeronimo ne’ebe maka simu vizita husi partisipante sira ne’e hateten Ofisiais Inpetor hamutuk nain 23 hamutuk ho Ofisiais Kapitaun 12 husi F-FDTLno Tanente nain tolu hosi Forsa Naval  ohin mai halo vizita estudu ida nee atu hodi rona Komandu Jeral nia  efetivu sira, ema servisu kolokadu iha ne’ebe deit no halo saida, ida ne’e maka ita esplika ba no esplika mos konaba servisu saida maka ita halo.

Komandante Carlos haktuirtan Ita fo dadus hirak ne’e ba sira tanba PNTL sira hetan mos koñesementu husi Dosente sira husi Komandu Jeral espesialmente ba area Polisial nian sira aprende iha neba no ohin sira mai hamutuk atu rona fila-fali area ne’ebe ita ba hanorin ona no sira mai halo perguntas balu relasionadu ho area hirak ne’ebe maka inportante relasiona ho servisu hirak ne’ebe PNTL halo.

“Ita nia esperansa katak sira hotu aprende hamutuk para hakbiit sira nia kapasidade lideransa atu sai lideransa no bele sai lider ida diak iha aban bainrua,” dehan Inspetor Jeral PNTL.

Partisipante hirak ne’e kompostu husi PNTL nain 23 no F-FDTL nain 15 ne’ebe maka halao kursu iha IDN hahu iha fulan Fevereiru tinan 2019 to’o Fevereiru 2020.

Iha loron 27 partisipante hirak ne’e halo ona vizita estudu ba Centru Formasaun Polisia (CFP) no Unidade Espesial Polisia (UEP). Media PNTL