Uncategorized

Dili, Komandu Polísia Nasional Timor-Leste (PNTL) hetan apoiu ekipamentus banda músika ne’ebe maka oferese husi BARESKRIM POLRI ( Bagian Kriminal Polisi Repúblik Indonesia).

Komandante Jerál PNTL Komisariu Polísia Julio da Costa Hornay iha serimonia entrega ekipamentus banda músika ne’ebe hala’o iha iha sexta-feira ne’e (02/03) iha salaun enkontru Kuartél Jerál PNTL, hateten ohin ita hala’o serimonia ida entrega ekipamentus banda músika nian ne’ebe maka parte Komandu husu apoiu ba POLRI no apoiu ne’e hanesan apoiu gratuita ida ba PNTL.

“Ida halo liu husi servisu hamutuk kooperasaun entre PNTL ho POLRI, liu-liu iha Singapore wainhira PNTL partisipa iha ASEANAPOL, ami iha bilateral meeting ida entre hau ho KAPOLRI koalia kona-ba asuntu servisu hamutuk liu-liu koalia kona-ba  Memorandum of Understanding (MoU) ne’ebe uluk asina ona entre Komandante Jerál sesante (Dr.Longinhos Monteiro) ho KAPOLRI iha momentu ne’eba ita koalia atu kontinuasaun ba ida ne’e”, tenik governante PNTL ne’e.

Komisariu Polísia Julio da Costa Hornay akresenta liu tan katak MoU refere koalia buat balun deit kona-ba kapasitasaun, ita hare’e buat barak mosu tempu ikus-ikus ne’e presija ita atu halo ita nia koordenasaun diak liu entau koalia ba ida ne’e atu hatama tok planu refere iha MoU iha tempu oin mai.

“Ami mós koalia ba malu atu oinsa servisu hamutuk atu kombate droga, kombate aktus krime (Trans National Crime) ida ne’e atu servisu hamutuk ho sira tanba POLRI rasik sira iha esperiensia lubuk bo’ot ida ho ekipamentus sira ne’ebe maka avansadu liu atu bele detekta kriminozu sira, tanba ne’e maka ita servisu hamutuk ne’e kooperasaun ita hasa’e atu oinsa planu hirak ne’ebe maka ita seidauk koloka iha MoU ita bele hatama hotu”, hatutan Komandante Jerál PNTL ne’e.

Iha biban hanesan, KABARESKRIM POLRI Komjer Pol. Aridono Sukmanto iha ninia intervensaun ba serimonia ne’e hato’o ninia esperansa katak ho apoiu ekiapmentus banda músika ne’e bele halo PNTL iha komunidade nia le’et sai hanesan instituisaun ida ne’ebe tenke sente orgullu no apresia ho servisu polísia nian ne’ebe fó seguransa ba ninia komunidade.

“Ami nia vizita ne’e atu mai halo kontinuasaun ba servisu hamutuk ne’ebe maka halo uluk ona no iha enkontru bilateral iha momentu aktividae ASEANAPOL iha ne’ebe PNTL nu’udar mitra-dialog husi ASEANAPOL iha momentu ne’eba, ami halo akordu bilateral entre na’in ulun POLRI no Komandante Jerál PNTL koalia atu oinsa kontinuasaun ba MoU ne’ebe mak iha ona maka hanesan aktividade operasional, formasaun sira ne’e hotu ho objetivu atu hametin diak liu sinergitas no apresiasaun husi instituisuan rua ne’e”, hateten KABARESKRIM POLRI ne’e.

Komjer Pol. Aridono Sukmanto subliña liu tan katak iha momentu aktividade ASEANAPOL ne’e, Komando PNTL hato’o katak menus ekipamentus banda músika nian no ami sente katak nu’udar polísia ho polísia  iha dever ne’ebe hanesan katak fó seguransa ba komunidade karik ita apreszenta buat ne’ebe diak no futak maka komunidade sei sente haksolok ho ita nia presensa.

Partsipa iha serimonia entrega ekiapmentus banda músika ne’e Komandante Jerál, Segundu Komandante Jerál, ofisias Superior no delegasaun KABARESKRIM POLRI. Iha serimonia ne’e, PNTL mós fó lembransa ba kada membru delegasaun refere.

Media PNTL.       

Dili, Komandu Polísia Nasional Timor-Leste (PNTL) ofisialmente simu ekipamentus ofisina nian ne’ebe suporta husi governu Estadus Unidus Amerika liu husi parseiru desenvolvimentu United Nation Development Programme (UNDP).

Dili, Komandu Polísia Nasional Timor-Leste (PNTL) ofisialmente simu ekipamentus ofisina nian ne’ebe suporta husi governu Estadus Unidus Amerika liu husi parseiru desenvolvimentu United Nation Development Programme (UNDP).

Komandante Jerál PNTL Komisariu Polísia Julio da Costa Hornay iha ninia intervensaun ba serimonia ne’ebe hala’o iha resintu ofisina PNTL Kuartél Jerál Kinta-feira (01/03) ne’e hateten lori Komandu Jerál PNTL nia naran hato’o agradesimentu ba povu Amerikanu liu husi ninia embaixada Estadus Unidus Amerika nian iha Timor-Leste no UNDP ne’ebe iha vontade diak katak apoiu instituisaun PNTL ninia desenvolvimentu ba oin.

“Apoio ida ne’e laos primeira vés, maibé apoiu ne’e dala barak husi UNDP mai tantu hahu’u husi kapasitasaun ba pesoal PNTL iha area Rekursu Umanu, iha area IT, iha area Lojistika dala barak maka UNDP ajuda mai desenvolvimentu instituisaun ida ne’e”, tenik Komandante Jerál PNTL ne’e.

Komisariu Polísia Julio da Costa Hornay salienta liu tan katak ohin ita simu ekipamentus ofisina ida ne’e no ami espera katak sasan hirak ne’ebe maka UNDP apoio mai ita, ita bele utiliza ho diak no responsabiliza ho diak atu sasan hirak ne’e bele dura ba tempu naruk no ita bele hadia ita nia transporte hirak ne’e hodi apoiu ba servisu PNTL.

“Apoiu ida ne’e mai, liu husi estudu ida ne’ebe naruk desde tinan kotuk liu ba, durante UNDP nia presensa iha PNTL sira halo analisa ida ou estudu ida que parte saida maka importante apoiu ba PNTL, iha area lojistika de faktu katak ita nia mékaniku professional iha, maibé ekipamentus maka menus hodi suporta sira hodi hadia ita nia viatura sira, entaun sira halo proposta ida hodi hetan apoiu orsamentu”, hatutan governante PNTL ne’e.

Iha fatin hanesan embaixadora Estadus Unidus Amerika iha Timor-Leste Kathleen Fitzpatrick iha nia entrevista hafoin serimonia ne’e hateten ohin onra bo’ot ida ba hau mai hamutuk iha ne’e ho Komandante Jerál PNTL no UNDP nia director atu fó ekipamentus ba PNTL tanba ekipamentus hirak ne’e importante tebes ba operasaun PNTL nian no ami mós sei apoiu formasaun ou treinamentu ba mékaniku sira.

“Ami apoiu ona Timor-Leste desde ninia independensia iha area barak, area ida mak atu hametin instituisaun demokratika sira inklui PNTL tanba ita hotu hatene katak PNTL sai hanesan elementu ida ne’ebe importante iha prosesu demokratizasaun nasaun ne’e nian”, tenik embaixadora Estadus Unidus Amerika iha Timor-Leste ne’e.

Iha sorin seluk mós Country Diretor UNDP Claudio Provides iha ninia intervensaun hateten parte UNDP hakarak espresa ninia prestasaun ba povu no governu amerikanu ne’ebe maka fó suporta ba PNTL liu husi UNDP iha Timor-Leste.

“Suporta ne’ebe oferese ne’e maka ho objetivu hodi reforsa servisu jestaun frotas PNTL nian iha nivel nasional no regional sira, jestaun ba frotas PNTL ne’ebe oras ne’e hadia dadaun ne’e sei presija nafatin tulun nune’e bele asegura diak liu tan prestasaun servisu PNTL nian”, tenik Country Diretor UNDP ne’e.

Partisipa iha serimonia ne’e Komandante Jerál PNTL, Segundu Komandante Jerál PNTL, embaixadora Estadus Unidus Amerika iha Timor-Leste, Country Diretor UNDP, ofisias PNTL inklui mékaniku ofisina PNTL nian.Media PNTL.

Dili, Komandu Polísia Nasional Timor-Leste (PNTL) servisu hamutuk ho Ministeriu Saude (MS) Timor-Leste no International Organization for Migration (IOM) segunda-feira ne’e (26/02) hala’o programa Screening/X-Ray no Diagnostica ba moras Tuberculoze ba membru PNTL tomak.

Segundu Komandante Jerál PNTL Komisariu Polísia Faustino da Costa iha ninia intervista hafoin  serimonia abertura programa Screening/X-Ray no Diagnostica ba moras Tuberculoze ne’e hateten aktividade refere hanesan oportunidade diak ida no importante duni katak PNTL hanesan instituisaun ne’ebe maka sempre ninia ema hetan risku ba buat hotu-hotu.

“Alem de ida ne’e nia misaun atu servi no protégé ema, oinsa nia protégé ema ida sé karik nia rasik iha iha kondisaun inseguru liu-liu kona-ba moras ne’e afeta ba profesionalizmu tanba ne’e maka ohin hau dehan ida ne’e hanesan oportunidade diak ida ba membru PNTL sira hotu”, tenik Segundu Komandante Jerál PNTL ne’e.

Komisariu Polísia Faustino da Costa mós agradese ba Ministeriu Saúde no IOM ne’ebe bele indika katak PNTL sai hanesan alvu ida ou tragetu ida ba iha programa ida ne’e.

Iha fatin hanesan, Vise Ministru Saúde Timor-Leste Dr. Luis Lobatu hateten ohin oportunidade diak tanba MS hanesan Ministeriu tutela ba programa Tuberculoze iha Timor-Leste hatu’ur programa ida in-kooperasaun ho IOM ho fundu ida $250.000 atu halo indentifikasaun ba membrus polísia no F-FDTL ho mós komunidade iha munisipiu ha’at hanesan Ermera, Maliana, Oecusse no Covalima atu identifika sé maka moris ho mikrobakteri Tuberculoze.

“Hanoin ida ne’e mosu tanba Tuberculoze bele kona ba sé deit, dala ruma ita isin bele bokur hela mas ita bele moris hela ho Tuberculoze dala barak ita hanoin katak ema isin krekas sira maka hetan moras Tuberculoze, tanba ne’e maka importante ba MS no ba ita hotu atu bele buka hatene ita nia kondisaun rasik”, hateten Vise Ministru Saúde Timor-Leste ne’e.

Dr. Luis Lobatu salienta liu tan katak Tuberculoze laos moras att ida, dala ruma ema barak tauk atu dehan nia Tuberculoze tanba ema dehan katak Tuberculoze ne’e moras husi avó sira (Keturunan) lae, Tuberculoze laos moras familia nian maibé Tuberculoze moras ema idak-idak nain dependente liu ba nia ekonomia, ninia maneira atu moris no tanba ne’e duni maka  governu Timor-Leste em nome MS hanoin katak presija atu halo deteksaun ida atu detekta iha membrus polísia no F-FDTL sé maka iha risku ba moras Tuberculoze.

Partisipa iha serimonia ne’ebe hala’o iha salaun BOP (Batallaun Ordem Públika- COP A) Caicoli ne’e Xefe Misaun IOM iha Timor-Leste Camila Ribeiro, Vise Ministru Saúde, Segundu Komandante Jerál PNTL, Xefe Unidade Asistensia Klinika no Manuntensaun Saúde PNTL inklui  membrus PNTL sira.

Media PNTL.              

Dili, atu komemora aniversariu Polísia Nasional Timor Leste (PNTL) ba dala XVII iha tinan ida ne’e, maka Komandu PNTL sei realiza aktividade ho naran “Tasa PNTL” hanesan desportu liu-liu jogu Futsal.

Komandante Komandu Operasaun PNTL Superintendente Xefe Henrique da Costa ne’ebe sai hanesan koordenador prinsipal ba komisaun Organizadora Futsal PNTL 2018 iha enkontru ho komisaun ne’ebe hala’o iha loron segunda-feira ne’e (19/02) iha Kuartél Jerál PNTL hateten enkontru refere hanesan sorumutu ba dala ikus preparasaun molok realiza aktividade Futsal “Tasa PNTL” ne’ebe maka tuir planu sei realiza iha loron 24 fulan ida ne’e to’o iha loron 19 fulan Marsu tinan 2018.

“Ita nia objetivu hala’o aktividade futsal ida ne’e iha pontu prinsipais tolu maka hanesan, primeiru atu kria amizade entre Polísia ho komunidade hodi garante paz no estabilidade iha Timor Leste, segundu hodi komemora aniversariu PNTL ba dala XVII ne’ebe maka sei hala’o iha loron 27 Marsu 2018 no terseiru ninian atu loke oportunidade ba iha juventude sira ne’ebe maka iha talentu ba futsal ninian”, tenik Komandante Komandu Operasaun PNTL ne’e.

Superintendente Xefe Henrique da Costa salienta liu tan katak oportunidade ida ne’e loke ba públiku liu-liu ba juventude sira ne’ebe mak iha koñesimentu kona-ba futsal hodi bele hatudu sira nia kbi’it liu husi kompetisaun ida ne’e tanba ne’e maka ita hakarak organiza hodi loke ba públiku atu bele partisipa.

“Ita loke ona registrasaun hahu’u iha loron 12 fulan Fevereiro no registrasaun ne’e sei taka iha loron 22 Fevereiro dader molok iha lokoraik ita sei halo teknikal meeting ba iha ekipa sira ne’ebe maka regista ona atu nune’e bele halo sorteiu no esplika tan regras ruma molok tama ba iha kompetisaun iha loron 24 Fevereiro nian”, hatutan Superintendente Xefe ne’e.

Komisaun Organizadora ba aktividade refere kompostu husi Koordenador, Vise Koordenador, Sekretariado, Seksaun Tekniku, Seksaun Média, Seksaun Arbitrajen, Seksaun Meja, Seksaun Finansa, Seksaun Sponsor no Seksaun Saúde.

Media PNTL.   

Dili, Komandu Polísia Nasional Timor-Leste (PNTL) liu husi Komandu Administrasaun tersa –feira ne’e (13/02) partisipa iha enkontru kooordenasaun servisu projetu ne’ebe maka durante ne’e PNTL halo ho parseiru desenvolvimentu United Nation Development Programme (UNDP).

Komandante Administrasaun PNTL Superintendente Xefe Mateus Fernandes iha ninia entrevista perante sesaun enkontru ne’e hateten enkontru refere hanesan sorumutu annual ida ne’ebe bain-bain PNTL halo ho parseiru UNDP ne’ebe naturalmente fó ajuda ba PNTL no objetivu husi enkontru ne’e maka atu halo avaliasaun servisu durante ne’e.

“Ita hotu hatene katak UNDP naturalmente fó ajuda ba PNTL no enkontru ida ohin ne’e atu avalia servisu, saida maka parte rua koopera halo ona iha tinan kotuk no saida maka ami hare’e atu iha tinan 2018 halo ba oin”, tenik Komandante Administrasaun PNTL ne’e iha salaun enkontru Hotel Ramelau Dili.

Superintendente Xefe Mateus Fernandes salienta liu tan katak avaliasaun ne’ebe halo iha area barak mak hanesan Rekursu Umanu, Infrastrutura no apoiu sira seluk hanesan UNDP instala mini ofisina PNTL iha munisipiu Maliana, Oecusse no Baucau.

“Karik ho ajuda ne’ebe UNDP halo instala ekipamentus ba mini ofisina ba fatin tolu refere, ne’e bele fó ona ajuda ba PNTL tanba karik atu presija troka oli, troka roda sira iha munisipiu la presija halo viajen mai Dili maibé sira halo deit ona iha mini ofisina ne’ebe maka instala ona”, subliña Superintendente Xefe ne’e.

Entretantu, Xefe UNDP Asistant Country Diretor Mariano Carmo iha sesaun entrevista ba jornalsita sira hateten enkontru ne’e importante atu bele husi UNDP grupu ne’ebe servisu hamutuk ho PNTL atu bele halo konsulta hodi hare’e servisu ne’ebe maka sei halo iha tinan 2018 nia laran.

“Tanba mai halo parseria ho PNTL kleur ona hahu’u husi tinan 2013 hafoin misaun ONU nian iha Timor-Leste hotu, UNDP tama kedas mai servisu hamutuk ho PNTL hodi hare’e area boa governasaun nian iha area administrasaun, rekursu umanu, planeamentu, jestaun ba frontas, IT no iha area komunikasaun, oras ne’e ami mós servisu ho PNTL iha area jender hahu’u husi Kuartél Jerál sei to’o ba iha munisipiu hotu-hotu”, hateten Xefe UNDP Asistant Country Diretor.

Mariano Carmo akresenta liu tan katak iha tinan hirak liu kuando eleisaun nasional ida ne’e parte UNDP servisu parseria ho PNTL realiza workshop seguransa ninian ba munisipiu hotu-hotu no resultadu hatudu katak iha eleisaun liu ba buat hotu lao diak, eleisaun lao ho susesu.

“Iha tinan ida ne’e, ohin Komandante sira mós husu atu oinsa prepara ann tan hala’o workshop sira iha munisipiu hotu hodi prepara ba eleisaun antesipada ne’ebe sei mai”, hatutan Mariano Carmo.

Partisipa iha enkontru koordenasaun ne’e Komandante Administrasaun PNTL, Komandante Planeamentu, Komandante Relasaun Públika, Diretor Interinu departamentu Rekurusu Umanu, Komandante Lojistik no representante departamentu IT.

Media PNTL.    

Ermera, iha loron sexta-feira (09/02) iha salaun Kuartél Komandu Polísia Nasional Timor-Leste (PNTL) munisipiu Ermera hala’o workshop kona-ba avaliasaun ba programa pilotu ne’ebe apoiu husi parseiru PAPK-Polísia Nova Zelandia.

Iha workshop ne’ebe hala’o durante loron ida, programa ne’ebe hala’o maka hanesan treinamentu komputador, formatu insidente & asidente, formatu vizita no formatu relatoriu.

Partipantes iha workshop ne’e Komandante Eskuadra PNTL munisipiu Ermera, Ofisial Polísia Suku (OPS) no xefe seksaun hotu iha komandu PNTL munisipiu ne’e.

Realizasaun workshop ne’e fasilita husi parseiru Polísia Nova Zelandia no The Asia Foundation (TAF).

Media PNTL.

Dili, Comissão Nacional Eleição (CNE), Komandu Polísia Nasional Timor-Leste (PNTL) no Falintil Forsa Defeza Timor-Leste (F-FDTL) sexta –feira ne’e (09/02) realiza konferensia imprensa iha salaun CNE Vila-Verde hodi koalia kona-ba Sistema Seguransa No Defeza Ba Susesu Eleisaun Antesipada Parlamentar 2018 iha Timor-Leste.

Presidente CNE Alcino Barris iha konferensia ne’e hateten ho honra bo’ot maka ohin ita konsege halibur ann iha fatin ida ne’e hamutuk ho dirijente husi instansia oin-oin ne’ebe hamutuk ho CNE atu bele fahe no entende kona-ba oinsa ita atu atúa liu-liu hasoru Eleisaun Antesipada (EA) ne’ebe oras ne’e dadaun kona-ba data sei hein deit Presidente Repúblika (PR) sei Dekreta iha tempu badak.

“Koalia kona-ba Eleisaun ema barak ladun entende diak nia forma atu oinsa organiza no dala-ruma tanba ita ladun entende ho diak, laiha ita atúa tun ba terenu ita dezeorganizadu, oras ne’e dadaun eleisaun ne’ebe ita sei hasoru maka eleisaun antesipada hafoin eleisaun ne’ebe ita konklui tiha, eleisaun jerál 2017 parlamentar maibé oras ne’e tenke hala’o fila-fali”, tenik Presidente CNE ne’e.

Alcino Barris salienta liu tan katak ho preukupasaun ba eleisaun antesipada no hare’e suspeita karik iha tensidade disputa entre konkorentes sira (partidu politiku-red) ami iha kualidade nu’udar orgaun eleitoral ne’ebe hatu’ur kedas iha Konstituisuan RDTL orgaun ne’ebe tau matan ba aktus eleitoral ne’ebe deit liu-liu ba eleisaun antesipada ida ne’e.

Iha fatin hanesan Xefe Estadu Maior Jeneral F-FDTL Major Jeneral Lere Anan Timur ne’ebe partisipa mós iha konferensia ne’e hateten ba ita ne’ebe toma konta ou responsabiliza ba defesa no seguransa ita iha misaun ida ne’ebe espesifiku nu’udar misaun ida ne’ebe propriu.

“Hanesan hau dehan katak ita instituisaun rua ne’e (PNTL no F-FDTL) laos iha ne’e atu reprime deit maibé diak liu maka prevene atu problema labele mosu, ohin ita koalia kona-ba eleisaun antesipada la kleur fulan ida rua tan ita tama ona ba iha prosesu eleisaun antesipada”, hateten Xefe Estadu Maior Jeneral F-FDTL ne’e.

Major Jeneral Lere Anan Timur subliña liu tan katak Timor laos demokrasia nia hu’un maibé fó lisaun, fó exemplu hanorin ba demokrasia, demokrasia ba nasaun seluk ne’ebe desenvolvidu liu ita.

Komandante Jerál PNTL Komisariu Polísia Julio da Costa Hornay ne’ebe partisipa mós iha konferensia ne’ebe hala’o iha salaun CNE ne’e hateten parte seguransa preparadu ona ba EA antes Presidente Repúblika foti desizaun parte seguransa preparadu ona atu bele asegura prosesu tomak hahu’u husi kampaña eleitoral to’o ba eleisaun, kontajen, anunsiu to’o formasaun governu.

“Só atu fó hanoin ba CNE kona-ba sosializasaun ba ita nia povu tomak atu bele entende diak liu regras eleisaun atu labele iha violasaun iha prosesu eleisaun nia laran tanba se lae ajente seguransa maka sei hasoru problema ida ne’e direta no kada vez mós sira nia atuasaun ne’e fanu fali Provedoria Direitus Humanu atu hateke fali para kritika fila fali katak atuasaun viola direitu sidadaun nian maibé servisu maka hanesan ne’e”, koalia Komandante Jerál PNTL ne’e.

Komisariu Polísia Julio da Costa Hornay haktuir liu tan katak seguransa nia presensa iha fatin votasaun maka atu asegura tomak prosesu eleisaun ida ne’e atu bele lao tuir nia dalan.

Partisipa iha konferensia ne’e Presidente Comissão Anti Corupção (CAC), Provedoria Direitus Humanu e Justisa (PDHJ), Komisariu CNE tomak no hetan partisipasaun másimu husi Komandante PNTL munisipiu 13.

Media PNTL.       

Dili, relasiona ho realizasaun Eleisaun Antesipada (EA), Komandu Polísia Nasional Timor-Leste (PNTL) hala’o enkontru ho Komandante PNTL Munisipiu sira iha kinta-feira ne’e (08/02) hodi koalia kona-ba preparasaun seguransa EA iha teritoriu tomak.

Komandante Jerál PNTL Komisariu Polísia Julio da Costa Hornay iha intervensaun ba enkontru ne’e hateten iha loron hirak liu ba Presidente Repúblika deside ona katak sei hala’o EA no agora dadaun partidu lubuk ida ona maka komesa konsola ba malu atu halo koligasaun iha EA.

“Ita espera katak Eleisaun agora partidu la barak ona no situasaun ne’ebe maka ita hasoru iha kampaña ne’e sente dala-ruma bele konfrontu malu oituan karik iha kampaña programa balun maka sira koalia balun iha ona programa sétimu governu ninian no atu antesipa kestaun ida ne’e maka Komandante munisipiu sira tenke servisu makas”, tenik Komandante Jerál PNTL ne’e.

Komisariu Polísia Julio da Costa Hornay salienta liu tan katak Komandante munisipiu sira tenke servisu makas maka ita nia Ofisial Polísia Suku (OPS) no polísia Komunitariu sira tenke servisu makas ho Komandante sira nia vizita ho Komandante sira nia akumula veteranus sira ne’e no mós autoridade lokal sira atu bele sosializa nafatin, fó hanoin nafatin ba ita nia povu katak politika maka hanesan ne’e duni, demokrasia maka hanesan ne’e duni.

“Ita labele preukupa ho nervozu tanba kestaun ida rua maibé ita nia demokrasia maka hanesan ne’e duni iha Konstituisaun no politika maka hanesan ne’e, importante liu maka ema hotu-hotu tenke tur hakmatek laos ita haksoit ba baku malu fali hodi manan eleisaun, lae maibé iha estasaun de votu maka sei determina, importante liu maka Komandante sira nia servisu agora ne’e atu halo sosializasaun atu ita nia povu bele entende”, hatutan Komisariu Polísia ne’e.

Iha biban ne’e mós Komandante Jerál PNTL hato’o ninia apresiasaun liu husi monotorizasaun ne’ebe Komandu halo ba servisu Komandu munisipiu 13 sira nian durante ne’e lao diak tebes no ne’e hanesan susesu bo’ot ida tanba Komandante sira nia servisu makas no mós aktividade polísiamentu komunitariu nian, sosializasaun sira ne’e, koordenasaun diak ho autoridade lokal sira no veteranu sira, juventude sira tanba ne’e maka buat hirak ne’e lao hakmatek to’o ohin loron.

“Dala-ruma ita bele dehan povu agora ne’e iha maturidade politika maibé laos ida ne’e deit tanba ita nia presensa, ita nia esplikasaun, ita nia envolvimentu to’o ba iha baze ne’e maka konvense povu ida ne’e sente katak los duni ita moris iha ambiente hakmatek ida ne’e importante ba ita tanba ne’e parabens ba Komandante sira, ita espera katak iha EA mais servisu ida ba ita tanba iha eleisaun tolu ita liu ho diak no susesu agora EA ne’e koko fali ita nia kapasidade seguransa”, subliña na’in ulun PNTL ne’e.

Enkontru ne’ebe preside husi Komandante Jerál PNTL ne’e akompaña husi Komandante Administrasaun no hetan partisipasaun másimu husi Komandante PNTL munisipiu 12 inklui regiaun espesial Oecusse.

Media PNTL.

Dili, Komandu Polísia Nasional Timor-Leste (PNTL) prontu asegura seguransa iha loron Eleisaun Antesipada (EA) ne’ebe sei hala’o iha tempu besik.

Komandante Jerál PNTL Komisariu Polísia Julio da Costa Hornay haktuir katak, ohin loron 5 Fevereiru la kleur tan ita tama ona fulan Marsu ba selebrasaun loron aniversariu PNTL aumesmu tempu preparasaun ba seguransa Eleisaun Antesipada.

“Ita hotu akompaña, asiste inderekta no direkta ba desizaun ne’ebe estadu foti ba nasaun nia vida ba oin, nia progresu desenvolvimentu Presidente deside hodi entrega fila fali ba povu atu determina signifika servisu bo’ot ida ba forsa seguransa atu asegura dala ida tan ba Eleisaun Antesipada ne’ebe tuir Konstitusaun Repúblika depois 60 dias foin anunsia kalendariu ba eleisaun ninian”, haktuir Komandante Jerál PNTL iha serimonia isar bandeira ne’ebe hala’o segunda-feira ne’e (05/02) iha Kuartél Jerál Kaikoli Dili.

Komisariu Polísia Julio da Costa Hornay subliña liu tan katak tuir Konstitusaun Repúblika depois 60 dias foin anunsia kalendariu ba eleisaun ninian ne’e katak iha loron 26 fulan Marsu Presidente sei anunsiu kalendariu, atu antesipa ida ne’e husu ba Komandu Administrasaun no Komandu Operasaun atu prepara saida maka ita atu bele prepara ba lalaok operasaun iha terenu tomak, iha teritoriu laran no mós saida maka ita bele fó apoio ba operasaun iha terenu.

“Hanesan ita koalia tiha ona atu bele prepara saida maka governu de forsa ba apoiu ita hodi asegura eleisaun antesipada ida ne’e, hala’o kna’ar ho diak, iha inisiativu labele hein husi parte operasaun, parte logistika, parte finansas, parte aprovesionamentu atu koopera ba malu bele aselera saida maka ita iha direitu atu bele uja aselera nia prosesu ho diak atu iha 60 dias nia laran ne’e ita bele hanoin no prepara buat ruma”, tenik Komandante Jerál PNTL ne’e.

Kona-ba transporte, Komandu iha planu atu aluga kareta atu bele rekoopera kareta sira iha munisipiu ne’ebe iha hela manuntensaun preparasaun ba eleisaun, parte logistika tenke servisu maka’as atu komunika parte saida deit maka falta ba Komandante sira atu bele aselera. Ho situasaun politika hanesan  ne’e, kada ema ida por ida hahu’u husi Segundu Komandante Jerál tun to’o ba ajente sira entende misaun PNTL nian. Polísia nia misaun atu halo seguransa, polísia nia misaun laos atu mete iha politika. Politika ita bele entende saida maka politika, maibé prátika politika maka la autoriza.

“Hanesan Komandante Jerál no Segundu Komandante Jerál ami fó hanoin que ita hotu-hotu hatene katak ita nia pozisaun neutru no imparsialidade, maibé nu’udar Komandu ami sempre fó hanoin ba ita hotu tanba dala-barak ita tau hanesan ne’e, ita rona isu barak maibé hau sempre hateten hau nia membru la mete ida ne’e, se karik ita bo’ot sira iha dadus ruma favor ida esplika mai hau para hau bele foti medida imediatu”, apela na’in ulun PNTL ne’e perante membru sira hotu.

Media PNTL.                

Dili, Komandu Polísia Nasional Timor-Leste (PNTL) tersa-feira foin lalais ne’e asina Memorandum of Understanding (MoU) ho Polísia Indonesia (POLRI) liu husi Badan Nasional Narkotika Kabupaten (BNNK) atu bele servisu apoio malu hodi kombate droga.

Komandante Jerál PNTL Komisariu Polísia Julio da Costa Hornay hafoin hasoru malu ho ekipa BNNK hateten MoU ida ne’e halo hodi parte rua bele koopera malu hodi prevene no kombate kazu droga sira ne’ebe maka karik tama mai Timor-Leste.

“Ida ne’e maka servisu ne’ebe maka PNTL ho POLRI halo iha tinan hirak liu ba husi 2009 to’o mai ohin loron hanesan kazu ida ne’ebe maka foin dadaun akontese wainhira ita nia Unidade Polísia Marítima (UPM) prende kazu ida ne’e maka komunika ba malu hodi sira nia reprezentante mai atu hotu-hotu bele hare’e hodi fó informasaun ba malu kona-ba sasan sira ne’ebe maka agora iha kontainer laran”, tenik Komandante Jerál PNTL ne’e.

Komisariu Polísia Julio da Costa Hornay subliña liu tan katak situasaun ida ne’e Komandu koordena kedas Prokurador Jerál Repúblika (PJR) atu oinsa aplika tuir Lei ne’ebe maka ita iha no ita kumpri saida maka ita nia Kódigu Penal hateten para depois prosesu ida ne’e kuando to’o nia rohan bele hetan nia legalidade.

“Hotu tiha ida ne’e hau sei ba hato’o ba iha PJR hodi hare’e asuntus legais ne’ebe maka presija atu prense nune’e rekezitus Lei ne’e ita tenke kumpri saida maka iha ita nia rai tanba kazu ne’e ninia akontesimentu iha Timor-Leste tanba ne’e ita komunika no koordena nafatin ho PJR hodi hetan orientasaun”, hateten Komisariu Polísia.

Iha fatin hanesan, Komandante BNNK Roten Ndao Nusa Tenggara Timur Komisaris Polisi Lino do Rosario hateten presensa parte BNNK nian mai atu hare’e sampel sira husi aimoruk hirak ne’ebe maka UPM prende foin lalais ne’e iha portu Dili hamutuk kontainer sira (9) no sei halo koordenasaun ho parte PJR liu husi Komandu PNTL.

“Ami hein husi Komandante Jerál PNTL no sampel refere atu halo teste iha ne’e ou rai liur depende ba Komandu PNTL no mós PJR tanba buat hotu tenke tuir Lei rai ida ne’e nian, servisu hamutuk ida ne’e bain-bain ami halo tiha ona iha tinan 2009, 2011 ne’e mak maluk balun halai ba Indonesia ne’e kaer hotu no lori mai”, tenik Komandante BNNK ne’e.

Komisaris Polisi Lino do Rosario apresia tebes ho servisu PNTL nian tanba prende ona kontainer sia (9) ne’e, signifika sira salva ona joven sira barak liu iha Indonesia ne’e hanesan prestasaun diak ida tanba ne’e parte BNNK hato’o apresiasaun diak ida ba Komandu PNTL liu husi servisu ida ne’e.

Media PNTL.