Uncategorized

Dili- Komandu Polisia Nasional Timor-Leste (PNTL ) no Falintil- Forsa Defeza Timor-Leste (F-FDTL)  apela ba povu Timor-Leste atu selebra Natal no Tinan Foun ho paz no hakmatek  tanba selebrasaun loron inportante ne’e nesesita ambiente ne’ebe nakonu ho estabilidade no paz

Komandante Jeral PNTL Komisariu Julio da Costa Hornay hateten loron Natal 2017 no tinan foun 2018 inportante no nesesita tebes ambiente ne’ebe nakonu ho estabilidade no paz iha biban ida ne’e PNTL no F-FDTL ne’ebe toma responsabilidade maximu ba estabilidade no  paz apela ba sidadaun hotu ne’ebe hela no moris iha rai ida ne’e atu hakmatek no fo imi nia kontribuisaun tomak nune’e sidadaun hotu livre no avontade festeza loron boot ne’e, Nia hato’o asuntu ne’e liu husi konferensia Inprensa komandu PNTL no F-FDTL Natal no Tinan Founiha Seguransa ne’ebe realiza iha Kuartel Jeral PNTL Kaikoli Dili, Tersa (12/12).

Komisariu Julio haktuir katak Komandu PNTL no F-FDTL bazeia ba despaixu Ministru Defeza no Seguransa hasai ona diretiva operasaun en kordenada ba Komandu Operasaun hodi elabora planu operasaun kordenada ne’ebe feitu no prontu ona hodi inplementa atu asegura nafatin estabilidade no paz iha rai laran to’o situasaun politika atual lao normal, tuir misaun ne’ebe maka hakerek ona iha konstiotuisaun da Republika ho inparsial no neutru ba nasaun no povu nia moris hakmatek.

“Ami sei halo patrulamentu enkordenada tantu ho kareta no lao ain to’o bairu-bairu no sei halo prevensaun no atuasaun karik individu ka grupu balu hanoin ka kria konflitu hodi kria instabilidade tanba ne’e husu atu hapara ona attitude hirak ne’e hodi kontribui ba estabilidade no paz,” dehan Hornay.

Alende ne’e sei halo cek point ba transporte privadu no publiku hodi hare sasan kroat no pasajeru, utilijasaun transporte tenke tuir regras ne’ebe vigora. Transporte publiku labele tula pasajeru liu kapasidade viatura, motorista tenke tau inportansia ba vida pasajeru duke osan no bainhira la kumpri maka Polisia sei hatun no fo sansaun ba motorista sira.

Konaba prejepiu husu ba autoridade lokal iha nivel munisipiu servisu hamutuk no igreja katolika no seguransa hodi organiza no kontrola didiak nune’e prejepiu ne’ebe halo hanesan simbolu Natal nian tenke dignu laos uza prejepiu sai fatin toka muzika, hemu tua, baku malu no buat seluk ne’ebe la mostra identidade sarani katolika nian karik polisia hetan aktu hirak ne’e maka sei foti medidas ne’ebe forte.

Entertantu Xefe Estadu Maior Jeneral das F-FDTL  Brigaderu Jeneral Lere Anan Timur hateten Natal no Tinan Foun tinan ida ne’e bele diferente kompara ho tinan antes tanba ohin loron situasaun politika rai laran ladun favorese, maibe ita konfia katak nai ulun sira sei ultrapasa difikukldade hirak ne’e hodi hetan solusaun diak.

Instituisaun F-FDTL no PNTL lakohi tan mosu krize hanesan 2006, tanba 2006 lisaun boot ba ita no husu nai ulun sira atu rezolve ita nia problema  no lalika konvida ema seluk atu mai resolve, povu tenke iha maturidade no responsabilidade ba vida nasaun ida ne’e no bali didiak Independensia .

Atu hakotu Lere husu ba povu no joventude atu tur hakmatek maske komemora Natal ho Tinan Foun ho kiak no susar maibe dignidade ema ida-idak, familia, povu no nasaun inportante liu, sidadun hotu tenke tau iha konsiensia katak semaka moris iha timor, rai timor ninian tanba ne’e labele aproveita situasaun hodi kria instabilidade iha rai laran. Media PNTL

Dili, Ministru Defesa no Seguransa (MDS) ofisialmente halo abertura ba reuniaun Konsellu Superior Polísia Nasional Timor-Leste (PNTL) ne’ebe hala’o segunda ne’e (11/12) iha Kuartél Jerál PNTL.

Ministru Defesa no Seguransa Agostinho Sequiera ‘Somotxo’ hafoin loke enkontru refere ba jornalista sira hateten enkontru Konsellu ne’e laos hala’o ba dahuluk maibé hala’o desde tempu ne’ebe maka Presidente Konsellu Superior nian konvoka.

“Normalmente iha enkontru ne’e sira (PNTL) koalia kona-ba sira nia problema Komandu ninian, herakria Komandu tanba hau mós hanesan Ministru hau mai halo abertura depois hau se’es fali ba servisu seluk”, tenik MDS Agostinho Sequiera ‘Somotxo’.

MDS salienta liu tan katak objetivu enkontru Konsellu Superior ne’e normalmente diskute estratejia PNTL, estratejia operasionais no problema sira ne’ebe iha herakria Komandu ninian atu resolve poblema sira ne’e.

“Iha enkontru ne’e konserteza sira sei koalia mós kona-ba disiplina institusional PNTL nian tanba sira iha kedas regulamentu disiplinar”, hatutan MDS.

Hatan kona-ba situasaun seguransa em jerál iha rai laran relasiona ho tensaun politika ne’ebe maka akontese dadaun, MDS esplika,”Imi hotu hare’e, se problema ruma hau fiar imi jornalista sei buka hau mas kuandu imi la buka hau quer dizer buat hotu lao diak”.

Iha fatin hanesan Komandante Jerál PNTL Komisariu Polísia Julio da Costa Hornay hateten presensa MDS nia iha enkontru refere hodi halo intervensaun badak ba membru Konsellu Superior sira nu’udar dever hanesan Minsitru Defesa no Seguransa.

“MDS mai para atu halo intervensaun badak, aproveita ofisias superior sira hotu iha ne’e no kada Komandu hotu iha ne’e MDS nia dever atu fó intervensaun ba membru Konsellu Superior nu’udar Komandante sira ne’ebe kaer Komandu atu bele kaer sira nia servisu ho responsabilidade, neutralidade no imparsialidade labele afillia ba partidu politiku maibé mantein pozisaun nu’udar Komandu kaer nia servisu ho responsabilidade”, tenik Komandante Jerál PNTL.

Komisariu Polísia Julio da Costa Hornay subliña liu tan katak intervensaun MDS nia mós husu atu kada Komandu atu tuba metin iha Konstituisaun Repúblika nia leten hodi servi povu tomak ho nia neutralidade ne’ebe diak, honestu ne’ebe diak ba povu tomak iha rai doben Timor-Leste.

“Situasaun seguransa em jerál iha munisipiu 12 inklui kapital Dili lao kontroladu apesár problema ki’ik oan sira ne’ebe bain-bain akontese maibé polísia atendimentu sempre imidiatu, ami iha planu operasaun sela falta aban (12/12) sei halo konferensia imprensa ba Komandu rua (F-FDTL no PNTL) ne’ebe maka halo servisu enkoordenada hanesan uluk ami halo ba eleisaun Presidensial no Parlamentar hodi asegura loron Natal no tinan foun no mós antisipasaun karik iha problemas balun relasiona ho situasaun politika ne’ebe agora dadaun lao iha ita nia rai laran”, esplika Komisariu Polísia ne’e.

Partisipa iha enkontru ne’e ofisiais superior PNTL no Komandante PNTL munisipiu sira.

Media PNTL.       

Dili- Ministeriu Saude asina akordu ho Klinka Polisia Nasional Timor-Leste (PNTL ) hodi define responsabilidade kilinika PNTL fo asistensia ba nia membru.

Diretur Jeral Prestasaun Saude Dra. Odete Viegas hateten Maske PNTL no F-FDTL estabelese klinika kleur ona hodi fo asistensia saude ba membru sira no populasaun maibe foin maka halo akordu koperasaun tanba responsavel barak liu iha Ministeriu Saude, no papel oinsa parseru sira sai inplementador iha terrenu, Nia hato’o asuntu ne’e iha serimonia asina akordu entre MS ho parseru sira iha Salaun enkontru SAMES kapun Alor Dili, Segunda (04/12).

Nia haktuirtan katak iha MOU hirak ne’e iha giaun konaba servisu saida maka MS halo no saida maka parseru sira halo nune’e karik mosu dezintedimentu ruma iha futuru ita bele tur hamutuk koalia hodi hare karik parseru nia hanoin no politika MS nian foun no iha buat ruma presija hadia.

Ministeriu saude hatudu nia komprimisiu boot oinsa atu involve ema hotu-hotu iha prosesu dezenvolvimentu ida ne’e, tanba ne’e inkontru regular parseru sira nian inportante atu halo regularmente kada fulan tolu ou fulan neen dala ida depende ba kondisaun ne’ebe maka ita enfrenta.

Iha okajiaun ne’e Segundu Komandante Jeral PNTL Komisariu Faustino da Costa hateten Liu husi asina MOU ida ne’e espera katak iha futuru PNTL no MS iha koperasaun ne’ebe maka diak hodi suporta PNTL no PNTL hatene nia responsabilidade bazeia ba akordu ne’ebe maka hakerek iha MOU ne’e.

Iha tinan 2012 PNTL estabelese klinika ho ninia mediku, infermeiru no paramediku nain 10 resin ne’ebe maka fo asistensia saude internal ba membru PNTL ho nia familia iha munisipiu hotu. Media PNTL

Dili, Komandante Jerál Polísia Nasional Timor-Leste (PNTL) Komisariu Polísia Julio da Costa Hornay segunda ne’e (04/12) diretamente dirige serimonia isar bandeira ne’ebe maka hala’o iha Kuartél Jerál PNTL Kaikoli.

Iha ninia diskursu ba serimonia isar bandeira dahuluk iha fulan Dezembru, Komisariu Polísia Julio da Costa Hornay hateten tanba preukupasaun servisu ne’ebe barak, la sente ita hotu iha ona fulan Dezembru nu’udar rohan iha tinan 2017.

“Iha ita nia vida moris, tantu individual to’o mai instituisaun hanesan umanu ita la se’es husi sala maibé hanesan mós umanu sala iha maibé iha vontade atu bele hadia, ida ne’e maka importante”, haktuir Komandante Jerál PNTL.

Komisariu Polísia Julio da Costa Hornay subliña liu tan katak ba instituisaun, ninia servisu no ninia ezizensia dala-barak ita iha servisu laran balun baruk ten, balun falta dor, balun problematik, maibé importante maka ita bele halo intropeksi ita nia ann atu oinsa ita bele hadia diak liu iha tinan foun 2018 mai.

“Husu ba Komandante sira hotu liu-liu sira ne’ebe kaer pozisaun husi Komandante Operasaun, Inspetór Jerál to’o ba iha xefe seksaun sira atu kontrola nafatin membrus ninia presensa, ninia servisu loron ba loron tanba ita la hatene ita nia membru balun karik moras mós tenke toma atensaun nune’e bele konsulta atu bele hadia nia saúde diak hodi forsa nafatin hala’o nia kna’ar servisu estadu ninian”, hatutan Komandante Jerál PNTL.

Komisariu Polísia ne’e haktuir liu tan katak ita hotu akompaña situasaun politika iha rai laran tantu direta liu husi media sosial, televisaun, jornal, no radio buat barak ita rona, buat barak ita le’e, buat barak ita hare’e, hanesan Komandante Jerál aproveita situasaun ida ne’e hodi apela dala ida tan ba ita hotu hahu’u husi Komandante Jerál to’o ba ajente atu mantein no firmeza ba pozisaun nu’udar forsa seguransa, aparellu estadu atu asegura situasaun iha teritoriu laran.

“Politika buat ketak, seguransa buat ketak, politika hala’o nia misaun nu’udar politiku, seguransa hala’o nia misaun nu’udar aperellu seguransa”, tenik Komandante Jerál PNTL.

Media PNTL.

Dili, Komandu Polísia Nasional Timor-Leste (PNTL) liu husi Komandante Jerál akompaña ho Segundu Komandante Jerál PNTL kinta ne’e (23/11) hala’o enkontru semanal ho Presidente Repúblika (PR) hodi hato’o situasaun seguransa iha teritoriu laran tomak.

Komandante Jerál PNTL Komisariu Polísia Julio da Costa Hornay hafoin enkontru ba jornalista sira hateten enkontru refere hanesan enkontru semanal ne’ebe Komandu halo hodi hato’o informasaun kona-ba situasaun seguransa no mós situasaun asidentes, insidentes, tráfiku ne’ebe akontese iha periodu semana rua liu ba no mós servisu seguransa PNTL ninian.

“Ami PNTL nia misaun klaru iha Konstituisaun da Repúblika, iha Lei Organika PNTL, iha regulamentu disiplinar kona-ba deveres sira ne’ebe maka PNTL sei ezerse, ami mantein no firmeza ba ami nia misaun, ami prontu atu asegura estabilidade no paz iha rai laran, kestaun politika ami la mete ida ne’e, kestaun politika ne’e politiku sira nian, maun bo’ot sira hatene oinsa atu rezolve kestaun politika iha rai laran”, hateten Komandante Jerál PNTL ne’e.

Komisariu Polísia Julio da Costa Hornay salienta liu tan katak forsa seguransa ninia misaun atu halo seguransa, laos atu halo politika ne’ebe kualkér situasaun ne’ebe maka akontese iha teritoriu Timor-Leste laran tomak, forsa seguransa en-koordenada ho forsa Defesa Timor-Leste prontidaun atu atúa no halo prevensaun wainhira mosu problema.

“Maneira prevensaun maka ita halo aktividades patrullamentu lao ain no aktividade patrullamentu ho kareta, halo sosializasaun liu husi Ofisial Polísia Suku (OPS) sira nia servisu iha suku, eskuadra mai fali iha munisipiu sira ne’ebe ita lao nafatin, atu halo prevensaun ba seguransa, informasaun detallu ba ita nia povu, maibé karik iha konfrontus ruma ou problema ruma mosu ami tenke atúa tanba ne’e misaun ami nia, ami prontidaun ba ida ne’e”, hatutan Komisariu Polísia ne’e.

Hatan kona-ba kazu membru PNTL tiru joven ida iha area Pantai Kelapa foin lalais, Komandante Jerál PNTL esplika, “Los duni iha Pantai Kelapa membru polísia ne’ebe halo atuasaun ida ne’e, atu asegura Ita nia entidade governu nian ne’ebe hasoru situasaun ida ne’ebe presija atuasaun membru sira ne’ebe hamutuk ho nia (entidade governu-red) no prosesu kriminal lao tiha ona, lori ona ba tribunal liu husi Ministeriu Públiku depois ita hare’e ninia rezultadu oinsa”.

Komisariu Polísia Julio da Costa Hornay subliña liu tan katak normalmente membru PNTL ida lao ho entidade ida maka entidade ne’e hetan ameasa, nia (membru PNTL-red) tenke halo atuasaun tanba nia misaun maka ne’e atu asegura entidade ne’ebe sira koloka ba atu asegura.

“Agora kestaun sala ou la sala, lao tuir prosedur ou lae, Lei iha atu bele deside dehan katak ajente ne’e sala ou lae, instituisaun mós hare’e ida ne’e, ami laos dehan katak membru ida ne’e sala ou lae ami labele koalia ida ne’e tanba prosedimentu legais sira maka iha ne’eba tiha ona no nia (membru PNTL-red) hala’o nia misaun kuandu entidade ne’ebe lao ho nia (membru PNTL-red) atu asegura hetan ameasa ou iha situasaun ne’ebe presija atuasaun membru sira nia”, esplika Komisariu Polísia ne’e.

Media PNTL.                  

Kaitehu- Unidade Espesial Polisia (UEP) seksaun Explosive Ordenance Disposal (EOD) destroy material esplusivu  funu nian hanesan bomba, Kainanun, Granada Tjer no seluktan ne’ebe maka rekolla iha teritoriu laran tomak.

Komandante UEP Superintendente Xefe Afonso dos Santos hateten material hirak ne’e tenke destroy tanba perigu no fo amiasa ba ema nia vida, Nia hato’o asuntu ne’e hafoin halo destroisaun ba material esplusivu iha kaitehu munisipiu Liquica, Tersa (21/11).

Komandante Afonso haktuirtan katak  Material hirak ne’e kompostu husi material funu, nomos  sasan evidensia husi akontesementu iha Bagia ne’ebe lakonsege rabenta ne’ebe maka Servisu Informasaun Polisia (SIP), Intelijen no J2 rekolla iha teritoriu laran tomak.

“ Ba tinan foun Unidade Espesial  Polisia seksaun EOD sei konsentra ba material balu ne’ebe maka seidauk halo destroisaun iha Suai no Ermera atu halo destroisaun iha area neba no ,” dehan Komandante UEP.

Iha okajiaun ne’e Segundu Komandante PNTL munisipiu Dili Superintendente Asistente Euclides Belo hateten Tzer  ne’ebe maka atu halo destropisaun bazeia ba mandatu Tribunal Distrital Dili tanba objetu hirak ne’e perigu no amiasa ema nia vida.

Husu ba komunidade sira karik hetan material funu hanesan Granada ou material funu nian atu informa ba PNTL hodi bele foti medidas nune’e la fo perigu ba komunidade sira nia vida.

Alende ne’e Komandu PNTL munisipiu Dili sei kontrola emprezariu sira ne’ebe inporta fugetes illegal tuir sira nia hakarak PNTL halo operasaun hodi halo aprensaun no prosesu ba Tribunal no hein mandatu husi tribunal hodi halo destroisaun ba sasan hirak ne’e. Media PNTL.

Dili, Komandu Polísia Nasional Timor-Leste (PNTL) durante semana kotuk konsege rezistu kazu hamutuk 32 asidentes no insidentes ne’ebe maka akontese iha teritoriu Timor-Leste.

Segundu Komandante Jerál PNTL Komisariu Polísia Faustino da Costa segunda ne’e (20/11) ba jornalista sira iha nia kna’ar fatin hateten situasaun em jerál iha teritoriu laran lao normal maske rezulta kazu asidente no insidentes balun.

“Situasaun jerál iha fim-de-semana lao diak, klaru iha asidentes no insidentes ne’e sempre akontese tanba ne’e, iha semana liu ita konsege rezistu deit asidentes hamutuk 32 kazu no husi asidentes ne’e na’in rua maka mate, kazu asidente barak liu iha Dili 24 asidentes ba kapital deit, iha munsipiu Liquiça na’in ida no iha kapital Dili asidentes 24 ne’e rezulta ema ida mate”, tenik Segundu Komandante Jerál PNTL.

Komisariu Polísia Faustino da Costa salienta liu tan katak prosesu sira ne’e lao nafatin hanesan bain-bain prosedimentu normal, insidentes ou akontesimentu ne’ebe akontese iha semana liu ba konsege rezista 28 insidentes husi insidentes hirak ne’e hanesan asaltu ki’ik oan iha munisipiu no rezistu númeru bo’ot liu maka iha kapital Dili ho 16 insidentes akontesimentus.

“Husi akontesimentus sira seluk ita atende normal, insidentes bo’ot ida maka akontese liu-liu fim-de-semana iha dominggu mandrugada (19/11) iha residensia Vise Ministru Obras Públicas ninian ne’e maka hamosu situasaun ida ne’ebe grave oituan no ikus mai ita nia Unidade Espesial halo intervensaun ne’ebe rezulta ema sira ne’ebe mai halo asaltu ne’e, ida kanek tanba hetan tiru iha ain karuk no borus ba iha nia ain loos iha ain kabun, ida ne’e maka akontese”, hatutan Komisariu Polísia ne’e.

Segundu Komandante Jerál PNTL subliña liu tan katak akontesimentu ne’e akontese tanba intervensaun polísia hodi salva no asegura residensia Vise Ministru nian tanba hare’e ba ameasa ne’ebe maka’as no rezulta mós kareta tolu rahun (bis ida no pick up 2) iha residensia refere tanba ne’e maka polísia hola asaun ida ne’e.

“Klaru ema sira ne’e mai husi grupo ou organizasaun balun tanba ne’e prosesu lao hela inklui membrus ne’ebe tiru vítima ne’e, nia mós submete prosesu atu ita bele identifika lolos razaun tiru vítima ne’e, membrus refere tenta atu salva Vise Ministru ne’e iha nia residensia”, hateten Komisariu Polísia Faustino da Costa.

Ema sira ne’ebe asaltu residensia Vise Ministru nian ne’e kauze lori sasan kroat hanesan ai-donan, rama ambon, katana maibé polísia la konsege kaptura ema sira ne’e ho sasan kroat hirak ne’e maka hamosu tiru iha fatin akontesimentu.

Media PNTL.          

Dili- Polisia Nasional Timor-Leste (PNTL) hein nafatin orientasaun no delegasaun kompetensia husi Ministeriu Publiku (MP) hodi kontinua investigasaun faze daruak ba kazu ro’o Honglong fishers husi husi Cina.

Komandante Jeral PNTL Komisariu Julio da Costa Hornay hateten hafoin konklui investigasaun faze dahuluk iha fulan kotuk hodi entrega ba Ministeriu Publiku PNTL kontinua hein orientasaun no delegasaun kompetensia husi Ministeriu Publiku nudar nasain ba asaun penal, Nia hato’o asuntu ne’e ba jornalista sira iha Kuartel Jeral PNTL Kaikoli Dili Segunda (17/11).

Nia haktuirtan katak  PNTL nafatin hein delegasaun kompetensia husi Ministeriu Publiku hodi kontinua halo prosesu investigasaun ba kazu ne’e tanba prosesu no kompetensia tomak iha Ministeriu Publiku nia liman.

“ Iha fulan hirak liu ba PNTL  no Prokurador Baucau kumpri orentasaun Ministeriu Publiku hodi halo prosesu identifikasaun ba ro’o hamutuk 15 kuaze semana rua no ohin fo ona TIR ba ro’o no pessoal hamutuk nain 70 nune’e labele sai husi teritoriu Timor-Leste,” dehan Komisariu Julio.

PNTL konklui ona investigasaun no evidensia hirak ne’ebe iha no dokumentu ne’e entrega ona ba Ministeriu Publiku no PNTL hein deit Prokurador sira atu hare kazu ne’e ou fo kompetensia ba se mak atu hare kazu ne’e no depois lori ba Tribunal  no Tribunal sei desidi bazeia ba lei ne’ebe maka iha.

Trabalador Cineza sira ne’ebe maka servisu iha ro’o nain walu (8) moras grave no presiza tratamentu mediku ne’ebe diak, ne’e kompetensia Ministeriu Publiku nudar nain ba prosesu atu desidi no fo autorizasaun atu sira halo tratamentu iha rai liur ou iha timor laran. Media PNTL

Dili, Komandante Jerál Polísia Nasional Timor-Leste (PNTL) Komisariu Polísia Julio da Costa Hornay iha Kinta ne’e (16/11) kontinua hala’o briefing ba Komandu PNTL Munisipiu Dili.

Komisariu Polísia Julio da Costa Hornay hafoin hala’o sorumutu ho estrutura Komandu PNTL Dili nian hahu’u husi komandante eskudra to’o komandante seksaun ba jornalista sira hateten objetivu husi enkontru ne’e atu briefing komandu nian ba sira atu prepara ann hodi halo prevensaun, halo servisu seguransa nian hodi hare’e situasaun politika ne’ebe lao iha rai laran.

“Ami mantein ami nia pozisaun nu’udar forsa seguransa hamutuk ho Falintil Forsa Defesa Timor-Leste (F-FDTL) atu bele asegura estabilidade no paz iha rai doben Timor-Leste ida ne’e tanba ne’e hau mai halo briefing ho sira hodi hato’o katak situasaun politika ne’ebe lao iha ita nia rai labele doko ita seguransa, husik politika lao tuir ninian dalan tanba iha ne’eba ita nia maun bo’ot deit maka iha ne’eba”, tenik Komandante Jerál PNTL.

Komisariu Polísia ne’e salienta liu tan katak forsa seguransa tenke tuba nafatin, firmeza nafatin, hamrik iha Konstituisaun Repúblika hodi mantein estabilidade no paz ba rai ida ne’e, nune’e ita nia povu iha rai ida ne’e bele tur hakmatek hodi hala’o sira nia aktidade loron-loron nian.

“Nune’e mós ita nia politika na’in sira bele hakmatek hodi hanoin oinsa atu deside ba nasaun ne’e ninia destinu no povu nia destinu ba oin ne’ebe presija ida ne’e ba sira, se situasaun ou estabilidade ne’e maka la lao diak maka hau fiar katak sira mós la hakmatek halo sira nia dezisaun politika atu ukun tanba ne’e forsa rua hamutuk hodi prepara ann atu kria estabilidade no paz iha rai ida ne’e atu povu doben hakmatek hala’o nia moris”, hatutan na’in ulun PNTL ne’e.

Komandante Jerál PNTL akresenta liu tan katak bainhira PNTL halo atuasaun, hala’o misaun seguransa ida ne’e atu nafatin mantein neutralidade, hamrik metin iha klaran ba se deit, la hateke ba kor ou rasa ou politika mai husi ne’ebe maibé hamrik metin iha klaran hodi atende problema sira ne’ebe maka iha, ida kuandu sala, tenke sala, no ida ne’ebe los tenke los.

“Ohin Komandante PNTL munisipiu Dili informa katak situasaun sira ne’ebe maka sira atúa, sira hala’o iha kapital ida ne’e, halo kapturasaun no buat lubuk ida hanesan kapturasaun ba ita alin sira ne’ebe involve iha arte rituais no arte marsiais ne’ebe Lei hateten ona katak bandu tanba ne’e maka PNTL hanesan forsa ida ne’ebe mantein Lei no Ordem, ita kaer Lei ida ne’e hodi halo prevensaun ba sira”, hateten Komisariu Polísia Julio da Costa Hornay.  Media PNTL.     

Dili, Komandante Jerál Polísia Nasional Timor-Leste (PNTL) Komisariu Polísia Julio da Costa Hornay hala’o briefing ho membrus husi Unidade Espesial Polísia (UEP) Kuarta ne’e (15/11) iha Kuartél UEP Bairo-Pite.

Komisariu Polísia Julio da Costa Hornay iha ninia intervensaun iha sorumutu ne’e apela ba membru hotu iha unidade ne’e atu mantein nafatin profesionalizmu hodi asegura estabilidade no paz iha rai Timor-Leste apesar situasaun politika ne’ebe akontese dadaun.

“Kona-ba orsamentu sira ne’ebe ita koloka iha tinan 2017 niian, agora ita tama fulan Novembru ona, Orsamentu Ratifikativu (OR) oras ne’e dadaun seidauk diskuti no ita la hatene aprova ou lae maibé labele hanoin katak se laiha OR maka ita nia salariu no osan alimentasaun mós laiha, ne’e lalos tanba governu jestaun lao nafatin, salariu lao nafatin ita hein katak to’o segundu oportunidade partidu koligasaun aprezenta programa ne’e bele hetan aprovasaun, se la hetan aprovasaun mós governu aktual sei lao hodi jere ba nesesidade servisu governu ninian” hateten Komandante Jerál PNTL ne’e.

Na’in ulun PNTL ne’e informa liu tan katak Komandu lakohi no la tolera ba membrus kualker husi Ofisias Superior to’o ajentes atu involve prátika politika, primeiru la konkorda no segundu se la tolera atu ida ne’e mosu, kaer metin misaun ne’ebe fó ona mai ita, lalika rona liafuan politika nian, tanba ita nia Lei no Regime Promosaun, Regime Salarial, Regulamentu Disiplinar klaru iha ne’eba mai husi Konstituisaun Repúblika.

“Tanba ne’e husu ba Komandante sira hotu atu hatudu ita nia firmeza hodi serve povu ida ne’e ho justu, honestu no professional, ida ne’e maka importante ba ita atu bele asegura ida ne’e”, apela Komisariu Julio perante membrus UEP hotu.

Komisariu Polísia Julio relata ninia objetivu hala’o briefing ho Komandu UEP tanba Unidade ida ne’e maka sai hanesan Unidade ida ne’ebe importante liu iha Instituisaun PNTL nia laran.

“Hau mai iha ne’e tanba Komandu ida ne’e, komandu importante forsa ida ne’ebe mais importante iha instituisaun PNTL, hau hakarak forsa ida ne’e maka hatudu ninia firmeza, loyalidade, prinsipiu ida ne’ebe ita tenke hamrik metin, ministru Defesa no Seguransa konvoka ona reuniaun ho Komandu rua (PNTL no F-FDTL) atu bele prepara Komandu rua nia planu operasaun hodi nune’e ita hamutuk bele asegura estabilidade ida ne’e”, tenik Komandante Jerál PNTL ne’e.

Media PNTL.