Uncategorized

Dili, Komandu Polísia Nasional Timor-Leste (PNTL) liu husi Komandante Jerál akompaña husi Segundu Komandante Jerál PNTL Kinta ne’e (09/11) hala’o enkontru semanal ho Presidente Repúblika (PR) hodi hato’o situasaun seguransa iha rai laran.

Komandante Jerál PNTL Komisariu Polísia Julio da Costa Hornay hafoin enkontru ba jornalista sira heteten enkontru semanal ne’e atu informa ba PR kona-ba situasaun seguransa iha munisipiu hotu lao ho hakmatek maske akontese asidente no insidente iha munisipiu balun inklui kapital Dili.

“Hanesan akontesimentu rama ambon ne’ebe akontese iha munisipiu Lautem iha loron 5 fulan Novembru, iha Suai akontese ema baku amu ida ho eskuterus sira, iha Balibo akontese homesidiu ida, Iha Baukau ema asaltu malu, iha capital Dili ita kaptura arte marsias no arte rituias 77 ne’ebe hala’o hela sira nia atividade iha Taibesi, ida ne’e mak informasaun hotu ne’ebe mak hato’o ba PR”, hateten Komandante Jerál PNTL.

Komisariu Polísia Julio da Costa Hornay hatutan tan katak alénde informa situasaun seguransa, hato’o mós ba PR kona-ba servisu enkoordenada entre forsa rua (PNTL no F-FDTL) hodi asegura estabilidade no paz iha rai laran.

“Kazu iha Lautem, prosesu investigasaun lao hela sira sei hamutuk ho autoridade lokal sira no OPS (Ofisial Polísia Suku) hodi buka tuir autor ne’ebe hana feto ida tanba akontesimentu ne’e akontese iha tempu kalan no rai ida ne’ebe dok oituan husi sidade maibé sira promete katak iha tempu badak sei kaptura autor hodi lori ba prosesu”, hatutan Komandante Jerál PNTL ne’e.

Komisariu Polísia ne’e informa liu tan katak akontesimentu iha Covalima mós agora dadaun lori ona ba Ministeriu Públiku maibé fiar katak ne’e kazu ida ho prosesu normal tanba laos flagante maibé Polísia nafatin iha ne’eba hodi koordena ho Prokurador sira hodi prosesu kazu ne’e hodi lori autor sira ba Tribunal hodi simu nia konsekuensia husi aktus ne’ebe sira halo.

“Iha Maliana ita kaer suspeitu na’in 7, iha ona proseu atu aprezentasaun ba Ministeriu Públiku no Tribunal maibé tanba kestaun ida rua, sei hela Komandu hodi hein atu lori ba Tribunal entretantu kestaun ida iha Taibesi ita kaptura arte rituais 77 ne’ebe hamanas biru hamutuk ema 139 no agora iha prosesu hela, balun minoridade feto na’in 6”, hatutan Komisariu Polísia ne’e.

Husi kazu Taibesi ne’e, Komandante Jerál PNTL apela inan aman sira atu bele responsabiliza, tau matan no eduka oan sira ne’ebe sei ki’ik no mós ba joven sira mezmu sira iha ona idade 17 maibé inan aman presija tau matan nafatin atu bele halo aktividade ruma ne’ebe diak ba oan sira nia futuru.

Media PNTL.            

Dili, Komandu Polísia Nasional Timor-Leste (PNTL) hetan vizita dahuluk husi membru Deputadus Parlamentu Nasional (PN) Komisaun B ne’ebe trata asuntu Negosiu Estrangeiru, Defesa no Seguransa hodi hare’e besik liu tan servisu instituisaun PNTL durante ne’e.

Presidente Komisaun B Fidelis Magalhães hafoin hala’o primeiru enkontru ho estrutura Komandu PNTL hateten objetivu husi vizita dahuluk ba komisaun B ne’ebe hare’e ba asuntu Negosiu Estrangeiru, Defesa no Seguransa mai iha Kuartél Jerál PNTL hodi intrega didiak estadu progresu desenvolvimentu insituisaun PNTL nian.

“Atu hatene katak ita mai husi ne’ebe, to’o ona iha ne’ebe no atu ba oin oinsa, hanesan Komisaun B ne’e kabe ba ami nia responsabilidade duni atu hatene didiak no kumpriende didiak dezafius hirak ne’ebe maka insituisaun PNTL enfrenta no oinsa liu husi Parlamentu Nasional bele ajuda hodi hadiak liu tan”, tenik Presidente Komisaun B.

Fidelis Magalhães subliña liu tan katak iha enkontru ne’e hahu’u ho aprezentasaun detallada ida husi Komandante Jerál PNTL atu indentifika mós progresu barak ne’ebe maka PNTL konsege alkansa iha tinan hirak nia laran no depois atu hare’e estadu to’o agora ne’e oinsa no atu hadia ba oin ne’e oinsa no hare’e mós Planu Estratéjiku PNTL nian.

“Komisaun B aproveita mós oportunidade ne’e atu preminiza servisu sira ne’ebe maka PNTL halo tiha ona hanesan isentivu ida ne’ebe diak atu instituisaun ida bele servisu diak liu tan mak liu husi apresiasaun positiva, apesár husi nota ou enkoraja atu iha melloramentu atu hadia diak liu tan maibé importante mós apresia ho dalan positiva ba servisu hirak ne’ebe sira konsege alkansa to’o agora”, hatutan xefe bankada husi partidu PLP iha PN.

Presidente Komisaun B esklarese liu tan katak Komisaun B hanesan Komisaun espesializada ida Parlamentu nian ne’ebe wainhira iha diskusaun orsamentu tuir mai maka sei hare’e no koloka atu oinsa maka bele responde duni ba nesesidade hirak ne’ebe PNTL enfrenta atu bele kontribui ho dalan ida ne’ebe hare’e ho matan, kritika maibé konstrutiva atu nune’e bele apoio liu tan institusaun PNTL bele halo servisu diak liu tan atu ikus mai presta servisu seguransa ba públiku tomak, ba nasaun tomak Timor-Leste.

Iha fatin Komandante Jerál PNTL Komisariu Polísia Julio da Costa Hornay hafoin enkontru hateten Komandu PNTL hetan konvite ida husi Presidente  Komisaun B atu mai vizita Kuartél Jerál PNTL hodi rona diretamente kona-ba situasaun Komandu ninian, servisu polísia ninian, no difikuldade sira ne’ebe maka PNTL atravesa.

“Tanba ne’e maka iha oportunidade ida ne’e ami halo briefing ba membru Komisaun B tomak kona-ba Planu Estratéjiku sira ne’ebe PNTL iha no ninia implementasaun no balun sei elabora hela, hato’o mós difikuldade sira ne’ebe maka PNTL durante ne’e no ita nia membru Parlamentu sira mós hetan apresiasaun kona-ba servisu hirak ne’e no sira sei lori informasaun hirak ne’e ba Parlamentu Nasional hodi koalia kuandu iha diskusaun orsamentu nian atu ble hadia diak liu tan”, tenik Komandante Jerál PNTL.

Komisariu Polísia Julio da Costa Hornay akresenta liu tan katak iha ninia aprezentasaun ne’e hato’o mós difikuldades sira ne’ebe maka PNTL hasoru durante ne’e hanesan transporte, akumodasaun, edifiu kuarteis sira, orsamentu sira nee’ebe kolokadu ba alimentasaun no fardamentus.

Hafoin enkontru, Presidente Komisaun B asina mós Livru de Onra PNTL nian no membru tomak Komisaun B PN hare’e diretamente operasaun Camera CCTV  ne’ebe maka instala iha kapital Dili.

Media PNTL.

Dili- Timor-Leste Police Development Program (TLPDP) suporta ekipamentu servisu ba Polisia Nasional Timor-Leste (PNTL) atu nune’e PNTL bele halao nia knaar ho diak.

Komandante TLPDP Superintendent Geoff Turner hateten ho ekipamentu hirak ne’e bele fasilita servisu PNTL nian nune’e bele dezenvolve instituisaun ne’e diak liutan, Nia hato’o asuntu ne’e iha serimonia entrega ekipamentu servisu ba PNTL iha Kampaun TLPDP Hudi Laran Dili Tersa (07/11).

Ekipamentu hirak ne’ebe maka TLPDP oferese maka hanesan Komputador , Printer, Laptop,  mesin foto kopia, Laterna ba atividade fronteira, kadeira no meza, Camcorder, Sound System, Crime scene tape no ekipamentu spesifiku seluktan ne’ebe sei distribui ba Komandu Jeral, Komandu PNTL munisipiu 13 no Unidade .

Iha okajiaun ne’e Komandante Komandu Administrasaun Superintendente Xefe Mateus Fernandes hato’o agradesementu ba TLPDP ne’ebe maka oferese ekipamentu ba PNTL bele fasilita servisu lor-loron nian atu dezenvolve diak liutan PNTL.

Nia haktuirtan katak TLPDP nudar parseru PNTL nian ne’ebe maka durante ne’e suporta PNTL  no hein katak ekipamentu hirak ne’ebe maka TLPDP oferese ami bele uza ho diak hodi halo servisu.

Hafoin simu ekipamentu hirak ne’e Komandu PNTL sei infentarija nudar asset instituisaun nian hodi distribui ba Komandu munisipiu no Centru Formasaun Polisia ne’ebe maka indika ona.

Atu termina Komandante mateus hateten nudar nasaun no instituisaun parseria ho TLPDP  inportante laos deit atu hetan ekipamentu maibe kapasitasaun rekursu humanus mos inportante hodi nune’e bele atinji Polisia ne’ebe maka professional tanba ne’e tenke investe liu husi ekipamentu no treinamentu hodi hadia diak liutan PNTL tuir ezijensia povu nune’e Polisia bele professional no proporsional. Media PNTL

Dili- Selebrasaun loron finadu (matebian) iha teritoriu  timor laran tomak lao ho hakmatek maske mosu konflitu iha munisipiu balu.

Komandante Jeral Polisia Nasional Timor-Leste (PNTL) Komisariu Julio da Costa Hornay hateten situasaun seguransa iha teritoriu laran tomak enjeral lao diak no kontroladu maske iha loron finadu 2 de Novembru akontese insidente no asidente balu iha momentu familia sira ba kari aifunan ba matebian sira, Nia hato’o asuntu ne’e ba jornalista sira iha Kuartel Jeral PNTL Kaikoli Dili Segunda (06/11).

Tuir tradisaun timor nian iha loron finadu familia sira sei hahan no tua ba matebian sira nune’e familia sira han no hemu hamutuk hafoin lanu no sira baku balu, maibe membru PNTL iha munisipiu alerta no halo atuasaun imediata ba kazu hirak ne’e.

Komisariu Hornay haktuirtan katak Kazu asaltu malu ne’ebe akontese iha munisipiu Baucau, rejulta joven ida baixa iha ospital, Bobonaro postu administrativu Balibo rezulta vitima ida mate, iha Suai baku amu lulik no sarani balu ne’ebe akompaña nia ba halo misa ne’ebe kauza husi hemu lanu.

Iha Baucau suspetu sira ataka Komandante Eskuadra ida no nia halo defeza aan hodi hasai tiru ida no kona vitima nia ain agora baixa iha ospital no agora hein hela prosesu, sira aprosima ona vitima nune’e prosesu investigsaun bele lao nune’e Komandu bele hare atuasaun membru PNTL ne’e tuir regras ou lae.

Relasiona ho kazu Balibo PNTL kaptura ona suspetu nain 7 hodi aprezenta ba Ministeriu Publiku no lori ba Tribunal maibe tanba seidauk iha defensor ba arguidu sira maka lori fila-fali ba Komandu PNTL Bobonaro, alende arguidu nain 7 iha mos mandadu kapturasaun ba suspeitu balu.

“Ohin hau halo kordenasaun ho Prezidente Tribunal Rekursu atu hare situasaun ne’e tanba kazu homesidiu maka husik fila-fali arguidu sira maka bele sai problema se loron ikus ita ba buka fila-fali, ” dehan Komisariu Julio.

Relasiona ho kazu baku amu lulik iha Suai PNTL kaptura ona suspetu nain 10 no ohin aprezenta ba Tribunal espera katak rezultadu ne’e bele hetan desizaun ne’ebe forte.

Atu termina Komandante Jeral ne’e haktuir katak situasaun atual iha Balibo provijoriu lao hakmatek no PNTL munisipiu Bobonaro asegura no kontinua alerta hodi antisipa karik iha aksaun tuir mai. Media PNTL

Dili, Komandu Polísia Nasional Timor-Leste (PNTL) servisu hamutuk ho Polísia Repúblika Indonesia (POLRI) iha sexta semana kotuk (3/11) lori hikas fujitivu Juga Gama ne’ebe hala’I sai husi prizaun Bekora mai Timor-Leste hodi entrega ba PNTL.

Segundu Komandante Jerál PNTL Komisariu Polísia Faustino da Costa iha konferensia imprensa ne’ebe hala’o iha Airportu Internasional Nicalau Lobatu iha loron 3 fulan Novembru 2017 hateten fujitivu Juga Gama komete kazu droga ne’ebe iha loron 3 fulan Novembru tinan 2013 hala’I sai husi prizaun Bekora hodi hala’I ba subar iha nasaun Indonesia.

“Fujitivu ida ne’e iha loron 3 fulan Novembru tinan 2013  hala’I sai husi prizaun no ohin ita hamrik iha ne’e mós data hanesan 3 Novembru maibé 2017 signifika nia tinan 4 iha liur, PNTL laos tur deit iha fatin ita buka no koordena ho ita nia polisia sira viziñu karik ita bele detekta, bele iha kooperasaun para bele halo kapturasaun”, tenik Segundu Komandante Jerál PNTL.

Komisariu Polísia Faustino da Costa subliña liu tan katak susesu lori hikas fujitivu ne’e tanba kooperasaun liu-liu embaixada Indonesia iha Timor-Leste no mós adidu seguransa POLRI nian iha Timor-Leste nune’e konsege halo kapturasaun lori fila fujitivu ida ne’e mai Timor-Leste.

“Lori Komandu PNTL agradese ba embaixada no POLRI em jerál liu-liu ba POLDA Bali ne’ebe ho esforsu tomak iha fulan barak nia laran buka hodi detekta no ohin ita bele lori fila ema ne’ebe ita hotu hein hela katak tenki fila mai hodi submete ba prosesu ne’ebe tuir ita nia Lei rasik iha”, hatutan Komisariu Polísia ne’e.

Iha fatin hanesan embaixador Indonesia iha Timor-Leste Sahat Sitorus fó parabens tanba ne’e hanesan prestasaun no kooperasaun servisu ne’ebe lao diak entre PNTL no POLRI hodi bele detekta krime hotu.

“Esforsu servisu hamutuk ida ne’e maka tuir hau nia hanoin presija hasa’e laos deit kooperasaun pesoal maibe kooperasun instituisional nune’e hatudu katak krime la para deit iha ne’e no polísia nasaun rua ne’e tenke nafatin hasa’e kooperasaun servisu hodi interese atu kombate krime hotu ne’ebe akontese iha teritoriu nasaun rua ne’e liu-liu kooperasaun nasaun Timor-Leste ho Indonesia”, hateten Sahat Sitorus.

Media PNTL.

Dili, Komandu Polísia Nasional Timor-Leste (PNTL) liu husi Departamentu Justisa iha loron 31/10 hala’o enseramentu ba Asaun Formasaun Justisa no Disiplina ne’ebe hala’o durante loron 10 to’o loron 27 fulan Outubru tinan ne’e iha Kuartél Jerál PNTL.

Xefe Departamentu Justisa PNTL Superintendente Orlando Gomes iha ninia intervensaun ba serimonia ne’e hateten Asaun Formasaun ne’ebe partisipa husi elementus PNTL departamentu justisa no disiplina iha Komandu Jerál PNTL.

“Tuir Lei organika PNTL katak, iha departamentu justisa PNTL responde diretamente ba Komandante Jerál PNTL no nia misaun prinsipal maka atu fasilita no fó apoio jurídiku no mós elabora prosesu ba Unidade servisu no Komandu PNTL sira tanba ne’e maka elementu ne’ebe maka servisu iha justisa no disiplina tenke presija formasaun ida ne’ebe nesesariu no adekuadu atu nune’e bele mellora diak liu tan administrasaun justisa PNTL nian”, tenik Xefe Departamentu Justisa PNTL.

Superintendente Orlando Gomes salienta liu tan katak liu husi formasaun no aktualizasaun ba elementus PNTL departamentu jusitisa maka departamentu jusitisa no disiplina haka’s ann hodi garantia profesionalizasaun no prestijiu ba instituisaun PNTL.

“Formasaun ida ne’e importante tebes, tanba ne’e maka departamentu justisa no disiplina PNTL husu kolaborasaun husi Guarda Nacional Repúblicana (GNR- Portugal) ne’ebe iha koñesimentu espesifiku diak ba iha materia sira maka iha hodi bele fornese ba iha instruktur prosesu no eskibaun sira atu bele hadia mekanismu servisu diak liu hodi garantia prosesu hotu iha departamentu justisa PNTL”, hatutan Superintendente Orlando Gomes.

Iha fatin hanesan Segundu Komandante Jerál PNTL Komisariu Polísia Faustino da Costa iha ninia breves palavras hateten servisu departamentu justisa PNTL laos servisu ida ne’ebe kma’an maibe liu husi maneira sira hanesan formasaun sira ne’ebe maka departamentu justisa infrenta servisu sira ne’e bele sai kma’an.

“Sai investigador ba asuntu disiplina, ba asaun ne’ebe membrus PNTL sira seluk halo hanesan ita bo’ot sira halo investiga hodi akuza ita nia maluk sira rasik laos buat ida simples no fasil tanba bele hakotu ema nia servisu no kareira nu’udar membru PNTL”, hateten Segundu Komandante Jerál PNTL.

Partispantes ba Asaun Formasaun ne’e hamutuk ema 18 no hala’o durante oras 28 nia laran hahu’u iha loron 10 to loron 27 fulan Outubru tinan 2017.

Media PNTL.            

Dili, Relasiona ho chegada asuwain Komandante Xefe Forsas Armadas da libertasaun Nasional Timor-Leste Falintil maun bo’ot Kay Rala Xanana Gusmão ne’ebe hetan tan konfiansa ba dala rua husi povu Timor-Leste tomak hodi lidera ekipa diskusaun fronteira maritima iha rai liur, maka Presidente Repúblika no Ministru Defesa no Seguransa orienta Komandu F-FDTL no PNTL atu koloka ninia membru iha area resintu Airportu Internasional Presidente Nicolau Lobato.

Komandante Jerál PNTL Komisariu Julio da Costa Hornay iha tersa ne’e (24/10) hala’o konferensia imprensa ida hodi fó avisu ba Timor oan hotu atu tau iha konsiderasaun ba asuntu refere.

“Hanesan ita hotu hatene katak ita nia asuwain Komandante Xefe Forsas Armadas da libertasaun Nasional Timor-Leste Falintil maun bo’ot Kay Rala Xanana Gusmão ne’ebe hetan tan konfiansa ba dala rua husi povu Timor-Leste tomak hodi lidera ekipa diskusaun fronteira maritima iha rai liur no hetan susesu bo’ot, sei fila hikas mai iha ita nia rai ne’ebe tuir informasaun sei to’o aban iha Airportu Internasional Presidente Nicolau Lobato”, haktuir Komandante Jerál PNTL.

Chegada ida ne’e konvida povu Timor-Leste tomak tantu membrus governu, partidus politikus, veteranus, joventude loriku asuwain, no sira seluk tan nu’udar Timor oan sei organiza malu hodi ba simu ita nia maun bo’ot Kay Rala Xanana Gusmão iha Airportu Internasional Presidente Nicolau Lobato.

Relasiona ho ida ne’e, Presidente Repúblika no Ministru Defesa no Seguransa orienta Xefe Estadu Maijor General das F-FDTL no Komandante Jerál PNTL atu asegura no la autoriza ba se deit, husi partidu ne’ebe deit atu utiliza atributu partidu nian ba Airportu hodi simu ita nia maun bo’ot Kay Rala Xanana Gusmão. Se deit maka hakarak ba simu ita nia maun bo’ot tenke ba hanesan sidadaun Timor-Leste. Tanba ita nia maun bo’ot ba reprezenta povu tomak nasaun Timor-Leste ne’e hodi luta atu liberta ita nia fronteira tasi Timor hanesan nasaun soberania, laos reprezenta ema ida ou grupu ida ka partidu ida.

Atu asegura orientasaun na’in ulun Presidente Repúblika no Ministru Defesa no Seguransa nian ne’e maka Xefe Estadu Maijor General das F-FDTL no Komandante Jerál PNTL sei koloka pesoal PNTL no F-FDTL iha area resintu estatua Presidente Nicolau Lobato to’o ba iha Airportu no sei pasa revista ho buska ba atributu partidu no sasan kroat antes tama ba area Airportu hodi partisipa iha eventu simu ita nia maun bo’ot Kay Rala Xanana Gusmão.

Media PNTL.

Dili- Komandante Jeral Polisia Nasional Timor-Leste (PNTL) informa katak situasaun seguransa iha teritoriu Timor-Leste oras ne’e daudaun lao hakmatek, no povu kontinua halao sira nia moris.

Komandante Jeral PNTL Komisariu Julio da Costa Hornay hateten situasaun seguransa iha teritoriu laran tomak oras ne’e dau-daun lao hakmatek no kalma, iha munisipiu populasaun sira la prekupa ho situasaun politika sira ida-idak halao sira nia knaar iha toos, natar no negosiu, Nia hato’o asuntu ne’e hafoin enkontru evaluasaun seguransa ho Komandante munisipiu, Komandante Unidade no Xefe departamentu iha Kuartel Jeral PNTL Kaikoli Dili, Tersa (24/10).

Komisariu Hornay haktuirtan katar nudar forsa seguransa prevensaun no antisipasaun inportante hodi buka informasaun karik iha grupu balu ne’ebe maka iha intensaun atu kria buat ruma ita bele detekta hodi halo prevensaun imediata.

“Hau konvoka enkontru ho Komandante munisipiu no Komandante Unidade sira hodi informa kona-ba situasaun seguransa rai laran, ho situasaun politika ne’ebe maka oras ne’e daudaun mosu maka husu ba sira atu kumpri sira misaun ho rigor no sentidu de estadu ba rai ida ne’e”.

Atu termina Komandante Jeral orienta Komandante munisipiu, Komandante Unidade no Xefe Departamentu sira atu koloka sira  nia aan nudar Komandante no forsa seguransa atu responsabiliza sira nia knaar ida-idak tuir Konstituisaun Republika no Lei Organika PNTL ne’ebe konsagra ona ba misaun inportante ida ne’e. Media PNTL

Aileu, Komandu Polísia Nasional Timor-Leste (PNTL) Munisipiu Aileu Kinta orseik (19/10) hala’o serimonia fatuk dahuluk ba konstrusaun uma ba Ofisial Polísia Suku (OPS) iha Munisipiu Aileu postu Administrativu Aileu Vila, Suku Seloi Craic.

Inspector Jerál PNTL reprezenta Komandante Jerál PNTL, Superintendente Xefe Carlos Jerónimo iha ninia diskursu ba serimonia ne’e hateten konstrusaun uma OPS ne’e hanesan programa pilotu ne’ebe hala’o entre Governu Nova Zelandia liu husi ninia Embaixada iha Timor-Leste no governu Timor-Leste liu husi Ministeriu Interior (MI) reprezenta PNTL no Ministeriu Adminstrasaun Estatal (MAE) reprezenta PNDS (Programa Nasional Desenvolvimentu Suku) prosesu ida ne’ebe laos fasil.

“Instituisaun PNTL hamosu politika oin-oin atu oinsa bele hamosu saida maka diak atu ba ninia membru PNTL tomak iha area oin-oin hanesan mós formasaun, infrastrutura no apoio sira seluk tan ne’ebe Komandu PNTL mesak labele hala’o buat sira ne’e hotu, maibé tanba konfia katak nia iha parseiru balun bele fó apoio hodi nune’e bele hakma’an ninia membru sira bele hala’o aktividade iha area rurais”, tenik Inspector Jerál PNTL.

Superintendente Xefe Carlos Jerónimo salienta liu tan katak apoio ne’ebe maka parseiru sira fó laos deit hari’I uma OPS iha munisipiu Aileu maibé sei fó apoio mós atu hari’I uma ba OPS seluk hamutuk 14 iha munisipiu 13 inklui rejiaun espesial Oecusse.

Iha fatin hanesan Administrador munisipiu Aileu João Tilman do Regu hateten komunidade hamutuk ho autoridade lokal munisipiu Aileu sente privilegio tebes ba apoio ne’ebe maka fó husi governu Nova Zelandia iha termu ida ne’e mós ami hatene katak laos ba konstrusaun uma ba OPS deit maibé liu husi mós formasaun atu bele fó apoio ba instituisaun PNTL iha teritoriu liu-liu iha munisipiu Aileu.

“Ida ne’e hatudu katak kooperasaun entre governu nasaun rua ninian espesialmente apoio ida ne’e mai iha munisipiu Aileu, ami lori governu lokal hato’o ami nia agradese ba apoio ida ne’e, hein katak ba futuru kooperasaun entre estadu rua bele metin diak liu tan iha aspektu oin-oin ne’ebe maka hakarak atu bele desenvolve diak liu tan instituisaun hotu-hotu liu-liu maka PNTL atu bele ajuda ami diak liu tan, hasa’e ami nia profesionalismu hodi nune’e bele servisu hamutuk garante Lei no Ordem iha Timor-Leste”, hateten Administrador munisipiu Aileu.

Nune’e mós embaixadora Nova Zelandia iha Timor-Leste Vicky Poole hateten inisiativa lansamentu primeira pedra ba pilotu uma ba OPS ne’ebe hetan apoiu husi governu Nova Zelandia no iha insiativa ida ne’e sei hari’I uma hamutuk 14 ne’ebe maka sei kompleta ba OPS uza deseñu ne’ebe desenvolve ona husi PNDS hamutuk ho PNTL. Implementasaun sei hahu’u iha tempu badak no hein katak uma sira ne’e sei remata iha fulan Janeiru tinan 2018.

“Ami apoiu ona polisiamentu komunitaria ba tinan barak no rekoñese katak OPS maka sai xave ba susesu polisiamentu komunitaria iha Timor-Leste, tanba ne’e uma OPS importante ba sira atu hela besik ho komunidade ne’ebe maka sira servi”, hateten Vicky Poole.

Iha programa Apoio Pilotu Uma ba OPS, Nova Zelandia sei fó apoio osan hamutuk $500,00 ba hari’I provizaun uma ba OPS no total uma ne’ebe maka sei hari’I hamutuk sanulu resin ha’at. Implementasaun programa pilotu ne’ebe sei uza Sistema servisu hotu iha PNDS (Programa Nasional Desenvolvimentu Suku) hodi koopera ho komunidade sira iha suku ba hari’I uma ba OPS.

Partisipa iha serimonia hatur fatuk dahuluk ba konstrusaun uma OPS maka Komandu PNTL munisipiu Aileu hamutuk ho membru eskudra tomak, Komandante PNTL munisipiu Ainaro, Komandante PNTL munisipiu Manufahi, reprezentante Centro Formação Polícia (CFP), lideransa komunitaria, autoridade lokal,  ekipa embaixada Nova Zelandia iha Timor-Leste, The Asia Foundation (TAF), PNDS, estudante no komunidade suku Selio Craic. Iha biban serimonia ne’e, entrega mós livru Norma Organizasaun no Proseidementu (NOP) ba uma Ofisial Polisia Suku ba komandante PNTL eskuadra Aileu Vila.

Media PNTL.   

Dili- Delegasaun Harley Owners Group (HOG) Indonezia vizita Kuartel Jeral Polisia Nasional Timor-Leste hodi koalia ho autoridade seguransa konaba lalaok no objetivu vizita.

Xefe delegasaun HOG Jenderal  Hadi Waluyo hateten objetivu delegasaun vizita Timor-Leste atu  hare potensia no fatin turismu ne’ebe maka iha hodi bele promove ba Indonezia, Malasia, Singapura, nasaun membru ASEAN no mundu internasional, Nia hato’o asuntu ne’e iha enkontru hamutuk entre delegasaun ho Komandante Jeral no Segundu Komandante Jeral iha Kuartel Jeral PNTL Kaikoli Dili Kinta (19/10).

Nia haktuirtan katak alende ne’e vizita husi delegasaun HOG mos atu hametin relasaun entre povu nasaun rua tanba nasaun rua ne’e nia baliza ho fronteira terreste tanba ne’e tenke amizade no haluha pasadu hodi hare ba futuru nune’e koperasaun no relasaun entre nasaun rua metin tanba ita maun alin.

“ Ami agradese ba PNTL ne’ebe maka fo seguransa mai ami durante touring loron rua iha Dili nune’e ami seguru halao viazen husi Fronteira Mota ain mai to’o Dili no apresia tebes tanba povu tau fiar no respeitu PNTL hein katak PNTL susesu liutan, professional no inplementador lei ne’ebe maka hetan fia husi povu no nasaun,” Dehan Hadi.

Iha okaziaun ne’e Komandante Jeral PNTL Komisariu Julio da Costa Hornay hato’o bemvindu ba xefe ekipa ho delegasaun  no apresia ho vizita husi delegasaun ne’e hodi hare direita kondisaun Kuartel Jeral PNTL.

Komandante Jeral mos informa ba delegasaun kona-ba situasaun seguransa iha nasaun ne’e konduzivu tebes maske oras ne’e daudaun iha hela diskusaun konaba programa VII governu durante tinan lima iha Parlamentu Nasional tanba ne’e labele duvida atu lao ba nebe deit PNTL asegura seguransa ba imi.

Nudar vizinu ami fiar katak ho imi nia vizita hodi hare direta kondisaun real Timor-Leste nian  nune’e hodi informa ba kolega seluk ne’ebe karik hakarak touring mai Timor-Leste iha tempu oin mai ami fo vem vindu no pronto atu simu imi no fo seguransa ba imi nia touring iha Timor-leste ba ne’ebe deit hodi hametin kooperasaun no hametin seguransa no  estabilidade iha Timor-Leste no indonezia liu-liu iha fronteira.

Entertantu Prezidente Motociclismu Timor-Leste Longuinhos Monteiro   hateten nudar onra boot ba ami hodi simu vizita husi delegasaun HOG ba dalarua maske tuir planu delegasaun atu to’o Com Lospalos maibe tanba oras ne’e daudaun sei halo konstrusaun Estrada husi Dili ba Lospalos maka delegasaun ne’e touring to’o Dili deit karik iha tinan 2020 delegasaun bele to’o Lospalos ou haleu teritoriu Timor laran tomak.

Delegasaun HOG kompostu husi motor Harley Davidson 40 ho ema hamutuk nain 60, vizita ne’e  ba dalarua antes hau nudar Komisariu PNTL simu ona delegasaun husi Jakarta Sul, ne’ebe kompostu husi motor Harley 40 husi Bali, Nusa Tenggara Barat, Nusa Tenggara Timur to’o Timor-Leste, momentu neba ekipa delegasaun halo touring to’o Lospalos loron rua tanba kondisaun Estrada diak.

Vizita delegasaun ne’e kompleta ho troka prenda tais Husi PNTL no prenda HOG ba PNTL no hasai foto hamutuk. Media PNTL