Uncategorized

Dili- Membru hamutuk 17 husi Unidade Espesial Polísia sub Unidade COE (Companhia Operasaun Espesial) sei partisipa iha treinamentu Seksaun Anti Terorista (SAT) hanesan formasaun ba segunda etapa durante fulan ida.

Komandante Jerál PNTL Komisariu Polísia Julio da Costa Hornay iha ninia intervensaun ba serimonia abertura treinamentu refere apela ba membru sira ne’ebe maka sei partisipa iha treinamentu ne’e atu kumpri orariu no aproveita materia sira ne’ebe maka fó husi instructor sira husi Guarda Nacional Repúblicana (GNR-Portugal).

Membru hamutuk 17 ne’e kompostu husi postu ajente no sarjentu ne’ebe maka partisipa ona formasaun iha Portugal no treinamentu SAT ne’e hanesan formasaun ba segunda etapa. Membru  hirak ne’e sei partisipa iha formasaun SAT ne’ebe maka sei hala’o iha Rairobo (Postu Administrativu Atabae, Munisipiu Bobonaro) durante semana rua nia laran, hafoin sei ba halo treinamentu iha Airportu no ikus liu maka treinamentru iha tasi laran.

Instructor ba treinamentu ne’e mai husi GNR hamutuk na’in 5 no instructor PNTL hamutuk na’in 5 ne’ebe maka remata ona sira nia formasaun kona-ba SAT nian iha Portugal. Abertura ba treinamentu ne’e hala’o iha Kuartel UEP segunda ne’e (21/08) no partisipa direta husi Komandante Jerál akompaña husi Komandante UEP Superintendente Xefe Afonso de Jesus.

Media PNTL.

Dili- Komandu Polisia Nasional Timor-Leste (PNTL) munisipiu Dili kontinua sosializa Lei Nu.  5/2017 rejimi juridiku pratika Artes Marsiais, Rituais, Armas Brancas no Rama Ambon ba autoridade lokal, professor no estudante sira atu nune’e bele kompriende lei ne’e.

Segundu Komandante PNTL munisipiu Dili Superintendente Asistente Euclides Belo hateten Sosializasaun ne’e inportante para partisipante sira bele kompriente konteudu no lalaok lei ne’e atu nune’e wainhira Polisia inpelementa ne’e iha terrenu labele iha inpedementu ruma, Nia hato’o asuntu ne’e ba jornalista sira hafoin abertura sosializasaun iha Hotel Ramelau Aimutin Dili, Sexta (18/08).

Komandante ne’e haktuirtan katak  PNTL sei servisu hamutuk ho autoridade lokal no partisipante sira iha sosializasaun ne’e atu bele kontrola arte marsiais sira ne’ebe maka sei halo trenu subar no hamos simbolu arte marsiais sira ne’ebe maka ema pinta iha fatin publiku iha kapital Dili.

“Sosializasaun ne’e involvemos estudante sira nune’e estudante hirak ne’e bele hatutan informasaun ba sira nia kolega no membru familia,” dehan Komandante Euclides.

Sosializasaun ne’e hanesan kontinuasaun tanba antes Kampaña Parlamentar Komandu munisipiu Dili halo ona sosializasaun ba kordenador partidu politiku, lider komunitaria nomos iha nivel suku halao ona iha suku Madohi.

Iha okaziaun ne’e Xefe suku Madohi Bernadino de Cristo Ferreira hateten durante ne’e autoridade local suku Madohi servisu hamutuk ho PNTL munisipiu Dili hodi sosializa lei ne’e ba komunidade suku Madohi nune’e bele konsensializa joventude sira hodi kumpri nia direitu no obrigasaun hodi moris ho seguru iha nasaun demokratiku ida ne’e.

Autoridade Lokal ne’e hateten oras ne’e daudaun laiha ona artes marsiais no Arte rituais ne’ebe maka lei bandu ejisti iha suku foun ne’e tanba komunidade tenke hanoin oinsa atu moris hamutuk iha paz no harmonia nia laran.

Programa sosializasaun ne’e halao ho koperasaun husi Programa Nasoens Unidas ba Dezenvolvimentu (PNUD/UNDP) no gabinete Asesoria Juridiku Komandu Jeral.

Sosializasaun durante loron ida ne’e partisipa husi Xefe suku, Director eskola no estudante Pré-Sekundaria, Sekundaria no organizasaun sira ne’ebe maka servisu ba joventude no desportu iha munisipiu Dili hamutuk ema nain 100 resin. Media PNTL

Dili- Komandu Polisia Nasional Timor-Leste (PNTL) munisipiu Dili sei fo seguransa maximu ba eventu Dili maratona Internasional ne’ebe maka sei halao iha loron Sabadu (19/08) iha sidade Dili.

Segundu Komandante PNTL munisipiu Dili Superintendente Asistente Euclides Belo hateten PNTL sei koloka membru hamutuk nain 200 resin ho apoiu husi Unidade Espesial Polisia (UEP) no Polisia Militar hodi fo seguransa ba Dili Maratona Internasional hodi fo susesu ba eventu ne’e to’o remata, Nia hato’o asuntu ne’e ba jornalista sira hafoin abertura sosializasaun lei Armas Brancas iha Hotel Ramelau Aimutin Dili, Sexta (18/08).

Nia haktuirtan katak atividade desportu Dili Maratona Internasional sei halao aban hahu tuku 06:00 dader to’o tuku 11:00 kalan tanba ne’e movimentu hotu-hotu ne’ebe maka ligadu ho tranzitu seguransa rodoviariu ita iha Polisia atu kontrola no labele foti desijaun mesak no kontra hodi sai fali adversariu ba operasaun Polisia nian.

“ Ami husu kolaborasaun no koperasaun komunidade no ema hotu ne’ebe maka utiliza dalan publiku atu kumpri no wainhira iha situasaun emerjensia ruma kontaktu autoridade seguransa ne’ebe maka koloka iha estrada publiku no labele kontra regra hirak ne’ebe maka polisia orienta”.

Polisia sei blokei dalan protokolu tuir Rute ba Dili Maratona:

Meia Maratona 21.0975 KM  hahu husi Palacio Governu,  liu dalan protokolu klaran to’o rotunda Prezidente Nicolau Lobato, fila mai Timor-Plaza liu husi benkel Tilosa, ba pertamina tasi ibun, no tuir Estrada boot to’o Hotel Kalifornia Meti aut no termina iha Palasiu Governu.

Full marathon 42.195 KM halai dobra dalan rua tuir rute iha leten no

Halai ba Dame (Run For Peace) 5 KM hahu husi Palacio Governu, to’o Aitarak laran, Meskita Anur, liu husi Tasi ibun ba  Motael no termina iha palasiu Governu.

Dili Maratona nudar eventu inportante ne’ebe maka governu organiza hodi promove desportu no tuir informasaun ne’ebe maka publika katak iha atleta nain rihun lima (5000) resin maka sei partisipa iha eventu ne’e .

No Halai ba Dame (Run For peace) 5 KM sei partisipa husi atleta husi ensinu Pre-Secundaria, Secundaria, no atleta husi grupu komunidade  kuaze ema nain1000 (rihun ida). Media PNTL

Dili-United Nations Entity for Gender Equality and the Empowerment of Women (UN Women) realiza workshop kona-ba Lideransa Transformativa ba Komandu Polísia Nasional Timor-Leste (PNTL) liu-liu ba polísia femenina sira.

Komandante Jerál PNTL Komisariu Polísia Julio da Costa Hornay iha intervensaun ba abertura workshop ne’ebe maka hala’o iha kuarta ne’e (16/08) iha salaun JL Villa hateten igualdade jéneru feto ho mane hanesan deit iha instituisaun PNTL nia laran.

“Ami tenta desenvolve sira (polísia femenina), fó oportunidade ba sira atu desenvolve ann no sira desenvolve ann diak liu, to’o agora ami iha komandante munisipiu, adjuntu komandante munisipiu, xefe seksaun iha munisipiu, komandante eskuadra iha munisipiu, ida ne’e hanesan orgullu ida PNTL nian”, tenik Komandante Jerál PNTL.

Komisariu Polísia Julio da Costa Hornay salienta liu tan katak prosesu desenvolvimentu jéneru iha instituisaun PNTL diak tebes no ita kontinua nafatin ho progresu ne’ebe diak ba oin, aproveita workshop hanesan ne’e atu bele fahe informasaun ba malu oinsa ita atu bele desenvolve diak liu tan jéneru iha PNTL.

Iha biban hanesan Head of Office UN Women ba Timor-Leste Sunita Caminha iha sesaun intervensaun hateten UN Women servisu hamutuk ho instituisaun seguransa iha tinan barak nia laran hodi promove igualdade basea ba Timor-Leste nia komitmentu rasik hodi promove feto paz no seguransa.

“Ne enkaixa iha komitmentu politika nasional Timor-Leste nian no mós obrigasaun internasional hanesan liu husi komitmentu husi asinatura ba konvensaun CEDAW no mós Planu Asaun sira ne’ebe desenvolve ona”, hateten Head of Office UN Women.

Sunita Caminha subliña liu tan katak basea ba esperiensia no relasaun ho intituisaun seguransa sira ne’e, UN Women simu pedidu atu suporta formasaun hanesan iha area lideransa no formasaun ida ne’e laos ba PNTL deit maibé mós ba instituisaun seluk hanesan Sekretariu Estadu Mulher (SEM) no mós Rede Feto.

“Ho hanoin ida katak iha potensia barak liu iha instituisaun idak-idak nia laran maibé dala-ruma bainhira ema seidauk iha kbi’it ka fiar ann, sira labele atinzi potensial ida ne’e”, salienta Sunita Caminha kona-ba objetivu workshop ne’e nian.

Un Women existe iha Timor-Leste iha tinan 2001 ne’ebe uluk hanaran UNFEN no programa formasaun ida ne’e sei hala’o iha tinan ida nia laran, ekipa sira iha workshop ne’e sei hasoru malu dala neen tan.

Tema ba workshop ne’ebe sei hala’o durante loron tolu nia laran ne’e maka Lideransa Transformativa: Lidera atu atinzi igualdade jéneru no feto nia direitu iha Timor-Leste. Partisipante ba workshop ne’e maka ofisias inpectores PNTL nian ne’ebe reprezenta husi kada munisipiu no seksaun sira iha PNTL nia laran. Partisipa iha abertura worksop ne’e Komandante Jerál PNTL Head of Office UN Women ba Timor-Leste no Diretora Diresaun Nasional Prevensaun Konflitu Ministeriu Interior.

Media PNTL.      

Dili, Polísia Nasional Timor-Leste (PNTL) hamutuk ho Sekretariu Estadu Juventude no Desportu (SEJD) sei halo dezeminasaun no sosializasaun ba Lei Armas Brankas iha tempu besik ba munisipiu sira hotu.

Komandante Operasaun PNTL Superintendente Xefe Henrique da Costa segunda ne’e (14/08) ba jornalista sira hateten oras ne’e dadaun komandu PNTL koloka ona pesoal ida ne’ebe maka hamutuk ho Komisaun Reguladora Arte Marsias (KRAM) hodi kontinua desemina Lei Nu.5/2017 kona-ba Armas Brankas.

“Parte PNTL, ita iha pesoal ida ne’ebe ita integra iha Komisaun Reguladora Arte Marsias ninian ne’ebe maka halo aktividade dezeminasaun Lei Armas Brankas ba iha munisipiu Aileu no Ermera iha semana kotuk no aktividade ne’e sei nafatin kontinua iha semana oin ba iha munisipiu sira ne’ebe maka seidauk tama”, tenik Komandante Operasaun.

Superintendente Xefe Henrique da Costa salienta liu tan katak Komandu iha ona planu atu halo dezeminasaun ne’e sei hala’o konjuntu entre PNTL ho parte SEJD liu-liu ekipa KRAM ninian ba munisipiu sira no sei involve Xefe Suku, Xefe Servisu sira iha munisipiu, juventude inklui mós Administrador Munisipiu atu nune’e hafoin halo dezeminasaun Lei refere sei halo kedas servisu operasional diretamente ba iha terenu hodi halo limpeza ba iha atributu Arte Marsias ninian.

Semana Ida, PNTL Rezista Asidente Tráfiku Hamutuk 24

Durante semana ida hahu’u husi loron 5 to’o loron 10 fulan Agostu tinan 2017, Komandu PNTL rezista kazu asidente tráfiku hamutuk 24 ne’ebe maka maioria akontese iha munisipiu Dili.

Komandante Operasaun PNTL Superintendente Xefe Henrique da Costa hateten situasaun em jerál iha teritoriu laran tomak lao normal no kontroladu maske akontese insidente no mós asidente balun iha munisipiu Dili, Aileu, Ermera, Lospalos no Manufahi.

“Situasaun iha teritoriu laran tomak durante periodu semana kotuk lao kontroladu maske mosu insidente ki’ik oan no mós asidente balun maibé ida ne’e la fó impaktu ba desenvolvimentu iha Timor-Leste”, akresenta Superintendente Xefe Henrique da Costa.

Entretantu, hafoin kampaña no eleisaun parlamentar Komandu PNTL munisipiu Dili iha semana kotuk kontinua halo operasaun ba viatura públiku sira no konsege prende kareta hamutuk 21 no motor hamutuk 41.

“Mezmu eleisaun remata ona, maibé ita nia servisu operasional hare’e kona-ba transporte sira ne’e sei kontinua hala’o hela no viatura sira ne’ebe maka Komandu PNTL munisipiu Dili relata iha relatoriu katak transporte hirak ne’e liu-liu ba motor sira ne’e balun sei uza kanu resin, balun dokumentu laiha hanesan karta kondusaun laiha”, subliña Superintendente Xefe ne’e.

Media PNTL.

Dili, grupu Hadomi Paz no Estabilidade ne’ebe kompostu husi individu no instituisaun balun sexta ne’e (11/08) hasoru malu ho Komandante Jerál Polísia Nasional Timor-Leste (PNTL) Komisariu Polísia Julio da Costa Hornay hodi hato’o kongratulasaun ba servisu PNTL nian durante prosesu kampaña no eleisaun Parlamentar tinan 2017.

Representante grupu Hadomi Paz no Estabilidade Luis Sampaio hafoin enkontru hateten inisiativa grupu ida ne’e hodi hasoru malu ho na’In ulun PNTL nian hodi fó hanoin no kongratula ba susesu ne’ebe PNTL halo hodi matein paz no estabilidade iha Timor-Leste.

“Ami mai atu fó hanoin, fó koragem liu-liu mós kongratula susesu PNTL nian, orgaun seguransa no defesa relasiona ho eleisaun ne’ebe maka susesu ona, maibé agora ita iha hela prosesu ida aproximasaun entre polítiku sira atu buka solusaun alternativa saida diak ba futuru governasaun foun mai”, hateten Luis Sampaio.

Aktual Diretór Judicial System Monitoring Programme (JSMP) ne’e subliña liu tan katak grupu ne’e mós mai atu fó forsa hodi husu ba instituisaun seguransa no defesa, liu-liu PNTL atu mantein sira nia profesionalismu, pozisaun no firmeza atu garante seguransa, paz ba ita nia nasaun atu fó oportunidade ba ita nia polítiku sira atu buka dalan ou opsaun diak liu ba formasaun governu foun mai.

Observasaun grupu ne’e halo ba PNTL durante prosesu eleisaun nian, Luis Sampaio esplika,”Em termu eleisaun ninian sira (PNTL) susesu tebes iha eleisaun Prezidensial no Parlamentar ne’ebe ita hotu-hotu tauk no preukupa tanba iha grupu oin-oin no partidu barak maibé PNTL hatudu progresu ne’ebe bo’ot tebes-tebes, hatudu profesionalismu ne’ebe ita dehan luar biasa tanba sira maneja konflitu, sira maneja tentativa ba potensia konflitu sira ne’e ho diak tebes-tebes ikus mai laiha buat ida maske iha insidente kiik oan ruma ne’ebe mosu, maibé sira bele atúa ho diak hodi to’o agora ita hotu sente seguru”.

Enkontru ne’e hala’o entre Komandante Jerál PNTL hamutuk ho membrus husi Grupu Hadomi Paz no Estabilidade hanesan Diretór JSMP Luis Sampaio akompaña husi eis Primeira Dama Isabel Fereira.

Media PNTL.

Liquica- Komandante Jeral Polisia Nasional Timor-Leste (PNTL) inagura kazerna Polisia munisipiu Liquica hodi apoiu membru sira halao servisu.

Komandante Jeral PNTL Komisariu Julio da Costa Hornay hato’o agradesementu ba governu tanba bele tau inportansia ba instituisaun PNTL hodi kria kondisaun infrastrutura ba PNTL atu halao nia knaar hodi fo seguransa ba povu no nasaun ne’e, Nia hato’o asuntu ne’e hafoin serimonia inagurasaun kazerna PNTL munisipiu Liquica, Kinta (11/08).

Komisariu Julio haktuirtan katak PNTL sei uza kazerna ne’ebe maka governu hari hodi servi povu Timor-Leste no espesialmente populasaun munisipiu Liquica.

Entertantu Komandante PNTL munisipiu Liquica Superintendente Olavo Cristovão hateten kazerna ne’e kompleta nesesidade PNTL munisipiu Liquica atu hela tanba realidade membru barak maka laiha hela fatin,.

Superintendente ne’e haktuirtan katak hafoin serimonia entrega Komandu sei verifika membru no ofisiais sira ne’ebe maka presiza atu hela iha kazerna ne’e, no husu ba Komandu Jeral atu kompleta moviliariu iha kazerna hirak ne’e tanba presiza kondisaun ne’ebe diak hodi halo servisu.

Iha okajiaun ne’e Diretor kompania Holuli Janio Rui Ximenes hateten kazerna ne’e hari ho montante orsamentu $ milaun 2.250, konstrusaun ne’e inisia iha 2012 no termina iha 2017, konstrusaun ne’e tarde tanba kompania infrenta difikuldade barak durante prosesu konstrusaun  hanesan kompesasaun ba rai nain no problema seluktan.

Kazerna ne’ebe maka entrega iha uma 11 ne’ebe maka fahe ba uma tolu ba Komandante ho Segundu Komandante Polisia, no 9 ba membru PNTL.

Serimonia inagurasaun ne’e marka prezensa husi Reprezentante komisaun B Parlamentu Nasional, Komandante PNTL munisipiu 12, Komandante UNPOL, Autoridade Munisipal, Autoridade Local no konvidadu sira. Media PNTL

Dili- Komandu PNTL munisipiu Baucau kaptura no detein ona suspeitu nain 17 ne’ebe maka involve iha konfrontasaun iha suku Tekonomata postu administrativu Laga foin lalais.

Segundu Komandante PNTL munisipiu Baucau Superintendente Asistente Joni Viana hateten Suspetu sira iha ona prosesu nia laran no Komandu PNTL iha ona kontaktu ho Ministeriu Publiku oinsa enkamina prosesu hirak ne’e hodi halo prosesu kontinuasaun tuir lei ne’ebe maka vigora iha nasaun ne’e, Nia hato’o asuntu ba jornalista hafoin partisipa abertura formasaun ba formador sira iha Tower Fatuhada Dili, Segunda (07/08).

Komandante Joni haktuirtan katak Suspetu nain 17 ne’ebe maka Polisia halo identifikasaun   balu iha indikasaun forte konaba sira nia involvimentu nune’e polisia detein iha Eskuadra Polisia Laga no balu iha Komandu PNTL munisipiu Baucau hodi halo prosesu investigasaun. no seluk husik fila-fali tanba laiha indisiuis ruma konaba sira nia involvimentu maibe wainhira presiza deklarasaun ruma Polisia sei bolu hikas sira ba Ministeriu Publiku hodi hare hikas kazu ne’e no prosesa ba oin.

Autoridade judisial sira sei iha tempu ferias judisial tanba ne’e ita hein iha tempu badak kazu ne’e bele entrega ona ba Ministeriu Publiku hodi prosesa.

Oras ne’e dadaun situasaun atual iha suku Tekinomata no area Laga iha ambiente hakmatek no Komandu PNTL munisipiu Baucau no Komponentente terestre halo nafatin patrulamentu no prosesu ba sira ne’ebe maka diskumfia involve iha kazu ne’e no ami apela ba joven sira ne’ebe involve iha kazu ne’e atu kopera ho justisa.

Kronolojia Konfrontus iha Laga suku Tekinomata akontese iha loron 31/07 entre estudante tuir mai involve komunidade, tanba estudante sira lori sira nia maun alin no familia tama iha problema nia laran, konfrontasaun ne’e rejultaestdante no joven nain rua kanek no Jose Moreira mate. Media PNTL

Dili- Komandu Polisia Nasional Timor-Leste (PNTL) munisipiu Baucau kontinua sosializa Lei Nu. 5/2017 rejimi juridiku pratika Artes Marsiais, Rituais, Armas Brancas no Rama Ambon hodi redus krime no konflitu entre Arte Marsiais.

Segundu Komandante PNTL munisipiu Baucau Superintendente Asistente Joni Viana hateten Komandu PNTL munisipiu Baucau iha loron 3/08 hamutuk ho Prokurador Distrital Baucau halo sensibilizasaun lei ne’e iha suku Tekinomata no suku seluk nune’e komunidade sir abele kompriende lalaok husi lei ne’e, Nia hato’o asuntu ba jornalista sira hafoin partisipa abertura formasaun ba formador sira iha Tower Fatuhada Dili, Segunda (07/08).

Komandante Joni informatan Komunidade barak maka seidauk iha koñesementu konaba lei armas brancas ne’ebe maka koalia konaba sasan kroat hirak ne’ebe maka joven sira utiliza hodi hasai ema nia vida hanesan rama ambon, diman, surik, katana, samurai no seluktan ne’ebe maka define iha lei Nu 5/2017 artigu 2 numeru 1.

Sosializasaun ne’e rasik hetan partisipasaun maximu husi komunidade no sira hein katak sosializasaun ne’e kontinua nafatin atu nune’e ema hotu iha koñesementu hodi evita problema ne’ebe maka sempre mosu bebeik.

“PNTL inplementa ona lei ne’e tanba ne’e wainhira iha ema ruma uza armas brancas polisia halo kedas atuasaun tuir lei haruka,”.

Alende ne’e PNTL Baucau hamutuk ho F-FDTL, Batelaun Ordem Publika (BOP), Polisia Militar ho autoridade munisipal no lokal halo esforsu hodi halo limpeza no hamos lema artes marsiais iha sidade Baucau no laiha reasaun ruma husi joven sira tanba ema hotu tenke kumpri lei no lei maka ass liu hodi regula ema nia hahalok no atividade.

Lei Nu.5/2017 aprova iha Parlamentu Nasional iha loron 6/03/2017 no promulga husi Prezidente Republika iha loron 12/04/2017 ho artigu hamutuk 43. Lei ne’e hanesan lei espesifiku (Lex Especialis). Media PNTL

Dili- Ofisial Polisia Suku (OPS) husi munisipiu 12 no Rejiaun Autonoma Espesial Oe-Cusse tuir Formasaun ba  Formador hodi dezenvolve liutan Polisiamentu Komunitaria.

Komandante Komandu Operasaun Superintendente Xefe Henrique da Costa hateten ho kursu ne’e formadu sira bele haforsa servisu Polisia Komunitaria iha nivel suku diak liutan hodi bele redus krime, Nia hato’o asuntu ne’e hafoin abertura formasaun ba formador sira iha Tower Fatuhada Dili, Segunda (07/08).

Komandante ne’e haktuirtan katak formasaun ne’e sei foka liu kona-ba Normas Organizasaun no Prosedimentu (NOP) ba OPS, Konselu Polisiamentu Komunitaria (KPK) no Konselu Seguransa Munisipal (KSM) ne’ebe maka aprova no lansa ona husi Komandante Jeral tanba ne’e molok inplementa membru sira tenke iha koñesementu klean nune’e inplementasaun iha terrenu bele lao diak.

Formasaun ne’e partisipa husi Segundu Komandante munisipiu balu, Xefe Operasaun no Komandante Eskuadra; formasaun ne’e sei halao durante semana rua nia laran (07-18) no formador sira husi Departamentu Polisiamentu Komunitaria, Centru Formasaun Polisia (CFP), no Fundasaun Azia.

Tuir planu formasaun hanesan sei fo ba Komandante Eskuadra sira nune’e bele akompaña atividade Polisiamentu Komunitaria iha suku 442. Media PNTL