Dili, Komandu Polísia Nasional Timor-Leste (PNTL) liu husi Departamentu Investigasaun Kriminal Nasional (DIKN) iha loron sexta-feira (17/01) Ofisialmente entrega Sampel ba Kazu Insidente Tiru ne’ebe akontese iha iha loron 01 fulan Janeiru 2025 madrugada, iha eis Prezidente Repúblika Dr.Francisco Guterres-Lu-Olo nia residensia ba parseiru Timor-Leste Police Development Program (TLPDP) liu husi Australia Federal Police (AFP) hodi halo ezaminasaun.
Hafoin serimonia entrega Sampel hirak ne’e ba jornalista sira Komandante Operasaun DIKN Inspetúr Xefe Polísia Mouzinho Correia hateten iha oportunidade ne’e entrega mos Sampel rua seluk maka hanesan Insidente Tiru iha Matadoru ne’ebe akontese iha loron 01 fulan Janeiru 2025, iha mós kazu ida akontese iha residensia eis PR Lu-Olo nian iha Setembru 2018.
“Objetivu ezaminasaun ida ne’e primeiru maka atu hatene mais ou menus Arma tipu saida maka uza hodi tiru, segundu ita mós tenta atu hatene sé maka tiru, maibé prinsipal atu hatene primeiru maka Arma saida, hodi ida ne’e ita rekolla Pistola Lima (5) husi Unidade Espesial Polísia (UEP) nian sai hanesan Amostra/Referensia hodi halo komparasaun ho Sampel ne’ebe ita rekolla ona iha loron hirak liu ba iha residensia eis PR nian no ida fali iha residensia sidadaun sivil ida iha Matadoru”, esplika Komandante Operasaun DIKN ne’e.
Inspetúr Xefe Polísia ne’e hatutan tan katak prezensa kolega sira husi Australia iha ne’e, Péritu Balistiku nian iha Timor-Leste hodi apoiu, fasilita ita ba exame ida ne’e. Além de mai fasilita PNTL, AFP mós fó Treinamentu Básiku ba ita nia Tékniku Forensik sira durante semana ida nia laran.
Iha fatin hanesan Péritu Balistiku husi TFLPD-AFP Matthew Bolton iha ninia intervista agradese ba Komandu PNTL liu-liu DIKN ne’ebe maka permite ona AFP hodi mai fó apoiu halo investigasaun ba kazu Tiru ne’ebe maka akontese iha Timor-Leste.
“Hau orgullu tebes tanba iha ekipa Forensik ne’ebe kapas, sira ema diak iha ne’e, hau enjoy no gosta tebes atu fó treinamentu ba sira, kona-ba durasaun tempu hodi bele hatene resultadu Ezaminasaun ne’e parese sei lori tempu semana ha’at (4) ami halo Komparasaun Microscope nian”, tenik Péritu Balistiku husi TFLPD-AFP ne’e.
Matthew Bolton esplika liu tan katak ba futuru TLPDP no AFP sei kontinua apoiu PNTL hodi halo investigasaun ruma ne’ebe maka PNTL presiza. Media PNTL.
