Dili, Komandu Polísia Nasional Timor-Leste (PNTL) liu husi Departamentu Polisiamentu Komunitaria Nasional (DPKN) kontinua hala’o programa Kultura Hadomi Vida ne’ebe lansa ona iha semana kotuk ba estudante Universitariu sira iha Universidade Dili (UNDIL) iha loron segunda-feira (04/10) ne’e.
Diretor DPKN Superintendente António da Luz iha nia entrevista hateten aktividade ne’ebe hala’o ba loron ohin nian maka aktividade formasaun Edukasaun Sivika ba estudante sira iha UNDIL durante loron ha’at (hahu’u husi loron 04 to’o loron 07 fulan Outubru) hala’o teoria loron rua no prátika loron rua.
“Iha UNDIL partisipa iha aktividade ne’e além-de estudante sira, partisipa mós funsionariu sira ne’ebe maka hakna’ar ann iha UNDIL, tan ne’e ita nia orariu ohin no aban sei hala’o teoria iha UNDIL no loron kuarta-feira maka kontinua hala’o prátika iha Hera”, esplika Diretor DPKN ne’e.
Superintendente ne’e afirma tan materia sira ba iha formasaun ne’e hanesan Prevensaun Krime nian prepara husi DPKN no materia sira kona-ba Kódigu Estrada no Sinalizasaun sira husi DNTT no Tránzitu Nasional.
“Planu ba aktividade ida ne’e sei kontinua semana oin ba estudante sira iha Univesidade Timor-Loro Sa’e (UNITAL) hafoin sei kontinua ba Institutu no Universidade sira seluk hanesan IOB, DIT, Kristal no ICR, importante iha aktividade ne’e maka materia ba ita nia estudante sira atu bele hatene kona-ba Prevensaun Krime, Kódigu Estrada no Sinalizasaun”, tenik Superintendente ne’e.
Media PNTL.
