Dili, Durante Komemorasaun loron bo’ot Natal no Tinan Foun hahu’u husi loron 24 fulan Dezembru 2019 to’o loron 05 Janeiru 2020 Komandu Polísia Nasional Timor-Leste (PNTL) rezista kazu Asidente no Insidente hamutuk 175.
Komandante Jerál PNTL Komisariu Polísia Faustino da Costa relata ba jornalista sira iha enkontru Avaliasaun Servisu Komandu PNTL ho F-FDTL katak durante periode loron bo’ot situasaun iha nivel teritoriu nasional lao diak, kalma no hakmatek maske oras ne’e ita hotu hare’e katak tempu udan maibé udan ne’e laos iha parte hotu-hotu, parte udan no parte balun mak la udan.
“Atu dehan deit katak komesa loron 24 Dezembru to’o loron 05 Janeiru PNTL rezista kazu Asidente no Insidente hamutuk 175, husi akontesimentus sira ne’e ida ne’ebe maka grave liu komesa iha loron 01 Janeiru to’o loron 05 ne’e rezulta ema na’in 7 mak lakon sira nia vida, asidente ida iha Dili iha loron 01 dadersan madrugada ne’ebe rezulta jovem ida mate, iha mós Oecusse ne’ebe alin feto ida mós mate tanba monu husi kareta, ida mate iha Lospalos tanba rian maka sona fila fali ne’e ninia feton nia laen”, relata Komandante Jerál PNTL ne’e.
Komisariu Polísia ne’e afirma tan katak insidente ne’ebe maka mosu iha loron 02 Janeiru maka mosu iha Liquiça rezulta labarik feto na’in 2 no mane na’in 1 mate, agora iha loron 05 insidente mosu iha Same wainhira katuas ida atu sai ba kasa entaun nia tenta atu oho animal fahi fuik maibé fahi seidauk mate, fahi tata fali katuas ne’e.
Media PNTL.
