Dili– Ekipa Jurídiku Polisia Nasional Timor Leste (PNTL) hamutuk nain 6 (neen) ne’ebe ho nia habilitasaun literária Direitu ka Lei halo revizaun ba Lei Organika PNTL, atu haree ba estrutura balun ne’ebe la responde ona ba operasional iha terreinu, no parte seluk servisu funsionalmente lao ona maibe estrutura seidauk iha seidauk tau iha Lei Organika PNTL.“Uluk PNTL submete ba Sekretariu Estadu Seguransa (SES), maibe bainhira iha mudansa politika husi Governu, agora dadaun PNTL submete fali ba Ministeriu Interior, tamba ne’e mak Komando Jeral PNTL liu husi Komandante Jeral halo despaixu ida hodi estabelese ekipa jurídiku atu halo revizaun ba Lei Organika PNTL nian,” afirma Xefe Ekipa Juridiku PNTL, Inspetor Virgilio Correia ba jornalista sira iha Kuartel Jerál PNTL, hafoin halo aprezentasaun ba revizaun Lei Organika PNTL ba dala rua iha loron Kuarta, (13/05/2015).
Inspetór Virgilio hatutan, parte estrutura no lei ne’ebe ekipa juridiku PNTL halo revizaun mak lei no estrutura balun ne’ebe la responde ona tuir situasaun real, nomos servisu funsionalmente lao ona maibe estrutura no lei seidauk tama iha Lei Organika hanesan Aprovizionamentu ne’ebe uluk iha SES nia okos maibe agora desentralizadu iha PNTL, Relasaun Publika PNTL, Klinika PNTL, no Teknolojia Informátika.
Iha fatin hanesan, Segundu Komandante Jerál PNTL, Komisáriu Faustino da Costa hateten ekipa juridiku PNTL halo Revizaun ba lei organika PNTL atu kompleta ba planu estratejiku PNTL nian 2014-2018 iha área lejislasaun nian, ne’ebe sei halo amandamentu ka iha mudansa ba lei organika refere.
Entertantu revizaun ba lei organika refere, ekipa juridiku PNTL halo aprezentasaun ba ofisiais PNTL sira, no iha ideia ka opiniaun balun ne’ebe Komadante sira sujere, ekipa juridiku sei hadi’a fila fali, no ikus liu sei konvida komandante husi 13 Munisipiu sira hotu, Komandante Unidade, Departamentu, Seksaun atu halo diskusaun ba revizaun lei organika refere, molok aprezenta ba Governu atu aprova. Média PNTL.
