Dili- Ema barak mak sai ona vítima husi sunu fugetes tamba ne’e Komando Jerál PNTL bandu ba loja sira atu labele fa’an fugetes, karik liu husi inspesaun mak hetan loja sira fa’an fugetes, sei prosesa tuir lei ne’ebe vigora iha Timor Leste.
Sunu fugetes ne’e nia konsekuensia mak balun sai ona vitima hanesan akontesimentu foin lalais ne’e iha Munsipiu Covalima no Manufai ne’ebe rezulta ema nain 7 kanek no uma 7 ahi han mutuk.
“Faktus hatudu katak iha Indonesia ema barak mak sai ona vitima ba fugetes ka petasan. Iha Timor Leste foin lalais ne’e akontese iha Munisipiu Covalima, iha joven nain 7 mak hetan kanek tamba vitima husi sunu fugetes, no iha Munsipiu Manufahi mos akontese sunu fugetes halo ahi han uma 7, iha Munisipiu Dili iha ona informasaun katak ema balun mos sai ona vítima ba sunu fugetes ne’e,” informa Komandante Operasaun Nasional Interinu PNTL Superintendente Natercia Eufrasia Martins liu husi konferensia imprensa ne’ebe mak hala’o hamutuk entre Ministeriu Komersiu Industria no Ambiente no Komando PNTL Munisipiu Dili iha Kuartel Jeral PNTL Caicoli-Dili, loron Kuarta (23/12/2015).
Komandante Natercia Martins hatutan, fugetes nuudar sasan explosive baixa ne’ebe mak baibain ema uza hodi harame eventu sira.
“Komando operasaun nasional, bazeia ba despaixu husi Ministeriu Interior no. 205/CG-PNTL/12/2015 nomos Diretiva Komando Jeral no.03/2015 kona-ba fugetes ka petasan. Fugetes mak material explosivu ne’ebe forma husi pó (powder) ne’ebe falun iha suratahan ka plastiku barak baibain no ninia sumbu. Sasan ida ne’e baibain ema uza hodi harame eventu serimonia sira. Material ida nee konsidera nuudar sasan explosizu baixa (low Explosive).”
Tamba ne’e, PNTL nuudar instituisaun seguransa iha area teritoriu tomak, hakarak apela ba komunidade sira atu labele sunu fugetes, no ba loja sira labele fa’an fugetes, komando sei halo operasaun tama sai loja no bairo hodi kontrola ba ida ne’e tamba sunu fugetes perigu ba ema nia vida. Média PNTL.
