Díli- Ema deskoñesidu baku membru Polisía Nasional Timor-Leste(PNTL) eskuadra Becora nian to’o tama iha sala emerjensia Hospital Nasional Guido Valadares (HNGV) tamba hetan kanek makaas iha parte oin nian.
Akontesimentu ne’e akontese iha área Becora, Has-Laran, Domingo (27/9) lokraik, bainhira ema deskoñesidu sira ne’e ho kareta liu husi área refereno soke kois Polisía nain tolu ne’ebe maka ho motor depois Polisía hapara sira no mosu diskusaun oituan ikus mai sira baku Polisía nain tolu ne’e no nain ida kanek todan, lori kedas ba HNGV.
Tuir sasin ne’ebe maka lakohi publika nia naran dehan, membru Polisía nain tolu ne’e ho motor husi eskuadra Becora atu ba terminal maibe iha dalan hasoru kedas ema sira ne’e no tuku Polisía ne’e nia oin laran hodi monutun ba rai foti tan fatuk riba tan ba nia oin.
“Ha’u halai mai haree depois sori tiha konfrontasaun ne’e. Se ha’u maka laiha, Polisía na’in tolu ne’e dala ruma ida bele mate,” dehan fonte ne’e ba Timor-post iha Becora Domingo (27/9).
Iha fatin seluk Komandante Jeral PNTL Komisariu Julio da Costa Hornay dehan, nia rona ona nia membru hetan baku husi ema deskoñesidu maibe husik ba investigasaun la’o maka foin hatene tanba saida maka sira baku no baku iha ne’ebe.
“Kodigu penal maka sai medida. Ne’ebe ita hotu iha Kodigu Penal nia okos. Se maka komete krime, artigu ne’ebe nia kontra nia pena mos iha nebá kastigu. Ne’e kodigu penal maka haree liu ba ida ne’e,” dehan Komandante Jeral ne’e ba jornalista sira iha Kuartel UEP, Bairo-Pite, Segunda (28/9).
Nia hatutan, atu baku militar, sivil ka Polisía iha prosesu para uza hodi prosesa autor sira ne’ebe maka halo krime.
Nia dehan Relatoriu seidauk tama iha nia meza, tamba ne’e nia seidauk ko’alia klaru liu ba publiku. Sei hein depois haree tiha relatoriu husi komandu Distritu Dili maka foin bele fo sai ba publiku.
Tuir informasaun ne’ebe maka jornalista Timor Post hetan husi membru PNTL balun iha Distritu Dili nian katak, Polisía Kaptura ona suspeitu na’in tolu ne’e kaptura iha área Surikmas. (Fontes: Timor Post Tersa, 29 Setembru 2015).
