Dili– Ema deskoñesidu tuda no estraga komunidade nia kioske iha área Pantai Kelapa. Polisia Nasional Timor Leste (PNTL) sei hala’o hela investigasaun hodi buka tuir suspeitu.
Komandante Jerál PNTL, Komisariu Julio da Costa Hornay dehan, kazu ne’e akontese iha semana kotuk, iha ema deskoñesidu tuda no estraga komunidade nia kioske. Kazu ne’e sei iha hela investigasaun nia laran.
“Ita simu informasaun ne’e kioske ida maibe ita nia Servisu Investigasaun Kriminal sei buka informasaun. Karik sei iha tan depois investigasaun mak hatene,” dehan Julio ba jornalista sira iha Kuartel Jeral PNTL Caicoli, Kuarta (09/12).
Nia hatutan, informasaun ne’e katak grupu artemarsiais mak halo problema hodi estraga kioske sira ne’e, maibe atu detallu liu depois rezultadu investigasaun mak foin hatene loos.
“Ita nia polisia sira sei buka hela suspeitu. Tamba ita seidauk kaptura ema ruma iha akontesimentu ne’e,” dehan Julio.
Nia hatutan, problema ba Polisia mak falta de kooperasaun husi komunidade sira hodi bele fo hatene paradeiru ema ne’ebe mak halo problema, tamba ne’e mak polisia la kaptura suspeitu sira ne’e.
“Ita sempre tun ba fatin akontesimentu ita nia inan aman sira nunka fo hatene ema ne’ebe mak halo problema. Sira sempre dehan lahatene ema bairu seluk mak mai halo problema,” dehan Julio.
Antes ne’e mos Xefe Estadu Maior Jeneral F-FDTL, Major Jeneral Lere Anan Timur dehan, oras ne’e mosu tuda malu barak ona iha Dili laran, liu-liu iha área Pantai Kelapa besik Ministru Defeza nia uma oin.
“Ami fila mak foin haree sira. Tamba sira kalan sempre tuda malu hela deit,” dehan Lere iha Baucau Sabadu (05/12).
Akontesimentu tuda malu entre joven mak harahun mos komunidade sira nia kioske ne’e akontese iha Sesta (04/12). Fonte: Timor Post Edisaun Kinta (10/12/2015).
