Dili, Komandu Polísia Nasional Timor-Leste (PNTL) sexta-feira (04/08) ne’e hala’o enkontru dahuluk ho estrutura Asosiasaun Esposa Polísia Nasional Timor-Leste (AESPNTL) hodi hato’o vizaun no Misaun AESPNTL nian ba Komandu PNTL.
Hafoin partisipa iha abertura enkontru ne’ebe hala’o iha Centro Formação Polícia (CFP) ba jornalista sira, Komandante Jerál PNTL Komisariu Jerál Polísia Henrique da Costa hateten aktividade ne’e hanesan kontinuasaun ida husi buat ne’ebe uluk hahu’u ona husi Esposa Komandante Jerál sesante sira, hanesan hahu’u husi esposa eis Komandante Jerál Komisariu Polísia Julio Hornay no Komisariu Polísia Faustino da Costa no kontinua mai iha Komisariu Polísia Faustino da Costa no Komisariu Polísia Mateus Fernandes ninian.
“No ohin sira organiza malu atu nune’e hodi halo diak no forte liu tan, sira (AESPNTL) mós sei prepara sira nia Estatutu atu bele lori ba rezista no sira bele hala’o sira nia aktividade”, tenik Komandante Jerál PNTL ne’e.
Komisariu Jerál Polísia ne’e salienta tan katak AESPNTL nia prioridade maka hare’e liu-liu kona-ba oinsa sira bele suporta sira nia kaben/parseiru nia servisu no hodi hare’e mós oinsa sira bele fó apoiu ba membru PNTL sira ne’ebe maka moras, hare’e ba maluk sira ne’ebe maka moras no hare’e mós ba iha desportu nian balun, atu nune’e AESPNTL iha aktividade hodi bele halibur malu.
“Kona-ba apoiu Komandu PNTL nian ba iha AESPNTL, klaru katak iha tanba AESPNTL mós fó apoiu ba Komandu atu nune’e aktividade hotu bele lao, tanba servisu Polísia ninian todan ne’e maka presiza apoiu husi ema hotu, maibé familia mós importante nune’e familia mós tenke apoiu servisu PNTL nian”, hatutan Komisariu Jerál Polísia ne’e.
Iha fatin hanesan Prezidente AESPNTL Manuela de Araújo hateten kona-ba ezistensia AESPNTL nian foin maka hari’I iha loron 21 Abril tinan 2023 wainhira Komandante Jerál no Segundu Komandante Jerál simu ona kargu hodi Komanda instituisaun PNTL, maka ami na’in rua hanesan Esposa Komandante Jerál no Segundu Komandante Jerál iha ona hanoin ida atu halibur esposa sira.
“Iha momentu ne’eba ami hakarak halibur esposa husi ajente to’o mai iha Superior sira nia esposa, entaun ida ne’e ami tenke halo asosiasaun ida, husi asosiasaun ida ne’e ho nia Vizaun atu fó hamahon ba esposa sira atu moris iha Naroman no mós Unidade”, esplika Prezidente AESPNTL ne’e.
Esposa Komandante Jerál PNTL ne’e salienta tan katak AESPNTL iha mós Misaun ida maka oinsa dezenvolve esposa sira hodi hala’o aktividade no mós fó apoiu ba ami nia parseiru sira servisu hanesan servidor estadu liu husi instituisaun PNTL.
“Husi ne’e, ami estrutura Asosiasaun nian kria ona programa sira hanesan desportu, ekonomia, kultura, sosial ida ne’e maka ami sei hala’o ba oin, ami mós hetan apoiu husi parseiru sira hanesan kompañia balun hodi bele suporta aktividade asosiasaun nian ho diak liu tan”, hatutan Esposa Komandante Jerál PNTL ne’e.
Kona-ba legalidade AESPNTL nia rasik, Manuela de Araújo esplika katak Asosiasaun ne’e foin maka hari’I tanba ne’e presiza tempu ne’ebe maka naruk atu hetan legalidade. Tanba ne’e, AESPNTL la hein atu to’o hetan legalidade husi parte Jurídiku Komandu PNTL nian maka foin bele hala’o aktividade, maibé ami hakarak AESPNTL ne’e ba oin nune’e maka ami hala’o ona aktividade balun hanesan asaun karidade ba iha HNGV iha semana hirak ba kotuk.
“Ami sei ba vizita membru PNTL sira ne’ebe maka durante ne’e hetan moras hodi la hala’o kna’ar, ami sei oferse apoiu nesesidade oituan ne’ebe maka AESPNTL iha no mós ami sei ba vizita feto maluk ne’ebe maka laen polísia maibé mate ona hodi bele fó apoiu ne’ebe maka ami iha inklui ami sei oferse apoiu balun ba iha Komandante munisipiu sira atu bele hatutan ba membru sira ne’ebe moras iha munisipiu”, hakotu Manuela de Araújo.
Aktividade ne’e partisipa husi Komandante Jerál PNTL Komisariu Jerál Polísia Henrique da Costa, Segundu Komadante Jerál Komisariu Polísia Pedro Belo, Komandante Komandu Supervizaun, Inspetúr Jerál, Amo Kapelaun, Komandante Komandu Munisipiu, Unidade, Xefe Servisu no Xefe Gabinete sira Komandu PNTL nian.
Media PNTL.
