Oe-Cusse– Eskuadra Polisia Nasional Timor Leste (PNTL) Sub Rejiaun Pante Makasar responsavel ba suku 8 no Aldeia 29, nomos ba area fronteira hanesan portu entrada Sakato no Leolbata.
Komandante Eskuadra Pante Makasar Inspetor Adelaide da Rosa hateten, ho suku 8 ne’e, membru PNTL inklui Komandante Eskuadra ho Ofisial Polisia Suku hamutuk na’in 22 ne’ebe kompostu husi feto na’in 9 no mane na’in 13 mak hala’o kna’ar iha Eskuadra Pante Makasar atu servi ba komunidade iha sub Rejiaun refere.
“Eskuadra Pante Makasar responsavel ba suku 8 (ualu) mak hanesan suku Costa, Lifau, Taiboco, Nipani, Lalisuk, Cunha, Naimeco no Bobocase, suku 8 ne’e iha ona Ofisial Polisia Suku (OPS) hodi fo apoiu ba lideransa komunitariu sira atu nune’e bele halo prevensaun ba konflitu ne’ebe mosu iha komunidade nia leet” afirma Inspetor Adelaide ba média PNTL iha Eskuadra Pante Makasar Oe-Cusse, loron 27 Novembru 2015.
Komandante Eskuadra Inspetor Adelaide hatutan, atividade lor-loron ne’ebe mak membru PNTL iha Eskuadra Pante Makasar hala’o mak hanesan patrullamentu rutina, fo atendimentu ba kazu krime publiku no kazu krime semi publiku, nomos ajuda umanitaria ba komunidade sira ne’ebe hetan dezastre.
Komandante Adelaide hatutan, iha Sub Rejiaun Pante Makasar númeru kazu ne’ebe mak aas liu mak kazu violensia domestika no tuir mai mak integridade fijika simples, polisia eskuadra mak halo prosesu inisiu ba kazu hirak ne’e, hafoin entrega ba Investigasaun no VPU Kuartel Jeral PNTL Oe-Cusse hodi kontinua prosesu ba kazu refere.
Mekanizmu ne’ebe mak atu diminui kazu violensia doméstika mak halo prevensaun no aproximasaun ba komunidade sira liu husi sosializasaun kona-ba saida mak violensia domestika, ho nune’e komunidade sira bele kompriende didiak kona-ba saida mak violensia domestika.
Komandante Adelaide konfesa katak difikuldade ne’ebe Eskuadra Pante Makasar hasoru mak kanalizasaun be moos, dala ruma halao patrullamentu fila mai, sira tenke buka meius atu ba buka be mos, no difikuldade seluk mak laiha hand set radio komunikasaun nian.
Ho preokupasaun hirak ne’e, Komandante PNTL Rejiaun Espesial Oe-Cusse, Superintendente Arnaldo de Castro Araujo hateten Komando sempre halo esforsu hodi responde ba difikuldade ne’ebe mak Eskuadra sira infrenta, maibe komando husu ba membru sira atu labele haree difikuldade hirak ne’e sai obstakulu atu hala’o kna’ar, tamba sai polisia tenke pronto iha kualker tempu no prontu atu servi komunidade. Média PNTL.
