Dili– Governu Amerikanu liu husi ninia Embaixada Estadus Unidus da Amérika (EUA) iha Timor-Leste tuir planu sei oferese Radio Komunikasaun hamutuk 65 (neen nulu resin lima) ba Polisia Nasional Timor-Leste (PNTL) Departamentu Polisia Komunitariu hodi fasilita di’ak liu tan servisu Ofisial Polisia Suku (OPS).
Adjuntu Xefe Misaun Embaixada Estadus Unidus Amérika iha Timor Leste, Katherine Dueholm hateten Estadus Unidus Amérika haksolok atu kontinua ninia apoiu direitu ba programa kapasitasaun no servisu PNTL ninian nu’udar buat ne’ebé mak Estadus Unidus Amérika halo nanis kedas ona liu husi projetu ida ne’e, hahu husi tinan 2012 liu ba.
“Estadus Unidus nia programa “Apoia Polisia, Sustenta Dame” maka programa miliaun dolar $11 ne’ebe implementa iha area oi-oin hodi hadia seguransa no estabilidade iha Timor-Leste. Doasaun ida ne’e maka produtu ida husi esforsu rua iha programa ida ne’e nia laran ne’ebé mai hamutuk hodi apoia PNTL nia Departamentu Polisia Komunitaria ho komunikasaun ne’ebe sira presiza,” afirma Katherine Dueholm iha serimonia entrega radio komunikasaun ba Polisia Komunitaria ne’ebe hala’o iha Salaun Konferénsia Kuartel Jeral PNTL Caicoli-Dili, loron Kinta (17/09/2015).
USAID nia projetu Polisia Komunitaria, implenta liu husi Fundasaun Asia, identifika ona katak OPS ida-idak presiza radio, no Konseleiru Senior Polisia-Logístika husi Governu Estadus Unidus, fasilita ona akizisaun ba radio sira ne’e.
“Ohin Polisia Komunitaria simu tan apoiu balun husi Embaxada EUA liu husi governu Amerikanu ne’ebe entrega radio komunikasaun hamutuk 65 ba OPS sira, nune’e bele fasilita no responde ba difikuldade ne’ebe mak OPS sira hasoru iha baze,” afirma Xefe Departamentu Polisia Komunitaria Nasional, Superintendente Assistente Boavida Ribeiro.
Boavida hatutan, apoiu ne’e fó bazeia ba parseru sira nia observasaun durante ne’e katak nesesidade PNTL liu-liu kona-ba komunikasaun ba Polisia Komunitaria, OPS sira presiza tebes radio komunikasaun atu nune’e bele halo komunikasaun bainhira sira halo servisu iha baze.
Durante ne’e Polisia Komunitaria servisu hamutuk ho parseiru barak no suporta ida ne’e nudar rezultadu diskusaun nivel parseria nian hodi fahe informasaun ba malu liu-liu iha área seguransa nian, tamba sira haree katak seguransa ne’e área ne’ebe mak importante tebes.
Instituisaun PNTL iha avansu no mudansa boot, liu-liu iha área Polisiamentu Komunitaria ne’ebe mak koloka ona membru sira iha kada suku, tamba ne’e sira apar ho programa no problema ne’ebe mak Polisia Komunitaria infrenta nune’e ho vontade sira oferese meius ne’ebe mak presiza.
Iha okaziaun ne’e Segundu Komandante Jeral PNTL Komisariu Faustino da Costa husu ba OPS sira atu utiliza radio ne’e ho diak atu fasilita no kanaliza informasaun. Uza radio ne’e ho kuidadu no ho responsabilidade atu radio ida ne’e tuir nia dalan no bele fo benefisiu di’ak liu tan ba meius komunikasaun ne’ebe mak durante ne’e sai obstakulu ba PNTL bainhira halao kna’ar.
“agradese ba Embaixada EUA liu husi nia reprezentante Katherine Dueholm, hein katak apoiu ne’e laos ninin no rohan ba apoiu maibe Estadus Unidus sei nafatin tulun no hein katak nia rejultadu pojitivu hodi garantia seguransa ba povu atu hala’o movimentu livre no seguru.”
Tuir planu, membru OPS ida hetan radio komunikasaun ida, maibe doador sira mos iha kbi’it limitadu tamba ne’e radio komunikasaun 65 ne’ebe sira fó apoiu sei oferese ba OPS sira ne’ebe iha liu área rural ka suku ne’ebe izoladu liu nomos ba Postu Administrativu sira husi kada Munisípiu.
Serimonia entrega Radio Komunikasaun ne’e dirizi husi Segundu Komandante Jerál PNTL, reprezentante EUA iha Timor Leste, Xefe Departamentu Polisia Komunitaria Nasional, reprezentante Ofisial Polisia Suku husi kada Munisípiu no membru PNTL sira seluk. Média PNTL.
