Dili- Komandante Jeral Polisia Nasional Timor-Leste (PNTL) apela ba inan aman sira atu kumpri sira nia dever hodi kontrola oan sira nia movimentu no aktividade loro-loron, nune’e bele prevene oan komete krime.
Komandante Jeral PNTL Komisariu Polisia Julio da Costa Hornay hateten Inan aman iha dever atu kontrola oan sira ne’ebe idade joven no hatene sira nia ransu malu ne’e iha ne’ebe no halo saida para ita kontrola ida-ida hodi labele hamosu bebeik problema iha kapital Dili, Nia hato’o kestaun ne’e ba jornalista sira hafoin partisipa iha enkontru semanal iha Kuartel Jeral Kaikoli Dili Segunda (18/04).
Nia akresentatan katak komunidade labele hanoin deit katak polisia iha para atu atende no resolve problema, buka tuir suspeitu, kaptura no lori ba prosesu maibe ita hotu-hotu iha dever maximu atu kontribui ba paz, nudar timor oan nasaun ne’e iha ita hotu nia liman tantu husi kiik to’o boot ita hotu nia responsabilidade atu kria paz iha ita nia rai laran, paz mai husi ita nia aan no lamai husi ema seluk wainhira ita kontribui hotu maka nasaun ne’e sei diak, hakamatek no dezenvolvimentu sei lao ho hakmatek.
“ Hau apelu ba inan aman atu toma responsabilidade kontrola oan sira ninia ransu ba ne’ebe, halo saida, no tenke hatene sa oras maka sira fila para diminui sira nia ransu ba aktividade kriminozu no aktividade illegal iha rai laran ne’ebe kria konfujaun no konflitu,” Nia dehan.
Problema ne’ebe maka akontese iha sidade Dili fila-fali ba ema ida-idak nia konsiensia nudar timor oan, se ita hotu sente katak rai ne’e ita nia no hakarak moris iha ambiente ne’ebe paz no dame ita hotu-hotu tenke koopera, joven sira tenke hanoin hodi halao aktividade ne’ebe maka nia halo loron ohin no inportansia ba nia futuru. Media PNTL