Dili 09/06, Kazu violasaun ida ne’ebe halo husi membru Polisia Sientifika Investigasaun Kriminal (PSIC) hasoru membru Polísia Nasional Timor-Leste (PNTL) iha loron 07 fulan Juñu tinan 2023 iha area Hudi Laran ninia prosesu krime lao ona.
Segundu Komandante Jerál PNTL Komisariu Polísia Pedro Belo sexta-feira (09/06) ne’e hafoin hasoru malu ho adjuntu director PSIC liu husi konferensia imprensa hateten lori Komandu Jerál nia naran hakarak hato’o argadese wa’in ba adjuntu director PSIC no asesor juridiku, tanba ne’e hanesan hasoru malu ba dahuluk iha mandatu foun hanesan Komandante Jerál no Segundu Komandante Jerál, hanoin hasoru malu ida ne’e bele iha relasaun servisu ida ne’ebe maka bele diak liu tan iha futuru oin mai.
“Tanba ita hatene katak hare’e ba pasadu no mós kazu ne’ebe ligadu ba iha kazu ne’ebe akontese orseik madrugada ne’ebe maka envolve oknum husi instituisaun rua (PNTL & PSIC), ikus mai públiku foti kestaun ida ne’e sai bo’ot no ema hotu preukupa ho situasaun ida ne’e, tanba ne’e iha ami nia hasoru malu ida ne’e koalia mós kona-ba asuntu ida ne’e, maibé atu koalia lolos katak ami nia hasoru malu ne’e atu halo kontinuasaun servisu entre instituisaun rua atu ba oin bele diak”, tenik Segundu Komandante Jerál PNTL ne’e.
Komisariu Polísia ne’e afirma tan katak, maibé kazu ne’ebe akontese orseik madrugada, lao tuir nia dalan hanesan prosedimentu kriminal kontinua lao no iha parte PSIC nian mós sei iha prosesu internal atu hare’e iha parte disiplina ninian. Ne’ebe labele kahur sasan sira ne’e hamutuk, ida ne’e hanesan instituisaun Estadu nian ne’ebe presiza iha kooperasaun hamutuk tanba hotu-hotu iha interese ba povu nian tantu husi PNTL no PSIC ita hotu hakarak kombate aktu kriminozu sira ne’ebe hakarak Estraga Estabilidade iha ita nia rai laran.
“Tanba ne’e maka kooperasaun ba oin ne’e hau hanoin diak liu tan maibé ita labele kahur tan deit akontesimentu orseik madrugada no ikus mai instituisaun rua ne’e hare’ malu matan la mós, nune’e públiku bele kestiona kona-ba tanba saida maka sira la servisu hamutuk maibé hamosu fali konflitu entre sira, kualker kazu ne’ebe mosu entre membru husi PNTL nian no husi PSIC nian ne’ebe mosu, ami kontaktu malu atu bele koalia ba malu labele sé kotuk ba malu “, hatutan Komisariu Polísia ne’e.
Eis Komandante Komandu Operasaun PNTL ne’e subliña tan katak membru PNTL ne’ebe sai vítima iha momentu akontesimentu nia hala’o hela ninia servisu maka mosu problema sira ne’e hotu. Tanba ne’e husu nafatin atu idak-idak hala’o ninia servisu liu-liu membru husi intituisaun rua ne’e nian.
Iha fatin hanesan Adjuntu Diretor PSIC Adino Nunes Cabral hateten kooperasaun institusional ne’e tenke funsiona iha nivel superior, problema ne’e bele akontese iha kualkér fatin maibé superior rua instituisaun nian tenke hamutuk.
“Tanba ami hotu-hotu hanesan aparellu Estadu nian oinsa maka atu bele garantia kooperasaun diak entre instituisaun rua ne’e, agora dezentendimentu ne’ebe maka mosu iha loron hirak liu ba, ida ne’e iha ninia trâmitu rasik, sé iha indikasaun ba krime, prosedimentu tenke lao, vitima ne’ebe sente ofendidu iha prosedimentu kriminal lao tuir ida ne’e”, esplika Adjuntu Diretor PSIC ne’e.
Adino Nunes hatutan tan tanba ne’e iha ligasaun ho membru PSIC, hau hanoin prosesu internal sei hare’e ninia sirkunstansia oinsa atu nune’e bele aproxima ba asaun polisial ida.
“Hau enkoraja vitima iha direitu tomak tuir norma prosesual penal bele halo keixa iha departamentu investigasaun kriminal PNTL ou iha Ministériu Públiku, lao tuir nia dalan, tanba problema ne’e hanesan problema partikular maibé wainhira iha sirkuntansia maka iha indikasaun ba krime, prosesu kriminal tenke lao”, tenik Adino Nunes. Media PNTL.
