Kazu membru Polisia Nasional Timor-Leste (PNTL) Stasaun Kelekai tiru joven nain rua oras ne’e dadaun iha ona prosesu investigasaun iha prokuradoria Distrital Baucau hodi buka hatene motivu akontesementu no se maka sala.
Komandante jeral PNTL Komisariu Julio da Costa Hornay hateten Komando PNTL hein lia los husi prosesu ne’e no justisa maka sei desidi se maka los no se maka sala; wainhira polisia maka sala nia tenke prontu atu simu konsekuensia sansaun disiplinar tuir regulamentu PNTL nian.
Nia hatutan katak normalmente polisia halo prevensaun ruma tuir regras se joven sira sae motor la uza kapasete nia hapara no husu e hato’o regras tranjitu ou prende motor no ema hodi halo prosesu ba violasaun ne’ebe maka nia halo.
“Hau hanoin hau membru ajente sira ne’ebe koloka iha estasaun kelekai ema sei normal no kumpri nia regras de servisu maibe se membru sira ne’e halo atuasaun la tuir lei maka nudar komandante jeral hau sei foti medidas ba sira,” dehan Hornay Kinta (19/11) iha Kuartel Jeral kaikoli Dili.
Bazeia ba relatoriu husi Komando Munisipiu Dili hateten katak iha akontesementu komandante fo ordem ba nia membrus ba halo atuasaun to’o iha fatin akontesementu atu no problema kalma, maibe joven nain tolu mai sae motor ida deit no la uza kapasete no uza farda artemarsiais no halo aksaun ba polisia tanba ne’e polisia defende nia aan tuir rejime lei uja forsa ninian.
Entretantu antes ne’e Komandante polisia Munisipiu Baucau, Superintendente justino Menezes, afirma antes tiru joven sira ne’e polisia Eskuadra Kelikai ba atua uluk problema entre grupu rua husi suku Baguia, aldeia Saraida ho suku Letemumu postu administrative kelikai nian.
“bainhira polisia eskuadra kelikai ba hakalma tiha situasaun entre joven suku rua nian iha sede suku Letemumu mosu joven nain tolu ho motor ida deit ne’ebe la uja kapasete ho atributu arte-marsiál nian kompletu ne’ebe maka estadu taka tiha ona, dehan Justinu ba jornalista sira iha edifisiu Komando PNTL Baucau, tersa (3/11) semana ne’e.
Xefe polisia Baucau ne’e hatete, joven nain tolu ne’ebe la uza kapasete naran Agostu dos Santos, Sidonio Guterres no Januario dos Santos.
‘Sira nain tolu ba iha fatin problema nian halo provokasaun au mesmu tempu dudu polisia no rasta polisia ninia pistol atu hadau ho manera ida ne’e mak polisia mos uza forsa hodi defende aan hakanek joven nain rua,” dehan Justinho. Media PNTL