Dili- Komandante Jeral em Ezersisiu komisariu Polisia, Pedro Belo fo ordem ba komandu PNTL munisipiu Dili atu asegura paz no seguransa iha kapital Dili.
Komisariu Polisia, Pedro Belo hateten objetivu husi enkontru ne’e atu fo ordem no orientasaun ba Despaixu husi Ministru Estatal Tomas Cabral atu fo ba Autoridade Lokal sira serbisu hamutuk ho Ofisial Polisia Suku (OPS) sira hodi identifika area risku sira, hafoin identifika sei halo dialogu iha fatin hirak ne’ebe identifikadu ona, Nia hato’o asuntu ne’e hafoin enkontru ho komadante Eskudra no OPS sira iha komandu munisipiu Dili, Segunda (24/06).
Nia hatutan alende ne’e orientasaun husi Ministru Interior Francisco Guterres ba Komandu Jeral atu kontinua ba Komandu munisipiu sira ligadu ho vizita Santo Padre nian ne’ebe sei mai iha fulan Setembru, tanba ne’e maka iha orientasaun lubuk ida ne’ebe maka atu fo, oras ne’e daudaun Komandante Eskuadra sira hamutuk ho OPS identifika area risku iha suku ida-idak.
Komandante Eskuadra sira mos informa katak sei halo dialogu ho parte eskola tanba sempre mosu problema, orientasaun ne’e klaru ona ba sira atu sira kontinua serbisu hamutuk ho Autoriedade Lokal no parte eskola atu kria enkontru ruma ho sira nune’e bele halo prevensaun ba problema nune’e iha Vizita Amu Papa nian situasaun hotu-hotu bele la’o diak.
Orientasaun hirak ne’e maka ami fo ba malu no kontinua serbisu ona. Alende ne’e oras ne’e daudaun mos Kopa Euro nian ne’ebe la’o hela no kolega balu ne’ebe maka Fens barak ba nasaun balu entaun ita presija halo planu no prevensaun hamutuk ho OPS sira atu identifika joven hirak ne’ebe maka hakarak atu kria problema. Ami nia OPS sira serbisu hamutuk ho autoriedade lokal no komunidade sira hodi garante katak Kopa Euro ne’e remata ho situasaun diak.
Media PNTL
