Dili-Komandu Polísia Nasional Timor-Leste (PNTL) liu husi Departamentu Polisiamentu Komunitaria Nasional realiza formasaun kona-ba Polísia Komunitaria, NOP, KPK no Lei relevante sira seluk ba Komandante Eskuadra Munisipiu sira.
Komandante Operasaun PNTL Superintendente Xefé Henrique da Costa hafoin halo abertura ba formasaun ne’e hateten formasaun ne’e hanesan kontinuasaun husi primeira faze ne’ebe maka hala’o ona iha semana kotuk ba Komandante Eskuadra sira tanba total partisipantes hamutuk ema 65 nune’e maka fahe ba sesaun rua.
“Workshop ne’e importante tebes-tebes liu-liu ba Komandante Eskuadra sira tanba iha asuntus importante balun ne’ebe maka sei koalia iha workshop ne’e hanesan NOP ba polísiamentu komunitaria nian, segundu kona-ba KPK ninian no mós KSM ninian”, tenik Komandante Operasaun PNTL.
Superintendente Xefé Henrique da Costa akresenta liu tan katak liu husi formasaun ne’ebe maka sei hala’o durante loron lima ne’e, komandante eskuadra sira presija atu hatene nune’e wainhira sira ba hala’o sira nia servisu iha terenu, bele sai hanesan modalidade ida ba sira atu hala’o servisu ho diak.
“Iha formasaun ne’e sei koalia mós kona-ba asuntu seluk hanesan sensibilizasaun Lei Nu.5/2017 kona-ba Lei Arma Branka tanba ita hatene katak iha munisipiu no eskuadra balun hala’o ona operasaun maibé balun mós seidauk halo operasaun ne’e ho sériu no másimu tanba ita mós presija hasa’e sira nia koñesimentu kapasidade, tanba ita hatene Lei refere rigorozu tebes-tebes entaun presija koñesimentu klean molok halo implementasaun”, subliña Superintendente Xefé ne’e.
Iha fatin hanesan Komandante Departamentu Polisiamentu Komunitaria Nasional (DPCN) Superintendente Asistente António da Luz iha ninia intervensaun ba serimonia ne’e hateten formasaun ba Komandante Eskuadra sira iha workshop ne’e sei koalia kona-ba koñesimentu servisu polisia komuntaria nian no sosializasaun ba NOP tolu ne’ebe maka estabelese iha instituisaun PNTL liu-liu iha polisia komunitaria kona-ba OPS, KPK no KSM.
“Formasaun ida ne’e importante tebes-tebes ba koñesimentu komandante eskuadra sira nian, tanba ita bo’ot sira maka hanesan lideransa másimu iha postu administrativu, eskuadra ne’ebe loron ba loron ita bo’ot sira tau matan ba ita bo’ot sira nia membru liu-liu ba OPS sira ne’ebe koloka iha ita bo’ot sira nia suku”, hateten Komandante DPCN.
Superintendente Asistente António da Luz hateten liu tan katak ho hanoin hirak ne’e maka Komandante Eskuadra sira tenke iha formasaun, tenke iha koñesimentu klean kona-ba normas prosedimentu sira ne’ebe maka estabelese iha PNTL liu-liu kona-ba papel OPS nian.
Formasaun ba faze daruak ne’e hetan suporta husi parseiru desenvolvimentu The Asia Foundation (TAF) no husi total Komandante Eskuadra hamutuk ema 65, partisipantes ba iha sesaun daruak formasaun ninian hamutuk ema 33 ne’ebe maka kompostu husi komandante eskuadra munisipiu hotu no sei hala’o durante loron lima nia laran.
Media PNTL.
