Baucau– Komando Empeñamentu Operasaun Konjunta (EOC) ne’ebe kompostu husi Instituisaun Polisia Nasional Timor Leste (PNTL) ofisialmente ensera ona operasaun “HANITA” tuir rezolusaun Governu hodi hala’o nia misaun buka tuir Prezidente Konsellu Revolusionariu Maubere Paulino Gama “Mauk Moruk” ho nia elementu sira durante fulan 5 (lima) husi loron 21 Marsu to’o 08 Agostu 2015.
Enseramentu operasaun ne’e hala’o iha 1 Batallaun F-FDTL Lanud Baucau loron Kuarta (09/09/2015), ne’ebe partisipa husi Xefe Estadu Maior F-FDTL Coronel Falur Rate Laek, Komandante 1 Batallaun F-FDTL Tenente Coronel Maubuti, Reprezentante Administrador Munisipiu Baucau no Komanante PNTL Munisipiu Baucau.
Iha enseramentu operasaun ne’e, Komandante Jerál PNTL Komisáriu Julio da Costa Hornay agradese no hato’o apresiasaun ba forsa konjunta ne’ebe hala’o nia misaun durante fulan 5 nia laran maske hetan kritika barak husi publiku.
“Ha’u hanesan Komandante Jerál PNTL iha biban ida ne’e hakarak hato’o ha’u nia agradesimentu no apresiasaun boot ba forsa konjunta ne’ebe hala’o imi nia misaun durante fulan 5 nia laran hodi kumpri rezolusaun Governu ne’ebe hato’o mai forsa 2 atu hala’o operasaun konjunta hodi kombate ba krime organizadu ne’ebe eziste iha tempu ne’eba,” afirma Komisáriu Hornay.
Julio hatutan, susesu barak mak forsa 2 ne’e hetan, maibe iha mos difikuldade barak mak hasoru durante operasaun, maibe ida ne’e la’os obstakulu ba forsa konjunta ne’e atu hala’o nia misaun.
“Durante operasaun la’o to’o remata, ita hetan kritika barak maibe hanesan forsa defeza no seguransa ita iha misaun klaru tuir rezolusaun Governu atu hala’o ita nia atuasaun. Susesu barak mak ita hetan maibe iha mos difikuldade barak mak ita hasoru, maibe ita sakrifika ita nia an hodi hala’o misaun ne’e ho di’ak. Agradese ba imi hotu, tamba durante iha operasaun ita hatudu espiritu de kamaradajen, espiritu de corpo entre forsa 2 ne’ebe hatudu di’ak teb-tebes,” tenik Hornay.
Iha fatin hanesan, Xefe Estadu Maior General das F-FDTL Major Jeneral Lere Anan Timur hateten, lori Governu no Instituisaun 2 nia naran agradese boot ba membru EOC ne’ebe hatudu duni nia rezultadu pozitivu liu husi misaun ne’ebe mak forsa 2 PNTL ho F-FDTL hala’o.
“Hodi Governu nia naran, hodi ita nia Ministru Defeza no Interior nia naran hato’o ami nia agradesimentu boot ba imi nia servisu, imi nia sakrifisiu ba misaun ne’ebe ita nia Estadu no Governu fo ba imi durante fulan 5 nia laran,” afirma Major Jeneral Lere.
Xefe Estadu Maior Jeneral Lere hatutan, ho sakrifisiu no pasiensia mak bele hatudu nia rezultadu, no liu husi operasaun ne’e, membru ida-idak bele hetan esperiensia foun iha sira nia moris, no iha sira nia kareira nuudar militar no polisia.
“Fulan 5 nia laran hasoru difikuldade barak maibe konsege ultrapassa, tamba ho imi nia pasiensia no sakrifisiu mak hatudu nia rezultadu. Komando Agradese ba imi, ba misaun ne’ebe imi halo ho susesu, ita hein katak problema hanesan ne’e labele akontese tan. Iha fulan 5 nia laran imi hetan esperiensia barak, imi nia komandante sira bele bele apresia imi, se mak komandante diak, se mak soldadu diak, imi rasik mak konsege hetan esperiensia foun ba imi nia vida, imi nia kareira nuudar militar no nuudar polisia.”
Iha parte seluk, Komando mos sei halo reklamasaun ba keixa sira ne’ebe mak komunidade hato’o kona-ba ba erru ne’ebe membru sira halo durante operasaun, karik ne’e loos mak komando sei kastigu ba membru ne’ebe komete, maibe karik ida ne’ebe keixa inventa deit mak konsidera sira hakarak atu hatun dignidade instituisaun 2 ne’e.
Entertantu enseramentu ne’e mos taka ho jantar konfraternizasaun iha 1 Batallaun FFDTL Lanud-Baucau, entre PNTL ho FDTL nomos hetan partisipasaun husi Lideransa Komunitaria suku Triloca no konvidadus seluk tan. Média PNTL.
