Dili– Tuir ejijensia ne’ebe hato’o husi eis deputadu Cornelio Gama “L7” nuudar Maun husi Matebian Paulino Gama “Mauk Moruk” katak Operasaun Konjunta ne’ebe hala’o husi Polisia Nasional Timor Leste no Falintil Forsa Defeza Timor Leste hamate ka oho nia alin Mauk Moruk, ho nune’e familia ejiji ba Estadu atu fó kategoria saida ba Mauk Moruk, katak mate hanesan ema veteranu ida ka oinsa.
Kona-ba kestaun ne’e Komando Empeñamentu Operasaun Konjunta (EOC) laiha kompeténsia atu fó kategoria ba Mauk Moruk tamba EOC kumpri deit rezolusaun ka ordem husi Parlamentu Nasional, ne’ebe Diretiva husi Governu no hetan promulga husi Prezidente Repúblika.
“Ba ami laiha kompetensia atu koalia kona-ba ida ne’e, husu ba Governu kategoria saida mak fo ba Mauk moruk, ba ami laiha kompetensia atu responde, so pollitiku sira, hanesan mos operasaun politiku sira haruka mak ami retira, ami iha ne’e para kumpri deit, iha mundu ne’ebe deit militar so iha poder atu empeña bazeia ba ordem, tamba ne’e ita nuudar Timor oan ita tenke iha sentidu de Estadu, Estadu iha mundu primeiru mak Maromak segundu mak Estadu, liu ida ne’e laiha ona, tamba ne’e mak ita labele halimar ho Estadu,” afirma Xefe Estadu Maior F-FDTL, Major Jeneral Lere Anan Timur ba jornalista sira liu husi konferensia imprensa ne’ebe hala’o iha Kuartel Jerál F-FDTL Fatuhada-Dili, loron Kuarta (12/08/2015), ne’ebe akompaña mos husi Komandante Jerál PNTL Komisáriu Julio da Costa Hornay.
Major Jeneral Lere Anan Timur hatutan, Estadu liu husi EOC tenta buka meius oi-oin atu Mauk Moruk entrega-an deit ba EOC hodi ba hatan iha Tribunal ba aktu krime ne’ebe Mauk ho nia grupu sira halo hasoru forsa no seguransa estadu nian, maibe Mauk Moruk rasik mak lakohi koopera no halo reasaun nafatin hasoru membru KOK iha terreinu hodi rezulta membru KOK balun hetan kanek.
“Hafoin Mauk Moruk mate ema komesa koalia barak-barak katak Ha’u (Major Lere.red) Prezidente Taur, ho eis PM Xanana mak oho, ha’u dehan ba ita boot sira katak ami mos lakohi Mauk Moruk mate, ami tenta halo esforsu tomak hodi Mauk mai intrega-an deit, maibe nia rasik mak lakohi koopera ho ami, no halo reasaun nafatin bainhira ami nia membru KOK hasoru nia, no ikus mai liu husi kontaktu tiru malu ne’e nia mate, ida ne’e konsekuénsia no ita tenke simu realidade,” afirma Major Lere.
Iha konferénsia imprensa ne’ebe Komando EOC hala’o, fo sai mos kronolojia akontesimentu molok Mauk Moruk ho nia elemntu nain 3 mate hafoin halo kontaktu tiru malu iha loron 5 no 8 fulan Agostu 2015. Média PNTL.
