Dili, atu garante seguransa iha loron Restaurasaun Independensia Timor Leste nian ne’ebe monu iha loron 20 fulan Maiu tinan ne’e, Komandu Polísia Nasional Timor Leste (PNTL) preparadu ona hodi koloka membru iha fatin selebrasaun nian iha munisipiu Ermera.
Komandante Jerál PNTL Komisariu Julio da Costa Hornay iha sexta semana ne’e hateten, Komando PNTL munisipiu Ermera hala’o ona enkontro ho komisaun organizadora ba selebrasaun loron Restaurasaun Independensia 20 de Maiu ne’ebe tuir ajenda sei hala’o iha postu administrativu Gleno munisipiu Ermera.
“Ba loron 20 de Maiu ne’e preparadu no organizadu ona, hein implementasaun, no ohin pessoal Komando Operasaun mós desloka ba munispiu Ermera, seguransa laiha problema, kestaun lalaok serimonia ne’e komisaun organizadora nia responsabilidade, no forsa seguransa maka fó apoio ba iha seguransa no mós involvimentu iha parada militar”, tenik Komandante Jerál PNTL wainhira hasoru malu ho jornalista iha sexta (13/05) ne’e.
Hatan kona-ba kolaborasaun no koordenasaun PNTL ho parte Komisaun Organizadora ba eventu Nasional ne’e, Komisariu Polísia Julio da Costa Hornay hateten, parte PNTL partisipa ona enkontru ne’ebe organiza husi Komisaun Organizadora ba eventu 20 de Maiu nian, no parte PNTL prontu atu halo kolaborasaun no koordenasaun ho Komisaun iha aspektu seguransa durante serimonia.
Ba ida ne’e, Komandante Jerál PNTL esplika,”Kona-ba koloborasaun no kooperasaun klaru que iha, tanba Komando Operasaun halo ona reuniaun dala barak ona ho komisaun oragnizadora tanba tenke involve malu hodi entende programa ne’e lao oinsa”.
Kona-ba membru PNTL nain hira maka sei koloka hodi fó seguransa iha serimonia ne’e, tuir Komisariu Polísia Julio da Costa Hornay hateten, ida ne’e parte Komando PNTL munisipiu Ermera tomak no apoio husi Unidades Espesial ho mós Tránzitu hodi halo passa revista (cek-point) husi dalan diresaun munisipiu Liquiça tama ba munisipiu Ermera, nune’e mós husi dalan diresaun munisipiu Aileu tama ba munisipiu Ermera, no ba iha munsipiu Ermera laran rasik, membru tomak sei tun no apoio husi Unidades sira. Parte F-FDTL mós sei fó sira nia apoio ba PNTL hodi bele asegura seguransa iha munisipiu Ermera durante eventu ne’e lao. Media PNTL.
