Dili- Komandu Polisia Nasional Timor-Leste (PNTL) distribui viatura hamutuk 61 ba Komandu munisipiu no Unidade hodi fasilita servisu operasional iha terrenu.
Komandante Jeral PNTL Komisariu Polisia Faustino da Costa hateten distribuisaun ne’e nudar kontinuasaun tanba iha fulan balu liu ba distribui ona viatura ba Eskuadra, Seksaun, Unidade Pessoal Vulneravel (VPU) no Departamentu Tranzitu Seguransa Rodoviariu iha munisipiu hotu tanba ne’e ohin ita kompletatan Eskuadra sira ne’ebe maka seidauk iha trasporte, Nia hato’o asuntu ne’e iha serimonia distribui kartea iha Kuartel Jeral PNTL Kaikoli Dili, sexta (07/10).
Nia haktuirtan aproveta oportunidade ida ne’e husu ba Komandante munisipiu no Unidade sira hotu katak transporte hirak ne’e foun maka tenke mai ho mentalidade foun oinsa atu uza hodi garante utilija ba tempu naruk no sente katak sasan ne’e povu no estadu nian instituisaun PNTL so empresta estadu nia sasan no uza hodi servi estadu, povu no rai ida ne’e.
Atu reforsa ida ne’e maka Komandu PNTL oras ne’e prepara no kria hela regulamentu no Lei oinsa utilija viatura estadu ba PNTL nune’e mos hamosu despasu ba motorista sira ne’ebe maka seidauk hetan sertifikasaun husi Komandu maske nia iha karta kondusaun husi DNTT maibe seidauk atravesa formasaun utilijasaun viatura estadu maka Komandante sira tenke hatene nia sei la autorija, wainhira la kumpri no involve iha asidente ruma maka Komandante ho membru ne’e sei submete ba prosesu no ida-idak responsabiliza ba kustu gastu ne’ebe iha.
Motorista kuaze nain 100 ne’ebe maka partisipa ona formasaun so sira maka autorizadu utilija transporte hirak ne’ebe ita distribui no kualker asidente ne’ebe involve viaturas PNTL nian obrigadu Komandante sira hotu tenke atravesa prosesu investigasaun husi Departamentu Tranzitu Seguransa Rodoviariu tanba trasporte ne’e atribui ba Polisia.
Iha okajiaun ne’e Vice Ministru Interior Antonio Armindo husu ba PNTL atu utilija transporte hirak ne’e ho kuidadu tanba governu laos tinan-tinan sosa deit kareta foun ba PNTL tanba ita iha ministeriu lubuk ida ne’ebe maka presija mos, nune’e kareta hirak ne’ebe maka distribui ohin no antes ne’e favor ida kuidadu ba laos ohin simu ba soke ou ohin simu ba ense fali minarai tanba kareta hirak ne’e hola ho osan povu no governu nian tanba ne’e tenke kuidadu hanesan kuidadu ita nia aan rasik.
Viatura unidade 61 ho marka HILUX HILUX ne’e kompra ho orsamentu Jeral Estadu (OJE) hamutuk miloens $2,303, 238 ne’ebe liu husi prosesu tenderijasaun iha Komisaun Nasional Aprovizionamentu (CNA-sigla portuges) no manan husi kompania Auto Timor, hodi kompleta ba Eskuadra PNTL no unidade ne’ebe seidauk simu viatura operasional iha tinan 2021.
Serimonia distribui Viatura ne’e prezidi husi Komandante Jeral no Segundu Komandante jeral Komisariu Polisia Mateus Fernandes ho prejensa Vice Ministru Interior, Prezidente Komisaun B Agustinho Sequera “Somocho”, membru Komisaun B, Reprejentante Provedor PDHJ, Estrutura Komandu PNTL no komvidadu sira. Media PNTL
