Dili, Komandu Polísia Nasional Timor-Leste (PNTL) liu husi Komandante Jerál Komisariu Jerál Polísia Henrique da Costa no Segundu Komandante Jerál Komisariu Polísia Pedro Belo hamutuk ho Ministru Interior Francisco Guterres hala’o Avaliasaun Servisu kona-ba Implementasaun 5 Prioridade 2023-2028 Durante Periodu Marsu 2023 To’o Dezembru 2024 ba Komandante Supervizaun, Komandante Komandu Munisipiu 13, Komandante Unidade, Xefe Gabinete no Xefe Departamentu sira PNTL nian.
Ministru Interior Francisco Guterres hafoin halo abertura ba aktividade ne’ebe hala’o iha loron Segunda-feira (27/01) ne’e iha Salaun Suai Room Timor Plaza ba Jornalista sira hateten 5 Prioridade ne’e aprova kleur ona no ohin sira mai atu halo avaliasaun implementasaun programa 5 Prioridade ne’e katak saida maka halo ona, saida maka seidauk halo no saida maka presiza tenke hadia hodi nune’e dezafiu ne’e iha ne’ebe.
“Tanba ne’e enkontru ida ne’e barak liu atu mai diskuti kona-ba dezafiu ne’ebe maka iha katak halo ona maibé seidauk másimu, tanba saida maka seiduak másimu, tanba rekursu ka tanba kestaun jestaun ka kestaun sistema ou kestaun Lei ne’ebe maka iha hodi impede ou tanba politika ruma halo hodi impede implementasaun programa ne’e la lao, ida ne’e maka sira identifika no kapas ohin sira aprezenta, identifika kestaun importante balun ne’ebe ita presiza duni hadia hodi nune’e Komandu ida ne’e bele funsiona lao diak liu tan”, haktuir Ministru Interior ne’e.
Membru Governu ne’e akresenta tan katak kestaun atu hadia ne’e barak maibé primeiru kestaun koordenasaun presiza identifika didiak katak koordenasaun institusional ne’e importante tebes-tebes atu bele aselera prosesu implementasaun programa ne’e, segundu kestaun kona-ba rekursu presiza tenke hare’e didiak, presiza koloka didiak atu nune’e sira bele uza rekursu ne’ebe maka sira iha ne’e hodi hala’o sira nia servisu ho másimu.
“Kestaun seluk maka kona-ba Komandu katak oinsa maka kada Komandante Komandu idak-idak tenke responsabiliza ba ninia Unidade no elementu sira, tenke iha duni autoridade atu foti desizaun, tenke brani foti desizaun wainhira hasoru difikuldade ruma Komandu tenke iha autoridade atu bele foti desizaun tanba Lei Orgânika no despaisu Komandante Jerál nian fó dalan ba sira, tanba ne’e kestaun sira ne’e ami diskuti no tenke hadia iha tinan ida ne’e”, hatutan Membru Governu ne’e.
Iha fatin hanesan Komandante Jerál PNTL Komisariu Jerál Polísia hateten hafoin simu pose, ita mai ho Prioridade Lima Komandu nian hanesan ohin aprezenta ida ne’ebe implementa iha tinan 2023 to’o 2028 ninian.
“Konserteza ita nia Prioridade ka Programa sira mai ho dezafiu, laos katak buat hotu ne’ebe ita tau ne’e, buat hotu ita implementa tuir ita nia Mehi, ne’e lae; maibé iha difikuldade barak ne’ebe maka dala-ruma nia impaktu ba iha implementasaun sira hanesan dala-ruma mós balun kona-ba ita nia politika rasik, tuir mai ita nia rekursu umanu rasik, tuir fali ita nia kapasidade atu implementa, sira ne’e maka sai hanesan dezafiu ida ne’ebe ohin ita hare’e hamutuk atu nune’e ba iha tinan 2025 ne’e, ita hare’e husi ita nia parte fraka sira ne’e, ita hodi hadia implementa fila fali iha tinan 2025 nian”, haktuir Komandante Jerál PNTL ne’e.
Komisariu Jerál Polísia ne’e subliña tan katak avaliasaun ne’e ita involve Komandante Munisipiu, Unidade, Departamentu sira, ita hotu-hotu hare’e frakeza ida ne’e ka fallansu ida ne’e husi Komandu ka husi munisipiu ka ou husi parte sira seluk, ida ne’e mak ita halo avaliasaun, ita sei koalia aberta ba malu, ida ne’ebe maka falla husi Komandu ninian, ita bele hadia, ida ne’ebe falla husi Komandante munisipiu sira, ita orienta katak ida ne’e kna’ar imi nian maibé imi la implementa ka ezekuta, entaun ida ne’e sai hanesan bareira ida.
Aktividade Avaliasaun ne’e marka prezensa husi Ministru Interior, Prezidente Komisaun B Parlamentu Nasional, Komandante Jerál, Segundu Komandante Jerál, Komandante Supervizaun, Diretur Diresaun Justisa no Disiplina, Komandante Komandu Munisipiu 12, RAEOA, Komandante Administrasaun Espesial Atauro, Komandante Komandu Unidade (UPM, UEP, UPF), Xefe Gabinete no Xefe Departamentu sira PNTL nian, Vise Prezidente AESPNTL, Amo Kapelaun PNTL, Parseiru TLPDP no parseiru The Asia Foundation. Media PNTL.
