Liquiça, Komandu Polísia Nasional Timor-Leste (PNTL) liu husi Komandu PNTL munisipiu Liquiça implementa programa “Polísia Proximidade” katak hakbesik ann ba komunidade ho modelu vizita komunitariu ba aldeia sira ne’ebe identifikadu no merese atu vizita iha aldeia Padevou, suku Guicu, postu administrativu Maubara, munisipiu Liquiça kinta-feira (06/10) ne’e.
Reprezentante Komandante Jerál PNTL, Komandante Komandu Operasaun Superintendente Xefe pedro Belo iha ninia intervensaun hateten, PNTL mai ho ninia estatutu no Lei Orgânika PNTL iha ninia misaun importante ida ne’ebe maka bolu dehan Polisiamentu Komunitaria.
“Iha Polisiamentu Komunitaria, iha programa ida ne’ebe importante ho naran VIP (Vizibilidade, Involvoimentu no Profesional) ho VIP maka Polisia ohin loron hamutuk ho maluk sira iha fatin ida ne’e; politika Komandante Jerál husu ba nia membru tomak iha teritoriu nasional atu implementa Polisiamentu Komunitaria, hakbesik ann ba komunidade, koñese ninia juventude sira, koñese ninia lideransa komunitaria sira, koñese ninia inan-aman sira, koñese ninia veteranu sira, ida ne’e maka importante tebes hodi ohin loron PNTL tau ninia ema sira iha fatin hotu, liu-liu Ofisial Polísia Suku (OPS) sira”, tenik Komandante Komandu Operasaun PNTL ne’e.
Superintendente Xefe ne’e afirma liu tan katak OPS ne’ebe maka koloka iha teritoriu nasional hamutuk 452 iha suku hotu-hotu hodi koopera hamutuk. Ohin ita mós halo vizita ba komunidade sira ne’ebe presiza tebes ita nia ajuda/tulun, tanba liu husi Xefe Suku no autoridade lokal sira maka ita bele hatene katak, iha maluk balun ne’ebe maka to’o ohin loron sei moris iha terus no mukit nia laran.
“Tanba ne’e polisia sira ne’ebe maka servisu iha komunidade liu-liu OPS sira, sira hanesan ponte ida ne’ebe lori maluk sira ba iha fatin ida ne’ebe naroman, atu lori diresaun sira ne’ebe bele fó tulun ba maluk sira ne’ebe presiza tebes ita nia tulun, tanba ne’e husu ba maluk sira atu koopera hamutuk ho polísia sira ne’ebe hamutuk ho imi hodi hala’o servisu ho didiak hodi dezenvolve rai ida ne’e ba oin”, hatutan Reprezentante Komandante Jerál PNTL ne’e.
Iha fatin hanesan reprezentante Administrador postu administrativu Maubara sente haksolok tanba bele hola parte iha aktividade ne’ebe importante, halo komunikasaun entre autoridade hotu tantu sivil no militar liga ba ita nia komunidade sira.
“Agradese ba PNTL munisipiu Liquiça ba inisiativa ida ne’ebe kapas tebes hodi lori ita hamutuk mai rona no aprezenta servisu ne’ebe maka ita halo hela, nia mekanizmu, prosesu sira hodi halo atendimentu diak ba ita nia komunidade aumezmu tempu rona mós preukupasaun husi komunidade sira, hodi ita bele buka solusaun ba problema sira ne’ebe maka ita nia komunidade hasoru”, tenik reprezentante Administrador ne’e.
Nia hatutan tan katak sente haksolok liu tan wainhira hare’e aktividade ida Polisiamentu Komunitaria, iha ne’ebe halo proximisaun ba komunidade, halo ita sente besik liu hodi mai atu ajuda ita buka solusaun ba problema ka defikuldade sira ne’ebe ita hasoru.
Iha loron ne’e, Komandante Komandu PNTL munisipiu Liquiça hamutuk Superintendente Umbelina Soares ho estrutura Komandu PNTL munisipiu Liquiça, ekipa Administrador munisipiu, ekipa Servisu Protesaun Sivil, Xefe Suku hala’o mós Sensibilizasaun kona-ba Prevensaun Konflitu, Seguransa Rodoviaria, Protesaun Sivil ba komunidade sira iha suku Guicu. Hala’o mós jogus komunitariu, divertimentu no hala’o enkontru komunitariu ho populasaun sira. Aktividade hanesan, molok ne’e hala’o ona iha loron 18-19 fulan Agostu tinan 2022 iha postu Administrativu Bazartete.
Hola parte iha aktividade ne’e Komandante Komandu Operasaun PNTL, estrutura Komandu PNTL munisipiu Liquiça, autoridade lokal, veteranus, estudante no komunidade sira husi suku Guicu.
Media PNTL.
