Dili, Komandu Polísia Nasional Timor-Leste (PNTL) kinta-feira (05/09) ne’e hala’o enkontru semanal ho Presidente Repúblika (PR) hodi informa situasaun seguransa hafoin Komemorasaun tinan 20 Konsulta Popular iha loron 30 fulan Agostu tinan ne’e.
Komisariu Polísia Faustino da Costa ne’ebe akompaña husi Segundu Komandante Jerál PNTL Komisariu Polísia Mateus Fernandes hafoin enkontru ho PR ba media hateten PNTL mai atu aprezenta situasaun no aktividade durante fulan ida nia laran no aumezmu tempu aktualiza aktividade operasionais loron konsulta popular ninian ne’ebe maka lao no ita bele dehan katak finaliza aktividade ou eventu bo’ot hirak ne’e maka iha loron 4 orseik maka Marsa da Paz ne’ebe hala’o husi resintu Hotel Timor to’o iha Centro Convenções Dili (CCD).
“Informa ba PR katak situasaun seguransa iha nivel territori Nasional lao ho hakmatek, iha asidente no insidente balun ne’ebe mosu durante fulan Agostu nia laran maka asidente deit ita iha 137 akontesimentu ne’ebe rezulta ema na’in lima mak mate, ema na’in 31 maka kanek todan no ema na’in 155 kanek kma’an”, tenik Komandante Jerál PNTL ne’e.
Autoridade másimu Instituisaun seguransa ne’e afirma tan katak maibé ho atuasaun no mós aktividade ne’ebe PNTL halo, ita atende kazu sira ne’e no ita prega mós multa ou koimas ba infrasaun sira no infrasaun sira ne’e hamutuk ho nia númeru ne’ebe bo’ot tebes maioria infrasaun sira ne’e maka negligência ema nian maka hanesan konduz laiha karta kondusaun, la lori dokumentus transporte viatura ninian hanesan mós ekipamentus seguransa (kapasete), entaun ita prega multa sira hamutuk $19.000,00 kada fulan ita sempre hatama orsamentu ba kaixa jerál Estadu.
“Tanba ne’e ita nafatin sensibiliza informasaun sira ne’e liu husi programa balun ne’ebe ita sei halo fali iha tempu tuir mai katak Komandu hanoin ona atu oinsa maka bele koalai ho estudante sira, komunidade sira iha sede suku kona-ba artigu diak liu ita koalia kona-ba risku no efeitu, tanba ne’e maka programa balun ami atu hamosu maibé depois ami nia Porta Voz sei koalia ba ita bo’ot sira katak programa ida ita hanaran ‘Kultura Hadomi Vida’ katak programa ne’e tenta atu halo ba oin no sei lansa iha tempu tuir mai”, afirma Komisariu Polísia ne’e.
No nai Presidente Repúblika mós apresia ba servisu PNTL nian durante eventu bo’ot ida liu ba ne’e no PR husu atu PNTL transmiti ida ne’e ba membru tomak kona-ba susesu ne’ebe halo ba selebrasaun tinan 20 Konsulta Popular. Media PNTL.
