Komandu PNTL No JICA Hala’o Serimonia Asinatura ba Projetu Hasa’e Kapasidade Iha Seguransa No Protesaun Marítima Nian

Dili, 09/07/2025- Komandu Polísia Nasional Timor-Leste (PNTL) liu husi Komandante Jerál Komisariu Jerál Polísia Henrique da Costa asina Akta kona-ba Diskuasaun ba projetu hasa’e Kapasidade iha Seguransa no Protesaun Marítima nian ho Xefe Reprezentante Japan International Cooperation Agency (JICA) iha Timor-Leste Sr.Daisuke Fukumori.

Objetivu husi Projetu ida ne’e hanesan Estabelesimentu no hasa’e kapasidade institusional sira husi Unidade Polísia Marítima (UPM) PNTL nian ba seguransa no protesaun maritime. JICA hein atu fornese Ró Inflável ho Kasko Ríjidu (RHIBs) no ekipamentu relevante, inklui motór sira, reboke ró nian no kareta atu tula ró sira. No mós JICA sei haruka péritu tékniku sira atu hala’o formasaun ba operasaun no manutensaun RHIB sira.

Komandante Jerál PNTL Komisariu Jerál Polísia Henrique da Costa hafoin asina akta diskusaun ne’e ba jornalista sira hateten molok tama ba asinatura ida ne’e, iha rua tinan kotuk wainhira ita halo enkontru ida ho Embaixador Japaun nian iha Timor-Leste, ita hato’o ita nia difikuldade sira liu-liu ba UPM, oinsa sira bele iha ró ruma atu nune’e sira bele hala’o servisu.

“Ita hatene difikuldade ne’ebe ita iha maka Ró atu ita nia UPM uza hodi hala’o servisu no iha tempu ne’eba Embaixador Japaun hateten katak sira sei buka meius atu nune’e bele apoiu ba ita nia UPM, hafoin ida ne’e halo diskusaun ho parte JICA ninian, sira deside katak sira pronto atu apoiu Ró ho ekipamentus balun ba UPM, molok sira entrega sasan hirak ne’e no ohin ita asina akta deklarasaun nian, iha tinan kotuk sira halo peskiza hamutuk ho UPM no ekipa tékniku husi JICA ninian ba identifika fatin sira ne’ebe maka merese ka diak atu nune’e karik Ró ne’e mai sira bele koloka ba”, tenik Komandante Jerál PNTL ne’e.

Komisariu Jerál Polísia ne’e afirma tan katak hafoin halo peskiza, ekipa JICA hamutuk ho UPM identifika katak iha parte Kuartél UPM rasik no mós iha Beacou ne’eba, kondisaun ne’ebe maka iha ona ne’e, sira bele hadia tan hodi nune’e wainhira Ró ne’e mai bele atraka ba.

Iha fatin hanesan, Embaixador Japaun iha Timor-Leste Sr.Tetsuya Kimura iha ninia intervensaun ba serimonia ne’e hateten nia parte haksolok tanba hafoin halo koordenasaun extensive, Japaun sei fó apoiu vital ba Timor-Leste nia seguransa maritime. Pakote ida ne’e inklui laos deit Ró ha’at ho dezempeñu ass, maibé mós ferramenta manutensaun esensial sira no kolokasaun péritu Japonez sira. Abordajen abrante ida ne’e ho objetivu atu hadia efetivu kapasidade sira husi UPM.

“Ami fiar katak melloramentu seguransa marítma ne’e esensial ba nasaun ida nia prosperidade no estabilidade. Fronteira maritima sira ne’ebe seguru maka importante tebes atu proteje Soberania Nasional, salva-guarda rekursu tasi nian ne’ebe valiozu, kombate aktividade illegal sira hanesan pirataria no peska illegal, no garante seguransa transporte no komersiu maritimu nian”, haktuir Embaixador Japaun ne’e.

Sr.Tetsuya Kimura iha konfiansa katak Ró ha’at ho dezempeñu ass no treinamentu ne’ebe akompaña sei utiliza ho efetivu hodi reforsa seguransa kosteria Timor-Leste nian. Mai ita kontinua servisu hamutuk hodi garante seguransa no protesaun ba Povu Timor-Leste, hametin liu tan ita nia parseiria.

Entretantu, reprezentante Ministru Interior aktual Sekretariu Estadu Protesaun Sivil Domingos Mariano Reis iha ninia intervensaun hateten ohin hau hamutuk ho Embaixador Japaun nian iha Timor-Leste asiste ba serimonia asinatura Protokolu ba Kooperasaun JICA ho PNTL entermu apoiu Ró ha’at ba ita nia UPM hodi asegura ita nia seguransa maritima, ita nia riku-soin no peska ilegais sira ne’ebe maka sempre ultrapasa iha Tasi Timor nian.

“Lori Nonu Governu Konstitusional, hau reprezenta Ministru Interior hakarak agradese ba gratidaun no komitmentu Governu Japaun espesial ba Povu Japaun ne’ebe apoiu Timor-Leste sem reserva, ida ne’e komitmentu bo’ot bilateral entre Timor-Leste ho Japaun”, tenik Sekretariu Estadu Protesaun Sivil ne’e.

Membru Governu ne’e salienta tan katak hein katak ho asinatura ida ohin bele asegura seguransa maritima ninian liu husi ita nia forsa Polísia Marítima ninian hodi bele asegura katak Peska Ilegais sira labele halo movimentu iha Tasi Timor nian no mós hodi asegura katak ita nia rikus-soin iha tasi nian, ema seluk sei labele halo tuir nia hakarak iha ita nia area Tasi ninian.

Hola parte mós iha serimonia ne’e, Segundu Komandante Jerál PNTL Komisariu Polísia Pedro Belo, reprezentante AFP, Asesor GNR, Inspetúr Jerál PNTL, Komandante Komandu Supervizaun, Diretúr no Xefe Gabinete sira Komandu PNTL nian, Ofisias Superior, Subalternu, Ajente no Media sira.

Media PNTL.