Liquiça, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa akompana husi Komandante Komandu Operasaun Superintendente Xefe Pedro Belo tersa-feira (06/10) ne’e hala’o enkontru Avaliasaun Servisu Seguransa Semanal ba iha liña fronteira hamutuk ho Komandante Komandu munisipiu Liquiça, Bobonaro, Covalima inklui Komandante Unidade Patrullamentu Fronteira (UPF), Unidade Polísia Maritima (UPM) no Unidade Espesial Polísia (UEP).
Komandante Komandu Operasaun Superintendente Xefe Pedro Belo iha intrevista hateten aktividade ne’e sempre halo kada semana iha parte liña fronteira nian, ba iha semana liu ba aktividade ne’e hala’o iha munisipiu Covalima no ba semana ne’e hala’o iha munisipiu Liquiça.
“Objetivu husi aktividade ne’e maka atu bele kontrola didiak seguransa iha liña fronteira, problema saida hanesan nafatin kontinuasaun mosu iha liña fronteira nian no ema sira ne’ebe tama liu husi dalan illegal kontinua hala’o aktividade, hare’e mós servisu ne’ebe maka membru sira hala’o ona iha semana liu ba kotuk; nune’e mós kontinuasaun orientasaun servisu ba iha semana oin nian ne’ebe maka simu direita husi Komandante Jerál hanesan orientasaun ne’ebe fó direita ba Komandante Komandu munisipiu tolu (Liquiça, Bobonaro no Covalima) inklui Unidade tolu (UPF, UPM no UEP)”, tenik Komandante Komandu Operasaun ne’e.
Superintendente Xefe ne’e haktuir tan katak iha orientasaun sira ne’e hotu hodi kontinuasaun ba prevensaun ba parte liña fronteira nian, iha mós orientasaun ida ne’ebe maka kontinuasaun servisu ba iha semana oin nian maka kontinua observa no tau matan nafatin ba iha movimentu politika ne’ebe maka oras ne’e dadaun lao hela iha ita nia rai, tanba hanesan ita hotu hatene Partidu Politiku sira hotu oras ne’e dadaun komesa ona lao ba baze hodi halo aktividade politika nian entaun presiza tebes parte PNTL nia observasaun no seguransa ba iha aktividade sira ne’e hotu atu labele hamosu fila fali problema sira ne’ebe maka atu akontese ba iha movimentu politiku sira ne’e.
“Mensajen ne’ebe maka Komandu PNTL hakarak hato’o maka husu nafatin ba komunidade sira hotu hodi koopera nafatin ho ita nia PNTL liu-liu iha liña fronteira nian hodi hare’e liu ba movimentu illegal sira ne’ebe maka lao, husu nafatin atu koopera ho ita nia UPF sira no mós ba iha Komandu PNTL munisipiu tolu (Liquiça, Bobonaro no Covalima) atu nune’e wainhira kuandu iha ema ruma ne’ebe maka ultrapasa/hakat liu ba iha liña fronteira nian, husu favor ida fo nafatin informasaun ba iha Polísia no koopera nafatin ho Polísia atu ita bele prevene diak liu tan seguransa iha liña fronteira nian”, apela Superintendente Xefe ne’e.
Eis Komandante Komandu PNTL munisipiu Dili ne’e apela mós ba Líder Politiku hotu ne’ebe oras ne’e dadaun prepara hela hodi halo movimentu politiku ba iha munisipiu sira liu-liu iha parte fronteira nian, husu nafatin komprensaun, mantein nafatin Unidade Nasional, labele provoka malu, kontinua hala’o aktividade ne’e ho diak no wainhira atu hala’o aktividade hirak ne’e ba iha munisipiu tolu (Liquiça, Bobonaro no Covalima) husu atu koopera ho Komandu munisipiu hirak ne’e hodi bele garante seguransa ba aktividade politiku sira ne’e hotu.
Media PNTL.
