Dili, Komandu Polísia Nasional Timor-Leste (PNTL) liu husi Komandante Jerál Komisariu Jerál Polísia Henrique da Costa tersa-feira (02/08) ne’e hala’o enkontru ho Prezidente Repúblika Dr. José Ramos Horta hodi relata situasaun seguransa iha teritoriu nasional.
Hafoin enkontru Komandante Jerál PNTL ne’e ba jornalista sira hateten além de relata situasaun seguransa, hato’o mós ba Xefe Estadu kona-ba progresu servisu Polísia ninian.
“Prezidente Repúblika husu ba PNTL atu reforsa seguransa iha liña fronteira no kontinua hala’o nia kna’ar ho diak hodi hatudu profesionalizmu Polísia ninian, mezmu PNTL hasoru difikuldade lubuk ida maka hanesan rekursu umanu, transporte, komunikasaun maibé PNTL nafatin hala’o nia kna’ar ho rekursu ne’ebe maka ita iha”, hateten Komandante Jerál PNTL ne’e.
Komisariu Jerál Polísia ne’e salienta tan katak ita hotu akompaña katak situasaun seguransa lao normal, ita nia Polísia tantu iha munisipiu no mós iha Unidade sira hala’o servisu ho maka’as, espesialmente iha Dili laran ita hatene dala-ruma engrafamentu maka’as maibé ita husu ba Polísia parte Tránzitu no parte Patrulla sira atu nune’e iha fatin balun sira nia prezensa antes atu bele prevene mosu engrafamentu.
“Ohin ita mós informa ba Xefe Estadu katak ita nia fasilidade membru sira nian iha fronteira enfrenta maka hanesan menus transporte no mós rekursu umanu hanesan ema ne’ebe maka koloka iha ne’eba, ita nia ema limita, distansia postu ne’ebe maka dok dala-ruma ema sira ne’ebe halo aktividade kontra bandu ne’e tama sai, dala-ruma sira liu husi fatin ne’ebe ita nia Polísia la kobre no dala-ruma tama mai to’o iha klaran, ita nia patrulla sira seluk konsege detekta”, hatutan Komisariu Jerál Polísia ne’e.
Autoridade másimu instituisaun Seguransa ne’e afirma tan katak ho meius ne’ebe ita iha ne’e no limitasaun ne’ebe maka iha, ita esforsu atu nune’e fó nafatin nia kualidade atendimentu ne’ebe maka diak. Tanba ne’e, Xefe Estadu husu ba PNTL atu nafatin servisu ho professional, mezmu ho limitasaun ne’ebe maka iha maibé Polísia labele lakon nia vontade servisu ho limitasaun ne’ebe maka iha, hatudu nafatin katak Polísia prontu atu nune’e asegura duni ita nia rai. Media PNTL.
