Dili-Komandu Polísia Nasional Timor-Leste (PNTL) liu husi Komandante Jerál no Segundu Komandante Jerál iha kinta-feira (21/05) ne’e hala’o enkontru semanal ho Prezidente Repúblika (PR) Dr.Francisco Guterres Lu-Olo hodi relata situasaun seguransa iha teritoriu nasional.
Komisáriu Faustino da Costa, akompaña husi Segundu Komandante Jeral Komisariu Mateus Fernandes, relata situasaun seguransa ba Prezidente Repúblika Francisco Guterres Lú Olo, katak situasaun iha teritoriu la’o hakmatek, maske tensaun polítika uitoan maibé la fó impaktu ba estabilidade iha rai laran.
Komandu Polisia Nasional Timor Leste Agradese no louva mos ba maturidade povu Timor Leste nia durante iha Estadu Emerjensia no situasaun politika iha rai laran, tanba kontribui tebes ba prosesu estabilidade nasaun nia.
“Ha’u Relata ba Prezidente Republika katak, situasaun jeral teritoriu nasional la’o diak, kalma no hakmatek. Maske sei iha tensaun politika ne’ebe ema hotu akompaña maibe ida ne’e mos aproveita atu agradese no apresia ita nia povu nafatin hakmatek”, dehan Komandante Jeral PNTL Komisariu Polisia Faustino da Costa hafoin hala’o enkontru ho Prezidente Republika Francisco Guterres “Lu Olo” iha Palasiu Prezidente Nicolau Lobato.
Tamba ne’e Komandu PNTL nafatin apela ba povu iha situasaun politika rai laran atu hakmatek nafatin hodi fo tenpu ba ulun bot sira atu buka solusaun.
Durante enkontru Prezidente Republika hato’o mos ninia apresiasaun ba Polisia Nasional Timor Leste liuliu durante periodu Estadu Emerjensia dahuluk no daruak nian. Media PNTL
