Dili- Polisia Nasional Timor-Leste kaptura ona suspetu ba kazu komfrontasaun iha Aimutin iha loron (23/09) ne’ebe rejulta vitima Ivon da Silva mate fatin no seluk kanek todan hodi lori ba prosesu tuir lei ne’ebe maka vigora.
Komandante komandu Operasaun Superintendente Xefe Pedro Belo hateten Suspetu nain rua maka kaptura ho flagrante delitu no sira seluk sei buka tuir tanba ita sei identifikatan ema lubuk ida no prosesu tomak ita entrega ba parte investigasaun para halo prosesu no hau fiar katak sei diskobre ema lubuk ida, nia hato’o asuntu ne’e ba Jornalista sira hafoin partisipa seminariu nasional iha Salaun Suai Room Timor-Plaza Dili Tersa (24/09).
Komandante ne’e haktuirtan akontesmentu horseik (Segunda ) antes ne’e iha inagurasaun gruta iha Aituri Laran Taibesi no kalan ne’e tomak buat hotu lao diak seguransa diak teb-tebes tanba iha apoiu husi membru KPK no OPS sira no patrula husi Unidade Espesial Polisia maibe depois dadersan sira atu desloka ba ida-idak nia munisipiu Polisia sira akompaña komboiu maibe to’o iha Unidade Espesial nia oin iha grupu balu ne’ebe iha kareta laran sira tolok membru Unidade Espesial sira depois sira hakat liu iha kareta ida husi komboiu laran ne’e halai ses no tama fali iha fatin seluk iha ema balu hakilar no tolok entaun hamosu komfrontasaun hodi tuda malu no rezulta vitima ida mate no ida kanek.
Polisia husi Dom Aleixo, Forsa Rezerva no Unidade especial responde kedas imediata hodi kaptura suspetu nain rua hodi detein iha sela Polisia no mos vitima matebian parte investigasaun lori kedas ba mortuariu hodi submete ba prosesu autopsia hafoin hodi matebian ba munisipiu Ainaro.
Iha momentu ne’e akontesementu ne’ebe lalais no kaundu Polisia ne’ebe iha oin labele responde entaun iha ekipa seluk maka responde maibe iha ona vitima tanba ne’e prosesu tomak ita entrega ba parte investigasaun no parte justisa atu hare prosesu ne’e.
Atu termina porta voz PNTL ne’e hateten Polisia no ema hotu la tolera aktus krime ida ne’e tanba ema hotu hakarak unidade no moris hakmatek lao livre oras 24 nia laran no laiha inpedimentu ema ruma atu trava sira, aktu ne’ebe maka akontese povu tomak hakribi ba ida ne’e.
Iha okajiaun ne’e Ministru Defeza no Interior Interinu Filomeno Paixão hateten insidente iha Aimutin ne’ebe akontese iha Segunda (23/09) rejulta vitima nain ida (1) mate fatin no nain rua kanek todan Polisia atua imediatamente, ema la espera atu mosu insidente ne’e tanba ema ba misa inagurasaun gruta hotu-hotu ba taka liman reza no hakruk afinal sai mai oho fali malu.
“Hau la espera mosu insidente ne’e hau hatene katak buat ne’e hotu no ema fila ona, hau rona dehan Kolimau 2000 no arte rituais balutan buat ne’e hotu ona atu fila maibe provoka malu no balu tun fali ba fatin faan obralan iha Aimutin derepente provoka malu no sai fali problema no momentu ne’eba Polisia atua no halo ona prosesu hodi entrerga ba Ministeriu publiku no kontinua ba tribunal,” dehan Ministru.
PNTL sei buka tuir no kaer hotu suspetu hirak ne’ebe maka involve iha insidente ne’e nia konklui. Media PNTL
