Dili– Komandante Jeral (KOMJER) Polisia Nasional Timor Leste (PNTL), Komisariu Julio da Costa Hornay orienta bus sira ne’ebe mak tula pasajeiru kompletu ona na’in 24 sai ona, labele hein tan iha terminal nune’e ema labele sa’e tan.
Nia dehan, nakonu ona labele hein, sai ona nune’e ema labele sa’e tan, tamba tuir estandarte ema na’in 24 deit mak iha kareta ida. Labele liu ida ne’e.
“Imi hatene asidente iha Fatuahi hatudu mai ita. Imi nia kareta kuandu nakonu ona sai labele iha nafatin terminal bolu nafatin Maliana ne’e ema kontinua sa’e,” dehan Julio ba Kondutor bus sira iha Tasi-Tolu, Kuarta (23/12).
Komandante Fitun ida ne’e hatutan, kondutor sira labele hanoin deit ba osan mak boot liu maibe hanoin ba ema nia vida mak importante liu buat hotu, bainhira sai husi Dili ba Maliana, deskansa labele fila kedas ne’e orsida dukur bele hamosu asidente.
“Ita boot sira labele duni deit mak osan maibe hanoin ema ne’ebe mak ita boot sira tula ne’e nia vida mak importante liu. Labele hanoin atu riku lalais osan ne’e sei mai,” dehan Julio hodi fo hanoin ba kondutor bus Maliana nian.
Nia dehan, bainhira hetan bus ruma mak tula ema nakonu polisia ne’ebe mak kolokadu ona sei hatun mesmu iha ai laran, atu nune’e evita asidente trafiku.
Tuir observasaun diáriu ne’e nian katak iha terminal tolu Becora, Hali-laran no Tasi-Tolu polisia tránzitu koloka ona iha ne’eba hodi haree no kontrola bus ne’ebe mak tula pasajeiru liu fali kareta nia forsa. (Fonte: Timor Post Edisaun 28 Dezembru 2015).
