Dili, relasiona ho ativasaun liña asistente 112 husi Polísia Nasional Timor-Leste (PNTL) kompañia Telekomuniasaun Telemor entrega telefone fixu ba Komandu PNTL.
Komandante Operasaun PNTL Superintendente Henrique da Costa hafoin simu telefone fixu hirak ne’e hateten apoio ne’ebe maka kompañia Telemor oferese mai PNTL atu bele estabelese liña 112 ba iha kada munisipiu hodi atende komunidade sira ne’ebe maka presija apoio PNTL nian.
“Agora dadaun iha munisipiu 13 liña 112 ativa hikas ona, ba komunidade sira ne’ebe maka uja sim card Telemor, entaun ida ne’e provaide Telemor nian maka sei atende, nune’e mós ba kompañia telekomunikasaun rua seluk hanesan Timor Telecom ho Telkomel”, hateten Komandante Operasaun PNTL.
Superintendente Henrique da Costa subliña liu tan katak, agora dadaun sei uja hela provaide husi kada kompañia operador telekomunikasaun hodi bele halo atendimentu husi komunidade no husi telefone fixu ne’e liña 112 iha munisipiu 13 sei atende rasik husi komandu kada komandu munisipiu nian.
“Ida ne’e sei lao lai ho kada provide tanba kestaun seguransa ba eleisaun parlamentar nian, maibé hafoin ida ne’e maka ita sei hare’e atu oinsa provide tolu ne’e bele sai ida deit”, tenik Superintendente Henrique da Costa.
Media PNTL.
